SJ WorldNews - шаблон joomla Авто

စေတနာတိကျခြင်းနှင့် ဝန်ဆောင်မှုလုပ်ငန်း

Tuesday, 10 October 2017 11:33 Written by  font size decrease font size decrease font size increase font size increase font size

မျက်မှောက်ခေတ်တွင် ဝန်ဆောင်မှုလုပ်ငန်း ထွေပြားစွာ အမျိုးမျိုး တွင်ကျယ်သည်ဟု ဆိုချင်၏။  နယ်ပယ်စုံဖြစ်လေသည်။

စီးပွားရေး၊ လူမှုရေး၊ သာရေး၊ နာရေး၊ ဘာသာသာသနာ၊ ပရဟိတလူမှုဝန်းကျင် သဘာဝပတ်ဝန်းကျင် စသည်ဖြင့် စုံလင်ပေသည်။ အခမဲ့စေတနာ သန့်သန့်ဖြင့် ဖော်ဆောင်ကြသကဲ့သို့ ငွေကြေးကဏ္ဍစီးပွားရေး လုပ်ငန်းအသွင်ဝန်ဆောင်မှုလုပ်ငန်းတွေလည်း များပြားပေ၏။ မည်သို့ပင်ဖြစ်စေ စေတနာနှင့် တိကျမှုတို့ လိုအပ်၏။ အချိန်၏တိကျခြင်းလည်း အကျုံးဝင်ပေသည်။ မြန်မာမှုတွင် အကြံကောင်းသော်လည်း နှောင်းလျှင်အကျိုးမရှိဟု ဆိုထားပေသည်။ သတိချပ်သင့်သည်ဟု ထင်၏။ ခေတ်စကားနှင့် ဆိုရပါကအချိန်နှင့်တစ်ပြေးညီ ဆောင်ရွက်ခြင်းက ကြီးမားသည့်ရလဒ်ကောင်း ဖော်ဆောင်နိုင်မည်ဟု ယူဆသည်။ မူလရည်ရွယ်ချက်၊ ဦးတည်ချက်များကို မြှင့်တင်ကြိုးပမ်းရာတွင် အကောင်အထည် ဖော်သည့် လက်တွေ့အားထုတ်မှုတိုင်း စေတနာပါမှု၊ အချိန်ကိုလေးစား တန်ဖိုးထားမှု၊ တိကျမှုတို့ကို အလေးထားဖို့ဖြစ်၏။ ယင်းသို့မကျင့်သုံးနိုင်ပါက မအောင်မမြင်ဖြစ်တတ်ပေသည်။

နေ့စဉ်နှင့်အမျှ ထုတ်လွှင့်သော အသံလွှင့်မီဒီယာတစ်ခုက ပြည်သူအကျိုးပြု အစီအစဉ်များနှင့် တိကျမှန်ကန်သော အချက်အလက်များကို အချိန်နှင့်တစ်ပြေးညီ ထုတ်လွှင့်ပေးလျက် ရှိကြောင်း ဖော်ပြလေ့ရှိပေသည်။ မှန်ပါ၏။ စေတနာပါဝင်မှု၊ တိကျမှုတို့ အကျုံးဝင်၏။ အများပြည်သူကို  သိသင့်သိထိုက်သည့် သတင်းအချက်အလက်များကို အချိန်နှင့် အခါနှင့်မပြော နှောင့်နှေးမှုကြောင့် အထိနာခဲ့ရသည့် သာဓကတွေရှိပေသည်။ မုန်တိုင်းထန်မှု၊ မြစ်ရေကြီးမှု၊ ငလျင်ဒဏ်ကျရောက်မှု စသည့် သဘာဝဘေးနှင့်ဆိုင်သော   အချက်အလက်များ အကျုံးဝင်သကဲ့သို့  လူတို့၏ အားထုတ်မှုကြောင့် တွေ့ရှိဖြစ်ပေါ်နိုင်သည့် သတင်းများလည်း ပါဝင်၏။ ရှောင်နိုင်၊ ဆောင်နိုင်ခြင်းက  အကျိုးမဲ့ဖြစ်ပွားစေမှုကို ထိန်းကျောင်းပေးသည်။   သတင်းဝန်ဆောင်မှု ကောင်းခြင်းကြောင့်   အချိန်နှင့်တစ်ပြေးညီ အဆုံးအဖြတ်ကောင်း ရရှိမည်မှာ သေချာပါ၏။

သတင်းဝန်ဆောင်မှုသည် နိုင်ငံသားတို့အတွက် အတော်ပင်အရေးကြီး၏။ အားကောင်းဖို့လို၏။   ကျွန်တော်တို့သတင်း အတတ်ပညာ လေ့လာဆည်းယူခဲ့ဖူး၏။ ရှေးထုံးအစဉ်အလာ အတွေ့အကြုံများအရ ပဓာန ကျသော အချက်သုံးချက်ကို ညွှန်ပြထားပြီး ဖြစ်လေသည်။ ယင်းသွန်သင်မှုကို ယခုတိုင် စွဲမှတ်ထားပြီးဖြစ်၏။ ထို့ကြောင့် ထူးခြားသော သတင်းဝန်ဆောင်မှုကို ကြားသိခြင်း တွေ့ရတိုင်း  ယင်းစံနှုန်းဖြင့် တိုင်းတာတတ်ပါ၏။

သတင်းမီဒီယာလောကတွင်     ဦးစွာအရေးကြီးသော အချက်မှာ    သတင်းရယူ ဖြန့်ချိခြင်းနှင့် လျင်မြန်မှုဖြစ်သည်။ သတင်းဖြစ်ပွားမှုကို အမြန်ဆုံးရယူ တင်ပြနိုင်ဖို့လို၏။ သို့သော်တိကျမှု Accuracy ကိုပဓာနပြုရပါ၏။ သတင်းအချက်အလက် မြန်ဆန်သော်လည်း ခိုင်မာတိကျခြင်း မရှိပါက အကျိုးမဲ့ဖြစ်နိုင်၏။ ထပ်မံသတိပြုရမည့် အချက်ရှိ၏။ မျှတမှု Fairness ဖြစ်လေသည်။ မြန်ဆန်တိကျသော်လည်း တစ်ဖက်သား နစ်နာဆုံးရှုံးမှုရှိ၊ မရှိသတိထားသင့်ပေသည်။ သတင်းဖြစ်လျှင်ပြီးရော သတင်းဦး၊ သတင်းထူးကို ရှေ့တန်းတင်သဖြင့် တိကျမှုအားနည်းမျှတမှု ကင်းပါက ချင့်တွက်စရာရှိလာ၏ အငြင်းပွားစရာ တွေ့နိုင်၏။ ထို့ကြောင့် နေ့စဉ်ဆောင်ရွက်ရမည့် ဝန်ဆောင်မှုလုပ်ငန်းသည် စေတနာအား ထည့်သင့်သည်မှာ ထင်ရှားသည်။

ယခုအခါ နိုင်ငံတော်က ပြည်သူ့ဝန်ဆောင်မှု လုပ်ငန်းအလေးထား ဆောင်ရွက်သည်ကို တွေ့ရသည်။နိုင်ငံတော်နှင့် ပူးပေါင်းဆောင်ရွက်ခြင်း ဆွေးနွေးပွဲများ၊ စီမံကိန်း၊ စီမံချက်များကို ချမှတ်သည်။ သင်တန်း များပေးခြင်း၊ ဝန်ဆောင်မှုကောင်းအတွက် အဂတိတရား ကင်းရှင်းမှုကိုရှေးရှုခြင်း စသည့် လက်တွေ့တာဝန်များ ပါဝင်၏။ အတိတ်က သင်ခန်းစာ ယူခြင်းလည်း ပါဝင်သည်။ မကြာမီ အကောင်အထည် ဖော်ဆောင်မည့် ပြည်သူ့ဝန်ဆောင်မှု ကောင်းလုပ်ငန်းအတွက် အားတက်ရပါ၏။

အမှန်အတိုင်း ဝန်ခံရပါက မြန်မာတို့သည် ရုံးပြင်ကနားကို သွားရမှာ၊ ဆက်ဆံရမှာကို အတော်ပင်ကြောက်ရွံ့ကြ၏။ အကြောင်းလည်းရှိ၏။ ဝန်ဆောင်မှုကောင်းနှင့် မထိတွေ့နိုင်သောကြောင့်ဖြစ်၏။ ဆက်ဆံရေးမပြေပြစ်မှု၊ တိကျခြင်းအားနည်းမှု၊ အပေးအယူ၊အဂတိတရား ကိစ္စများကြောင့်ဖြစ်၏။ မိမိဘက်က စာရွက်စာတမ်း ပြည့်စုံသော်လည်း ရိုးရိုးသားသားတင်ပြမှုကြောင့် အချိန်ဆွဲကြသည်။ အကြိမ်ကြိမ် သွားရသည်။ လာဘ်ပေးလာဘ်ယူအဆင်ပြေသည့် အခါကျမှ အချိန်နှင့်တစ်ပြေးညီဖြစ်တော့၏။ ထိုအခါ  ရုံးဌာနနှင့် မဆက်ဆံ၍မဖြစ်မှ   စွန့်စားသွားကြရတော့သည်။အများပြည်သူနှင့် ဆက်ဆံရသည့် ဌာနများသည်  ဝန်ဆောင်မှုကောင်းဖြစ်ဖို့၊ လေ့ကျင့်ဖို့လိုအပ်ဆဲဖြစ်၏။ စေတနာကောင်းလျှင် တုံ့ပြန်မှုကောင်းမည်မှာ အသေချာဖြစ်၏။

ရိုးသားခြင်း၊ ပြေပြစ်ခြင်း၊ တိကျခြင်းအတွက် တစ်ဖက်ကလည်း လက်နှေးမည်မဟုတ်ပါ။ မျှော်လင့်ချက်အတွက် မလွှဲမကင်းသာ ဆောင်ရွက်တတ်သူအဖို့ နာမည်ဆိုးဖြင့် ကျော်ကြားမည်။ နှစ်အတန်ကြာက ဖြစ်သည်။ နိုင်ငံရပ်ခြားတွင် အလုပ်လုပ်သော လူငယ်တစ်ဦးသည် ဝင်ငွေခွန်ဆောင်ရန် သံရုံးသို့ အခက်အခဲကြားက အချိန်ယူသွား၏။သံရုံးက အလုပ်ပိုလုပ်ရသည်ဟု ထင်ကာ အကြိမ်ကြိမ် ချိန်းဆို၏။ သို့ဖြင့် နှစ်ဖက်လုပ်ငန်း မအောင်မမြင်ဖြစ်ရ၏။ တစ်ချိန်ကပြောလေ့ရှိသော ချောဆီ၊     ချူဆီထည့်ခြင်း အလုပ်သည် ခေတ်သစ်၌ အံမဝင်တော့သည့် ဝန်ဆောင်မှု အသွင်ဖြစ်ကြောင်း    သတိထားသင့်ပေသည်။

နှစ်အတန်ကြာက ဖွဲ့စည်းဆောင်ရွက်ခဲ့သော ပုဂ္ဂလိကဘဏ်တစ်ခု၏ ဆောင်ပုဒ်ကို တွေ့ရှိဖူး၏။ တစ်ခါဆက်ဆံ ရာသက်ပန် ဟူ၍ဖြစ်၏။ ပြောသည့်အတိုင်း ဝန်ဆောင်မှု ကောင်းပေးနိုင်သဖြင့် အောင်မြင်လျက်ရှိ၏။ မြန်မာတို့ပြောလေ့ရှိသော တစ်ခါဆက်ဆံဆယ်ခါလန် ဟူသောစကား မြေလှန်ပစ်လိုက်ခြင်းဖြစ်၏။ ဆိုရိုးစကားတစ်ခုဖြစ်သော အပြောကောင်းလျှင် အထောင်းသက်သာခြင်းသည် ဝန်ဆောင်မှုကောင်း အငယ်စား ဟုပင် ဆိုချင်ပေသေးသည်။

Customer is always right  ဝယ်သူဘက်က အမြဲမှန်သည်ဆိုသော စီးပွားရေး လောကမှ စကားရပ်သည် အတော်ပင်ခရီးပေါက်၏။ ဝယ်သူစိတ်ကြိုက် ဆောင်ကြဉ်းခြင်းဖြင့် မိမိလိုရာဖြည့်ဆည်းနိုင်၏။ ပုဂ္ဂလိကများ အတော်ပင်စွဲကိုင်ကြ၏။  အောင်မြင်မှုလည်း ရ၏။ ဆံသလုပ်ငန်းလို လုပ်ငန်း၌ပင် စေတနာနှင့် တိကျမှုလို၏။ မကျင့်သုံးလျှင် ဖောက်သည်ပျက်ပေမည်။

စာရေးသူချိတ်ဆက် ဆောင်ရွက်ရသော  ကွန်ပျူတာစာစီစာရိုက် လုပ်ငန်းတစ်ခုရှိ၏။ စာမူများစွာ အပ်နှံဖူး၏။ မည်သည့်အခါမျှ အချိန်အတိအကျ မရဘူးပါ။  သို့သော် စေတနာပါခြင်း၊   ကျွမ်းကျင်ခြင်း၊ သည်းခံခြင်းကြောင့်    မိတ်ဝတ်မပျက် ဆက်ဆံရဆဲ ဖြစ်၏။ အချိန်ကိုက်ဆောင်ကြဉ်းပါက ယခုထက် အောင်မြင်ဖွယ်ရှိပါမည်။ အခြေခံအားဖြင့် လက်ဖက်ရည်ဆိုင် စားပွဲထိုးကလေးများ၏ ဝန်ဆောင်မှုကိုပင်ကြည့်ပါ။ ခေါ်မရပြောမရ၊  မှာသည်ကတခြား၊ လက်တွေ့ရောက်လာသည်က တခြားဖြစ်တတ်၏။ ဂရုမပြုတတ်ခြင်းဖြစ်၏။ တစ်ခါတွင် ပြန်အမ်းငွေကို လက်နောက်ပြန် ပေးခဲ့သဖြင့်  စိတ်ပျက်ရ၏။ ဝန်ဆောင်မှုနယ်ပယ်ကို   နားမလည်ခြင်း၊ တန်ဖိုးမထားခြင်းဖြစ်၏။

သတိကြီးစွာ ထားသင့်သော ကျန်းမာရေးဝန်ဆောင်မှု အခြေအနေကို တင်ပြချင်၏။  ထိခိုက်ဒဏ်ရာရမှု၊ အရေးပေါ်ရောဂါကြီးထွားမှုအတွက် ပို့ဆောင်မှု၊ ကုသမှု၊ ထိန်းချုပ်မှု တို့ကို စေတနာကောင်း၊ အချိန်နှင့် တစ်ပြေးညီ မဆောင်ရွက်ပါက ရှင်သန်ခွင့်မလွယ်ပါ။ ထို့အတူ အရေးပေါ် လုပ်ငန်းများသည် ဝန်ဆောင်မှုကောင်း ရရှိဖို့လိုအပ်သည်။

စာရေးသူတို့ကျင်လည်ဖူးသော ပုံနှိပ်ထုတ်ဝေရေး လုပ်ငန်းများတွင် စာစီစာရိုက်အပြင် ဒီဇိုင်းစာအုပ်ချုပ် ဖြန့်ချိမှုတို့ကို သေသပ်စွာ ဆောင်ရွက်ပါက အောင်မြင်၏။ ကြီးပွားသော စာပေတိုက်ကြီးများသည် စနစ်ကျသော စီမံခန့်ခွဲမှု၊ ဝန်ဆောင်မှု ပေးခြင်းတို့ကြောင့် ဖြစ်ပေသည်။ အချိန်ကိုက်လုပ်ရသော နာရေး ဖိတ်စာကိုပင် စေတနာတိကျစွာ ဖြည့်ဆည်းမပေးနိုင်ပါက ကျဆုံးဖို့သာရှိ၏။

ယခုခေတ်တွင် မီးခိုးမထွက်သော စက်ရုံဟု တင်စားကြသည်။ ခရီးသွားလုပ်ငန်း၊ ဟိုတယ်လုပ်ငန်းများသည် ဝန်ဆောင်မှုကို အားကောင်းအောင်   လေ့ကျင့်ပေးကြ၊ ဆောင်ရွက်ကြသည်။ ရေရှည်တည်တံ့စေဖို့ဖြစ်၏။ တစ်ခါက ကျွန်တော်တို့ လေ့ကျင့်ပေးခဲ့သည့် စာကြည့်တိုက်မှူး တစ်ဦးသည် အထက်တာဝန်ရှိသူ တစ်ဦး  အလျင်အမြန် လိုအပ်သော စာအုပ်နှင့်အချက်အလက်ကို ကျွမ်းကျင်စွာ ရှာဖွေပေးခဲ့၏။ သူမက အချိန်တိုအတွင်း ဝန်ဆောင်မှုပေးနိုင်သည်ကို ဝမ်းသာအားရ ပြောပြပေရာ ကျေနပ်ခြင်း၊ ကြည်နူးခြင်း ဖြစ်ရ၏။

အထူးသဖြင့် ယခုကာလတွင် ပြည်သူ့ဝန်ဆောင်မှု လုပ်ငန်းကိုအားပြုလျက် အဓိကထား ဆောင်ရွက်ရန် ကြိုးပမ်းချိန်တွင် နေရာစုံ၊ ဌာနစုံလွှမ်းခြုံ ချိတ်ဆက်မိစေချင်ပါ၏။ သမားရိုးကျ လုပ်ငန်းထက် စေတနာ ကျွမ်းကျင်မှု၊ တိကျမှုနှင့် အချိန်နှင့်တစ်ပြေးညီ ပေါင်းစည်းကျင့်သုံးနိုင်မှုသာ ဖြစ်ကြပါ၏။    

ညွန့်ဟန်(ကြူတော)

Read 483 times
Rate this item
(0 votes)
Last modified on Tuesday, 10 October 2017 11:35

Latest from ကေတု