SJ WorldNews - шаблон joomla Авто

မြေပဲတောင့် သန့်စင်လုပ်ငန်းမှ မိသားစု ပုံမှန်ဝင်ငွေ ရရှိနေ

Thursday, 14 November 2019 09:40 font size decrease font size decrease font size increase font size increase font size

မန္တလေးတိုင်းဒေသကြီး ပြင်ဦးလွင်မြို့နယ် မင်းတည်းကုန်း၌  မြေပဲသန့်စင်သည့် လုပ်ငန်းကို  တစ်နှစ်ပတ်လုံး လုပ်ကိုင်လျက်ရှိရာ မိသားစုပုံမှန် ၀င်ငွေရရှိလျက်ရှိခြင်းကြောင့် စားဝတ်နေရေး အဆင်ပြေနေကြောင်း သိရသည်။

လက်ရှိတွင် ရှမ်းပြည်နယ်မှ တင်ပို့သော အရည်အသွေးမြင့် မြေပဲများကို မြေပဲပွဲရုံမှ ၀ယ်ယူ၍  ရေဆေးခြင်း၊ သန့်စင်ခြင်းများ ပြုလုပ်ကာ တရုတ်ပြည်သို့ပြန်လည် တင်ပို့ကြသည်။ မြေပဲကုန်ကြမ်း အနေဖြင့် တစ်နေ့လျှင် တင်း ၁၀၀ ကျော်ကို စက်ဖြင့်ရေဆေးကာ နေလှန်းရသည်။  ၎င်းလုပ်ငန်းအတွက် နေ့စဉ်လုပ်သား ၃၀ ခန့် အသုံးပြုရသည်။

အမျိုးသားတစ်ဦးလျှင် နေ့စားလုပ်အားခ ငွေကျပ် ၇၀၀၀ ၊ အမျိုးသမီး တစ်ဦးလျှင် နေ့စားလုပ်အားခငွေကျပ် ၅၀၀၀ ရရှိသည်။

မြေပဲသန့်စင်သည့်ု လုပ်ငန်းတွင် စက်ဖြင့် ရေဆေးပြီးပါက    အခြောက်လှန်းကာ နှစ်ကြိမ်၊ သုံးကြိမ်အထိရွေး၍ အကောင်းဆုံး အရည်အသွေး ရရှိစေရန်ပြုလုပ်ကြသည်။

အရည်အသွေးမြင့် မြေပဲကုန်ကြမ်းများကို နောင်ချို၊ တောင်ကြီး၊ ရပ်စောက်နှင့် အခြားဒေသများမှ ၀ယ်ယူသည်။  လက်ရှိကာလ မြေပဲကုန်ကြမ်း တစ်ပြည်လျှင်   ငွေကျပ်  ၁၆၀၀  ဖြင့် ၀ယ်ယူကာ ပြန်လည်သန့်စင်ခြင်း လုပ်ငန်းကို လုပ်ကိုင်ကြသည်။

ပြင်ဦးလွင်မြို့နယ် အတွင်းရှိ မင်းတည်းကုန်း၊ ၀ါးနက်၊ မြန်ပြည်သာကျေးရွာတို့မှ လုပ်သားများအနေဖြင့် မြေပဲသန့်စင်လုပ်ငန်းကို တစ်နှစ်ပတ်လုံး လုပ်ကိုင်ကြရာ ပုံမှန်ဝင်ငွေ ရရှိသည့်အတွက် စားဝတ်နေရေး အဆင်ပြေနေကြောင်း မြေပဲသန့်စင် လုပ်ကိုင်သူများထံမှ သိရသည်။

Read 55 times Last modified on Thursday, 14 November 2019 09:41