နေပြည်တော်၊ ဇွန် ၂၉
ရန်ကုန်တိုင်းဒေသကြီး၊ တာမွေမြို့နယ်၌ လှည့်ကင်းဆောင်ရွက်နေသော ရဲတပ်ဖွဲ့ဝင်များအား အကြမ်းဖက်သူတစ်ဦးက သေနတ်ဖြင့် ပစ်ခတ်ခဲ့၍ ရဲတပ်ဖွဲ့ဝင်တစ်ဦးကျဆုံးခဲ့ကြောင်း သိရသည်။
ဖြစ်စဉ်မှာ ယနေ့ နံနက်ပိုင်းတွင် ရန်ကုန်တိုင်းဒေသကြီး၊ တာမွေမြို့နယ်၊ မေတ္တာညွန့်ရပ်ကွက်၊ အိုးစုလမ်းအနီး လုံခြုံရေးရယူထားသော လုံခြုံရေး ရဲတပ်ဖွဲ့ဝင်များသည် ရပ်ကွက်အတွင်း လှည့်ကင်းဆောင်ရွက်ရန်အတွက် ထွက်ခွာလာစဉ် သမာဓိ လမ်းထိပ်အနီးရှိ ဧရာဝတီဘဏ် အနီးအရောက်၌ MDY 1K-1159 Toyota Wish အဖြူရောင် ယာဉ်မောင်းနှင်လာသော အကြမ်းဖက်သူ အမျိုးသားတစ်ဦး(စိစစ်ဆဲ)က သေနတ်ဖြင့် ၉ ချက်ခန့်ပစ်ခတ်ခဲ့သဖြင့် လုံခြုံရေးတပ်ဖွဲ့ဝင်များက ပြန်လည်ခြောက်လှန့်ပစ်ခတ်ခဲ့ရာ အဆိုပါ အကြမ်းဖက်သူ အမျိုးသားမှာ မော်တော်ယာဉ်ပေါ်မှဆင်း၍ ထွက်ပြေးသွားခဲ့သည်။ အဆိုပါ မော်တော်ယာဉ်အား သွားရောက်စစ်ဆေးခဲ့ရာ မော်တော်ယာဉ်အနီး လမ်းပေါ်မှ ပစ္စတိုသေနတ် ၁ လက်၊ ၉ မမ ကျည်ခွံ ၉ ခုနှင့် မော်တော်ယာဉ်ခေါင်းခန်းအတွင်းမှ ၉ မမကျည် ၂၀ တောင့်၊ ယာဉ်မောင်းလိုင်စင် ၁ ခု၊ အိမ်ထောင်စု စာရင်းစာရွက်မိတ္တူ ၁ ရွက်တို့အား သိမ်းဆည်းရမိခဲ့ပါသည်။
အကြမ်းဖက်တိုက်ခိုက်မှုဖြစ်စဉ်အတွင်း လုံခြုံရေးတပ်ဖွဲ့ဝင်တစ်ဦး ကျည်ထိမှန်ဒဏ်ရာရရှိ ကျဆုံးခဲ့သဖြင့် ၎င်းအကြမ်းဖက်တိုက်ခိုက်ခဲ့သူအား ဖမ်းဆီးရမိနိုင်ရေး လုံခြုံရေးအင်အားများ ပူးပေါင်း၍ လိုအပ်သော ပိတ်ဆို့ရှာဖွေစစ်ဆေးခြင်းများ ဆက်လက်ဆောင်ရွက်လျက်ရှိကြောင်း သတင်းရရှိသည်။