ရန်ကုန်တိုင်းဒေသကြီး၊ လှိုင်သာယာမြို့နယ်အတွင်း အများပြည်သူ အသုံးပြုသည့် လမ်းမကြီးများအား အတားအဆီးများဖြင့် လမ်းပိတ်ဆို့ကာ ထိုင်သပိတ်ပြုလုပ်
နေပြည်တော်၊ မတ်လ ၁၃
ဆူပူဆန္ဒပြသူလူစုလူဝေးများအနေဖြင့် အများပြည်သူအသုံးပြုသည့် လမ်းမကြီးများတွင် ဝါးကပ်များ၊ သစ်မြစ်ဆုံများ၊ ကားတာယာများအား အသုံးပြုကာ အတားအဆီးများအခိုင်အမာပြုလုပ်၍ ထိုသပိတ် ပြုလုပ်ဆောင်ရွက်နေကြောင်း နေရာဒေသအချို့တွင် တွေ့ရှိရပါသည်။
ရန်ကုန်-ညောင်တုန်းသွားကားလမ်းမရှိ အောင်ဇေယျတံတားအဆင်း (၁)ထိပ်မှတ်တိုင်တွင် အင်းစိန်မြို့နယ်ဘက်သို့ သွားလာနိုင်မှုမရှိအောင် အတားအဆီးနေရာ (၄)နေရာ ပြုလုပ်ပြီး မင်းမင်း(ဘ) စိစစ်ဆဲ၊ (၁၆)ရပ်ကွက်၊ လှိုင်သာယာအနောက်ပိုင်းနေသူ ဦးဆောင်၍ နံနက် ၁၀နာရီအချိန်ခန့်တွင် အင်အား (၁၀၀)ဦးခန့်ဖြင့်လည်းကောင်း၊ နေ့လည် ၁၂ နာရီ ၂၀ မိနစ်အချိန်ခန့်တွင် အင်အား (၂၅၀)ဦး ခန့်လည်းကောင်း ထိုင်သပိတ်များပြုလုပ်ခဲ့ရာ ညနေ ၃ နာရီ ၅၀ မိနစ်အချိန်ခန့်တွင် အောင်ဇေယျ တံတားအဆင်းနှင့် (၃)ထိပ်လမ်းဆုံရှိ အင်အား (၅၀၀)ဦးခန့်သည် လူစုကွဲသွားခဲ့ပါသည်။
ရန်ကုန်-ညောင်တုန်းလမ်းနှင့် ဗိုလ်အောင်ကျော်လမ်းဆုံနေရာတွင် သားဇော်(ခ)ခင်မောင်ဇော်၊ (ဘ) ဦးသိန်းအောင်၊ လှိုင်သာယာအရှေ့ပိုင်းဦးဆောင်သည့် အင်အား(၁၀၀)ဦးခန့်ဖြင့် အတားအဆီးများ ချထားပိတ်ဆို့နေပြီး နေ့လည် ၁၂ နာရီ ၂၀ မိနစ်အချိန်ခန့်တွင် အမှတ်(၇)ရပ်ကွက်ဘက်ခြမ်းတွင် အင်အား (၂၀၀) ဦးခန့်၊ အမှတ်(၈)ရပ်ကွက်ဘက်ခြမ်းတွင် အင်အား(၂၀၀)ဦးခန့်ဖြင့် ထိုင်သပိတ်များ ပြုလုပ်ခဲ့ရာ ညနေ ၃ နာရီ ၅၀ မိနစ် အချိန်ခန့်တွင် အင်အား (၄၀၀)ဦးခန့် လူစုကွဲသွားခဲ့ပါသည်။
ရန်ကုန်-ညောင်တုန်းလမ်းနှင့် ဦးပုညလမ်းဆုံနေရာတွင် ဦးကေသရ၊ ညောင်တစ်ပင်ကျောင်း၊ (၂၁)ရပ်ကွက်၊ လှိုင်သာယာအနောက်ပိုင်း ဦးဆောင်သည့် အင်အား(၁၀၀)ဦးဖြင့် လမ်းပိတ်ဆို့ကာ ထိုင်သပိတ်ပြုလုပ်ခဲ့ပြီး ညနေ ၃ နာရီ ၅၀ မိနစ်အချိန်ခန့်တွင် လူစုကွဲသွားခဲ့ပါသည်။
လှိုင်သာယာမြို့နယ်၊ အမှတ်(၆)ရပ်ကွက်၊ ကျန်စစ်သားလမ်း၊ ဈေးလေးမှတ်တိုင်တွင် ခေါင်းဆောင် (စိစစ်ဆဲ) ဦးဆောင်ပြီး အင်အား(၁၀၀)ဦးခန့်သည် လမ်းပိတ်ဆို့၍ ထိုင်သပိတ်ပြုလုပ်ခဲ့ရာ ညနေ ၃ နာရီ ၅၀ မိနစ်အချိန်တွင် လူစုကွဲသွားခဲ့ပါသည်။
ဆူပူဆန္ဒပြသူလူအုပ်စုများအနေဖြင့် ပြည်သူလူထုသွားလာမှု ခက်ခဲအောင် လမ်းကြောင်းပိတ်ဆို့ခြင်းများ ဆောင်ရွက်မှုအတွက် အများပြည်သူလူထုအနေဖြင့် စိတ်ပျက်ခြင်း၊ ကြောက်ရွံခြင်းများဖြစ်ပေါ်ကာ အဖျက်အမှောက်လုပ်ငန်းများ လုပ်ဆောင်နေမှုအား ကန့်ကွတ်ရှုံ့ချပြီး ဥပဒေအရ ထိရောက်စွာအရေးယူ နိုင်ရေး ဆောင်ရွက်ပေးစေလိုသည့် သဘောများရှိလာကြကြောင်း အသိပေးသတင်းထုတ်ပြန်အပ်ပါသည်။