နေပြည်တော်၊ ဖေဖော်ဝါရီ ၁၃ ရက်
ပြည်ထောင်စုသမ္မတမြန်မာနိုင်ငံတော်၊ ၂၀၀၈ ခုနှစ် ဖွဲ့စည်းပုံ အခြေခံဥပဒေပုဒ်မ ၄၁၇ နှင့် အညီ ၂၀၂၁ ခုနှစ်၊ ဖေဖော်ဝါရီလ ၁ ရက်နေ့မှစ၍ နိုင်ငံတော်တွင် အရေးပေါ် အခြေအနေ သတ်မှတ်ပြီး နိုင်ငံတော် တည်ငြိမ်အေးချမ်းရေး၊ တရားဥပဒေ စိုးမိုးရေးနှင့် နိုင်ငံတော်၏ ယန္တရားကို ပုံမှန်လည်ပတ် ဆောင်ရွက်နိုင်စေရန် ဆောင်ရွက်လျက်ရှိရာ မင်းကိုနိုင် (ခ) ပေါ်ဦးထွန်း၊ ကျော်မင်းယု (ခ) ဂျင်မီ၊ ထွေးလင်းကို (ခ) လင်းလင်း၊ အင်းစိန်အောင်စိုး၊ မျိုးရန်နောင်သိမ်း၊ အိမ့်ပိုးဥ (ခ) အိပန်ဆယ်လို နှင့် မောင်မောင်အေး တို့သည် ၎င်းတို့အား လူသိများသည့် အခွင့်အရေးကို အသုံးချပြီး နိုင်ငံတော် ငြိမ်ဝပ်ပိပြားရေးကို ထိခိုက်စေရန် အကြောင်းရှိသည့် ရေးသားချက်များ၊ ပြောဆိုချက်များကို Social မီဒီယာများ၊ လူမှုကွန်ယက်များကို အသုံးပြု လုပ်ဆောင်နေကြောင်း တွေ့ရှိရသဖြင့် သက်ဆိုင်ရာ တရားရုံးများ၌ ရာဇသတ်ကြီး ပုဒ်မ ၅၀၅(ခ)ဖြင့် တရားစွဲဆိုထားရှိပြီး သက်ဆိုင်ရာ တရားရုံးများကလည်း ရာဇဝတ်ကျင့်ထုံး ဥပဒေနှင့်အညီ လူဖမ်းဝရမ်းများ ထုတ်ဆင့်ပြီး ဖြစ်ပါသည်။
နိုင်ငံတော်တည်ငြိမ် အေးချမ်းရေးအတွက် နိုင်ငံသားတိုင်းတွင် တာဝန်ရှိသဖြင့် အထက်ပါ လူဖမ်းဝရမ်း ထုတ်ဆင့်ထားသူများနှင့် ပတ်သက်၍ တွေ့ရှိလျင်ဖြစ်စေ၊ သတင်းရရှိလျင်ဖြစ်စေ အနီးဆုံး ရဲစခန်းများနှင့် နေပြည်တော်၊ တိုင်းဒေသကြီး၊ ပြည်နယ်အသီးသီးတွင် တိုင်ကြားနိုင်ရန် ထုတ်ပြန်ထားသည့် တယ်လီဖုန်း နံပါတ်များသို့ သတင်းပေး တိုင်တန်းနိုင်ကြောင်းနှင့် ၎င်းတို့အား လက်ခံထားပါက လက်ခံထားသူများကိုပါ ဥပဒေနှင့်အညီ အရေးယူ ဆောင်ရွက်သွားမည်ဖြစ်ကြောင်း မြန်မာနိုင်ငံ ရဲတပ်ဖွဲ့မှ သတင်း ထုတ်ပြန်ထားကြောင်း သိရှိရပါသည်။