SJ WorldNews - шаблон joomla Авто

ဂုဏ်ယူ အလေးပြုပါသည် အာဂအမျိုးသမီး ဇာနည်

Tuesday, 24 December 2019 09:35 Written by  font size decrease font size decrease font size increase font size increase font size

၂၁ ရာစုကမ္ဘာကြီးသည် အိပ်မက်ဆန်သော အပြောင်းအလဲများဖြင့် ခရီးရှည်ကို လျှောက်လှမ်းလျက်ရှိ၏။  မျိုးစုံသော အပြောင်းအလဲများတွင် စက်မှုကဏ္ဍ၊ နည်းပညာကဏ္ဍ၊ အာကာသနယ်ပယ်ကဏ္ဍ၊ ဆေးဘက်ဆိုင်ရာ   ကဏ္ဍများအပြင် စစ်လက်နက်ဆန်းတီထွင်မှု ကဏ္ဍများလည်း ပါဝင်ခဲ့လေသည်။ ယခင်က ဘက်ပေါင်းစုံ အကြောင်းတရားများဖြင့် ကျား၊ မ စည်းခြားထားခဲ့မှုများသည်လည်း ၂၁ ရာစုအတွင်း သိသာသော တန်းတူညီမျှ အခွင့်အလမ်း တစ်ခုဆီ ရောက်ရှိသွားခဲ့ပါသည်။

သို့သော်လည်း အချို့နိုင်ငံများတွင်တော့ အမျိုးသမီးထု၏ အခန်းကဏ္ဍက အနည်းငယ် မှေးမှိန်နေသည်ကိုတွေ့နေရဆဲ ဖြစ်ပါသည်။ ပြည်ထောင်စုသမ္မတမြန်မာနိုင်ငံတွင် အမျိုးသမီးများအနေဖြင့် အမျိုးသားများကဲ့သို့  နယ်ပယ်စုံတွင် သာတူညီမျှ အခွင့်အရေးများ ရရှိနေသည်ကို တွေ့ရှိရပါသည်။ အားကစားကဏ္ဍမှ အစပြု၍ စစ်ရေး၊ နိုင်ငံရေး၊ စီးပွားရေး၊ ပညာရေး နယ်ပယ်များတွင် အမျိုးသမီးများ၏ စွမ်းဆောင်ချက်များက အသိအမှတ်ပြုဖွယ် ကောင်းလှပါသည်။ အနီးစပ်ဆုံး ဖိလစ်ပိုင်အရှေ့တောင်အာရှ အားကစားပြိုင်ပွဲမှာပင် မြန်မာဘောလုံးအသင်းမှ အမျိုးသမီးလေးများ၏ ကြံ့ခိုင်သောကာယအား၊ မဆုတ်မနစ်သော လုံ့လအားတို့က အမျိုးသားများနည်းတူ  မှတ်ကျောက်တင် ခံခဲ့ရပါသည်။

ကမ္ဘာ့နိုင်ငံအသီးသီးမှ ခေါင်းဆောင်များသည် အင်အားတောင့်တင်းပြီး စွမ်းရည်ထက်မြက်သည့်     ခေတ်မီတပ်မတော်တစ်ရပ်ရှိမှ နိုင်ငံရေရှည် ရပ်တည်နိုင်စွမ်းရှိမည်ကို သဘောပေါက်ချိန်မှစ၍ ခေတ်မီတပ်မတော်များကို  ခေတ်အဆက်ဆက် ထူထောင်ခဲ့သည်ကို တွေ့ရှိရပါသည်။ ထိုသို့ ခေတ်မီတပ်မတော်တစ်ရပ် ထူထောင်ရာတွင် အမျိုးသားများ၏ အင်အားကိုသာမက အမျိုးသမီးထု၏ အင်အားကိုပါ စွမ်းရည်တစ်ရပ်အဖြစ် အသုံးချခဲ့ကြပါသည်။

မြန်မာ့တပ်မတော်သည် လွတ်လပ်ရေး ကြိုးပမ်းမှုနှင့်အတူ သန္ဓေတည် မွေးဖွားလာသော တပ်မတော်ဖြစ်သည်နှင့်အညီ တပ်မတော်အတွင်း ဝင်ရောက်အမှုထမ်း ခဲ့ကြသော တပ်မတော်သားအပေါင်းသည် မျိုးချစ်စိတ်ဖြင့် ဝင်ရောက်ခဲ့သူများ ဖြစ်ကြပါသည်။ အသက်ကိုပဓာနမထားဘဲ အမိနိုင်ငံတော်၏  အချုပ်အခြာအာဏာကို ကာကွယ်စောင့်ရှောက် လိုစိတ်များဖြင့် ခေတ်အဆက်ဆက် အမှုထမ်းခဲ့ကြသူများသာ ဖြစ်ပါသည်။ ထိုအထဲတွင် အမျိုးသမီး စစ်မှုထမ်းများလည်း အပါအဝင်ဖြစ်ခဲ့သည်။

၁၉၅၉ ခုနှစ် တပ်မတော်အက်ဥပဒေပုဒ်မ ၁၁ တွင်  ''တပ်မတော်ကာကွယ်ရေးဦးစီးချုပ်က အမိန့်ကြော်ငြာစာဖြင့် သီးခြားဖော်ပြသည့် တပ်မတော်၏တပ်အဖွဲ့၊ ဌာန၊ ဌာနခွဲ၊ သို့တည်းမဟုတ် တပ်မတော်၏ အစိတ်အပိုင်းတစ်ခုခု၌ တစ်စိတ်တစ်ဒေသ ပါဝင်နေသော၊ သို့တည်းမဟုတ် တွဲဖက်ထားသော  အခြားအဖွဲ့တွင် အမျိုးသမီးများ စစ်မှုထမ်းအဖြစ် စာရင်းသွင်းနိုင်ရန်နှင့် ဖြစ်စေ၊ အလုပ်လုပ်ကိုင်နိုင်ခွင့် ဖြစ်စေရှိရမည်'' ဟု  ဖော်ပြပါရှိသည်။ ထိုသို့ ထုတ်ပြန်ခဲ့သော  ဥပဒေနှင့်အညီ အမျိုးသမီး စစ်မှုထမ်းများအား ခေါ်ယူ လေ့ကျင့်တာဝန် ပေးစေခဲ့ပါသည်။

အမျိုးသား၊ အမျိုးသမီးမခွဲခြားဘဲ အမျိုးသားများကဲ့သို့ တိုင်းပြည်ကာကွယ်ရေး တာဝန်များ  ထမ်းဆောင်ရာတွင် တစ်တပ်တစ်အား ပါဝင်စေရန် ရည်ရွယ်ပြီး ၁၉၅၅ ခုနှစ်မှ ၁၉၆၄ ခုနှစ်အထိ တပ်မတော်(ကြည်း)ဘွဲ့ရ  အမျိုးသမီးဗိုလ်လောင်း သင်တန်းအမှတ်စဉ်(၁)မှ (၇)အထိ ဖွင့်လှစ်သင်ကြားပေးခဲ့သည်။ သင်တန်းအမှတ်စဉ် (၁)နှင့်(၂)အား တပ်မတော်(ကြည်း)တိုက်ခိုက်ရေးကျောင်းတွင် လည်းကောင်း၊ အမှတ်စဉ်(၃)၊ (၄)နှင့်(၅)တို့အား စစ်တက္ကသိုလ်တွင် လည်းကောင်း၊ အမှတ်စဉ်(၆)နှင့်(၇)တို့အား အမျိုးသမီး စစ်မှုထမ်းလေ့ကျင့်ရေး တပ်တွင် လည်းကောင်း ဖွင့်လှစ်သင်ကြားပေးခဲ့ပါသည်။ တပ်မတော်(ကြည်း) တွင်သာမက တပ်မတော်(ရေ)နှင့်  တပ်မတော်(လေ) တို့တွင်လည်း    ခေါ်ယူတာဝန်ပေးအပ်ခဲ့ပါသည်။   သင်တန်းပြီးမြောက်သည့်    အမျိုးသမီး အရာရှိများအား တပ်မတော်(ကြည်း၊ရေ၊လေ) လက်ရုံးဝန်ထမ်း တပ်ဖွဲ့များတွင်  တာဝန်ပေးအပ် ခဲ့ကြသည်ကို တွေ့ရှိခဲ့ရသည်။

ယနေ့အချိန်တွင်လည်း ထုတ်ပြန်ထားခဲ့သော ဥပဒေများနှင့်အညီ ''နိုင်ငံတော်ကာကွယ်ရေးတာဝန်  ထမ်းဆောင် ရာ၌ အမျိုးသမီးစစ်မှုထမ်းများ ပါဝင်ဆောင်ရွက်နိုင်ရန်အတွက်  အမျိုးသမီးစစ်မှုထမ်း (အရာရှိ)များအား လေ့ကျင့်သင်ကြား မွေးထုတ်ပေးရန်''ဟူသော ရည်ရွယ်ချက်ဖြင့် အမျိုးသမီး ဗိုလ်လောင်းသင်တန်းများအား ဖွင့်လှစ်ပေးလျက်ရှိရာ တပ်မတော်(ကြည်း)ဗိုလ်သင်တန်းကျောင်း(မှော်ဘီ)မှ  ဘွဲ့ရအမျိုးသမီးဗိုလ်လောင်းများလည်း အပါအဝင်ဖြစ်သည်။

နိုင်ငံတစ်ခု ဖွံ့ဖြိုးတိုးတက်ရန်အတွက် အမျိုးသား၊ အမျိုးသမီးခွဲခြား၍ ဆောင်ရွက်လို့ မရပါချေ။  တိုင်းရင်းသားညီအစ်ကို   လူတန်းစားအားလုံး စုစည်းညီညာသော ပြည်ထောင်စုစိတ်ဓာတ်ဖြင့် ကြိုးစားရမည် ဖြစ်ပါသည်။ စစ်ရေး၊ နိုင်ငံရေး၊  စီးပွားရေး၊ အုပ်ချုပ်ရေး ၊ ပညာရေးကဏ္ဍအသီးသီးတွင် တက်ညီလက်ညီ တိုင်တိုင်ပင်ပင် ညှိညှိနှိုင်းနှိုင်းဖြင့်    နိုင်ငံတော်၏အမျိုးသား အကျိုးစီးပွားကို   ဖော်ဆောင်ရပါမည်။ မြန်မာနိုင်ငံ၏ လွတ်လပ်ရေးကြိုးပမ်းမှု သမိုင်းတွင် သူရမ ချစ်ပိုကဲ့သို့သော အာဇာနည် အမျိုးသမီး ပေါ်ထွက်သကဲ့သို့ အခြားသော အမျိုးသမီးသူရဲကောင်းများလည်း ပါဝင်ခဲ့ကြပါသေးသည်။ အင်္ဂလိပ်-မြန်မာပထမ စစ်ပွဲအတွင်း     မြန်မာအမျိုးသား များ သာမက ရှမ်းအမျိုးသမီးများပင် ရဲဝံ့စွာ ပါဝင်တိုက်ခိုက်ခဲ့ကြသည်ကို   မှတ်သားခဲ့ရပေသည်။

မျက်မှောက်ကာလ ကမ္ဘာ့နိုင်ငံ အသီးသီးရှိ တပ်မတော်များတွင် အမျိုးသမီးစစ်မှုထမ်းများသည် ဦးစီးလုပ်ငန်းများတွင်သာမက ရှေ့တန်းစစ်ဆင်ရေးတာဝန်များ အထိပါ   တာဝန်ထမ်းဆောင်နေကြပြီ ဖြစ်ပါသည်။ မြန်မာ့တပ်မတော် တွင်လည်း အမျိုးသမီးစစ်မှုထမ်းများ၏ အခန်းကဏ္ဍ မြင့်တက်စေရန်အတွက် ကြိုးပမ်းဆောင်ရွက်လျက်ရှိရာ  ယခုဆိုလျှင် တပ်မတော်(လေ)အတွက် ပထမဦးဆုံးသော အမျိုးသမီး လေသူရဲ အရာရှိများကို မွေးထုတ်ပေးခဲ့ပြီး ဖြစ်ပါသည်။ ထို့ပြင် အာဆီယံတပ်မတော် သေနတ်ပစ်ပြိုင်ပွဲများတွင်လည်း နှစ်စဉ်နှစ်တိုင်း အမျိုးသမီး စစ်မှုထမ်းများအနေဖြင့် ဆုတံဆိပ်များ ရရှိသည်အထိ  စွမ်းဆောင်နိုင်ခဲ့ကြပြန်သည်။ 

ထို့ပြင်  အကြမ်းဖက်လေ့ကျင့်ရေး သင်ခန်းစာများ၊   လေထီးခုန်သင်တန်း များတွင်လည်း    အမျိုးသားများနည်းတူ မကြောက်မရွံ့ရဲရဲဝံ့ဝံ့၊ တက်တက်ကြွကြွ ဆောင်ရွက်နေကြသော   အမျိုးသမီးစစ်မှုထမ်းများကို     တွေ့ရပါ သေးသည်။ ဆေးတပ်ဖွဲ့တွင်ရှိသော  အမျိုးသမီးပါရဂူများ၊ သူနာပြုများ၏ စွမ်းဆောင်ရည်များကလည်း    မေ့ထားလို့မရပါချေ။ တပ်မတော်အမျိုးသမီး    သူနာပြု/ ကျွမ်းကျင်သူ အရာရှိများ၊ တပ်ကြပ်ကြီးသားဖွား တို့သည်လည်း မိမိတို့ကျရာ တာဝန်များကို အမျိုးသားများနည်းတူ စွမ်းစွမ်းတမံ ဆောင်ရွက်လျက်ရှိကြပြန်သည်။ အမျိုးသမီးစစ်မှုထမ်းများအနေဖြင့် တက်ရောက်ကြသော သင်တန်းများ၊ အခေါ်အဝေါ်များ မတူညီကြသည့်တိုင် ''တိုင်းပြည်တာဝန် ထမ်းဆောင်ရာမှာ  တစ်တပ်တစ်အားပါဝင်စေရန်'' ဟူသော  ရည်ရွယ်ချက်ကတော့  တူညီလျက်ရှိပါသည်။         

တပ်မတော်(ကြည်း)  ဗိုလ်သင်တန်းကျောင်း(မှော်ဘီ)မှ    ဘွဲ့ရအမျိုးသမီး ဗိုလ်လောင်းများအပါအဝင် အခြားသော အမျိုးသမီးစစ်မှုထမ်း အားလုံးတို့သည်  မတူညီသောဘဝလမ်း    အသီးသီးမှ  တပ်မတော်ရင်ငွေ့ကို ခိုလှုံသူများ  ဖြစ်ကြသည့်တိုင်      တပ်မတော်၏ အမိန့်နှင့်စည်းကမ်းတည်းဟူသော   အမိုးအကာအောက်တွင် သစ္စာလေးချက်ကို နှလုံးအိမ်မှာ ပန္နက်ရိုက်ထားကြသူများ ဖြစ်သွားကြသည်။ ထိုပန္နက်များသည် ဘယ်သူခွဲခွဲဒို့မကွဲ အမြဲစည်းလုံးမည် ဟူသည့်အတိုင်း မြဲမြံလျက်ရှိပါသည်။ ခိုင်မြဲလှသော တွဲလက်များဖြင့် ဒို့တာဝန် အရေးသုံးပါးကို ကာကွယ်စောင့်ရှောက်ကာ   တိုင်းပြည်နှင့်လူမျိုးအတွက် ကျရာတာဝန်ကို ကြည်သာရွှင်ပျစွာ ထမ်းရွက်ကြ မည့်သူများလည်း ဖြစ်ပါသည်။

၂ဝ၁၈  ခုနှစ်  ဒီဇင်ဘာ  ၂၆  ရက် ဘွဲ့ရအမျိုးသမီး ဗိုလ်လောင်းသင်တန်း အမှတ်စဉ်(၅) သင်တန်းဆင်းပွဲ အခမ်းအနားတွင်  တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မဟာသရေစည်သူ မင်းအောင်လှိုင်က သင်တန်းဆင်း မိန့်ခွန်းပြောကြားရာတွင် ''မိမိတို့ တပ်မတော်တွင် အမျိုးသမီးစစ်မှုထမ်းများ၏ အခန်းကဏ္ဍကိုပါ မြှင့်တင်နိုင်ရန်အတွက် ဘွဲ့ရအမျိုးသမီးအရာရှိများကို ပြန်လည်မွေးထုတ် တာဝန်ပေးအပ်လျက်ရှိရာ    ယခုအခါ အမျိုးသမီး အရာရှိများထဲမှ ခြောက်ဦးကို တပ်မတော်(လေ)အတွက်  ပထမဆုံးအမျိုးသမီး လေသူရဲ အရာရှိများအဖြစ် သင်ကြားလေ့ကျင့်ပေးနိုင်ခဲ့ပြီး ဖြစ်သဖြင့်  အမျိုးသားများနှင့်တန်းတူ  ပျံသန်းရေး တာဝန်များကို စတင်ထမ်းဆောင်နေပြီ ဖြစ်ကြောင်း''ပြောကြားခဲ့ပါသည်။

မြန်မာမှန်လျှင် ကျား၊ မ မခွဲ၊ ဒေသစွဲ လူမျိုးစွဲမထားတတ်သည်မှာ   မြန်မာ့စိတ်ရင်းဖြစ်ပါသည်။   အမျိုးသားများ နည်းတူ  နိုင်ငံတော်ကာကွယ်ရေး တာဝန်ထမ်းဆောင်နေကြသော အမျိုးသမီးစစ်မှုထမ်းများ အနေဖြင့်လည်း  စွမ်းရည်သုံးရပ် ထက်မြက်အောင် ကြိုးစားသွားကြရမည် ဖြစ်ပါသည်။  သို့မှသာ  တပ်မတော်၏ ရည်မှန်းချက်ကို အကောင်အထည်ဖော်ရာတွင် အထောက်အကူပြုမည်ဖြစ်၏။

ထိုစွမ်းရည်များဖြင့်သာ တပ်မတော်၏ဂုဏ်ကို မြှင့်တင်နိုင်မည် ဖြစ်ပါသည်။ ရခဲလှသော လူ့ဘဝတွင် ရခဲလှသော တပ်မတော်သားဘဝသို့   ရဲရဲဝံ့ဝံ့ ကူးပြောင်းလာကြသော   တပ်မတော်(ကြည်း) ဗိုလ်သင်တန်းကျောင်းမှ ဘွဲ့ရအမျိုးသမီး အရာရှိများ  အပါအဝင် အခြားသော အမျိုးသမီးစစ်မှုထမ်းများအား ဤစာစုဖြင့် မှတ်တမ်းတင် ဂုဏ်ပြုအပ်ပါသည်။ 

နွေကံ့ကော်(မြို့လှ)

Read 34 times
Rate this item
(0 votes)
Last modified on Tuesday, 24 December 2019 09:44