SJ WorldNews - шаблон joomla Авто

နိုင်ငံအရေး၊ ပြည်သူ့အရေး၊ အမျိုးသား နိုင်ငံရေးနှင့်တပ်မတော်

Monday, 23 March 2020 10:04 Written by  font size decrease font size decrease font size increase font size increase font size

''နိုင်ငံရေးဆိုတာ ရှုပ်ထွေးပါတယ်ကွာ မင်းအလုပ်ကိစ္စကိုသာ ပြောပါ။ တို့လက်လှမ်းမမီတဲ့ နိုင်ငံရေးကို ပြောမနေပါနဲ့'' အဆိုပါ စကားစုမှာ အိမ်ရှေ့ဧည့်ခန်းတွင် အဖေနှင့် ဦးလေးတို့ စကားပြောရင်းမှ အဖေက ဦးလေးအား စကားလမ်းကြောင်း ပြောင်းရန် ပြောကြားလိုက်သည့် စကားစုလေးအဖြစ် ကျွန်တော်ကြားလိုက်ရသည်။ ကျွန်တော့်အနေဖြင့်လည်း ၂ဝ၂ဝ ပြည့်နှစ်၊ မတ်လ ၆ ရက် နေ့ထုတ် မြဝတီသတင်းစာအား ဖတ်ရှုနေခိုက်နှင့် ကြုံလေသောအခါ သတင်းစာစာမျက်နှာ ၁၆ တွင်ပါရှိသည့် ''၂ဝ၁၁ ခုနှစ်တွင် ရွေးကောက်ခံအစိုးရကို စနစ်တကျလွှဲပြောင်းပေးခဲ့ပြီး တပ်မတော်သည် နိုင်ငံတော်ကို လုံခြုံရေးအရ တည်ငြိမ်အေးချမ်းရေး၊ နိုင်ငံရေးအရ တည်ငြိမ်အေးချမ်းရေးနှင့် ဖွံ့ဖြိုးတိုးတက်ရေး ကိစ္စများတွင် ပူးပေါင်းပါဝင် ဆောင်ရွက်ပေးခဲ့ကြောင်း၊ ၂ဝ၁၆ ခုနှစ်တွင် တက်လာသည့် အစိုးရအဖွဲ့ လက်ထက်တွင်လည်း ဒီမိုကရေစီ လမ်းကြောင်း ယိမ်းယိုင်မသွားစေရန်နှင့် စနစ်တကျဖြစ်စေရေးအတွက် ကူညီဆောင်ရွက်ပေးလျက် ရှိကြောင်း၊ ယင်းသည် နိုင်ငံတော်အတွက် သမိုင်းကြောင်းအရ တောင်းဆိုချက်ဖြစ်သော အမျိုးသားနိုင်ငံရေးကို လုပ်ဆောင်နေခြင်း ဖြစ်ပြီး တပ်မတော်အနေနှင့် နိုင်ငံ့အရေး၊ ဒေသဖွံ့ဖြိုး တိုးတက်ရေးနှင့် တည်ငြိမ်အေးချမ်းရေး အတွက်ကိုသာ ရှေးရှုဆောင်ရွက်နေခြင်းဖြစ်ကြောင်း'' နိုင်ငံတော်ကာကွယ်ရေး တက္ကသိုလ်သင်တန်း အမှတ်စဉ်(၁၈) သင်တန်းဆင်းပွဲတွင် တပ်မတော် ကာကွယ် ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင် ပြောကြားခဲ့သည့် အမှာစကားကို လေးနက်စွာ တွေးမြင် နားလည်မိပါတော့သည်။

၎င်းသည်ပင် ပြည်သူတို့ လိုလားတောင့်တခဲ့ကြသည့် ''ပါတီစုံဒီမိုကရေစီ''စနစ်ကို ဖော်ဆောင်ပေးခဲ့သည့် တပ်မတော်၏ အမျိုးသား နိုင်ငံရေးနှင့် ပြည်သူ့ဆန္ဒ သဘောထားအပေါ် ထားရှိသည့် အမျိုးသား နိုင်ငံရေး သစ္စာတရားဖြစ်သည်။ နိုင်ငံ့အရေးတွင်တပ်မတော်ဆောင်ရွက်ခဲ့သည့်၊ ဆောင်ရွက်နေသည့်၊  ဆောင်ရွက်နေမည့် အတိတ်၊ပစ္စုပ္ပန်၊ အနာဂတ်ဖြစ်သည်။ နိုင်ငံရေး(Politics)  ဟူသည်  တိုင်းပြည်နိုင်ငံ၏ လုပ်ငန်း ဆောင်ရွက်ချက် များကို ညွှန်ကြားခြင်းနှင့် စီမံခန့်ခွဲခြင်းဆိုင်ရာ ဝိဇ္ဇာ သို့မဟုတ် သိပ္ပံအတတ်ကို လက်တွေ့အကောင်အထည် ဖော်ခြင်းဖြစ်သည်။ တိုင်းပြည်နိုင်ငံဆိုင်ရာ ဆုံးဖြတ်ချက်များကို  လူအများက ပါဝင်ဆောင်ရွက်ခြင်းဖြစ်စဉ်သည် နိုင်ငံရေးပင်ဖြစ်သည်။ ထုိ့ပြင် နိုင်ငံရေးဆိုသည်မှာ လူ့အဖွဲ့အစည်းဖြင့် ဆုံးဖြတ်သော လမ်းစဉ်ဖြစ်သည်။ဤအသုံးအနှုန်းသည် ယေဘုယျအားဖြင့်  နိုင်ငံအစိုးရများ၏ လုပ်ငန်းရပ်များကို   ဆိုလိုသည့်အပြင် လူသားအချင်းချင်း ဆက်နွှယ်မှု၊ ပေါင်းစပ်ဖွဲ့စည်းမှု၊ ပညာသင်ကြားမှုနှင့် ဘာသာရေးဆိုင်ရာ လူမှုပတ်ဝန်းကျင် ကိစ္စရပ်များလည်း ပါဝင်ပတ်သက်သည်။ နိုင်ငံတစ် နိုင်ငံ၏ အကျိုးစီးပွား ဖြစ်ထွန်းတိုးတက်မှု၊ ရေရှည်တည်တံ့မှုနှင့် ငြိမ်းချမ်းသာယာ ရေးတို့ကို ခြုံငုံဆောင်ရွက်ခြင်းကို နိုင်ငံရေးဟူ၍ သတ်မှတ်သည်ဟု နိုင်ငံရေး၏ အဓိပ္ပာယ်ဖွင့်ဆိုချက်ကို သိရှိမှတ်သားရသည်။ နိုင်ငံရေးတွင် မျှတသော သဘောတရားရှိရန် အထူးလိုအပ်ပြီး မုန်းခြင်း၊ ချစ် ခြင်း၊ ပါတီစွဲ၊ လူစွဲကင်း၍ နိုင်ငံ့ကောင်းကျိုးအတွက် ဆောင်ရွက်သင့်သည်များကို ပြတ်သားစွာ ဆောင်ရွက်ရန် လိုအပ်ကြောင်း လေ့လာသိရှိရပါသည်။ အဆိုပါနိုင်ငံရေး အယူအဆ သဘောတရားများမှ သွေဖည် ပြီး တစ်ယူသန်အစွန်း ရောက်သွားပါက နိုင်ငံရေး အစွန်းရောက်ခြင်း ဖြစ်ပေါ်သွားနိုင်ပါသည်။ နိုင်ငံရေးပါတီ တစ်ရပ်တွင် အယူအဆပြင်းထန် အစွန်းရောက်သူများ အင်အားသာလွန် လွှမ်းမိုးသွားပါက နိုင်ငံရေး အစွန်းရောက်ခြင်း  (Polarization)) ဖြစ်သွားပြီဟု သတ်မှတ်ကြောင်း လေ့လာသိရှိရပါသည်။ အစွန်းရောက်ခြင်းအပြင် နိုင်ငံရေး လက်စားချေလိုမှု (Political Revenge)ပါ ပေါင်းထည့် လိုက်ပါက တိုင်းပြည်၏ အနာဂတ်အရေးပါ  မကောင်းနိုင်တော့။ နိုင်ငံတစ်ခုတွင် တည်ရှိနေသော နိုင်ငံရေးစနစ် လှုပ်ရှားလည်ပတ်ခြင်းနှင့် ပတ်သက်၍ လူအများ မည်မျှသိရှိသနည်း၊ နားလည် သဘောပေါက်သနည်း၊ အကောင်း မြင်ခြင်း၊ အဆိုးမြင်ခြင်း မည်သို့ရှိသနည်း စသည်တို့က လူ့အဖွဲ့အစည်း၏ နိုင်ငံရေး ယဉ်ကျေးမှုကို ဖော်ပြပါသည်။ နိုင်ငံရေး ဆောင်ရွက်ကြသော နိုင်ငံရေးနှင့် ဆက်စပ် သူအားလုံးတွင် နိုင်ငံရေး ယဉ်ကျေးမှုရှိမှသာလျှင်  နိုင်ငံတစ်နိုင်ငံ၏  အဆင့်အတန်း မြင့်မားလာနိုင်မည်ဖြစ်သည်။   နိုင်ငံရေး ယဉ်ကျေးမှုမှ ကင်းလွတ်၍ အစွန်းရောက်ခြင်းများ ဖြစ်ပေါ်လာပါက အကြမ်းဖက်မှုများ၊ ဆူပူဆန္ဒပြမှုများ၊ အထွေထွေ မကျေနပ်မှုများကြောင့် တိုင်းပြည်အေးချမ်း တည်ငြိမ်မှု ပျက်ပြားလာနိုင်၍ ဒီမိုကရေစီ နိုင်ငံတော် အဖြစ် အသွင်ကူးပြောင်းရာတွင် အနှောင့်အယှက် အတားအဆီးများ ဖြစ်ပေါ်လာတတ်သည်။ အမျိုးသားခေါင်းဆောင်ကြီး ဗိုလ်ချုပ်အောင်ဆန်းက ၂ဝ-၁-၁၉၄၆ ခုနှစ် တွင်ပြုလုပ်သော ဖဆပလ ညီလာခံတွင် နိုင်ငံရေးနှင့် ပတ်သက်၍ ''နိုင်ငံရေး မည် ည် ယုတ်မာညစ်ထေးသည် မဟုတ်၊ နိုင်ငံ ရေးကို ညစ်ထေးအောင် လုပ်သူတို့သာလျှင် ယုတ်မာသည်'' ဟု ပြတ်သားစွာ ပြောကြားခဲ့သည်ကို ကြားသိရမည်ဖြစ်သည်။ ပါတီစုံဒီမိုကရေစီစနစ် (Multi-party democra-tic system) ကို ကျင့်သုံး ဆောင်ရွက်လျက်ရှိသော မိမိတို့နိုင်ငံတွင် ပါတီနိုင်ငံရေးမှ ဖြစ်ပေါ်လာနိုင်သည့် နိုင်ငံရေး အစွန်းရောက်ခြင်းများကို သတိပြုရန် လိုအပ်လှသည်။

အမျိုးသားနိုင်ငံရေးဆိုသည်မှာ အမျိုးသား အကျိုးစီးပွား ကာကွယ်စောင့်ရှောက်ရေး၊ တိုင်းရင်းသား ပြည်သူလူထုအရေးနှင့် နိုင်ငံ့အရေးပင်ဖြစ်သည်။ တပ်မတော်သည်  နိုင်ငံတော်၏ အမျိုးသား အကျိုးစီးပွားကို ထိန်းသိမ်းစောင့်ရှောက် အကောင်အထည် ဖော်ရန်အတွက် အမျိုးသားနိုင်ငံရေး တာဝန်ကို ထမ်းဆောင်နေခြင်းသာဖြစ်သည်။ ပါတီ နိုင်ငံရေးကြောင့် ပေါ်ပေါက်လာသည့် နိုင်ငံရေးအစွန်း ရောက်မှုများကြောင့် နိုင်ငံ တော်မတည်မငြိမ်ဖြစ်ခဲ့သည်ကို သမိုင်းကြောင်းတွင် ဖြစ်ပေါ်ခဲ့မှုများက သက်သေ ပြလျက်ရှိသည်။ထို့ကြောင့် တပ်မတော်အနေဖြင့် သမိုင်းကြောင်းအရ တောင်းဆို ချက်ဖြစ်သော အမျိုးသား နိုင်ငံရေးကို လုပ်ဆောင်နေခြင်းဖြစ်ကြောင်း ၊ တပ်မတော် ကာကွယ်ရေးဦးစီးချုပ်က   အထက်ပါအတိုင်း အဓိပ္ပာယ်ရှိစွာ အမှာစကား ပြော ကြားခဲ့ခြင်းဖြစ်သည်ကို နားလည်သိရှိလိုက်ရသည်။

၂ဝဝ၈ ခုနှစ် ဖွဲ့စည်းပုံအခြေခံဥပဒေအရ တပ်မတော်ကို အမျိုးသားနိုင်ငံရေး တာဝန်များ အပ်နှင်းထားပြီး အပ်နှင်းထား သည့် အမျိုးသားနိုင်ငံရေး တာဝန်များကို လေ့လာကြည့်မည်ဆိုလျှင် မိမိတို့နိုင်ငံ၏ အမျိုးသား အကျိုးစီးပွားကို   ထိန်းသိမ်း စောင့်ရှောက် အကောင်အထည်ဖော်ရန် အတွက်သာဖြစ်သည်ကို လေ့လာတွေ့ရှိရ မည်ဖြစ်သည်။ ဖွဲ့စည်းပုံ အခြေခံဥပဒေကို နိုင်ငံရေးသိပ္ပံတွင် Public Law သို့မဟုတ် Constitution သို့မဟုတ် Constitutional Law သို့မဟုတ် Basic Law  of  the Country သို့မဟုတ် Highest Law of the Land   သို့မဟုတ Supreme Law သို့မဟုတ် Mother  Lawစသည်ဖြင့်အမျိုးမျိုးတင်စားသုံးနှုန်းကြသည်။ အောက်စဖို့ဒ်တက္ကသိုလ်မှ ထုတ်ဝေသော "The Constitution is the Rule and Pratices that regulate the relationship between the individual and State"  ဟူ၍ဖြစ်ပြီး  အဓိပ္ပာယ်မှာ ''ပြည်သူနှင့်အစိုးရအကြား ဆက်စပ်ပတ် သက်မှုတို့ကို လက်တွေ့လိုက်နာ ကျင့်သုံးရန်  ချမှတ်ပြဋ္ဌာန်းသည့် ဥပဒေ၊ နည်းဥပဒေများသည် ဖွဲ့စည်းပုံ အခြေခံဥပဒေဖြစ်သည်'' ဟူ၍ဖြစ်သည်။ မြန်မာနိုင်ငံတွင် ဖွဲ့စည်းပုံ အခြေခံဥပဒေကို ၁၉၄၇ ခုနှစ်၊  ၁၉၇၄ ခုနှစ်နှင့် ၂ဝဝ၈ ခုနှစ်တို့တွင် ၃ ကြိမ်ပြဋ္ဌာန်းခဲ့သည်။ ဖွဲ့စည်းပုံ အခြေခံဥပဒေနှင့် ပတ်သက်၍လည်း တပ်မတော် ကာကွယ်ရေး ဦးစီးချုပ် က ''တပ်မတော်အနေဖြင့် လွတ်လပ်ရေး ရရှိပြီးချိန်မှစ၍ ခေတ်အဆက်ဆက် နိုင်ငံရေး ဦးဆောင်မှုများကို ဆောင်ရွက်ခဲ့ရကြောင်း၊ ၁၉၈၈  ခုနှစ်တွင် တပ်မတော်က နိုင်ငံတော်တာဝန် အရပ်ရပ်ကို ထမ်းဆောင်နေချိန်၌ နိုင်ငံရေးအရ၊ စီးပွားရေးအရ၊ တိုင်းရင်းသားရေးအရ၊  အမျိုးဘာသာသာသနာအရ အမြင်မတူဘဲ ကွဲလွဲမှုများ ရှိခဲ့ကြပြီး ပြည်ပနိုင်ငံများမှလည်း  ပိတ်ဆို့မှု အမျိုးမျိုး ရှိခဲ့သည့်အတွက် အခက်အခဲများစွာ ရင်ဆိုင်ကြုံတွေ့ခဲ့ရကြောင်း၊ ၂ဝဝ၈ ခုနှစ် ဖွဲ့စည်းပုံ အခြေခံဥပဒေကို ရေးဆွဲပြဋ္ဌာန်းပြီး ပြည်သူများက လိုလားသည့်  ပါတီစုံဒီမိုကရေစီ လမ်းကြောင်းပေါ်ကို ရောက်အောင် တည် ဆောက် ပေးနိုင်ခဲ့ကြောင်း၊ ၂ဝဝ၈ ဖွဲ့စည်းပုံ အခြေခံဥပဒေသည် ရေးဆွဲစဉ် အချိန်က အခြေအနေအချိန်အခါနှင့် အကိုက်ညီဆုံး၊ မြန်မာနိုင်ငံ၏သမိုင်း၊ ယဉ်ကျေးမှုထုံးတမ်း အစဉ်အလာများအပေါ်တွင် အလေးထား စဉ်းစားရေး ဆွဲခဲ့ခြင်းဖြစ်ပြီး အခြေအနေ အချိန်အခါနှင့်   မကိုက်ညီမှုများ ရှိပါက သင့်လျော်သလို   ပြုပြင်သွားရမည် ဖြစ်ကြောင်း၊ သို့သော် ဒီမိုကရေစီနှင့် လူ့အခွင့်အရေးကို အကြောင်းပြပြီး  နိုင်ငံရေးအရ အသုံးချခံရခြင်း မဖြစ်အောင် ချင့်ချိန်ဆောင်ရွက်သွားရန် လိုအပ်ကြောင်း'' အမြော်အမြင်ကြီးစွာ အမှာစကား ပြောကြား သွားသည်ကို ဖတ်ရှုလိုက်ရသည်။

ဒီမိုကရေစီစနစ်၏ အခြေခံမှာ ရွေးကောက်ပွဲ(Election)များ ကျင်းပပေးခြင်းဖြစ်သည်။

ရွေးကောက်ပွဲဆိုသည်မှာ နိုင်ငံတော်အစိုးရ တင်မြှောက် ဖွဲ့စည်းနိုင်ရန်အတွက် ဆန္ဒမဲ အများဆုံးရရှိသူ သို့မဟုတ် ဆန္ဒမဲရရှိမှု ရာခိုင်နှုန်းအပေါ် မူတည်၍ ပြည်သူ့ကိုယ် စားလှယ်များ ရွေးချယ်ပေးခြင်းဖြစ်သည်။

ထိုကဲ့သို့ရွေးချယ်ပေးနိုင်ရန်အတွက် ရွေးကောက်ပွဲကျင်းပရာတွင် ရွေးကောက်ပွဲများကို စီမံခန့်ခွဲသူများ(Election Manage-ment Body ) အနေဖြင့် အခြေခံမူ၊ အခြေခံ သဘောတရားများကို လိုက်နာဆောင်ရွက်မှသာလွတ်လပ်၍ တရားမျှတသော ရွေးကောက်ပွဲ၊ အများယုံကြည် လက်ခံသော ရွေးကောက်ပွဲများ ဖြစ်ပေါ်လာမည်ဖြစ်သည်။ ပြည်ထောင်စု သမ္မတ မြန်မာနိုင်ငံတော် ဖွဲ့စည်းပုံ အခြေခံဥပဒေ (၂ဝဝ၈)နှင့် လွှတ်တော်ရွေးကောက်ပွဲ ဥပဒေများတွင် သတ်မှတ်အရည်အချင်း ပြည့်မီသော နိုင်ငံ သားတိုင်း ဆန္ဒမဲပေးနိုင်ရန် ပြဋ္ဌာန်းထားပြီး ဖြစ်သည်။ ၂ဝ၂ဝ ပြည့်နှစ် နှောင်းပိုင်းကာလတွင်  ပါတီစုံဒီမိုကရေစီ အထွေထွေရွေးကောက်ပွဲ ကျင်းပမည်ဖြစ်သည်။ အထွေထွေ ရွေးကောက်ပွဲများကို ၂ဝ၁ဝ ပြည့်နှစ်၊ နိုဝင်ဘာလ ၇ ရက်နေ့တွင် လည်းကောင်း၊ ၂ဝ၁၅ ခုနှစ်၊ နိုဝင်ဘာလ ၈ ရက်နေ့တွင် လည်းကောင်း ကျင်းပခဲ့ပြီးဖြစ်သည်။ ထို့အပြင် ကြားဖြတ်ရွေးကောက်ပွဲများကို ၂ဝ၁၂ ခုနှစ်၊ ဧပြီလ ၁ ရက်နေ့တွင် လည်းကောင်း၊ ၂ဝ၁၇ခုနှစ်၊ ဧပြီလ ၁ ရက်နေ့တွင် လည်းကောင်း၊ ၂ဝ၁၈ ခုနှစ်၊ နိုဝင်ဘာလ ၃ ရက်နေ့တွင်လည်းကောင်း အောင်မြင်စွာ ကျင်းပနိုင်ခဲ့သည်။ ရွေးကောက်ပွဲများမှ ပြည်သူလူထု ဆန္ဒနှင့်အညီ ရွေးကောက်ပေးခဲ့သော လွှတ်တော် ကိုယ်စားလှယ်များသည် နိုင်ငံတော်၏ အချုပ်အခြာအာဏာကို ရယူပြီး ပြည်ထောင်စု သမ္မတမြန်မာနိုင်ငံတော်ကို စစ်မှန်၍ စည်းကမ်းပြည့်ဝသော ဒီမိုကရေစီနိုင်ငံတော်အဖြစ် တည်ဆောက်ရန်ဖြစ်သည်။ တရားမျှတသည့် အထွေထွေရွေးကောက်ပွဲ အောင်မြင်စွာ ပြုလုပ်ပေးရန် လိုအပ်ပြီး   ရွေးကောက်ပွဲသည် အနာဂတ် နိုင်ငံရေးအတွက် အရေး ပါပုံကို တပ်မတော် ကာကွယ်ရေးဦးစီးချုပ်က''၂ဝ၂ဝ ပြည့်နှစ်သည် နိုင်ငံတော်အတွက် အရေးကြီးသည့် အထွေထွေ ရွေးကောက်ပွဲ ပြုလုပ်မည့်နှစ်ဖြစ်သကဲ့သို့ ငြိမ်းချမ်းရေးနှင့် အမျိုးသားပြန်လည် စည်းလုံးညီညွတ်ရေး လုပ်ငန်းစဉ်များ အောင်မြင်ရန် အရှိန်အဟုန်မြှင့် လုပ်ဆောင်ရမည့် ကာလလည်း ဖြစ်ကြောင်း၊  နိုင်ငံတော်၏  လက်ရှိပကတိ အနေအထားအရ ပြည်သူလူထုက ရွေးချယ်ထားသည့် ပါတီစုံဒီမိုကရေစီ လမ်းကြောင်း ခိုင်မာရေးအတွက် တရားမျှတသည့် အထွေထွေ ရွေးကောက်ပွဲ အောင်မြင်စွာ ပြုလုပ်ပေးနိုင်ရန် လိုအပ်ကြောင်း၊ လွတ်လပ်ပြီး တရားမျှတသည့် ရွေးကောက်ပွဲ မဖြစ်ပါက အနာဂတ် ဒီမိုကရေစီလျှောက်လှမ်းရေးတွင် အခက် အခဲဖြစ်လာနိုင်ကြောင်း၊ ရွေးကောက်ပွဲ တရားမျှတစွာ ပြီးမြောက်အောင်မြင်စေရန် နိုင်ငံတော် တည်ငြိမ်ရေးနှင့် တရားဥပဒေ စိုးမိုးရေးသည် မရှိမဖြစ် လိုအပ်သည့်အတွက် တပ်မတော်အနေဖြင့် ဝိုင်းဝန်းကူညီပံ့ပိုးရန် လိုအပ်ကြောင်း၊ အနာဂတ်နိုင်ငံရေးတွင် နိုင်ငံတော်လျှောက်လှမ်းနေသည့် ပါတီစုံ ဒီမိုကရေစီလမ်းကြောင်းပေါ်တွင် တည် တည်ငြိမ်ငြိမ်နှင့် လျှောက်လှမ်းနိုင်ရေး အတွက် နိုင်ငံရေးအရ တည်ငြိမ်အေးချမ်း ရန်လိုအပ်သကဲ့သို့   လုံခြုံရေးအရလည်း တည်ငြိမ်အေးချမ်းရန် လိုအပ်ကြောင်း'' ကြိုတင်မျှော်တွေး၍ အမှာစကား ပြောကြားခဲ့သည်ကို ဖတ်ရှုလိုက်မိသည်။ ဤသည်ပင် တပ်မတော်၏ ပါတီစုံဒီမိုကရေစီစနစ် ဖော်ဆောင်ရေး၌ အခြေခံကျသော လွတ်လပ်၍ တရားမျှတသည့် ရွေးကောက်ပွဲအပေါ် သဘောထား၊ မျှော်လင့်ချက်နှင့် လွတ်လပ်၍ တရားမျှတသည့် ရွေးကောက်ပွဲဖြစ်စေရန် လုပ်ဆောင်နေသည့် လုပ်ဆောင်ချက်တို့ ဖြစ်သည်။

အချုပ်အားဖြင့်ဆိုသော် မိမိတို့နိုင်ငံတော်အတွင်းရှိ နိုင်ငံသား အားလုံးသည် နိုင်ငံရေးကို နားလည်သည်ဖြစ်စေ၊ နားမလည်သည် ဖြစ်စေ၊ ပါတီစွဲ၊ အယူဝါဒစွဲ ကင်းသည့် အမျိုးသားနိုင်ငံရေးကိုတော့ နားလည်ထားရန် လိုအပ်ပါသည်။ တပ်မတော်သည် အမျိုးသားနိုင်ငံရေး တာဝန်ကို ထမ်းဆောင်ပြီး နိုင်ငံ့အရေးကို ဆောင်ရွက်သလိုပင် နိုင်ငံသူ၊ နိုင်ငံသားအားလုံးကလည်း အမျိုးသားရေး စိတ်ဓာတ်အပြည့်ဖြင့် နိုင်ငံ့ အရေးကို စိတ်ဝင်စားပြီး အမျိုးသားနိုင်ငံရေး တာဝန်များကို တတ်စွမ်းသရွေ့ထမ်းရွက်ကြပါမူ ကျွန်ုပ်တို့အမိမြန်မာနိုင်ငံတော်၏ အနာဂတ်သည် လည်း ခေတ်မီဖွံ့ဖြိုးတိုးတက်သော ဒီမို ကရေစီနိုင်ငံတော်ကြီး ဖြစ်လာမည်မှာ မလွဲဧကန်ပင်ဖြစ်ပါကြောင်း ရေးသားလိုက်ရပါ တော့သည်။ 

ဇော်မင်းထွန်း(ရေနံချောင်း)၊

မင်းသီဟ

Read 7 times
Rate this item
(0 votes)
Last modified on Monday, 23 March 2020 10:06

Latest from ကေတု