SJ WorldNews - шаблон joomla Авто

စဉ်လာမြင့်မြတ် ဆင့်ထပ်ဖော်ညွှန်း တပ်မတော်၏ မြတ်မော်ကွန်း

Thursday, 26 March 2020 10:58 Written by  font size decrease font size decrease font size increase font size increase font size

နိုင်ငံတစ်နိုင်ငံဖြစ်တည်ရန်မှာ တိကျပိုင်းခြား သတ်မှတ်ထားသော  ပိုင်နက်နယ်မြေ၊ မှီတင်းနေထိုင်သော ပြည်သူလူထု၊ အုပ်ချုပ်သော အစိုးရ၊ အချုပ်အခြာအာဏာနှင့် နိုင်ငံတကာ အသိအမှတ်ပြုမှု ဟူသည့် ဂုဏ်အင်္ဂါငါးရပ်နှင့်  ပြည့်စုံနေရမည်ဖြစ်သည်။ နိုင်ငံတော်၏ တည်ရှိပြီးသော အချုပ်အခြာ၊ မြေ၊ ရေ၊ လေ၊ နယ်နိမိတ် မကျိုးမပေါက်စေရေး အတွက် အရေးကြီးသော အခန်းကဏ္ဍမှာ ကာကွယ်ရေး ကဏ္ဍပင်ဖြစ်သည်။ ထို့ကြောင့်ပင် တပ်မတော် တစ်ရပ် မရှိမဖြစ် ဖွဲ့စည်းထားရန်   လိုအပ်သည်။

အဆိုပါ လိုအပ်ချက်များနှင့်အညီ မြန်မာ့တပ်မတော်ကို ဖွဲ့စည်းထားရှိသည်။ မြန်မာ့ တပ်မတော်သည်  အလိုအလျောက် ပေါ်ပေါက်လာခြင်းမျိုး မဟုတ်ဘဲ တိုင်းပြည်အတွက် လွတ်လပ်ရေး ကြိုးပမ်းမှုနှင့်အတူ ပေါ်ထွန်း လာခြင်းဖြစ်သည်။ ခေတ်မီအင်အား တောင့်တင်းပြီး စွမ်းရည်ထက်မြက်သော တပ်မတော်ကို ဒေသတွင်း နိုင်ငံများအပြင် ကမ္ဘာ့နိုင်ငံများကလည်း အသိအမှတ်ပြု လေးစားနေရသည်မှာ  ငြင်း၍မရသော ပကတိအရှိတရားပင်ဖြစ်သည်။

အချုပ်အခြာအာဏာ တည်တံ့ခိုင်မြဲရေး၊ ပိုင်နက်နယ်မြေ တည်တံ့ခိုင်မြဲရေး၊ တိုင်းရင်းသား စည်းလုံးညီညွတ်မှု တည်တံ့ခိုင်မြဲရေးတည်းဟူသော နိုင်ငံတော် တည်တံ့ခိုင်မြဲရေးအတွက် လိုအပ်ချက်မှန်သမျှကို အခိုင်အမာကာကွယ် စောင့်ရှောက်ဖြည့်ဆည်း သွားရန်မှာ  တပ်မတော်၏ အဓိကတာဝန်ဖြစ်သည်။ နိုင်ငံ တည်တံ့ခိုင်မြဲရေး၊ အေးချမ်းတည်ငြိမ်ရေးနှင့် ဖွံ့ဖြိုးတိုးတက်ရေးတည်းဟူသော အမျိုးသား နိုင်ငံရေး လုပ်ငန်းစဉ်များကို ဆောင်ရွက်နိုင်ရန် အတွက် လက်နက်ကိုင်အင်အား တစ်ရပ်ကို မလွဲမသွေ ထူထောင်ထားရှိရန် လိုအပ်ပေသည်။

တပ်မတော်ဟူသည်မှာ အချုပ်အခြာ အာဏာပိုင် နိုင်ငံတစ်ခုအတွက် ဦးလည်မသုန် ထမ်းဆောင်ရသော အမျိုးသား အကျိုးစီးပွားဆိုင်ရာ ကိစ္စရပ်များကို တာဝန်ယူသော အဖွဲ့အစည်းဖြစ်သည်။ ပါတီနိုင်ငံရေးများနှင့် မပတ်သက် မဆက်နွှယ်ဘဲ အမျိုးသား နိုင်ငံရေးကို ဦးထိပ်ရွက်လျက် ဦးဆွေးဆံမြည့် ထမ်းဆောင်ရသော  လက်နက်ကိုင် အဖွဲ့အစည်းဖြစ်သည်။ တပ်မတော်ဟူသည် အင်အား အကြီးအမားရှိခြင်း၊ ပြည်သူတို့ အားထားရာဖြစ်ခြင်းဟူ၍ အတုလဆရာတော်ခင်ကြီးဖျော်က အဓိပ္ပာယ် ဖွင့်ဆိုခဲ့သည်။

မြန်မာအဘိဓာန်က အဓိပ္ပာယ်ဖွင့်ဆိုရာ၌ တပ်မတော်ဟူသည် ကြည်းတပ်၊ ရေတပ်၊ လေတပ်ပါဝင်သော နိုင်ငံတော် ကာကွယ်ရေး တပ်ပေါင်းစုဟု ဖွင့်ဆိုထားသည်။

မြန်မာနိုင်ငံသည် ရှေးပဝေသဏီကပင် ကိုယ့်ထီးကိုယ့်နန်း ကိုယ့်ကြငှန်းဖြင့် ကမ္ဘာ့အလယ် ထည်ထည်ဝါဝါ ရပ်တည်နေထိုင်နိုင်ခဲ့သည့် နိုင်ငံတစ်နိုင်ငံဖြစ်ခဲ့သည်။ ဘီစီ ၃ ရာစုခန့်ကစ၍ ဗိဿနိုး၊ ဟန်လင်း၊ သုဝဏ္ဏဘုံမိ၊ တကောင်း၊ ဝေသာလီ၊ သရေခေတ္တရာ  စသော ပဒေသရာဇ်နိုင်ငံများ ထူထောင်၍  ကိုယ့်မင်းကိုယ့်ချင်း အုပ်ချုပ်နေထိုင်ခဲ့သော လွတ်လပ်သော နိုင်ငံဖြစ်သည်။

ပြည်ထောင်စုမြန်မာနိုင်ငံသည် ခေတ်အဆက်ဆက် ခိုင်မာသော သမိုင်းကြောင်းများရှိခဲ့သည်။ ၁ဝ၄၄-၁ဝ၇၇ ခုနှစ် အနော်ရထာမင်း လက်ထက်တွင် လည်းကောင်း၊ အေဒီ ၁၅၅၁-၁၅၈၁ ခုနှစ် ဘုရင့်နောင်လက်ထက်တွင် လည်းကောင်း၊  အေဒီ ၁၇၅၂-၁၇၆ဝ ပြည့်နှစ် အလောင်းဘုရား လက်ထက်တွင် လည်းကောင်း ကာကွယ်ရေး အင်အားကို ကျောထောက်နောက်ခံပြုလျက် သုံးကြိမ်တိုင်တိုင် စည်းလုံးညီညွတ်သော မြန်မာနိုင်ငံတော်ကြီးအဖြစ် ခံ့ညားထည်ဝါစွာ တည်ထောင်နိုင်ခဲ့သည်။ ထိုခေတ် ကာလများတွင် ဒေသတွင်း သာမက ကမ္ဘာ့အဆင့် အထိပါ နိုင်ငံရေး၊ စစ်ရေး၊ စီးပွားရေး၊ လူမှုရေးနယ်ပယ် ပေါင်းစုံတွင်  ဂုဏ်ရှိန်ရောင်ဝါ ထွန်းပြောင်နိုင်ခဲ့သည်။ ကျူးကျော် စော်ကားသူများကိုလည်း စည်းလုံးညီညွတ်မှု စွမ်းအား၊ ကာကွယ်ရေး စွမ်းအားတို့ဖြင့် တိုက်ထုတ်နိုင်ခဲ့သည်။ အင်အားတောင့်တင်းပြီး  စွမ်းရည်ထက်မြက်သော တပ်မတော်များ ဖွဲ့စည်းတည်ထောင်မှုကြောင့်သာ ခိုင်မာစွာ ရပ်တည်နိုင်ခဲ့သည်ဆိုသော သက်သေသာဓက သမိုင်းဖြစ်စဉ်များဖြစ်ပေသည်။

၁၉ ရာစုတွင်  နယ်ချဲ့ဗြိတိသျှတို့က အိန္ဒိယနိုင်ငံကို ၎င်းတို့ အင်ပါယာအတွင်း သွတ်သွင်းခဲ့ပြီး ထိုမှတစ်ဆင့် မြန်မာနိုင်ငံအား ၁၈၂၄ ခုနှစ်၊ ၁၈၅၂ ခုနှစ်၊ ၁၈၈၅ ခုနှစ်တို့တွင် ကျူးကျော်စစ် သုံးကြိမ်ဆင်နွှဲကာ ကိုလိုနီအဖြစ် သိမ်းပိုက်ခဲ့ကြသည်။ မြန်မာတို့ တစ်မျိုးသားလုံး  သူ့ကျွန်ဘဝရောက်ခဲ့ကာ   လွတ်လပ်ရေး ဆုံးရှုံးခဲ့ရသည်။

ဗြိတိသျှနယ်ချဲ့လက်အောက်တွင် သူ့ကျွန်အဖြစ် မနေလိုကြသော တိုင်းရင်းသား သူရဲကောင်းများက   စည်းလုံးညီညွတ်စွာ တော်လှန်တိုက်ခိုက်ခဲ့ကြသည်။ မြန်မာတို့၏ မျိုးချစ်စိတ်နှင့် ဇာတိမာန်ကို ဂုဏ်ရောင် ထွန်းပြောင်စွာ ပြသနိုင်ခဲ့ကြသည်။ ရရာလက်နက် စွဲကိုင်လျက်   နယ်ချဲ့တို့အား အသက်ပေးကာ  နည်းလမ်းပေါင်းစုံဖြင့် တိုက်ထုတ်ခဲ့ကြသည်။ သို့သော် စနစ်တကျ စုဖွဲ့လေ့ကျင့် တိုက်ခိုက်ခြင်းမျိုး မရှိခဲ့သဖြင့် အသက်ကိုသာ   စွန့်လွှတ်ခဲ့ကြရသည်။ ထို့နောက် တိုင်းရင်းသားများ အကြား မျိုးချစ်စိတ်ဓာတ် ရှင်သန်နိုးကြားလာသဖြင့် ဝိုင်အမ်ဘီအေ၊ ဂျီစီဘီအေ၊ တို့ဗမာအစည်းအရုံး၊ ဗမာ့ထွက်ရပ်ဂိုဏ်း စသည့် လူထုအခြေပြု အဖွဲ့အစည်းများ ဖွဲ့စည်းလှုပ်ရှားခဲ့ကြသည်။

၁၉၃၉ ခုနှစ် ဒုတိယ ကမ္ဘာစစ်ဖြစ်ပွားချိန် နယ်ချဲ့ကို  လက်နက်စွဲကိုင် တော်လှန်ရန် မြန်မာလူငယ်တို့ စတင်ကြိုးပမ်းကြသည်။

သခင်အောင်ဆန်း အမှူးပြုသော မြန်မာလူငယ်တို့သည် ဂျပန်နှင့် အဆက်အသွယ်ရကာ ဂျပန်ပြည်သို့ လျှို့ဝှက်စွာ ထွက်ခွာခဲ့ကြသည်။ မြန်မာပြည်မှ စွန့်စားထွက်ခွာခဲ့ကြသော မြန်မာလူငယ် ရဲဘော်သုံးကျိပ်သည် ၁၉၄၁ ခုနှစ်အတွင်း ဂျပန်တို့က အပြင်းအထန် လေ့ကျင့်သင်ကြားပေးသော စစ်သင်တန်းကို တက်ရောက်ခွင့် ရခဲ့ကြသည်။

ရဲဘော်သုံးကျိပ် ဦးဆောင်၍   ဗမာ့လွတ်လပ်ရေး တပ်မတော်(BIA)ကို ၁၉၄၁ ခုနှစ်  ဒီဇင်ဘာ ၂၇ ရက်တွင် ဗန်ကောက်မြို့တွင် စတင်ဖွဲ့စည်းခဲ့သည်။ ၁၉၄၂ ခုနှစ် ဇူလိုင် ၂၇ ရက်တွင် ဗမာ့လွတ်လပ်ရေး တပ်မတော်(BIA)ကို  ဖက်ဆစ်တို့ အလိုကျ ဖျက်သိမ်းခဲ့ရပြီး  ဗမာ့ကာကွယ်ရေး တပ်မတော် (BDA)အဖြစ်  ပြောင်းလဲဖွဲ့စည်းခဲ့ရသည်။ ၁၉၄၅ ခုနှစ်မတ် ၂၇ ရက်တွင် ကမ္ဘာသိ ဖက်ဆစ်တော်လှန်ရေးကြီးကို ဗမာ့တပ်မတော်က ဦးဆောင်လျက် တစ်နိုင်ငံလုံး   အုံကြွပါဝင် ဆင်နွှဲခဲ့သည်။

ဗြိတိသျှတို့သည် ဖက်ဆစ်ဂျပန်ကို စွမ်းစွမ်းတမံ တော်လှန်တိုက်ခိုက်ခဲ့သော မျိုးချစ်ဗမာ့တပ်မတော်၏  စွမ်းရည်သတ္တိကို လည်းကောင်း၊  ပြည်သူတို့၏ စည်းလုံးညီညွတ်မှု စွမ်းအားကို လည်းကောင်း မျက်ဝါးထင်ထင် တွေ့မြင်လိုက်ရပြီးနောက် မြန်မာနိုင်ငံအား လွတ်လပ်ရေး ပေးရတော့သည်။ မြန်မာနိုင်ငံသည် ၁၉၄၈ ခုနှစ် ဇန်နဝါရီ ၄ ရက်တွင် ဗြိတိသျှနယ်ချဲ့တို့ လက်အောက်မှ   လုံးဝလွတ်မြောက်ကာ အချုပ်အခြာအာဏာပိုင် နိုင်ငံ တစ်နိုင်ငံအဖြစ် ပြန်လည်ရောက်ရှိ ရပ်တည်လာနိုင်ခဲ့သည်။

ထို့နောက် တပ်မတော်သည် လွတ်လပ်ရေးနှင့်အတူ   တစ်ပါတည်း ပါလာသော ပြည်တွင်းလက်နက်ကိုင် ဆူပူသောင်းကျန်းမှုများကို ခေတ်အဆက်ဆက် အသက်စွန့်၍ နှိမ်နင်းခဲ့ရပြန်သည်။  တပ်မတော်သည် တိုင်းပြည်အတွင်း အရေးကြုံတိုင်း ရှေ့မှနေ၍ မားမားမတ်မတ် ရပ်တည်ကာ ပြည်သူတို့၏ အသက်အိုးအိမ် စည်းစိမ်များအား ကာကွယ်စောင့်ရှောက် ခဲ့ရသည်ကို သမိုင်းဖြစ်စဉ်များက သက်သေပြလျက် ရှိပေသည်။

တပ်မတော်သည် ၁၉၅၈ ခုနှစ် ပါလီမန် ဒီမိုကရေစီခေတ်တွင် နိုင်ငံတော် တည်ငြိမ်အေးချမ်းရေး အတွက် အိမ်စောင့်အစိုးရအဖြစ် လည်းကောင်း၊  ၁၉၆၂ ခုနှစ်တွင် တော်လှန်ရေး ကောင်စီအဖြစ် လည်းကောင်း၊ ၁၉၈၈ ခုနှစ်တွင် နိုင်ငံတော် ငြိမ်ဝပ်ပိပြားမှု တည်ဆောက်ရေး   အဖွဲ့အဖြစ် လည်းကောင်း တိုင်းပြည်၏ တာဝန်များကို ခေတ်အဆက်ဆက် ကျေပွန်စွာ ထမ်းဆောင်ခဲ့ရသည်။ ဤသို့ဖြင့်  နိုင်ငံတော် အေးချမ်းသာယာရေးနှင့် ဖွံ့ဖြိုးရေးကောင်စီ လက်ထက်တွင် ဒီမိုကရေစီ အသွင်ကူးပြောင်းရေးကို ဆောင်ရွက်ခဲ့သည်။ ၂ဝဝ၈ ခုနှစ် ဖွဲ့စည်းပုံ အခြေခံဥပဒေနှင့် အညီ၂ဝ၁၁ ခုနှစ် မတ် ၃ဝ ရက်တွင် နိုင်ငံတော်တာဝန် အရပ်ရပ်ကို ဦးသိန်းစိန် ဦးဆောင်သော အရပ်သားအစိုးရထံသို့ စနစ်တကျ လွှဲပြောင်းပေးခဲ့သည်။ ပြည်သူက ရွေးချယ်ပေးလိုက်သည့် လွှတ်တော် ကိုယ်စားလှယ်များဖြင့် ဖွဲ့စည်းထားသော အစိုးရသစ်များ၏  ဒီမိုကရေစီ နိုင်ငံတော်ကြီး ထူထောင်ရေး   ပြည်သူတို့နှင့် အတူ လက်တွဲကာ အရေးကြုံတိုင်း ပြည်သူ့ရှေ့က မားမားမတ်မတ် ရပ်တည်လျက်ရှိသည်။

လွတ်လပ်ရေး ကြိုးပမ်းဆောင်ရွက်မှုများနှင့်အတူ သမိုင်းအဆက်ဆက် ထင်ပေါ်လာခဲ့သည့် တပ်မတော်သည်  ဒီမိုကရေစီစနစ်ဖြင့်    လျှောက်လှမ်းလာနေသည့် ယနေ့ကာလအချိန်အထိ ကြိုးပမ်းဆောင်ရွက်ချက်များသည် ပြည်သူ့အတွက်သာ ဖြစ်ခဲ့သည်။ ၂ဝဝ၈ ခုနှစ် နိုင်ငံတော်ဖွဲ့စည်းပုံ အခြေခံဥပဒေ  အခန်း(၁)နိုင်ငံတော်၏ အခြေခံမူများပုဒ်မ ၂ဝ ပြဋ္ဌာန်းချက်များမှာ ပုဒ်မခွဲ(က) တပ်မတော်သည်  အင်အားတောင့်တင်းပြီး စွမ်းရည်ထက်မြက်သော ခေတ်မီသည့်  တစ်ခုတည်းသော မျိုးချစ်တပ်မတော်ဖြစ်သည်။ (ခ)တပ်မတော်သည် တပ်ပိုင်းဆိုင်ရာ ကိစ္စရပ်အားလုံးကို လွတ်လပ်စွာ စီမံခန့်ခွဲစီရင် ဆောင်ရွက်ပိုင်ခွင့်ရှိသည်။ (ဂ)တပ်မတော်ကာကွယ်ရေး ဦးစီးချုပ်သည်  လက်နက်ကိုင် တပ်ဖွဲ့အားလုံး၏ အကြီးအကဲ ဖြစ်သည်။ (ဃ)တပ်မတော်သည် နိုင်ငံတော် လုံခြုံရေးနှင့် ကာကွယ်ရေးတွင် ပြည်သူတစ်ရပ်လုံး ပါဝင်ရေးအတွက် စီမံဆောင်ရွက်ခွင့် ရှိသည်။ (င)ပြည်ထောင်စု မပြိုကွဲရေး၊ တိုင်းရင်းသား စည်းလုံးညီညွတ်မှု မပြိုကွဲရေးနှင့် အချုပ်အခြာအာဏာ တည်တံ့ခိုင်မြဲရေးတို့ကို   ကာကွယ် စောင့်ရှောက်ရန် တပ်မတော်တွင် အဓိက တာဝန်ရှိသည်။

(စ)တပ်မတော်သည်  ဖွဲ့စည်းပုံ အခြေခံဥပဒေကို ကာကွယ်စောင့်ရှောက်ရန် အဓိက တာဝန်ရှိသည်ဟူ၍ အသီးသီး ပြဋ္ဌာန်းထားရှိပေသည်။

တပ်မတော်သည် ပြည်သူတို့ကြုံတွေ့ခဲ့ရသည့် သဘာဝ ဘေးအန္တရာယ်များ၊ အခက်အခဲများကိုလည်း အတတ်နိုင်ဆုံး ဝိုင်းဝန်းကူညီ ဆောင်ရွက်ခဲ့ကြသည်။ မြန်မာနိုင်ငံတွင် မည်သည့်အချိန်တွင်မျှ မေ့ပျောက်နိုင်မည် မဟုတ်သည့်   နာဂစ်ကဲ့သို့သော သဘာဝကပ်ဆိုးကြီးကြောင့်  ဘေးဒုက္ခရောက်ခဲ့ရသော ပြည်သူလူထုကို ကူညီကယ်ဆယ် စောင့်ရှောက်ခဲ့သည့် တပ်မတော်သားတို့၏ ပုံရိပ်မှာ ပြည်သူများ၏ အသည်းနှလုံးတွင် ထဲထဲဝင်ဝင် ရှိနေခဲ့သည်။ ထို့ပြင် နေရာဒေသတိုင်းတွင် တွေ့ကြုံခဲ့ရသည့်  ရေဘေး၊ မီးဘေး၊  ငလျင်ဘေး  စသည့် သဘာဝဘေးအန္တရာယ် ကျရောက်တိုင်း ပြည်သူတို့၏ဘေးတွင် အစဉ်အမြဲရောက်ရှိ ကူညီနေသည်မှာ  တပ်မတော်သားများပင်ဖြစ်သည်။  ဒေသအသီးသီးရှိ ပြည်သူများအတွက် ကျန်းမာရေး စောင့်ရှောက်မှု အဝဝကိုလည်း ဒေသအရောက် ကွင်းဆင်းကုသပေးခြင်းများ ပြုလုပ်ပေးလျက်ရှိသည့်အပြင် ရေရှားပါးသည့် ဒေသနေပြည်သူများ အတွက် ရေဖြည့်ဆည်းပေးခြင်း စသည့် ပြည်သူ့အကျိုးပြု လုပ်ငန်းများကိုလည်း ဆောင်ရွက်ပေးလျက်ရှိသည်။

လွတ်လပ်ရေးရပြီး နောက်ပိုင်း တိုင်းရင်းသား ညီအစ်ကို   မောင်နှမများအကြား အကြောင်းအမျိုးမျိုးကြောင့် သံသယနှင့် ပဋိပက္ခများ ပေါ်ပေါက်ခဲ့ရာ   အဆိုပါကိစ္စရပ်များ ကင်းစင်ပပျောက်ပြီး ရေရှည်တည်တံ့သည့် စစ်မှန်သော ငြိမ်းချမ်းရေးရရှိရန်နှင့် ဒီမိုကရေစီဖက်ဒရယ် ပြည်ထောင်စု တည်ဆောက်နိုင်ရန်အတွက် အမျိုးသား ပြန်လည်သင့်မြတ်ရေးနှင့် ပြည်ထောင်စု ငြိမ်းချမ်းရေး လုပ်ငန်းစဉ်ကို တပ်မတော်၏ ငြိမ်းချမ်းရေး လုပ်ငန်းစဉ်(၆)ရပ်နှင့်အညီ နိုင်ငံတော်အစိုးရက ဆောင်ရွက်နေသည့် ပြည်ထောင်စုငြိမ်းချမ်းရေး ညီလာခံ-(၂၁) ရာစုပင်လုံ ကျင်းပရာတွင်  တပ်မတော် အင်အားစုကလည်း အတူတကွပူးပေါင်း ပါဝင်ဆောင်ရွက်လျက် ရှိနေပါသည်။

တပ်မတော်၏  သမိုင်းကြောင်းသည် မြန်မာ့လွတ်လပ်ရေး သမိုင်းကြောင်းနှင့် ယှဉ်တွဲလျက်ရှိသည်။ လွတ်လပ်ရေး ကြိုးပမ်းမှုနှင့်အတူ အစဉ်အလာမြင့်မြတ်မှုများဖြင့် ပေါက်ဖွား ပေါ်ထွန်းလာခဲ့သည့် တပ်မတော်သည် သမိုင်းကြောင်း အစဉ်အလာအရ နိုင်ငံတော်နှင့် ပြည်သူများ၏ အကျိုးစီးပွားကို ထာဝစဉ်ရှေးရှု သယ်ပိုးထမ်းဆောင်လျက်ရှိသည်။ နိုင်ငံတော်တွင် အရေးကြုံသည့်အခါတိုင်း အသက်ကိုပဓာနမထားဘဲ နိုင်ငံတော်နှင့်ပြည်သူလူထု၏ အကျိုးစီးပွားအတွက် စွန့်လွှတ်စွန့်စား ဆောင်ရွက်ခြင်း၊ ပိုင်နက်နယ်မြေနှင့် အချုပ်အခြာအာဏာ တည်တံ့ခိုင်မြဲရေးအတွက်   စောင့်ရှောက်ခြင်း၊ ထိန်းသိမ်းခြင်းများကို ဆောင်ရွက်ခဲ့ပါသည်။

တပ်မတော်၏ ဖြတ်သန်းလာခဲ့ရသည့် သမိုင်းကြောင်း အစဉ်အလာအရ တိုင်းပြည်၏ နိုင်ငံရေးပုံစံ၊ နိုင်ငံရေးလမ်းကြောင်း မည်သို့မည်ပုံပြောင်းလဲစေကာမူ တပ်မတော်အနေဖြင့် မည်သည့် တိုက်တွန်းချက်မှ မပါဝင်ဘဲ နိုင်ငံတော်ကာကွယ်ရေး တာဝန်နှင့် အမျိုးသား နိုင်ငံရေးတာဝန်များ ထမ်းဆောင်လျက်ရှိနေသည်ကို မြင်တွေ့ရပါသည်။

တပ်မတော်သည် နိုင်ငံတော်ကာကွယ်ရေး တာဝန်ကို ထမ်းဆောင်ရာ၌  စစ်ရေးတာဝန် တစ်ခုတည်းသာမဟုတ်ဘဲ  တရားဥပဒေ စိုးမိုးရေးနှင့် တည်ငြိမ်အေးချမ်းရေးကိုပါ ဆောင်ရွက်ရခြင်းကြောင့် နိုင်ငံတော် ကာကွယ်ရေး တာဝန်ကို ပြည်သူနှင့် တပ်မတော် တစ်စိတ်တစ်ဝမ်းတည်း   လက်တွဲဆောင်ရွက်ကြရသည်။ နိုင်ငံတော် ကာကွယ်ရေး တာဝန်ဆိုသည်မှာ ပြည်တွင်းပြည်ပ အန္တရာယ်များကို လုံခြုံအောင် ကာကွယ်ရုံမက ပြည်သူတို့၏ အသက် အိုးအိမ် စည်းစိမ်များ၊ နိုင်ငံတော်နှင့်ပြည်သူတို့၏ အကျိုးစီးပွားများ၊ နိုင်ငံတော်၏ မြေပေါ်မြေအောက် သယံဇာတများ ထိန်းသိမ်းစောင့်ရှောက် ကာကွယ်ရမည့် တာဝန် စသည် တို့ပါဝင်ခြင်းကြောင့် ကျယ်ပြန့်သော အဓိပ္ပာယ်ဆောင်ပေသည်။

တပ်မတော်ကို အခြေအနေအကြောင်း အမျိုးမျိုးအရ ဗမာ့လွတ်လပ်ရေး တပ်မတော်၊ ဗမာ့ကာကွယ်ရေး တပ်မတော်၊ ဗမာ့အမျိုးသား တပ်မတော်၊ မျိုးချစ်ဗမာ့တပ်မတော် စသည်ဖြင့်  စသည့် အမည်အမျိုးမျိုးဖြင့် ပြောင်းလဲဖွဲ့စည်း ခဲ့ရသော်လည်း ရည်ရွယ်ချက်နှင့် ခံယူချက် မပြောင်းခဲ့ပါ။ နိုင်ငံနှင့် လူမျိုးအတွက် သစ္စာစောင့်သိခဲ့သည်သာ ဖြစ်သည်။ ထိုသို့မှန်ကန်သော ရပ်တည်ချက်ကြောင့်ပင် မြန်မာနိုင်ငံသည် အိန္ဒိယနိုင်ငံထက် နောက်ကျပြီးမှ ကိုလိုနီနိုင်ငံဖြစ်ခဲ့ပြီး အိန္ဒိယနိုင်ငံထက်စောစွာ ကိုလိုနီလက်အောက်မှ လွတ်မြောက်ခဲ့သည်။ ထိုသို့ သမိုင်းအစဉ်အလာကောင်းများ ရှိသော တပ်မတော်ကို    ဂုဏ်ပြုသည့် အနေဖြင့် ဖက်ဆစ်ဂျပန် တော်လှန်ရေး စတင်ခဲ့သည့် ၁၉၄၅ ခုနှစ် မတ်လ ၂၇ ရက်နေ့ကို တပ်မတော်နေ့အဖြစ် သတ်မှတ်ခဲ့ပါသည်။ တပ်မတော်နေ့ကို အစဉ်သတိရစေသော အားဖြင့် အခမ်းအနားများ ကျင်းပ၍ ဂုဏ်ပြုလာခဲ့သည်မှာ ၂ဝ၂ဝ ပြည့်နှစ် မတ်လ၂၇ ရက်နေ့တွင် မြန်မာ့တပ်မတော်၏ (၇၅)နှစ်မြောက် စိန်ရတု တပ်မတော်နေ့သို့  ရောက်ရှိလာတော့မည်ဖြစ်ပါသည်။

ပြည်ထောင်စုတပ်မတော်သည် မြန်မာနိုင်ငံ၏ လွတ်လပ်ရေး ကြိုးပမ်းမှု သမိုင်းနှင့်အတူ ပေါ်ထွန်းလာခြင်းဖြစ်ပေရာ ထိုသို့တိုင်းပြည်၏ လိုအပ်ချက်အရ ဖြစ်တည်လာသော  တပ်မတော်သည် နိုင်ငံတော် ကာကွယ်ရေး တာဝန်အပြင် နိုင်ငံအတွင်း အခက်အခဲ အကျပ်အတည်းများ ကြုံတွေ့ရသည့် အချိန်တိုင်း ရှေ့မှ မားမားမတ်မတ် ရပ်တည်ခဲ့ရသည်။ ထိုအစဉ်အလာကောင်းများ ရှိသော တပ်မတော်သည် နောင်အနာဂတ်တွင်လည်း Standard Army အဖြစ် တည်ဆောက်ကာ နိုင်ငံနှင့်လူမျိုးကို အစဉ်ကာကွယ် စောင့်ရှောက်သွားမည်မှာ မြေကြီးလက်ခတ် မလွဲပင်ဖြစ်ပါပေသည်။

နိဂုံးချုပ်ဆိုရပါလျှင် မြန်မာနိုင်ငံ၏ ထူးခြားခမ်းနားသော မြန်မာ့တပ်မတော်၏ (၇၅)နှစ်မြောက် စိန်ရတု တပ်မတော်နေ့ကို ဂုဏ်ပြုကြရမည်ဖြစ်ပါသည်။ တပ်မတော်၏ အစဉ်အလာရှိသော သမိုင်းသည် မြန်မာနိုင်ငံ၏ သမိုင်းဖြစ်သည်။  မျိုးချစ်တပ်မတော်၊ စည်းကမ်းသေဝပ်သော တပ်မတော်၊ သစ္စာရှိသော တပ်မတော်၊ စည်းလုံးညီညွတ်သော တပ်မတော်၊ စွမ်းရည်ရှိသော တပ်မတော်၊ စိတ်ဓာတ်မြင့်မြတ်သော တပ်မတော်၊ အခက်အခဲကို ရင်ဆိုင်ကျော်လွှားနိုင်သည့်၊ရဲစွမ်းသတ္တိရှိသော တပ်မတော်  စသည့် အရည်အချင်းကောင်းများ ပြည့်စုံသော တပ်မတော်ကို စဉ်လာမြင့်မြတ် ဆင့်ထပ်ဖော်ညွှန်း တပ်မတော်၏ မြတ်မော်ကွန်း အဖြစ် အထူးထုတ်ဖော်ကာ မြန်မာနိုင်ငံ၏ ထူးခြားခမ်းနားပြီး သမိုင်းဝင် နေ့တစ်နေ့ဖြစ်သော ၂ဝ၂ဝ ပြည့်နှစ် မတ်လ ၂၇ ရက်နေ့တွင် ကျရောက်သည့် တပ်မတော်၏(၇၅)နှစ်မြောက်  စိန်ရတုတပ်မတော်နေ့ကို ဂုဏ်ပြုရေးသား လိုက်ရပါသည်။  

အောင်ခန့်ဖြိုးဝေ(တောင်ငူ)

Read 10 times
Rate this item
(0 votes)
Last modified on Thursday, 26 March 2020 11:00

Latest from ကေတု