SJ WorldNews - шаблон joomla Авто

အရည်အသွေးပြည့်ကျန်းမာရေး လူတိုင်းရအောင်ဆောင်ရွက်ပေး

Sunday, 07 April 2019 10:04 Written by  font size decrease font size decrease font size increase font size increase font size

၁၉၄၈ ခုနှစ် ဧပြီ ၇ ရက်တွင် ကမ္ဘာ့ကျန်းမာရေးအဖွဲ့ကြီးအား  စတင်ဖွဲ့စည်းခဲ့သည့်အထိမ်းအမှတ်အဖြစ် နှစ်စဉ် ဧပြီ ၇ ရက်တွင် ကမ္ဘာ့ကုလသမဂ္ဂအဖွဲ့ဝင်နိုင်ငံများတွင် ကမ္ဘာ့ကျန်းမာရေးနေ့အခမ်းအနားများကို ကျင်းပကြသည်။ ကမ္ဘာ့လူသားအားလုံးအတွက် အရေးကြီးသည့်ကျန်းမာရေးပြဿနာတစ်ခုကို နှစ်စဉ်ရွေးချယ်ပြီး ၎င်းပြဿနာကို ဝိုင်းဝန်းဖြေရှင်းနိုင်ကြစေရန်အတွက်  ကမ္ဘာ့ကျန်းမာရေးနေ့ ဆောင်ပုဒ်များထုတ်ပြန်ကာ သတိပေးလေ့ရှိသည်။

ယခုနှစ် ၂ဝ၁၉ ခုနှစ် ဧပြီ ၇ ရက်တွင် ကျရောက်သည့် ကမ္ဘာ့ကျန်းမာရေးနေ့ ဆောင်ပုဒ်မှာ '' Universal Health Coverage: Everyone, Everywhere'' ဖြစ်ပြီး အဆိုပါဆောင်ပုဒ်ကို ''အရည်အသွေးပြည့်ကျန်းမာရေး၊ လူတိုင်းရအောင်ဆောင်ရွက်ပေး'' ဟု မြန်မာပြန်ဆိုထားသည်။ ပထမဦးစွာ ကမ္ဘာ့ကျန်းမာရေးအဖွဲ့ကြီးမှ သတ်မှတ်ထားသော ကျန်းမာခြင်း၏ အဓိပ္ပာယ်ကိုဖော်ပြလိုသည်။ ကျန်းမာခြင်း၏ အနက်အဓိပ္ပာယ်ကို ''ခန္ဓာကိုယ်ချို့ယွင်းမှုကင်း၍ ရောဂါဘယကင်းရှင်းရုံသာမက ကိုယ်၏ကျန်းမာခြင်း၊ စိတ်၏ချမ်းသာခြင်း၊ လူမှုရေးသုခနှင့်ပြည့်စုံခြင်းတို့ကိုဆိုလိုသည်''ဟု ကမ္ဘာ့ကျန်းမာရေးအဖွဲ့မှ သတ်မှတ်ထားသည်။ အဆိုပါကျန်းမာခြင်းကို လူသားတိုင်း ဆင်းရဲချမ်းသာမရွေး လက်လှမ်းမီနိုင်စေရန်နှင့် လွှမ်းခြုံမှု ရရှိနိုင်စေရန် အထူးလိုအပ်သည်။ အရည်အသွေးကောင်းသည့် ပြည့်စုံလုံလောက်သော  ကျန်းမာရေးစောင့်ရှောက်မှုများကို လူသားတိုင်းလက်လှမ်းမီရရှိနိုင်စေရန်အတွက် ဆောင်ရွက်သွားနိုင်ရန် ယခုနှစ် ကမ္ဘာ့ကျန်းမာရေးနေ့ဆောင်ပုဒ်က မီးမောင်းထိုးပြထားခြင်းဖြစ်သည်။ ပြည်သူလူထုကျန်းမာရေးနှင့်ပတ်သက်၍ ကျန်းမာရေးနှင့် အားကစားဝန်ကြီးဌာနသည် နိုင်ငံတစ်ဝန်းရှိ ပြည်သူလူထုအားလုံးအား အကောင်းဆုံးသော အကျိုးကျေးဇူးများ ရရှိစေမည့်လုပ်ငန်းရပ်များကို   အချိန်တိုအတွင်း ခံစားနိုင်စေမည့် အောင်မြင်မှုများရရှိစေရန် ကြိုးပမ်းဆောင်ရွက်လျက်ရှိသည်။ ထိုသို့ဆောင်ရွက်ရာတွင် ဝန်ကြီးဌာနအနေဖြင့် ကျန်းမာရေး အသိပညာမြှင့်တင်ရေးလုပ်ငန်းများ၊ ကျောင်းကျန်းမာရေး လုပ်ငန်းများ၊ အာဟာရဖွံ့ဖြိုးရေး လုပ်ငန်းများ၊ မိခင်နှင့်ကလေး ကျန်းမာရေးလုပ်ငန်းများ၊ လုပ်ငန်းခွင်နှင့်ပတ်ဝန်းကျင် ကျန်းမာရေးလုပ်ငန်းများ၊ ကူးစက်တတ်သော ရောဂါနှင့် မကူးစက်တတ်သောရောဂါများအတွက် ကြိုတင်ကာကွယ်ရေးနှင့် ကုသရေးလုပ်ငန်းများ၊ ကျန်းမာရေး အဆင့်အတန်း မြှင့်တင်ရေးနှင့် ကျန်းမာမှုပြန်လည်ထူထောင်ရေး လုပ်ငန်းများကို နှီးနွှယ်ဝန်ကြီးဌာနများ၊ ဖွံ့ဖြိုးမှုမိတ်ဖက် အဖွဲ့အစည်းများဖြစ်သည့် ကုလသမဂ္ဂ အဖွဲ့အစည်းများ၊ ပြည်တွင်းပြည်ပလူမှုရေး အဖွဲ့အစည်းများ၊ တိုင်းရင်းသား ကျန်းမာရေးအဖွဲ့အစည်းများ၊ ပြည်သူလူထုအခြေပြုအဖွဲ့အစည်းများ စသည့်အကျိုးတူပူးပေါင်းဆောင်ရွက်မည့် အသင်းအဖွဲ့များ၊ ပညာရပ်ဆိုင်ရာကျွမ်းကျင်သူများနှင့် လက်တွဲ၍ စီမံကိန်းများ၊ စီမံချက်များ၊ လုပ်ငန်းစဉ်များချမှတ်ကာ တက်ညီလက်ညီအားသွန်ခွန်စိုက်ပူးပေါင်းဆောင်ရွက်လျက်ရှိသည်။ သို့ရာတွင် ကျန်းမာရေးကဏ္ဍ ဖွံ့ဖြိုးတိုးတက်ရေးအတွက် အားဖြည့်ဆောင်ရွက်ရန် လိုအပ်လျက်ရှိသော လုပ်ငန်းနယ်ပယ်များရှိနေဆဲဖြစ်သည်။ မြန်မာနိုင်ငံအပါအဝင် ကမ္ဘာ့နိုင်ငံ အသီးသီးတွင် လူသားတိုင်းလက်လှမ်းမီသော ကျန်းမာရေးစောင့်ရှောက်မှု ရရှိနိုင်ရန် လိုအပ်ချက်များ ရှိနေပါသေးသည်။ ကမ္ဘာပေါ်ရှိ လူဦးရေ သန်း ၁ဝဝ ခန့်သည် မိမိတို့၏ ကျန်းမာရေး စောင့်ရှောက်မှုအတွက် မိမိတို့ကိုယ်တိုင် ပေးဆောင် နေရသောကြောင့် ဆင်းရဲခြင်း အခြေအနေကို ပိုမိုတွန်းအားပေးလျက် ရှိနေကြောင်းကိုလည်း တွေ့ရှိရသည်။ သို့ဖြစ်ရာ သက္ကရာဇ် ၂ဝ၂၃ ခုနှစ်တွင် ကမ္ဘာ့လူဦးရေ သန်းပေါင်း ၁ဝဝဝ အတွက် ကျန်းမာရေး စောင့်ရှောက်မှု လက်လှမ်းမီစေရေး တိုးချဲ့ဆောင်ရွက်သွားရန် လျာထားချက်များ ချမှတ်ထားသည်။ ယခုနှစ် ကမ္ဘာ့ကျန်းမာရေးနေ့ ဆောင်ပုဒ်က အဆိုပါ လုပ်ငန်းစဉ်ကို အထောက်အကူပြုစေသည်။ လူတိုင်းလက်လှမ်းမီသော ကျန်းမာရေး စောင့်ရှောက်မှု ဆိုသည်မှာ   လူတစ်ဦး တစ်ယောက်ချင်းစီတိုင်းနှင့် လူ့အဖွဲ့အစည်းတိုင်း ငွေကြေးအပါအဝင် မည်သည့်အခက်အခဲမျှ မရှိစေဘဲ အရည်အသွေး ကောင်းမွန်သော ကျန်းမာရေး စောင့်ရှောက်မှုများကို လွယ်လင့်တကူ လက်လှမ်းမီရရှိနိုင်စေရန် ဆောင်ရွက်ပေးခြင်းဖြစ်သည်။ တစ်မျိုးသားလုံးကျန်းမာရေးအတွက် လူတိုင်းလက်လှမ်းမီသော ကျန်းမာရေး စောင့်ရှောက်မှုမှာ အဓိကကျသော သော့ချက်ဖြစ်သည်။ အဆိုပါ လူတိုင်းလက်လှမ်းမီသော ကျန်းမာရေး စောင့်ရှောက်မှုကို အချို့သောနိုင်ငံများတွင် အောင်မြင်စွာ အကောင်အထည်ဖော် ဆောင်ရွက်နိုင်ပြီဖြစ်ကြောင်း လေ့လာတွေ့ရှိရသည်။ မိမိတို့ အနေဖြင့် လူတိုင်းလက်လှမ်းမီသော ကျန်းမာရေး စောင့်ရှောက်မှု ရရှိစေရန် နယ်ပယ်အသီးသီးမှ အဖွဲ့အစည်းများနှင့် အတူတကွကြိုးပမ်းအားစိုက်ပြီး ခိုင်မာသော၊ ရေရှည်တည်တံ့ရန် ထိန်းသိမ်းထားနိုင်သော၊ သာတူညီမျှမှုရှိသော လူထုအကျိုးပြု ကျန်းမာရေး စောင့်ရှောက်မှု စနစ်ဖြစ်ထွန်းပေါ်ပေါက် လာစေရန် ကြိုးပမ်းဆောင်ရွက်သွားရမည်ဖြစ်သည်။ ကျန်းမာရေးနှင့် ပြည့်စုံစေရန်အတွက် ဥစ္စာရင်လို ဥစ္စာရင်ခဲ ဆိုသကဲ့သို့ နိုင်ငံသားများ အနေဖြင့်လည်း မိမိတို့၏ ကျန်းမာရေးအတွက် မိမိတို့ကိုယ်တိုင် ဂရုပြုနေထိုင်ကြရန်လည်း အရေးကြီးသည်။ နိုင်ငံသူနိုင်ငံသားအားလုံး အသက်အရွယ်မရွေး လူတန်းစားအလွှာအသီးသီးတွင်  ကျန်းမာရေးအသိပညာများ ပြည့်ဝနေမှသာလျှင် ကျန်းမာရေးနှင့် ညီညွတ်သည့် အလေ့အကျင့်၊ အပြုအမူများဖြစ်သည့် ဘေးအန္တရာယ်ကင်းရှင်း၍ ကျန်းမာရေးကိုအကျိုးပြုသောအစားအစာများစားသုံးခြင်း၊ ကျန်းမာရေးနှင့်ညီညွတ်သည့် လူနေမှုဘဝပုံစံများဖြင့် ပြုမူနေထိုင်ခြင်း တို့ကို လိုက်နာကျင့်သုံးဆောင်ရွက်နိုင်မည်ဖြစ်သည်။ နိုင်ငံသူနိုင်ငံသားများ ကျန်းမာရေးအသိပညာများ ပြည့်ဝစေရန်အတွက် မိသားစုတိုင်း၊ အိမ်ထောင်စုတိုင်း တွင် တစ်ဦးတစ်ယောက်ချင်းစီမှစ၍ ကျန်းမာရေးအသိရှိနေရန် လိုအပ်သည်။ ဆိုလိုသည်မှာ ကျန်းမာရေးနှင့် ညီညွတ်သော လူနေမှုဘဝပုံစံများကို လူတိုင်းသိရှိပြီး လိုက်နာကျင့်သုံးနေထိုင်တတ်စေရန် လိုအပ်သည်။ မွေးကင်းစမှစ၍ ကောင်းမွန်မှန်ကန်သော မွေးကင်းစကလေးပြုစုစောင့်ရှောက်ခြင်းကိုရရှိပြီး ကလေးအရွယ်၊ ကျောင်းသား အရွယ်၊ ဆယ်ကျော်သက်အရွယ် စသည်တို့တွင်လည်းကောင်း၊ လူလတ်ပိုင်းနှင့် သက်ကြီးပိုင်းတို့တွင် လည်းကောင်း မှန်ကန်သော ကျန်းမာရေးစောင့်ရှောက်မှု များဖြင့် ကျန်းမာရေးနှင့်ညီညွတ်သော လူနေမှုဘဝပုံစံများကို ရရှိပိုင်ဆိုင်ကာ လူ့ဘဝကို စိတ်ချမ်းသာ ကိုယ်ကျန်းမာဖြင့် သက်တမ်းစေ့နေထိုင်သွားနိုင်ရန် လူသားတိုင်းတွင် အခွင့်အရေးရှိသည်။အဆိုပါ  လူသားအခွင့်အရေးများကိုရရှိနိုင်စေရန် နိုင်ငံတော်အစိုးရ တာဝန်ရှိသူများမှ ဥပဒေနှင့်အညီဆောင်ရွက်ပေးနေသကဲ့သို့ မိမိတို့ကိုယ်တိုင်ကလည်း ထိုအခွင့်အရေးများမဆုံးရှုံးစေရန် မိမိကိုယ်ကို ကျန်းမာရေးအသိဖြင့်  ကာကွယ်စောင့်ရှောက် ရမည်ဖြစ်သည်။ ကျန်းမာရေးနှင့်ညီညွတ်စေရန်အတွက်   စားအုန်းဆီကဲ့သို့သော  ခန္ဓာကိုယ်အား  ဘေးဖြစ်စေသည့်ဆီများ၊ ပြန်ကြော်ဆီများ၊ အချိုမှုန့်များ၊ အငန်ဓာတ်များကိုရှောင်ကြဉ်ခြင်း၊ အရက်သေစာသောက်စားခြင်း၊ ကွမ်းစားခြင်း၊ ဆေးလိပ် အပါအဝင် မူးယစ်ဆေးဝါးသုံးစွဲခြင်းများ စသည်တို့ကို လုံးဝမပြုလုပ်ဘဲရှောင်ကြဉ်ခြင်း၊ အချိုရည်များကိုမသောက်သုံးဘဲ ရှောင်ကြဉ်ခြင်း၊ ပုံမှန်ကိုယ်လက်လှုပ်ရှားလေ့ကျင့်ခန်းများပြုလုပ်ခြင်း၊ အလုပ်လုပ်ချိန်၊ အိပ်ချိန်၊ စားချိန်၊ အနားယူချိန် စသည်တို့ကို ပုံမှန်မျှမျှတတဖြစ်စေရန် ထိန်းညှိဆောင်ရွက်ခြင်း၊ စိတ်တည်ငြိမ်စေရန်အတွက် မိမိတို့ကိုးကွယ်ရာဘာသာအလိုက် တရားဘာဝနာအလုပ်များပြုလုပ်ခြင်းတို့သည် လူတိုင်းအလွယ်တကူဆောင်ရွက်နိုင်သော အလုပ်များဖြစ်သည်။ သို့သော် ထိုအလုပ်များကို မလုပ်ကြသူများ၊ မလုပ်နိုင်သူများရှိနေ၍သာ ကျန်းမာရေးမကောင်းသူများ၊ သက်တမ်းစေ့မနေကြရသူများ ရှိနေပြီး ဆေးရုံ၊ ဆေးခန်းများတွင် လူစည်ကားခြင်းများဖြစ်နေရသည်။ ထိုအလုပ်များသည် လွယ်သည်ဟုလည်းပြောနိုင်သလို ခက်သည်ဟုလည်း ပြော၍ရပါသည်။ ပြုလုပ်လိုသူများအတွက် တစ်နည်းအားဖြင့် ကျန်းမာရေးအသိပညာဗဟုသုတရှိပြီး  ကျင့်သုံးလိုက်နာလိုသူများအတွက် လွယ်ကူပြီး ကျန်းမာရေးအသိမရှိသူများနှင့် မိမိကိုယ်ကို ဂရုမစိုက်သူများအတွက်တော့ ခက်ခဲနေပါလိမ့်မည်။ ကျန်းမာရေးအသိပညာနည်းသူများ အထူးသဖြင့် အတန်းပညာအခြေခံမရှိသူများ၊ လူမှုစီးပွားအခြေအနေ နိမ့်ကျသူများ စသည်တို့သည် ၎င်းတို့၏အချိန်အများစုကို စားဝတ်နေရေး(အဓိကအားဖြင့် နေ့စဉ်ဘဝရပ်တည်ရေး)အတွက် ခက်ခဲပင်ပန်းစွာ ရုန်းကန်နေရသောကြောင့် ကျန်းမာရေးဗဟုသုတရှာဖွေရန် အချိန်မရှိသဖြင့် ၎င်းတို့သည် ကျန်းမာရေးနှင့် မညီညွတ်သော ပတ်ဝန်းကျင်၌ ကျန်းမာရေးနှင့် မညီညွတ်သော နေထိုင်စားသောက်မှု ပုံစံများဖြင့် အသက်ရှင် ရပ်တည်နေရပါသည်။ ထိုသူတို့သည် အရွယ်ကောင်းစဉ်ကာလ၌ပင် သွေးတိုး၊ ဆီးချို၊ ကင်ဆာမျိုးစုံ၊ လေဖြတ်ခြင်း၊ တီဘီ၊ အေအိုင်ဒီအက်စ်၊ အသည်းရောင်အသားဝါ စသည့်ရောဂါမျိုးစုံဖြင့် လူ့လောကကြီးမှ စောစီးစွာ ထွက်ခွာသွားနေရသည်။ ထို့ပြင် အချို့သော ပညာတတ်သူများ၊ လူမှုစီးပွားအခြေအနေ ကောင်းမွန်သူများသည်လည်း ကျန်းမာရေးအသိပညာ အားနည်းခြင်းကြောင့် နေထိုင်စားသောက်မှုပုံစံမမှန်သဖြင့် ရောဂါမျိုးစုံခံစားရပြီး အသက်တိုကြရသူများ ရှိနေသည်။ လူတိုင်းတွင် ကျန်းမာရေးအသိရှိမှသာ နေ့စဉ်နေထိုင်စားသောက်မှုဘဝနေဟန်များတွင် ကျန်းမာရေးနှင့်ပြည့်စုံသော အခြေအနေများကို ပြုမူကျင့်သုံးနိုင်မည်ဖြစ်သည်။ ကျန်းမာရေးအသိရှိသော အိမ်ရှင်မများကသာ မိမိ၏ မိသားစုအတွက် ကျန်းမာရေးနှင့် ပြည့်စုံသော အစားအသောက်များကို ဖန်တီးချက်ပြုတ်နိုင်မည်ဖြစ်သကဲ့သို့ ကျန်းမာရေး အသိရှိသော ဈေးသည်များကလည်း မိမိတို့၏ဖောက်သည်ဖြစ်သော ဝယ်ယူသူများအတွက် ကျန်းမာရေးနှင့်ပြည့်စုံသော လူသုံးကုန်များ၊ စားသောက်ကုန်များကို ပြုလုပ်ရောင်းချကြရမည်ဖြစ်သည်။ ထိုအခါ ဆိုးဆေးကင်းသော၊ အန္တရာယ်ရှိ ဓာတုပစ္စည်းကင်းသော၊ သက်တမ်းကုန်ဆုံးရက်စွဲ တိကျစွာဖော်ပြထားသော စားသောက်ကုန်များ ဈေးကွက်အတွင်း ရောက်ရှိလာမည်ဖြစ်သည်။ ကျန်းမာရေးအသိရှိသော ဝယ်ယူသူများက မိမိတို့ဝယ်ယူမည့်ပစ္စည်းများကို သတ်မှတ်အရည်အသွေး မီ/မမီ စိစစ်၍ စံမမီသော လူသုံးကုန်၊ စားသောက်ကုန်များကို ဝယ်ယူသုံးစွဲခြင်း မပြုလုပ်ပါက ရောင်းချသူများအနေဖြင့်လည်း အရည်အသွေးမမီသော ကုန်ပစ္စည်းများကို ဆက်လက်ရောင်းချရဲတော့မည်မဟုတ်ပါ။ ထို့ပြင် ကျန်းမာရေးအသိရှိသူများ၊ လူမှုရေးအသိတရားရှိသူများ၊ ကိုယ်ချင်းစာနာစိတ်ရှိသူများ အနေဖြင့် ကျောင်းနှင့်ကျောင်းပတ်ဝန်းကျင် သတ်မှတ်ဧရိယာအတွင်း အရက်သေစာရောင်းချခြင်း၊ ဆေးလိပ်နှင့်ကွမ်းယာ ရောင်းချခြင်းများကို ပြုလုပ်တော့မည်မဟုတ်ပါ။ မူးယစ်ဆေးဝါးရောင်းချသူများလည်း ရှိတော့မည် မဟုတ်ပါ။ လူအများအသုံးပြုသော ရုံး၊ ဆေးရုံ၊ ပန်းခြံ၊ ရုပ်ရှင်ရုံ၊ ဘတ်စကားပေါ်၊ မီးရထားပေါ်နှင့် ကန့်သတ်ဧရိယာများ စသည်တို့တွင်လည်း ရိုင်းပျသောအပြုအမူဖြစ်သည့် လူအများကိုအားမနာဘဲ ဆေးလိပ်သောက်သုံးခြင်းများလည်း ရှိတော့မည်မဟုတ်ပါ။ ဆေးဝါးအတုများ၊ စံမမီဆေးဝါးများလည်း ပျောက်ကွယ်သွားမည်ဖြစ်သည်။ လမ်းမများပေါ်တွင် စည်းကမ်းမဲ့ထွေးထားသော ကွမ်းသွေးကွက်များလည်း မြင်တွေ့ရတော့မည်မဟုတ်ပါ။ ထိုကဲ့သို့ ကဏ္ဍအသီးသီးတွင် ကျန်းမာရေးနှင့်ပြည့်စုံသော အခြေအနေများဖြစ်ပေါ်လာပါက သက်ဆိုင်ရာပြည်သူလူထု၏လူနေမှုဘဝများသည်လည်း ကျန်းမာရေးနှင့်ပြည့်စုံကောင်းမွန်သော ပျော်ရွှင်ဖွယ်မိသားစုဘဝများ ဖြစ်လာမည်ဖြစ်သည်။ ပြည်သူများ၏ကျန်းမာရေး ကောင်းမွန်ခြင်းသည် နိုင်ငံတစ်ခုအတွက် အကောင်းဆုံးသော လာဘ်လာဘဖြစ်သည်။ သို့သော် ထိုလာဘ်လာဘသည် လွယ်လွယ်နှင့်ရသော လာဘ်လာဘမျိုးမဟုတ်ဘဲ ဥာဏ်ပညာ၊   ဝီရိယတို့နှင့်ယှဉ်တွဲပြီး  စနစ်တကျရယူရသည့် ဆုလာဘ်မျိုးဖြစ်သည်။ ထိုဆုလာဘ်ကိုရရှိရန် မိမိတို့အားလုံး ဝိုင်းဝန်းပြီး အသိတရားရှိရှိဖြင့် လုပ်ဆောင်သွားရမည်ဖြစ်သည်။ ယခုအခါ မိမိတို့နိုင်ငံတွင် အမျိုးသားကျန်းမာရေး စီမံကိန်း (၂ဝ၁၇-၂ဝ၂၁)ကို အကောင်အထည်ဖော်ဆောင်ရွက်နေပြီဖြစ်သည်။ အဆိုပါ အမျိုးသားကျန်းမာရေး စီမံကိန်းသည် မိမိတို့၏ ကျန်းမာရေး ရည်မှန်းချက်ဖြစ်သည့် ပြည်သူလူထုကို အရည်အသွေး ပြည့်ဝသည့် ကျန်းမာရေး စောင့်ရှောက်မှုပေးရန်နှင့် ရေရှည်ပန်းတိုင်ဖြစ်သည့် လူတိုင်းအရည်အသွေး ပြည့်ကျန်းမာရေး စောင့်ရှောက်မှု လက်လှမ်းမီရရှိစေရေး (Universal Health Coverage)ကို အရောက်သွားနိုင်ရန်အတွက်ဖြစ်သည်။ ထိုရည်မှန်းချက် အောင်မြင်စေရန်အတွက် ကျန်းမာရေးဝန်ထမ်းများသာမက ပြည်သူပြည်သားအားလုံးက မိမိတို့ခံစားရရှိမည့် ကျန်းမာရေးဆိုင်ရာ ကောင်းကျိုးရလဒ်များ အတွက် ဝိုင်းဝန်း၍ စုပေါင်းကြိုးပမ်းကြရန် လိုအပ်သည်။ ကျန်းမာရေး အသိပညာရှိမှသာ နိုင်ငံသား တစ်ဦးချင်းစီက မိမိတို့ကိုယ်တိုင် ကျန်းမာစေရန်အတွက် အသိတရားဖြင့်  ထိန်းသိမ်းလာနိုင် မည်ဖြစ်ပြီး  မိမိ၏မိသားစုနှင့် ပတ်ဝန်းကျင်တို့ကိုလည်း ကျန်းမာသော လူနေမှုဘဝသို့ ရောက်ရှိစေရန် တွန်းအားပေးပံ့ပိုးသွား နိုင်မည်ဖြစ်သည်။ ထို့ပြင် အနာဂတ်မျိုးဆက်သစ်များ အတွက် ကျန်းမာရေးနှင့် ပြည့်စုံသော လူနေမှုဘဝပတ်ဝန်းကျင်ကိုလည်း အမွေကောင်းအဖြစ် ချန်ရစ်ခဲ့နိုင်မည်ဖြစ်သည်။ သို့ပါ၍ နိုင်ငံသူနိုင်ငံသားတို့၏ ကျန်းမာရေးအတွက် တာဝန်ရှိဌာနများ၊ ကုလသမဂ္ဂဆိုင်ရာ အဖွဲ့အစည်းများ၊ ပြည်တွင်းပြည်ပ လူမှုရေး အဖွဲ့အစည်းများ စသည်တို့နှင့် ပြည်သူများမှ ပူးပေါင်းလက်တွဲ၍ မိမိတို့တစ်ဦးချင်းစီ၏ ကျန်းမာရေးအတွက် မိမိတိုိ့ကိုယ်တိုင်က သက်ဆိုင်ရာ ကဏ္ဍအသီးသီးတွင် ကျန်းမာရေးအသိ စိတ်ဓာတ်ဖြင့် အမြဲမပြတ်စုပေါင်း၍ ဝိုင်းဝန်းကြိုးပမ်းဆောင်ရွက် ကြမှသာ အရည်အသွေးပြည့်ဝသော ကျန်းမာရေး စောင့်ရှောက်မှုများကို လူတိုင်းလူတိုင်းက အခက်အခဲမရှိ ရရှိနိုင်မည်ဖြစ်ပါကြောင်း ၂ဝ၁၉ ခုနှစ် ကမ္ဘာ့ကျန်းမာရေးနေ့ အထိမ်းအမှတ်အဖြစ် ရေးသားတင်ပြအပ်ပါသည်။

ထွန်းအောင်လှ(လုပ်ငန်းခွင်ကျန်းမာရေး)

Read 134 times
Rate this item
(0 votes)
Last modified on Sunday, 07 April 2019 10:14