SJ WorldNews - шаблон joomla Авто

ဘီလူးစီးခြင်း

Wednesday, 11 December 2019 10:11 Written by  font size decrease font size decrease font size increase font size increase font size

မေး။     ဆရာကြီးခင်ဗျာ ကျွန်တော်ညအိပ်ရင် မကြာခဏ လန့်လန့်နိုးတတ်ပါတယ်။ လေပွပြီး အိပ်မပျော်တာထင်လို့  အိပ်ရာဝင်ခါနီးမှာ အစားအသောက် တစ်ခုခုစားပြီးမှ အိပ်လေ့ရှိပါတယ်။

 လွန်ခဲ့တဲ့နှစ်ရက်က အိပ်ပျော်နေရာက ရုတ်တရက်လန့်နိုးလာပြီး အသက်ရှူမ၀ဖြစ်ပါတယ်။ ကျွန်တော့်ရင်ဘတ်ပေါ်မှာ တစ်စုံတစ်ဦးက ဖိထားသလိုဖြစ်လို့ လန့်ပြီးအော်တဲ့အခါ အသံမထွက်ပါဘူး။ တစ်ကိုယ်လုံးလည်း လှုပ်လို့မရပါဘူး။ ဇောချွေးတွေပြန်လာပြီး စိတ်ထဲကဘုရားစာများ ရွတ်ပြီး ခဏကြာမှ လက်တစ်ဖက်က လှုပ်လို့ရတာနဲ့ ကြမ်းပြင်ကိုပုတ်ပြီး ခေါ်မှ အိမ်သားတွေနိုးလာကြပြီး ကျွန်တော့်ကို ထူပေးပါတယ်။ ရေတစ်ခွက်တိုက်ပြီးမှ သတိကောင်းကောင်း ရပါတယ်။

 လူကြီးတွေကပြောတော့ ဘီလူးစီးတာလို့ ပြောပါတယ်။ အရင်က တစ်ခါမှမဖြစ်ဖူးပါဘူး။ နောက်ထပ်မဖြစ်ရအောင် ဘယ်လိုလုပ်ရမလဲ။ ညအိပ်ရာဝင်ခါနီးမှာ အစာစားတာနဲ့ရော သက်ဆိုင်ပါသလား ဆရာ။

ဖြေ။      ဘီလူးစီးတယ်ဆိုတာ အသက်ရှူ လမ်းကြောင်းမှာ ပုံမှန်လေ၀င်လေထွက် မရှိဘဲ လေပိတ်သွားရာက ဖြစ်ပါတယ်။ ၀ါယောပိတ်ဆို့တဲ့ ရောဂါတစ်မျိုးပါ။ နှစ်နှစ်ခြိုက်ခြိုက် အိပ်ပျော်ခါစမှာ လေရှူမရတော့လို့ ရုတ်တရက် လန့်နိုးလာတဲ့အခါ ပုံမှန်အိပ်ပျော်နေတဲ့ ဦးနှောက်က အာရုံကြောများကို စေခိုင်းလို့မရဘဲ လှုပ်ရှားမရ၊ အော်ဟစ်ဖို့ အသံထွက်မရဖြစ်ပြီး အသက်ရှူတဲ့အခါမှာ ရင်ဘတ်ပေါ်မှာ တစ်ခုခု ဖိထားသလို ဖြစ်နေတတ်ပါတယ်။

 တချို့ကလည်း ကိုယ့်ရင်ဘတ်ပေါ် လူတစ်ဦး တက်ထိုင်နေသလို ခံစားရတယ်လို့ ပြောတတ်ကြပါတယ်။ အဲဒါကြောင့် ဘီလူးစီးတယ်လို့ သုံးနှုန်းကြခြင်းဖြစ်ပါတယ်။ ရုတ်တရက် လှုပ်ရှားမရဘဲ လေဖြတ်သလို ဖြစ်သွားတာမို့ အနောက်တိုင်း ဝေါဟာရက Sleep Paralysis လို့ သုံးနှုန်းပါတယ်။ အိပ်ပျော်နေရင်း လေဖြတ်သလိုမျိုးပေါ့။

 အနောက်တိုင်း ဆေးပညာရှင်နဲ့ စိတ်ပညာရှင်များ အဆိုအရ Sleep Paralysis ဖြစ်တဲ့အချိန်က လူတစ်ဦး အိပ်ပျော်ခါစအချိန် သို့မဟုတ် အိပ်ရာနိုးခါစ အချိန်တွေမှာဖြစ်တတ်တယ်။ Deep Sleep နှစ်နှစ်ခြိုက်ခြိုက် အိပ်ပျော်တဲ့အချိန်ကို မရောက်ခင်နဲ့ ပြန်နိုးလာမယ့် အချိန်တွေမှာ မျက်လုံးလှုပ်ရှားမှုက ပုံမှန်ထက်မြန်တဲ့ အချိန်ရှိတယ်။ Rapid Eye Movement (REM) အဆင့်မှာ   ဘီလူးစီးတာ ဖြစ်လေ့ရှိတယ်လို့သုတေသနက ပြောပါတယ်။

 နောက်တစ်ခုကတော့ Non-Rapid Eye Movement (NREM) ဆိုတဲ့အဆင့်ဖြစ်ပါတယ်။ အိပ်စက်တဲ့အချိန်မှာ ဦးနှောက်က ထိန်းချုပ်တာ တစ်လှည့်စီဖြစ်နေတဲ့ သဘောပါ။ NREM ဆိုတာက အိပ်တစ်ဝက်နိုးတစ်ဝက် အခြေအနေဖြစ်ပြီး REM ကတော့ လုံးဝအိပ်ပျော်သွားတဲ့အခြေအနေဖြစ်ပါတယ်။ အဲဒီအချိန်မှာ အိပ်မက်တွေ မက်ကြပါတယ်။

 အိပ်မက်ထဲမှာ လှုပ်ရှားတာတွေကို  ခန္ဓာကိုယ်က လိုက်မလှုပ်ရှားပါဘူး။ အသက်ရှူတာကတော့ ပုံမှန် လုပ်နေတယ်လို့ ဆိုပါတယ်။ ဘီလူးစီးတယ်ဆိုတဲ့ အခြေအနေမှာ REM အဆင့်ကနေ မလျှော့ဘဲ၊ ဦးနှောက်က ထိန်းချုပ်ထားတာတွေ မလျှော့ဘဲ အလုပ်လုပ်ပုံ မှားယွင်းသွားတာကြောင့် နိုးသွားပြီး လူကသိနေပေမယ့် ဦးနှောက်က အိပ်နေတယ်လို့ သတ်မှတ်ထားပြီး အာရုံကြောတွေ လှုပ်ရှားခွင့်မပြုတာကြောင့် လှုပ်မရအော်မရ ဖြစ်တာကို ဘီလူးစီးတယ်လို့ ခေါ်တာဖြစ်ပါတယ်။

တိုင်းရင်းဆေးပညာအမြင် ဘီလူးစီးခြင်း

တိုင်းရင်းဆေးပညာ အမြင်အရတော့ အိပ်ခါနီး အစာစားလိုက်တဲ့အခါ လူအိပ်ပေမယ့် အစာအိမ်က အစာခြေနေရပါတယ်။ စားတဲ့အစာထဲမှာ လေစာပါတဲ့အခါ  ၀ါယောဖောင်းကြွမှုဖြစ်လာပြီး  အထက်ကို တက်လာပါတယ်။ နှစ်နှစ်ခြိုက်ခြိုက် အိပ်ပျော်နေသူက ရှူသွင်းတဲ့လေနဲ့ အစာအိမ်က လေပြွန်အတိုင်း ပြန်တက်လာတဲ့ လေပူ(ဥဏှဝါယော)ဆုံမိတဲ့အခါ လေပူနဲ့လေအေး ဆန့်ကျင် တိုက်ခိုက်မှုဖြစ်ပြီး ရုတ်တရက်အသက်ရှူ ရပ်သွား သလိုဖြစ်တဲ့အချိန်မှာ လန့်နိုးပြီး လှုပ်ရှားမရ၊ အော်မရတစ်ခုခုရင်ဘတ်ပေါ် တက်ဖိထားသလို ခံစားရတာကို ဘီလူးစီးတယ်လို့ ခေါ်ခြင်းဖြစ်ပါတယ်။

ဘီလူးစီးတာဟာ ထမင်းလုံးတစ္ဆေ ခြောက်တာနဲ့တော့ မတူပါဘူး။ ထမင်းစားပြီး အိပ်ပျော်သွားလို့ အိပ်မက်ထဲမှာ ချောက်ထဲလိမ့်ကျသလိုမျိုး ဖြစ်သွားတာကို ထမင်းလုံး တစ္ဆေခြောက်တယ်လို့ ခေါ်ကြတာပါ။

ဘီလူးစီးတာနဲ့စာရင် အဆင့်နိမ့်ပါတယ်။ စာရေးသူကိုယ်တိုင် ငယ်စဉ်က ထမင်းစားပြီး ရေမသောက်ဘဲ အိပ်ပျော်သွားတဲ့အခါ အိပ်မက်ထဲမှာ ခန္ဓာကိုယ်က ပေါ့ပါးပြီး လေထဲမှာသွားနေသလို အပေါ်စီးကနေ မြေပြင်ကို လှမ်းကြည့်နေရသလိုမျိုး ဖြစ်ပါတယ်။ ပြီးရင် အဲဒီအမြင့်ကနေ ရုတ်တရက်ပြုတ်ကျပြီး  ရင်ထဲမှာ အေးခနဲဖြစ်ပြီး   လက်ကဆုပ်မိဆုပ်ရာဆုပ်ပြီး လန့်နိုးလာတာမျိုး မက်ဖူးပါတယ်။ တစ်ခါတစ်ရံလည်း တောနယ်မှာ ကလေးတွေ သဘာဝထမင်းကို လက်နဲ့ဆုပ်စားပြီး လက်ကိုပြောင်အောင် မဆေးဘဲ ထမင်းစေ့ကပ်နေတဲ့အခါ သို့မဟုတ် နှုတ်ခမ်းမှာ ထမင်းစေ့ကပ်နေတဲ့အခါ ဒီလိုအိပ်မက်မျိုး မက်တာကို လူကြီးတွေက ထမင်းလုံးတစ္ဆေခြောက်တယ်လို့ပြောကြတာကို မှတ်မိနေပါတယ်။

လေစာများကိုရှောင်ကြဉ်ပါ

 ညအိပ်ရာဝင်ခါနီး  အစာစားသူများ  အထူးသတိထား ရမှာကတော့ လေစာများကို ရှောင်ကြဉ် စားသောက်ဖို့ဖြစ်ပါတယ်။ လေစာဆိုတာ ဘာလဲဆိုရင်  စားလိုက်တဲ့အစာ  အစာအိမ်ထဲ ရောက်ပြီးနောက် အစာခြေရည်နဲ့ ထိတွေ့တဲ့အခါ ချက်ချင်းကြေမသွားဘဲ အမြှုပ်ထပြီး လေပွလာတာဖြစ်ပါတယ်။ ပွလာတဲ့လေဟာ အစာမကြေသေးခင်မှာ အထက်ကို တက်လာပြီး လည်ချောင်းထဲသို့ ရောက်လာပါတယ်။ အာခေါင်ထဲ ရောက်ရင်တော့ လေချဉ်တက်တယ်လို့ ခေါ်ကြပါတယ်။

 ကြေခဲတဲ့အစာ၊ ခါးတဲ့အစာ၊ အလွန်အေးတဲ့ အစာများကို လေစာလို့ သတ်မှတ်ပါတယ်။  ကောက်ညှင်း၊  ဆန်စေး၊  သခွားသီး၊  ခ၀ဲသီး၊ ခွေးတောက်၊ တမာ၊ ကြောင်လျှာ၊ ကြက်ဟင်းခါး၊ ၀က်သား၊ လက်ဖက်၊ မျှစ်၊ မျှစ်ချဉ်စသည်တို့ကို လေစာလို့ အကြမ်းဖျင်း မှတ်သားထားဖို့ လိုပါတယ်။ လေစာတွေကိုကြိုက်လို့   နေ့လယ်နေ့ခင်းစာတွေမှာ စားရင် အရေးမကြီးပေမယ့် ညစာ အထူးသဖြင့် ညအိပ်ခါနီးမှာ  မစားမိဖို့ အရေးကြီးပါတယ်။

ခေါင်းအုံးအမြင့် မအိပ်ပါနှင့်

          ဘီလူးစီးတဲ့ လူတွေမှာ ပက်လက်အိပ်ပျော်နေတဲ့အခါ ခေါင်းအုံးကလည်း မြင့်တယ်ဆိုရင်  ဇက်ခေါက်ပြီးလေပွလို့ အစာအိမ်က တက်လာတဲ့လေဟာ လည်ချောင်းမှာ ပိတ်မိနေပါတယ်။ အိပ်ပျော်နေသူက အသက်ကို ပုံမှန်ရှူသွင်းနေရာ လေရှူပြွန် နဲ့ အစာရေမျိုပြွန် ဆုံမိတဲ့နေရာမှာ အပြင်လေအေးနဲ့ အတွင်းလေပူတို့ ထိတွေ့ပြီး အပူအအေး ပဋိပက္ခဖြစ်ပါတယ်။အပူအအေး ၀ိရောဓိဖြစ်တယ်လို့လည်း ဆိုနိုင်ပါတယ်။ အဲဒီလိုဖြစ်တဲ့ အချိန်မှာ နှစ်ခြိုက်စွာ အိပ်ပျော်နေသူဟာ လန့်နိုးတတ်ပါတယ်။

 လူကလန့်နိုးပြီး အသိစိတ် ၀င်လာပေမယ့် နိုးတစ်ဝက် အိပ်တစ်ဝက်မှာ အာရုံကြောများက မလှုပ်ရှားနိုင်ပါဘူး။ အထူးသဖြင့် ခန္ဓာကိုယ် လှုပ်ရှားစေတဲ့ “အင်္ဂမင်္ဂနုသာရီဝါယော က  အလုပ်မလုပ်သေးပါဘူး။

အိပ်ပျော်နေတဲ့သူ ဖြစ်တဲ့အတွက် အဆင်သင့် မလှုပ်ရှားပေးနိုင်ပါဘူး။ ဒါကြောင့် ဘီလူးစီးသူတွေမှာ ရင်ဘတ်ပေါ် တစ်စုံတစ်ယောက် တက်ဖိထားသလိုဖြစ်ပြီး  အော်မရဟစ်မရ လှုပ်ရှားမရဖြစ်ရခြင်းပါ။ တချို့ဘီလူးစီးခံရတာ ဖြစ်နေသူတွေမှာတော့ ဘေးနားက လူတစ်ဦးက လှုပ်နှိုးပေးလိုက်တဲ့အခါ  ပြန်ကောင်းသွားတတ်ပါတယ်။ ဘီလူးစီးတာ အသက်မသေနိုင်ပေမယ့် ခံစားချက်မှာ အလွန်ကြောက်စရာကောင်းတယ်လို့ ဖြစ်ဖူးသူတွေက ပြောကြပါတယ်။

ဘီလူးစီးခြင်းမှ ကာကွယ်ရန်

 အချို့လူတွေမှာ ဘီလူးစီးတယ်ဆိုတာ တစ်ခါတစ်ရံသာ ကြုံတောင့်ကြုံခဲဖြစ်ပေမယ့် တချို့မှာ ညစဉ်လိုလို သို့မဟုတ် ရက်ခြားမကြာခဏ ဘီလူးစီးတာ ဖြစ်ပွားလေ့ရှိပါတယ်။ ဒီလိုဖြစ်ပြီဆိုရင်တော့ ကျန်းမာရေးကို ထိခိုက်နိုင်တာမို့ အကြောင်းရင်းရှာဖွေပြီး ကုသဖို့ လိုအပ်ပါတယ်။အနောက်တိုင်း နိုင်ငံများမှာဆိုရင်လည်း စိတ်ရောဂါကု ဆရာဝန်များ ပြသပြီး ညအိပ်ချိန်မှာ ဘယ်လိုဖြစ်တယ်ဆိုတာကို စောင့်ကြည့်ပြီး ဆရာဝန်က အကြောင်းရင်းခံကို ဖော်ထုတ်ကုသပေးမှ ပျောက်ကင်းတဲ့ အဆင့်မြင့် ရောဂါတစ်မျိုးအဖြစ် သတ်မှတ်ထားပါတယ်။

 ဘီလူးစီးသူတွေဟာ အိပ်ခါနီး အစာမကြေတဲ့ အစာစားမိသူ၊ လေစာများစားမိသူ၊ နောက်ပြီး ပက်လက် အနေအထားနဲ့ အိပ်ပျော်သူ၊ အိပ်ခန်းအတွင်း  လေ၀င်လေထွက် မကောင်းတဲ့နေရာမှာ  အိပ်မိသူ၊ ခန္ဓာကိုယ်ဝပြီး လည်ပင်းနဲ့မေးအောက် အဆီအိတ်ရှိသူ၊ လျှာခေါက်ပြီး အိပ်ပျော်ရင် ဟောက်တတ်သူများမှာ ပိုပြီးဖြစ်လေ့ရှိတာ တွေ့ရပါတယ်။

 ဒါကြောင့် ဘီလူးစီးတာ အကြိမ်များလာပြီဆိုရင် အိပ်ရာဝင် အစားမစားပါနဲ့။ အစာအိမ်က လေကို အထက်မတက်အောင် ရှောက်ရည်နဲ့ပျားရည် ရောစပ်သောက်ပါ။ အိပ်ရင်ပက်လက် မအိပ်ပါနဲ့။ ဘယ်ဘက်သို့ စောင်းအိပ်တဲ့ အကျင့်ကို ပြောင်းကြည့်ပါ။ လည်ပင်းမခေါက်အောင် ခေါင်းအုံးကို ခပ်ပါးပါးနဲ့အိပ်ပါ။ ပက်လက်ပဲ အိပ်တတ်တာဆိုရင် ရင်ဘတ်ပေါ်မှာ စောင်ခေါက်တစ်ခု တင်အိပ်ပါ။ အိပ်ရာဝင်ချိန် တရားမှတ်ခြင်း၊ ပုတီးစိပ်ခြင်းပြုလုပ်လျှင်လည်း ကောင်းပါသည်။   

ကြည်လွင်မြင့် (မုဒြာ)

Read 35 times
Rate this item
(0 votes)
Last modified on Wednesday, 11 December 2019 10:13