SJ WorldNews - шаблон joomla Авто

တညင်းသီးကြိုက်ရင် ဘယ်လိုစားမလဲ

Saturday, 19 May 2018 09:33 font size decrease font size decrease font size increase font size increase font size

မြန်မာလူမျိုးတို့အကြိုက် ရိုးရာအစားအစာဖြစ်သော တညင်းသီးစားခြင်းမှာ အနောက်တိုင်း ဆေးပညာရှင် ဆရာဝန်ကြီးများ လုံးဝလက်မခံသော အစားအစာဖြစ်သည်။ ကျောက်ကပ်နှင့် ဆီးလမ်းကြောင်းပိတ်ပြီး အသက်အန္တရာယ် ပြုနိုင်သော အစားအစာဖြစ်သည်။ များများစားမိ၍ ဆီးလမ်းကြောင်း ပိတ်သွားသဖြင့် ခွဲစိတ်ခန်းဝင်ပြီး သံပိုက်ဖြင့် ဆီးချူရသူပင် ရှိသည်ဟု ဆိုသည်။ မြန်မာလူမျိုးတို့သည် တညင်းသီးကို အဘယ်ကြောင့် ကြိုက်ကြသနည်းဟူမူ နှုတ်မြိန်သော အစားအစာဖြစ်၍ ဟုဆိုနိုင်သည်။ တညင်းသီး၏ ထူးခြားသော အစွမ်းသတ္တိမှာ ခံတွင်းပျက်ပြီး စားချင်သောက်ချင်စိတ် မရှိသူတို့ စေးထန်းသော၊ ဖန်ပြီးစပ်သော အရသာတို့ဖြင့် လျှာပေါ်ရှိ အရသာဖုများကို နိုးကြားစေပြီး စားချင်သောက်ချင်စိတ် ဖြစ်လာသောကြောင့် ဖြစ်သည်။ တညင်းသီးစားပုံ အမျိုးမျိုးရှိသည်။ ပြုတ်၍သော် လည်းကောင်း၊ မီးဖုတ်၍သော်လည်းကောင်း၊ ဆားရည်စိမ်၍ သော်လည်းကောင်း၊ အဖန်ဓာတ်နှင့် အစေးဓာတ်ကုန်အောင် ပြုပြင်စားသုံးကြသည်။ ရှေးယခင်က မန္တလေး ဈေးချိုတော် အလယ်ပေါက်တွင် ရောင်းသော တညင်းသီး အုန်းနို့ဆမ်းသည် နာမည်ကြီးသော ဈေးချိုသရေစာ ဖြစ်ခဲ့ဖူးသည်။ ယခုထိလည်း ကျော်ကြားဆဲ၊ ရောင်းကောင်းဆဲဖြစ်သည်။ တညင်းသီးဈေးကွက်တွင် မိုးမှန်သည့် ဇူလိုင်လဆန်းမှစပြီး သံတောင်တညင်းသီး၊ ရေး၊ ထားဝယ်ဒေသထွက် တညင်းသီးနှင့် မြန်မာပြည်အထက်ပိုင်း မြစ်ကြီးနားမှလည်း တညင်းသီးများထွက်သည်။ သင်္ကြန်မိုးရွာလျှင် တညင်းသီးပို၍ အထွက်ကောင်းသည်ဟု ဆိုသည်။ သံတောင် တညင်းသီးသည် အရောင်ပိုလှသဖြင့် လူကြိုက်များသည်။ ကရင်ပြည်နယ် မြောက်ပိုင်း သံတောင်၊ လိပ်သို၊ ယာဒို၊ ပိန်းသီလာ ဒေသများတွင် တညင်းပင်ကို ရော်ဘာကဲ့သို့ နှစ်ရှည်ပင်များနှင့်ရောပြီး စိုက်ပျိုးလေ့ရှိသည်။ အပင်သက် ရှစ်နှစ်ခန့် အကြာမှ အသီးစတင် ခူးယူနိုင်ပြီး ၁ဝ နှစ်၊ ၁၅ နှစ်သားတွင် တညင်းသီး အထွက်အကောင်းဆုံး ဖြစ်သည်။ တောင်ငူမြို့နှင့် ရန်ကုန်ညောင်လေးပင် ဈေးတို့တွင် ရှေးကပင် တညင်းသီးပွဲရုံများ ရှိသည်။ သံတောင်ဒေသထွက် တညင်းသီးကို တောင်ငူဈေးကွက်မှ တစ်ဆင့် ပဲခူး၊ ရန်ကုန်၊ မန္တလေး မြို့ကြီးများသို့ တင်ပို့သည်။ ယခုအခါ နေပြည်တော် အာဟာရသုခဈေးတွင် တညင်းသီး ဈေးကွက်များ ပေါ်ထွက်လာပြီဟု ဆိုသည်။ တညင်းသီး ရောင်းရာတွင် အချိန်အတွယ်အဖြစ် ခြောက်ပြည်ဝင် သံပုံးနှင့် တစ်ပုံးလျှင် ငွေကျပ် ၈ဝဝဝ မှ ဈေးကောင်းလျှင် ၁၄ဝဝဝ အထိရရှိသည်ဟု ဆိုသည်။ တညင်းသီး တစ်ရာသီတွင် ခြောက်ပြည်ဝင်သံပုံး တစ်သိန်းကျော်အထိ ရောင်းချရကြောင်း ပွဲရုံ လုပ်ငန်းရှင်တစ်ဦးမှ ပြောပြသဖြင့် တညင်းသီး စားသုံးမှုမှာ မြန်မာလူမျိုးများတွင် အလွန်များပြားကြောင်း သိနိုင်သည်။ တညင်းသီး ကြိုက်သူများအတွက် တင်ပြလိုသည်မှာ မြန်မာ့ရိုးရာဆေးပညာ ရှုထောင့်အရ စေးထန်းပျစ်ချွဲသော အာပေါအာဗန္ဓရ အစာဖြစ်သည်။ အာကာသကို ပျက်စေသဖြင့် အပေါက်အခေါင်းများကို ပိတ်စေနိုင်သော အစာဖြစ်သည်။ ထိုအစာကိုစားလျှင် အာကာသ ပွင့်စေသော အစာနှင့် တွဲဖက်စားသင့်သည်။ တညင်းသီးပြုတ်ကို တို့စရာအဖြစ် စားလျှင် အဖြေဓာတ်အဖြစ် ရှောက်ရွက်အနည်းငယ်ကို တို့စားပေးပါ။ ပိတ်သော အာကာသဓာတ်ကို ပြန်ပွင့်အောင် ကူညီပေးနိုင်သည်။ တညင်းသီးပြုတ်လျှင် သကြား အနည်းငယ်နှင့် ရှောက်ရည်ညှစ်ထည့်ပြီး ပြုတ်ပါ။ နူးလွယ်ပြီး အဖန်ဓာတ်၊ အစေးဓာတ် လျော့နည်းစေသည်။ တညင်းသီးကို ရင့်သည့်အသီးရှောင်၍ နုသောအသီးများကို ထက်ခြမ်းခွဲကာ ဖန်ပုလင်းတွင်ထည့်ပြီး ဆားရည်စိမ်ထားပါ။ အာကာသပိတ်ခြင်း ကျောက်ကပ်တွင် အစေဓာတ် ပိတ်ဆို့ခြင်းမှ ကာကွယ်နိုင်သည်။ ထမင်းစားသောအခါ ကြိုက်တတ်၍ တညင်းသီးများများ စားမိလျှင်ဖြစ်စေ၊ တညင်းသီး အုန်းနို့ဆမ်း စားမိလျှင်ဖြစ်စေ စားပြီးပြီးချင်း သံပရာဖျော်ရည်တစ်ခွက် သောက်ပေးပါ။ အဆိပ် မတက်စေနိုင်သော အဖြေဓာတ်ဖြစ်ကြောင်း တင်ပြလိုက်ရပေသည်။

ကြည်လွင်မြင့်(မုဒြာ)

Read 167 times Last modified on Thursday, 24 May 2018 12:15