SJ WorldNews - шаблон joomla Авто

ပြည်ထောင်စုအမွေတည်တံ့ခိုင်မြဲရေး

Monday, 12 February 2018 08:26 font size decrease font size decrease font size increase font size increase font size

ယနေ့ ၂ဝ၁၈ ခုနှစ် ဖေဖော်ဝါရီ ၁၂ ရက်သည် ပြည်ထောင်စု သမ္မတမြန်မာ နိုင်ငံတော် ၏(၇၁) နှစ်မြောက် ပြည်ထောင်စုနေ့ဖြစ်သည်။ ပြည်ထောင်စုတစ်ဝန်းရှိ တိုင်းဒေသကြီးများနှင့် ပြည်နယ်များတွင်ရှိသော မြို့နယ် အသီးသီး၌ ပြည်ထောင်စုနေ့ အခမ်းအနား များကို စည်ကားသိုက်မြိုက်စွာ ကျင်းပနေကြသည်။

မြန်မာနိုင်ငံ၏ သမိုင်းကြောင်းကို ပြန်လည်ဆန်းစစ်ကြည့်လျှင် ရှေးဘိုးဘေး ဘီဘင်တို့ လက်ထက်မှစ၍ အမိမြေပေါ်တွင် နှစ်ပေါင်းထောင်နှင့်ချီ၍ အခြေချ နေထိုင်ခဲ့ကြသည်။ ကိုယ့်ထီးကိုယ့်နန်း ကိုယ့်ဘုရင် ကိုယ့်အရှင်နှင့် ကိုယ်ပိုင်ယဉ်ကျေးမှုတို့ဖြင့် ကမ္ဘာ့ အလယ်ဝင့်ထည်စွာ နေထိုင်ခဲ့ကြသော မြန်မာလူမျိုးများဖြစ်သည်။

မြေပေါ်မြေအောက် သယံဇာတပေါကြွယ်ဝပြီး ဂုဏ်ယူဖွယ်ရာ ကိုယ်ပိုင်ယဉ်ကျေးမှု ထွန်းကားသည့် မြန်မာနိုင်ငံသည် ခရစ်နှစ် ၁၈၈၅ ခုနှစ်တွင် နိုင်ငံတော်၏ လွတ်လပ်ရေးနှင့် အချုပ်အခြာ အာဏာဆုံးရှုံးကာ တိုင်းတစ်ပါး လက်အောက်ခံ ကိုလိုနီ နိုင်ငံဘဝ ကျရောက်ခဲ့ရသည်။ ကိုလိုနီနိုင်ငံ ဘဝကျရောက်ခဲ့ရစဉ် မြေပေါ်မြေအောက် သယံဇာတများ ဆုံးရှုံးခဲ့ရသည်။ အမျိုး၊ ဘာသာ၊ သာသနာနှင့် ယဉ်ကျေးမှုများ မှေးမှိန်သွားစေရန် ဗြိတိသျှတို့၏ ဖိနှိပ်ချုပ်ချယ်ခံ ခဲ့ရသည်။ တိုင်းရင်းသား အချင်းချင်း စည်းလုံးညီညွတ်မှု ပျက်ပြားစေရန် သွေးခွဲအုပ်ချုပ်ခြင်းနှင့် ဗျူရိုကရေစီယန္တရား အတွက်သာ အထောက်အကူပြုသော အုပ်ချုပ်ရေးစနစ်ဖြင့် မြန်မာနိုင်ငံကို အုပ်ချုပ် ခဲ့ကြသည်။

ဗြိတိသျှကိုလိုနီ လက်အောက်ခံ မြန်မာနိုင်ငံသားတို့ ဘဝကို ဘိုးဘွားများ ပြောသံ ကြားဖူးရာမှ ပို၍မှတ်ရလွယ်ကူစေခြင်းငှာ စာပေပညာရှင်ကြီး ဆရာဇော်ဂျီရေးခဲ့သော ''တို့တိုင်းပြည်''ကဗျာ တစ်ပိုင်းတစ်စကို ဖော်ပြလိုသည်။ ကဗျာမှာ ''ထလော့မြန်မာ၊ အိုမြန်မာတို့၊ တို့ရွာတို့မြေ၊ တို့ရွာမြေဝယ်၊ စေတီစပါး၊ များလည်းများ၏၊ များပါလေလဲ၊ တမွဲမွဲနှင့်၊ ဆင်းရဲကာသာ၊ ကာလကြာလျှင်၊ ယာစကာမျိုး၊ တညှိုးညှိုးနှင့်၊ ပုထိုးမြင့် မောင်း၊ ကျောင်းကြိုကျောင်းကြား၊ လှည့်လည်သွားလျက်၊ မစားလေရ၊ ဝမ်းမဝ၍၊ ဆွမ်းမျှမတင်နိုင် ဖြစ်လေမည်'' ဟူ၍ဖြစ်သည်။ မြန်မာနိုင်ငံ ဆန်စပါးလုပ်ငန်းကို နိုင်ငံခြားသားပိုင် ကုမ္ပဏီကြီးများက ချုပ်ကိုင်ထားကြသည့်အပြင် လယ်မြေ ယာမြေများ မှာလည်း နိုင်ငံခြားသားများက ပိုင်ဆိုင်ထားကြသဖြင့် မြန်မာလယ်သမားတို့မှာ လုပ်သလောက် အကျိုးခံစားခွင့် မရကြပေ။ မြေခွန်၊ ရေခွန် ပေးဆောင်ရသည့်အပြင် လူခွန်ကိုပါ ပေးဆောင်ကြရသည်။ မိမိတို့ ဘိုးဘွားပိုင် မြေပေါ်တွင် နေထိုင်လုပ်ကိုင် စားသောက်ကြသူများက အခြားတိုင်းတစ်ပါးမှ ကျူးကျော်ဝင်ရောက်လာကြသူများအား အခွန်ပေးရသည့် အခြေအနေသည် တွေးမိတိုင်း အသည်းနာဖွယ်ဖြစ်သည်။ ရေနံနှင့် ကျွန်းသစ်လုပ်ငန်း၊ သတ္တုလုပ်ငန်းတို့ကိုလည်း အလားတူ နိုင်ငံခြားသားများကသာ ပိုင်ဆိုင်ကြသဖြင့် မြန်မာနိုင်ငံသားများမှာ မဝရေစာဖြင့် အသက်ရှင်လုပ်ကိုင် နေကြရ သည်။

တိုင်းရင်းသား ပြည်သူအပေါင်းတို့သည် ဤဘဝအခြေအနေများမှ လွတ်မြောက်ရန် ရရာလက်နက်ကိုင်စွဲပြီး မျိုးချစ်တပ်မတော်နှင့် လက်တွဲ၍ ကိုလိုနီနယ်ချဲ့နှင့် ဖက်ဆစ် တို့ကို မြန်မာ့မြေပေါ်မှ မောင်းထုတ်ခဲ့ကြသည်။ ဖက်ဆစ်တို့အား မြန်မာ့မြေပေါ်မှ မောင်းထုတ်လိုက်ချိန်တွင် နောက်တစ်ကြိမ် ကိုလိုနီကျွန်ပြုရန် မြန်မာနိုင်ငံသို့ ရောက် လာသော ဗြိတိသျှတို့သည် စက္ကူဖြူစီမံကိန်းဖြင့် ကျွန်သက်ရှည်အောင် ကြိုးစားကြ သည်။

သို့သော် ဗိုလ်ချုပ်အောင်ဆန်း ဦးဆောင်သော ပြည်ထောင်စု တိုင်းရင်းသားတို့၏ ခိုင်မာသော ပြည်ထောင်စု စိတ်ဓာတ်ထက်သန်မှုတို့ကြောင့် တောင်ပေါ်မြေပြန့် မခွဲခြားဘဲ အတူတကွ လွတ်လပ်ရေးရယူကြရန် သဘောတူညီကြသဖြင့် ၁၉၄၇ ခုနှစ် ဖေဖော်ဝါရီ ၁၂ ရက်တွင် သမိုင်းဝင် ပင်လုံစာချုပ်ကြီးကို လက်မှတ်ရေးထိုးကြသည်မှာ ယနေ့ဆိုလျှင် နှစ်ပေါင်း (၇၁)နှစ်ပြည့်ပြီဖြစ်သည်။ ပြည်ထောင်စုသား သွေးချင်း ညီအစ်ကိုများ၏ စစ်မှန်သော ပြည်ထောင်စုစိတ်ဖြင့် ဆက်လက်ကြိုးပမ်းခဲ့ကြခြင်း ကြောင့် ၁၉၄၈ ခုနှစ် ဇန်နဝါရီ ၄ ရက်တွင်  မြန်မာနိုင်ငံ လွတ်လပ်ရေးရရှိခဲ့သည်။

မြန်မာနိုင်ငံလွတ်လပ်ရေးသည် ခရီးဆုံးပန်းတိုင် မဟုတ်သေးဘဲ တိုင်းရင်းသား ပြည်သူ တို့၏ လူမှုစီးပွား ဘဝဖွံ့ဖြိုးရေးသို့ ရောက်ရှိစေမည့် လမ်းကြောင်းသာ ဖြစ်သည် ဆိုသည့်အတိုင်း နိုင်ငံတော် တည်ဆောက်ရေး တာဝန်ကို ခေတ်အဆက်ဆက် နိုင်ငံတော်အစိုးရနှင့် ပြည်သူတို့ လျှောက်လှမ်းခဲ့ကြသော်လည်း အခက်အခဲ အဟန့်အတား အမျိုးမျိုးဖြင့် ကြုံတွေ့ကြရသည်မှာ ယနေ့တိုင်ဖြစ်သည်။ တိုင်းရင်းသား ပြည်သူအပေါင်းတို့၏ လူမှုစီးပွား ဘဝဖွံ့ဖြိုး တိုးတက်ရေးအတွက် နိုင်ငံရေး၊ စီးပွားရေး၊ လူမှုရေး ပြုပြင်ပြောင်းလဲမှု လုပ်ငန်းများ ဆောင်ရွက်ရာတွင် စည်းလုံးညီညွတ်မှု၊ တည်ငြိမ် အေးချမ်းမှုတို့ရှိမှသာ ခရီးတွင်မည်ကို သမိုင်း အတွေ့အကြုံနှင့် ပစ္စုပ္ပန်အခြေ အနေတို့ကို ကြည့်ခြင်းအားဖြင့် သိနိုင်ကြပေသည်။

သို့ဖြစ်၍ သမိုင်းအစဉ်အလာ ကြီးမားသော တိုင်းရင်းသား ဘိုးဘွားတို့အမွေ ပြည်ထောင်စုကြီး တည်တံ့ခိုင်မြဲရေးကို လည်းကောင်း၊ အမြော်အမြင်ကြီးမားသော ဘိုးဘွားတို့၏ ပြည်ထောင်စု စိတ်ဓာတ်ကိုလည်းကောင်း ယနေ့ခေတ်လူတို့က တာဝန် ကျေကြရမည်ဖြစ်သကဲ့သို့ မျိုးဆက်သစ်တို့ထံ လက်ဆင့်ကမ်း အမွေပေးရန်လည်း တာဝန်ရှိကြသည်ကို မမေ့အပ်ကြောင်း (၇၁)နှစ်မြောက် ပြည်ထောင်စုနေ့ အခါသမယ တွင် မြဝတီက တိုက်တွန်းနှိုးဆော် လိုက်ရပါသည်။     

Read 112 times Last modified on Monday, 12 February 2018 08:42