SJ WorldNews - шаблон joomla Авто

ဘဝရည်မှန်းချက်အတွက် အောင်မြင်ရေးနည်းလမ်းကောင်း

Sunday, 05 August 2018 07:07 font size decrease font size decrease font size increase font size increase font size

လူတို့သည် အချိန်တန် အရွယ်ရောက် စဉ်းစားတတ်သည့် အချိန်မှစ၍ ရည်မှန်းချက် ကိုယ်စီရှိကြသည်။ရည်မှန်းချက်ကို ရောက်အောင် ကြိုးစား အားထုတ်မှု အနည်းအများ ပေါ်မူတည်၍ အောင်မြင်မှု ကွာခြားသွား ကြရခြင်းဖြစ်သည်။ လူတိုင်းတွင် စိတ်တန်ခိုးရှိကြလေရာ လူနေချုံကြား စိတ်နေ ဘုံဖျား ဆိုထားသည့် အတိုင်း ရိုးသား ကြိုးစားမှုဖြင့် စွဲစွဲမြဲမြဲ ကျင့်ကြံ အားထုတ်ကြလျှင် ဖြစ်သင့်ဖြစ်ထိုက်သော ဘဝမျိုးဖြင့်  စိတ်ချမ်းသာ၊ ကိုယ်ကျန်းမာ ရပ်တည်နိုင်ကြမည် ဖြစ်သည်။

လူတိုင်းရှိပြီး စိတ်တန်ခိုးကို ပို၍ထက်မြက်အောင် ထူထောင် မွေးမြူကြရာတွင် စိတ်ကူးယဉ် သက်သက်ဖြင့် မရနိုင်ဘဲ စူးစူးစိုက်စိုက်ယုံကြည်ခြင်း၊ စွဲစွဲမြဲမြဲ မှတ်သားခြင်း၊ အမှန်ကို သာပြုမူပြောဆိုခြင်း၊ စိတ်၏ တည်ကြည်ခြင်း၊ရည်မှန်းချက်ကို အထမြောက်အောင်   ကြိုးစားအားထုတ်ခြင်းတို့ ရှိရမည်ဖြစ်သည်။ ရည်မှန်းချက်ကို အထမြောက်အောင် ကြိုးစား အားထုတ် ပါသော်လည်း ကံမကောင်း အကြောင်း မလှသည်နှင့် ကြုံလျှင် မအောင်မမြင်ဖြစ်တတ်သည့် တိုင်အောင် မအောင်မမြင်ဖြစ်ရသည့် အကြောင်းတရားကို တွေ့အောင်ရှာ၍ ပြုပြင်လိုက်လျှင် အောင်မြင်မှု ရရှိနိုင်မည်ဖြစ်သည်။မအောင်မမြင်ဖြစ်ရသည့် အကြောင်း တရားတွင် အောင်မြင်မှုအတွက် မျိုးစေ့ပါလာမြဲဖြစ်သည် ဟူ၍လည်းကောင်း၊ မအောင်မြင်မှုကို အထက်သို့ တက်လှမ်းရန် ကျောက်လှေကားအဖြစ် ပြောင်းလဲရမည် ဟူ၍လည်းကောင်း အတွေးအခေါ် ပညာရှင်များက ညွှန်ပြထားကြသည်။ ထိုသို့မအောင်မြင် မှုတွင်ပါလာသော အောင်မြင်မှုမျိုးစေ့ကို ရှင်သန်ဖြစ်ထွန်းအောင် ပြုစုပျိုးထောင်ရာ၌ လည်းကောင်း၊ မအောင်မြင်မှုကို အထက်သို့ တက်လှမ်းရန် ကျောက်လှေကား အဖြစ်ပြောင်းလဲရာ၌ လည်းကောင်း မိမိကိုယ်တိုင် ဖြောင့်မတ်သော စိတ်ထားနှင့် ကိုယ်တိုင် စည်းကမ်း သေဝပ်မှုရှိရန် အဓိကဖြစ်သည်။ လူတိုင်းလူတိုင်းသည် မိမိစိုက်

ထုတ်ရသော ကာယ၊ ဥာဏ်၊ ဝီရိယစွမ်းအား အလျောက် ထိုက်တန်သော အကျိုးခံစားခွင့်ကို ရရှိနေသည့်တိုင်အောင် အတိုင်းအဆမရှိသော လိုချင်တပ်မက်မှု လောဘ၏ စေ့ဆော်မှုကြောင့် ရရှိပြီးသော အောင်မြင်မှု ဆုံးရှုံးသွားကြရသည်များကို မြင်တွေ့ကြားသိနေကြရသည်။

အထူးသဖြင့် နိုင်ငံ့ဝန်ထမ်းများနှင့်စပ်လျဉ်း၍ ဝတ္တရားပေါ့လျော့မှု၊ အလွဲသုံးစားမှု၊ အဂတိ လိုက်စားမှုများ လျော့နည်းသွားစေရန် နှစ်လိုဖွယ်ကောင်းပြီး    နေချင်စဖွယ် ကောင်းသော လုပ်ငန်းခွင် ဖန်တီးပေးရေး၊ ကျင့်ဝတ် စည်းကမ်းများကို လေးစား လိုက်နာပြီး တာဝန်ယူမှု၊ တာဝန်ခံမှု ရှိလာအောင် နိုင်ငံ့ဝန်ထမ်းများ၏ စိတ်ဓာတ်နှင့် ခံယူချက်ကို ပြုပြင် ပြောင်းလဲပေးရေး၊ ပြည်သူ့ရေးရာ ဝန်ဆောင်မှုနှင့် သက်ဆိုင်သည့် သဘော တရားများကို သိရှိနားလည် တတ်ကျွမ်းအောင် လေ့ကျင့် သင်ကြားပေးရေးတို့ လိုအပ်ကြောင်း မီဒီယာများမှ တစ်ဆင့်နိုင်ငံတော် အစိုးရအား အကြံပြုထားသည်များ မကြာခဏ တွေ့နေရသည်။

သက်တမ်း ၁ဝဝ ရှိသော လူ့ဘဝကို ဗုဒ္ဓတရားတော်အရ အရွယ်အားဖြင့် ပိုင်းခြား ထားသည်မှာ အသက် ၃၃ နှစ်အထိ ပထမအရွယ်၊ ၃၄ နှစ်မှ ၆၆ နှစ်အထိ ဒုတိယအရွယ်၊ ၆၇ နှစ်မှ ၉၉ နှစ်အထိ တတိယ အရွယ်ဟူ၍ သတ်မှတ် ထားသော်လည်း လူတိုင်း အရွယ်သုံးပါး သက်တမ်းစေ့နေကြရသည် မဟုတ်ပေ။ ထို့ကြောင့် လူတိုင်းသည် အသက်အရွယ် အလိုက် မိမိကိုယ်မိမိပြုပြင်၍  ဘဝ ရည်မှန်းချက် အောင်မြင်အောင် ကြိုးစားကြရမည် ဖြစ်သည်။မည်သို့ ပြုပြင် ရမည်နည်း ဆိုသော် လောဘ၊ ဒေါသ၊ မောဟနှင့် မာနတရား တို့ကို ပြန်လည် ဆန်းစစ်၍ အချိန်မီ ပြုပြင်ကြရမည် ဖြစ်သည်။  မိမိကိုယ်မိမိ ပြုပြင်သူသာလျှင် မိမိကိုယ်မိမိ ချစ်ရာရောက်ပြီး မပြုပြင်သူသည် မိမိကိုယ်မိမိ နှစ်ရာရောက်သည်။ ရသင့် ရထိုက်သော အခွင့်အရေးထက် ပိုရလိုသော လောဘကြောင့် မရိုးမဖြောင့်သော နည်းဖြင့် ကြိုးစား အားထုတ်ခြင်း၊ အခြားသူများ အပေါ် မနာလို ဝန်တိုစိတ်၏ စေ့ဆော်မှုကြောင့် ကြမ်းပိုးကို လိပ်ဖြစ်အောင် ပြောဆိုခြင်း၊ ဆင်ကို ဆိတ်ဖြစ်အောင် ပြောဆိုခြင်း စသည့် မုသာဝါဒ ကံကို မကျူးလွန်မိအောင် ရှောင်ကြဉ်ကြရမည်ဖြစ်သည်။ဆင်ခြင်တုံ တရားနည်းသူတို့သည် မနေဘူးသော အရပ်ကို ရောက်၍ မတွေ့ဘူးသော ပုဂ္ဂိုလ်နှင့် တွေ့ရသည့် အချိန်တွင် မသိမှု မောဟဖုံးလွှမ်းပြီး မာန်တက်သွားခြင်းကြောင့် အခြေ အနေ အချိန်အခါကို နားမလည်တော့သည့် သဘာဝရှိကြသည်။ စလေ ဦးပုည၏ စကားနှင့်ဆိုရသော် ''ဘုရားလိုဏ်ခေါင်း အောင်း၍မာန်သွေး၊ ဟောင်သည့်ခွေးကို အရေးယူ ငှါခွင့်မသာ သကဲ့သို့''ဟူသော အခြေအနေမျိုးနှင့်နစ်နာသူအတွက် ဥပဒေနှင့် အညီ အကျိုးခံစားခွင့် မရသည်ကို မနိုင်၍သည်းခံ ရခြင်းတို့သည် ရေရှည် ကောင်းကျိုး မပြုနိုင်သည်ကို အလေးအနက်ထားကြရန်လိုသည်။

ကံဆိုသည်မှာ အလုပ်ဖြစ်သဖြင့် မိမိ၏ကိုယ်၊ နှုတ်၊ နှလုံးသုံးပါးတို့၏ ကြံစည် တွေးတော ပြုမူပြောဆိုမှုတို့ကိုစောင့်ထိန်း၍ မှားယွင်းသော ကြံစည်တွေးတောပြုမူ ပြောဆိုမှုများ ပြင်ဆင်လိုက်လျှင် ကံမကောင်း အကြောင်း မလှသည့် အခြေအနေမှ ကံကောင်း အကြောင်းလှသော အခြေအနေသို့ တိုးတက်ရောက်ရှိကာ မိမိ ကြိုးစား အားထုတ်မှု အလိုက် ဖြစ်သင့်ဖြစ်ထိုက်ရာ ဘဝမျိုး၌ လူရိုသေ၊ ရှင်ရိုသေဖြင့် စိတ်ချမ်းသာ၊ ကိုယ်ကျန်းမာ ရပ်တည်နိုင်ကြမည်ကို ယုံမှားသံသယ ဖြစ်ဖွယ်မရှိကြောင်း ပညာရှိသူတော်ကောင်းတို့ ဆုံးမစကားကို မြဝတီက ထပ်ဆင့်မျှဝေလိုက်ရပါသည်။        

 


 


 


 


 

 

Read 132 times Last modified on Sunday, 05 August 2018 07:11