SJ WorldNews - шаблон joomla Авто

ပြည်သူအားလုံးကျန်းမာရေး

Wednesday, 30 January 2019 09:59 font size decrease font size decrease font size increase font size increase font size

အသွင်သစ်ဖြင့်ပညာပေး မီဒီယာများ၊ ယဉ်ကျေးမှုနှင့်အနုပညာရှင်များနှင့်ကျန်းမာရေးစံပြုအချက်အလက်များဆိုင်ရာ အလုပ်ရုံ ဆွေးနွေးပွဲဖွင့်ပွဲ အခမ်းအနားကို ဇန်နဝါရီ ၂၆ ရက် မွန်းလွဲပိုင်းတွင် ရန်ကုန်မြို့ရှိ Chatrium Hotel ၌ ကျင်းပရာ ကျန်းမာရေးနှင့် အားကစားဝန်ကြီးဌာန ပြည်ထောင်စုဝန်ကြီး ဒေါက်တာမြင့်ထွေး တက်ရောက် အမှာစကား ပြောကြားသည်။

ပြည်ထောင်စု ဝန်ကြီးက အမှာစကား ပြောကြားရာ၌ ပြည်သူများသည် သတင်းစာ၊ ဂျာနယ်၊ ရေဒီယို၊ ရုပ်မြင်သံကြား၊ ရုပ်ရှင် စသည်တို့ကို ကြည့်ရှု ကြသည့်အပြင် အင်တာနက်နှင့် လူမှုကွန်ရက် များကိုလည်း အလွယ်တကူ လက်လှမ်းမီ အသုံးပြုကြသည် ဖြစ်၍ ပြည်သူများ၏ မျက်စိအလင်းတံခါး၊ အကြားတံခါးနှင့် နှလုံးသားတံခါးတို့ကို ဖွင့်လှစ် ပေးနိုင်သူများ ဖြစ်သည့် မီဒီယာများနှင့် အနုပညာရှင်များသည် ပြည်သူများ ကျန်းမာရေး အသိပညာ ကြွယ်ဝစေရေး ဝိုင်းဝန်း ဆောင်ရွက်ပေးခြင်းဖြင့် ပိုမိုထိရောက်အောင်မြင်မည် ဖြစ်ကြောင်း၊ မီဒီယာအမျိုးမျိုးမှ ကျန်းမာရေး သတင်းစကားများကို ပုံသဏ္ဌာန် အမျိုးမျိုးဖြင့် ဖြန့်ဖြူးရာတွင် ဝန်ကြီးဌာနနှင့် မီဒီယာများအကြား ကျန်းမာရေးဆိုင်ရာ စံပြု အချက်အလက်များကို ပေါင်းကူးသဖွယ် ထားရှိ အသုံးပြုကြကာ အများပြည်သူသုံး သတင်းစကားများ အဖြစ် တစ်ဆင့်ပြန်လည် ဝေမျှပေးရန် တိုက်တွန်းလိုကြောင်းဖြင့် ပြောကြားသည်။

ကျန်းမာရေးနှင့် အားကစား ဝန်ကြီးဌာနသည် လူတိုင်းရောဂါ ဘယ ကင်းရှင်းစွာဖြင့် သက်တမ်းစေ့နေနိုင်ရေး မျှော်မှန်းချက်ကို အကောင်အထည်ဖော်ရာတွင် ဆေးရုံ၊ ဆေးခန်းများ ဖွင့်လှစ်၍ ကုသ စောင့်ရှောက်သည့် လုပ်ငန်းတာဝန်ကိုသာ ထမ်းဆောင်ခြင်းမျိုး မဟုတ်ဘဲ ကြိုတင်ကာကွယ်ခြင်းသည် ကုသခြင်းထက် ထိရောက်သည် ဆောင်ပုဒ် နှင့်အညီ ပြည်သူများအနေဖြင့် ကျန်းမာရေးနှင့် ညီညွတ်သော နေထိုင်စားသောက်မှု ပုံစံများရှိစေရေး၊ ကူးစက်နိုင်သော ရောဂါမပြန့်ပွားရေး၊ မကူးစက်နိုင်သော ရောဂါကြိုတင်ကာကွယ်ရေး စသည့်များပြားလှသော လုပ်ငန်းများကို ဆောင်ရွက်လျက်ရှိသည်။ ပြည်သူများ ရောဂါဘယကင်းရှင်းရေး လုပ်ငန်းများ ဆောင်ရွက်ရာတွင် ကျန်းမာရေး ဝန်ထမ်းအင်အား မလုံလောက် မှု၊ ဝေးလံခေါင် သီသော ဒေသများ၌ နေထိုင်ကြသော ပြည်သူများအတွက် ဆက်သွယ်သွားလာရန် ခက်ခဲမှု၊ ကျန်းမာရေး ဝန်ထမ်းများအတွက် လုံခြုံစိတ်ချရသည့် အခြေအနေမရှိမှု စသည့် အကြောင်းများကြောင့် သက်ဆိုင်ရာဒေသများ၌ ဆေးရံ၊ု ဆေးခန်း ဖွင့်ထားသော်လည်း အရည်အသွေးပြည့်ဝသော ကျန်းမာရေးကုသ စောင့်ရှောက်မှု မရနိုင်ဘဲ ရှိနေကြသည်။

ကျန်းမာရေးနှင့် အားကစားဝန်ကြီး ဌာနသည် ပြည်သူများအတွက် ကျန်းမာရေးကုသစောင့်ရှောက်ရန် တိုင်းရင်းဆေးရုံ၊ ဆေးခန်းများကိုလည်း ဖွင့်လှစ်ပြီး ကျန်းမာရေးဝန်ထမ်း များကိုလည်း ခန့်အပ်ထားသည့် တိုင်အောင် မြို့ပြနှင့် ကျေးလက်များပါမကျန် ဆေးရောင်းချသော ဆိုင်များက ရောင်းချသော စပ်ဆေး၊ တွဲဆေးများကို ဝယ်ယူ အသုံးပြုနေကြသည်။

စပ်ဆေး၊ တွဲဆေးများကို အသုံးပြု ကုသခြင်းသည် ဝေဒနာကို ခေတ္တခဏမျှသာ သက်သာစေနိုင်သော်လည်း ရောဂါအမြစ်ပြတ်စေရန် ကုသမှုခံယူခြင်း မဟုတ်သဖြင့် ရောဂါအခြေအနေ ပိုမိုဆိုးဝါးလာပြီး အသက်အန္တရာယ် ထိခိုက်နိုင်ကြောင်း ဆေးဝါးဗေဒ ပညာရှင်များက သတိပေး ထားကြသည်။ စပ်ဆေးနှင့် ပတ်သက်၍ နှစ်မျိုးရှိရာတွင် ပထမတစ်မျိုးမှာ ဝေဒနာခံစား နေရသူကိုယ်တိုင် ဆေးဆိုင်သွား၍ မိမိဝေဒနာကို ပြောပြသောအခါ သောက် ရမည့်ဆေးကို ဆေးရောင်းသူက တွဲစပ်ပေးလိုက်သည့် ဆေးဖြစ်ပြီး ဒုတိယတစ်မျိုးမှာ ဆေးရုံ၊ ဆေးခန်းသွားပြစဉ်က ဆရာဝန်ပေးလိုက်သော ဆေးအတွဲကို သိမ်းထားပြီး မိမိနှင့် အလားတူ ဝေဒနာ ခံစားရသူများအား နမူနာပြ၍ ညွှန်းလိုက်ခြင်းကြောင့် နောက်တစ်ဦးက အလားတူ ဆေးမျိုးဝယ်ပြီး တွဲစပ်အသုံးပြုခြင်း ဖြစ်ကြောင်းနှင့် ပြည်သူများ အနေဖြင့် စပ်ဆေး၊ တွဲဆေး အသုံးပြုခြင်းသည် အလွန်အန္တရာယ်ကြီးမားကြောင်း သိရသည်။

ပြည်သူများ ကျန်းမာရေး အသိပညာ မြှင့်တင်ခြင်း လုပ်ငန်းများတွင် အီလက်ထရွန်နစ် မီဒီယာများ၊ ပုံနှိပ်မီဒီယာများနှင့် ရုပ်ရှင်၊ ရုပ်မြင်သံကြားနှင့် အသံလွှင့်မီဒီယာတို့ အားလုံးက အကျိုးပြု စက်ဝန်းကြီးသဖွယ် ပါဝင်လျက်ရှိကြရာ ပြည်သူများ စိတ်ဝင်စားမှုနှင့် အာရုံစူးစိုက်မှု ပိုမိုရှိကြစေရန် ဆန်းသစ်တီထွင်မှု ရှိသော အစီအစဉ်များဖြင့် အသိပညာပေး ကြရမည်ဖြစ်သည်။ ယနေ့အချိန်တွင် မြန်မာပြည်သူတို့၏ အင်တာနက် အသုံးပြုမှု အညွှန်းကိန်းများ၌ လူဦးရေ ၁ ဒသမ ၉ သန်းတို့က အင်တာနက် အသုံးပြုနေကြောင်း တွေ့ရသည်။

ထို့ကြောင့် ပြည်သူတို့၏ မျက်စိအလင်းတံခါး၊ အကြားတံခါးနှင့် နှလုံးသားတံခါးတို့ကို ဖွင့်လှစ်ပေးသော မီဒီယာများ အနေဖြင့် ပြည်သူများ ရောဂါဘယ ကင်းရှင်း၍ သက်တမ်းစေ့ နေနိုင်ရေးအတွက် အမြင်သစ်၊ အသွင်သစ်ဖြင့် ပညာပေးနိုင်မည့် အစီအစဉ်များဖြင့် ဆောင်ရွက်ကြပါရန် မြဝတီက တိုက်တွန်းနှိုးဆော် လိုက်ရပါသည်။ ။

Read 65 times Last modified on Wednesday, 30 January 2019 10:00