SJ WorldNews - шаблон joomla Авто

ပုဂံရာဇဝင်မှ သံပျင်မှတ်တမ်း အမှတ်တရ

Thursday, 31 January 2019 09:45 font size decrease font size decrease font size increase font size increase font size

ပထမမြန်မာနိုင်ငံတော် ပုဂံရာဇဝင်၌ ကျစွာမင်းကြီး၏ သမီးတော်ဟူ၍ လည်းကောင်း၊ နရပတိစည်သူမင်းကြီး၏ သမီးတော်ဟူ၍ လည်းကောင်း ဆိုကြသော မင်းသမီးသည် စာပေကျမ်းဂန် အလွန်တတ်မြောက်သူ ဖြစ်သဖြင့် ရဟန်းတော် များကိုပင် စာပေပို့ချရသူ ဖြစ်သည်။ ဤသို့ စာပေပို့ချရာ၌ ရဟန်းနှင့် မိန်းမတို့ မသင့်လျော်သဖြင့် တင်းထိမ် ကာရံထားခြင်းကြောင့် စာလိုက်သော ရဟန်းတို့က မင်းသမီးကို မမြင်ကြရချေ။

ကာလအတန်ကြာသော် စာလိုက်သော ရဟန်းတစ်ပါးက မင်းသမီး၏ အသံကို တပ်မက်စိတ်ဖောက်ပြားကာ လူကိုပါမြင်ရအောင် ကြံစည်တော့ရာ မိမိတက်သော မူရင်းစာ၏အဆုံး၌ ''ဟိံဇာလေဟေဟေးလား''ဟု ဆက်ရေးထားသည်။ တစ်နေ့သောအခါ မူရင်းစာတက်၍ ပြီးချိန်တွင် စာလိုက်သောရဟန်းက ကြံစည်ထားသည့်အတိုင်း စာအဆုံး၌ ''ဟိံဇာလေဟေဟေးလား''ဟု ဆက်ဖတ်လိုက်သည်။ တင်းထိမ်အတွင်းရှိ စာချဆရာ မင်းသမီးက ငါ့ရှင် စာ၌မရှိသည်ကို အဘယ်ကြောင့် ရွတ်ဆိုသနည်းဟုဆို၏။ ရဟန်းက မင်းသမီး စာရှိ၍ ငါရွတ်သည်၊ မယုံလျှင် ကြည့်ပါတော့ ဆိုသဖြင့် မင်းသမီးက တင်းထိမ်ကို ဖွင့်၍ကြည့်ရာ အကယ်ပင်စာရှိသည်ကို တွေ့လေသည်။

ထိုအခါ မင်းသမီးက ဤစာသည် အပိုသက်သက်ဖြစ်သည်။ သို့ရာတွင် အချည်းနှီးမဖြစ်စေရ။ ကျွန်ုပ်က သင့်လျော်အောင် အနက်ပေးလိုက်မည်။ လိုက်ဆိုပေတော့ ဆိုပြီး အနက်အဓိပ္ပာယ်ပေးသည်မှာ ''ဟိံ-တံငါတို့သည်၊ ဇာလေ-ကွန်ရွက်တို့ကို၊ ဟေဟေးလား-ဆွဲကြကုန်၏''ဟု အနက်ပေးလိုက်သဖြင့် အငြင်းအခုံ မရှိတော့ဘဲ စာချောသွားသည်။ သို့သော် စာကချောသွားလေငြား စာသင်ရဟန်းမူကား အမောကြီးမော ရလေပြီ။ ယခင်ကအသံကို တပ်မက်ရာမှ ယခုမင်းသမီး၏ ရုပ်ကိုပါ မမြင်လျှင်မနေ နိုင်တော့သဖြင့် သာခွေယိုင်ဖြစ်ပြီး တမ်းတမ်းတတ နွမ်းလျ နေတော့သည်။ မျက်ရည်မကျပေမယ့် အသည်းထဲက လှုပ်ခါသည့်ဒဏ်ကို ခံစားရင်း မစားနိုင်၊ မအိပ်နိုင် လူးလဲ၍ ဆင်းရဲကြီးစွာ ရောက်ရလေသည်။

ထိုအကြောင်းကို မင်းသမီးခမည်းတော် မင်းကြီးကြားသော် ရဟန်းပျိုအား ''ငါ့ရှင် အသက်သေရမည်လောက် တစ်ယောက်ဆိုတစ်ယောက်၊ ပိတောက်ဆိုပိတောက် စွဲလမ်းတပ်မက်လျှင် ငါ့သမီးတော်ကို ပေးပါမည်၊ သို့သော် ငါ့ရှင်က ပညာတတ်ပုဂ္ဂိုလ် ဖြစ်သည်။ သို့ကြောင့် သာသနာ၌ အကျိုးများမည့် ကျမ်းတစ်စောင်တစ်ဖွဲ့ရေးခဲ့ပါ ဦး၊ ပြီးသောအခါ ငါ့သမီးတော်ကို ပေးပါမည်''ဟု ဆိုလေ၏။ ရဟန်းပျိုလည်း ဥာသိကျမ်း၏ အဖွင့်ဋီကာကိုရေးလေသည်။ မင်းကြီးက ရဟန်းလူထွက်အား သံပျင်အမတ် ရာထူးပေးတော် မူသည်ကို အစွဲပြု၍ အမတ်ကို သံပျင်အမတ်၊ မင်းသမီးကို သံပျင်မင်းသမီး၊ ဥာသိဥာဏ်၏ အဖွင့်ဋီကာကို သံပျင်ဋီကာဟုခေါ်တွင် ကြလေသည်။

ကျောင်းနေအရွယ်က ဤစာကို ဖတ်ရသည့်အခါ ကဝေဆူးကြောင့် ရူးချင်တိုင်းရူးနေမည့် ရဟန်းပျို၏ အဖြစ်ကို သနားမိခြင်းနှင့်အတူ အသံကြားသနားပါစေ၊ မျက်နှာမြင်ချစ်ခင်ပါစေ ဆုနှင့်ပြည့်ဝသော မင်းသမီး၏ သွင်ပြင်ကို စိတ်ကူးပုံဖော် ကြည့်မိသည်။ စာတတ်ပေတတ် ပုဂ္ဂိုလ်အပေါ် အမျက်ထွက်ဖို့ဝေး သမီးတော်ကိုပေး၍ သာသနာတော်ကို အကျိုးရှိစေမည့် ကျမ်းပြုရန်သာ တောင်းဆိုသော မင်းကြီးကိုလည်း ကြည်ညို လေးစားမိသည်။

ဟိံဇာလေဟေဟေးလားကို အကြောင်းအကျိုး ညီညွတ်အောင် အဓိပ္ပာယ် ဖွင့်လိုက်သည်မှာ မင်းသမီး၏ လက်တန်းသဘောမျှသာ ဖြစ်မည်ဟူ၍ ပေါ့ပေါ့တွေးမိသည်။ ပါဠိ-မြန်မာ အဘိဓာန်၌ ဟိံသက-ညှဉ်းဆဲတတ်သော။ ဇာလီ-ကွန်ရက်ယှိသည်၊ ကွန်။ ဟေလာ-မထီလေးစားပြုခြင်း၊ ကစားခုန်စားပြုခြင်းဟူ၍ အသီးသီး အဓိပ္ပာယ် ဖွင့်ဆိုထားရာ ''ဟိံဇာလေဟေဟေးလား'' ကို ကဗျာသဘောဖြင့် စာချောရန် ရည်ရွယ်၍ ဟိံ-တံငါတို့သည်၊ ဇာလေ-ကွန်ရွက်ကို၊ ဟေဟေးလား-ဆွဲကြကုန်၏ ဟူ၍ မြန်မာမှုပြုထားသော သံပျင်မင်းသမီး၏ စာပေနှံ့စပ် ကျွမ်းကျင်မှုကို နောင်မှ အထင်အရှား သိရတော့သည်။

တစ်ဆက်တည်းမှာပင် သုတ၊ ရသစာပေ ရေးသားကြသော ပညာရှင်ကြီးများ အမြဲမပြတ် သွန်သင်ကြသည့် ဝေါဟာရတို့ ပရိယာယ်ကို အသိကြွယ် အမြင်ကျယ်အောင် လေ့လာမှတ်သားကြဖို့ လိုကြောင်းကိုလည်း သတိရမိသည်။ ဥပဒေပညာရှင်ကြီး များကလည်း ဥပဒေတစ်ရပ် ရေးဆွဲလျှင် အဓိက ပါဝင်သော အမည်နှင့် အဓိပ္ပာယ်ဖော်ပြချက်၊ ဥပဒေ၏ ရည်ရွယ်ချက်၊ ဥပဒေ၏ အခန်းလိုက်၊ အပိုဒ်လိုက် ဝေါဟာရတို့သည် အကြောင်းအကျိုး ညီညွတ်၍ ဆိုလိုသည့် အဓိပ္ပာယ် ရှင်းလင်းတိကျမှုတို့ ရှိရမည် ဖြစ်ကြောင်းနှင့် သို့မှသာ လိုရာဆွဲ၍ အဓိပ္ပာယ်ဖွင့်ကြသည့် အန္တရာယ်ကို ကြိုတင်ကာကွယ်နိုင်မည် ဖြစ်ကြောင်း အမြဲမပြတ် သတိချပ်ရန် ပညာပေးရေးသား ဟောပြောကြသည်။

ယနေ့ ပြည်ထောင်စုသမ္မတမြန်မာနိုင်ငံတော်၏ နိုင်ငံရေးပြုပြင် ပြောင်းလဲရေးတွင် နိုင်သူအကုန်ယူစနစ် ကျင့်သုံးလျက်ရှိရာ အားသာချက်များ ရှိသလို အားနည်းချက်များ ရှိကြောင်း တွေ့ရသည်။ အိပ်မက်ထဲမှာပင် ဖြစ်စေတော့ အနိုင်ယူလိုစိတ်ကို ဆုပ်ကိုင်ထားလျှင် သော်လည်းကောင်း၊ အပြောင်းအလဲကို ဗလောင်းဗလဲဆန်လျှင် သော်လည်းကောင်း ယခင်စစ်အေးခေတ်က ဆိုဗီယက်ယူနီယံ ဖြစ်စဉ်ကို သင်ခန်းစာယူသင့်သည်။ ဆိုဗီယက်ယူနီယံပေါ် ကံကြမ္မာဆိုး ကျရောက်ရခြင်းသည် ပြင်ပပယောဂဆရာတို့ ဖန်ဆင်းပေးသော ရုပ်သွင်၊ အသက်သွင်းသော ဝိညာဉ်၊ တည်ထောင်ပေးသော ဘဝကို အားကျမိသော လုပ်ရပ်ကြောင့် ဖြစ်သည်။ ထိုအချိန်က ဆိုဗီယက် ယူနီယံကြီးတွင် သမားရိုးကျ စစ်ပွဲများ ဖြစ်ပွားနေသကဲ့သို့ နိုင်ငံရေးတိုက်ပွဲများ ပြင်းထန်နေချိန်ဖြစ်သည်။ ဤသို့ရှုပ်ထွေးနေချိန် အတွင်းမှာပင် ဂေါ်ဘာချော့ဗ်၏ ပြန်လည်တည်ဆောက်ရေး(ပယ်ရီစထရွိုက်ကာ)နှင့် ပွင့်လင်းမြင်သာမှု (ဂလပ်စနော့သီအိုရီ) တို့ကြောင့် ဆိုဗီယက်ယူနီယံကြီး အစိတ်စိတ် အမြွှာမြွှာ ပြိုကွဲသွားရပြီး ၁၉၉၁ ခုနှစ် ဇွန်လတွင် ပြုလုပ်သော ရွေးကောက်ပွဲ၌ ဘောရစ်ယဲ့လ်ဆင်က မဲအနိုင်ရသွားသဖြင့် ဂေါ်ဘာချော့ဗ်အတွက်ရော ပြည်သူများအတွက်ပါ ဖွတ်မရ ဓားမဆုံး ယူကျုံးမရ ဖြစ်သွားရသည်။

ထို့ကြောင့် နှုတ်တစ်ရာ စာတစ်လုံး ဆိုရိုးစကားနှင့်အညီ သုတ၊ ရသစာပေ ရေးသားပြုစုကြရာတွင် ဖြစ်စေ၊ ပြည်သူ့အကျိုးငှာ ဥပဒေရေးဆွဲ ပြဋ္ဌာန်းရာတွင်ဖြစ်စေ ဟိံဇာလေဟေဟေးလားကဲ့သို့ တမင်ရည်ရွယ်၍ သော်လည်းကောင်း၊ မရည်ရွယ်ဘဲသော် လည်းကောင်း စာလုံးအပိုအလိုမရှိ အဓိပ္ပာယ်နှစ်ခွ မထွက်သော ဝေါဟာရ များဖြင့် ရှင်းလင်းတိကျစေခြင်းငှာ အဘက်ဘက်က ရှုမြင်ကြရန် ဖြစ်ကြောင်း မြဝတီက စေတနာကောင်းဖြင့် တင်ပြလိုက် ရပါသည်။ ။

Read 48 times Last modified on Thursday, 31 January 2019 09:46