SJ WorldNews - шаблон joomla Авто

ပြည်သူ လျှောက်လှမ်း ဘဝလမ်း ဖြောင့်တန်း ကြစေဖို့

Monday, 25 March 2019 10:46 font size decrease font size decrease font size increase font size increase font size

လူတို့အတွက် သင့်တင့်လျောက်ပတ်သောအရပ်၌နေရခြင်းသည် မင်္ဂလာတစ်ပါးဖြစ်သည်ဟု (၃၈)ဖြာမင်္ဂလာ တရားတော်၌ ဂေါတမမြတ်စွာ ဘုရားဟောကြားတော်မူထားသည်။ ထို့အတူ လောကနီတိ၌ လူတို့ မနေအပ်သော အရပ်ကို ညွှန်ပြရာ၌ မင်းနှင့်ရပ်ရွာတည်ငြိမ်အေးချမ်းအောင် အုပ်ချုပ်သူမရှိသည့်အရပ်အပါ အဝင် ငါးမျိုးညွှန်ပြ ထားသည်။ လွတ်လပ်ရေးရပြီး မြန်မာနိုင်ငံသမိုင်းတွင် အုပ်ချုပ်သူအစိုးရအဖွဲ့ရှိသော်လည်း အာဏာစက်ပျံ့နှံ့မှုမရှိသော ဒေသ၊ အာဏာစက်ပျံ့နှံ့မှုရှိသော်လည်း မှေးမှိန်သည့်ကာလတို့ရှိကြောင်းတွေ့ရသည်။

ဤသို့ကာလဒေသပယောဂတို့ဖြစ်ရသည့်အကြောင်းရင်းကို ဆန်းစစ်ကြည့်လျှင် လူတို့တွင်ရှိသောအစွဲ အမျိုးမျိုးကို အခြေခံသည့် အတ္တမာန တံခွန်ထူကြသောအခါ မြန်မာပြည်သားကျွန်ုပ်တို့ဟူသော သဘောထား ပျောက်၍ ငါဟူသော သဘောထားတို့လွှမ်းမိုးပြီး အစွန်းရောက်သွားကြသည်။ အစွန်းရောက်သဘောထား၏ လှုံ့ဆော်မှုကြောင့် ပုဂ္ဂိုလ်ရေး တိုက်ခိုက်မှု၊ ပါတီချင်းတိုက်ခိုက်မှုပြင်းထန်လာသောအခါ ပြည်သူလူထုအတွင်း ကူးစက်ပျံ့နှံ့သွားပြီး နိုင်ငံတော် တည်ငြိမ် အေးချမ်းမှုကို ပျက်ပြားစေသည့် ဆူပူသောင်းကျန်းမှုများပေါ်ပေါက် လာခြင်းဖြစ်သည်။ ထိုသို့သော အခြေအနေများ လွတ်လပ်ရေး အတွက် သန္ဓေတည် ပေါက်ဖွားလာပြီး လွတ်လပ်ရေးကို ရယူပေးခဲ့သော တပ်မတော် သည် ပြည်သူတို့ဘဝ တည်ငြိမ်အေးချမ်း သာယာဝပြောရေးကို ရှေးရှုသည့် သောင်းကျန်းမှုနှိမ်နင်းရေး တရားသော စစ်ကို စစ်ဆင်နွှဲခြင်း၊ သောင်းကျန်းသူများအား ငြိမ်းချမ်းရေးဆွေးနွေးပွဲသို့  ဖိတ်ခေါ်ခြင်းနည်းလမ်း တို့ကို ခေတ်အ ဆက်ဆက် ဖော်ဆောင်လျက်ရှိသည်။

နိုင်ငံရေးအင်အားစုများသဘောထား ကွဲလွဲအားပြိုင်ကြရာမှ တရားဥပဒေ စိုးမိုးရေးနှင့် ရပ်ရွာတည်ငြိမ် အေးချမ်းရေးအား နည်းလာသည့်အချိန်တွင် တပ်မတော်က အိမ်စောင့်အစိုးရ (Caretaker Government) တာဝန်ယူခဲ့ရသည့် ၁၉၅၈ ခုနှစ်မှ ၁၉၆ဝ ပြည့်နှစ် အစောပိုင်းကာလအတွင်း တိုင်းပြည်တည်ငြိမ်အေးချမ်းရေး အတွက် အထွေထွေ လွတ်ငြိမ်းချမ်းသာခွင့် အမိန့်ထုတ်ပြန် ပေးလိုက်သဖြင့် တောတွင်းလက်နက်ကိုင်အဖွဲ့ဝင်အချို့ အလင်းဝင်လာကြရာ ပြည်သူ့ ရဲဘော်အဖွဲ့အားလုံး ပါဝင်ကြောင်း သိရသည်။ အိမ်စောင့် အစိုးရက ရွေးကောက်ပွဲကျင်းပပေးပြီး အနိုင်ရပါတီသို့ နိုင်ငံတော်တာဝန်ပြန်လွှဲပြီးချိန်တွင် ပြည်ထောင်စုကြီးကို ရှစ်စိတ်ကွဲအောင်ဖြိုခွဲမည့် နိုင်ငံရေးမုန်တိုင်း အန္တရာယ်ကြောင့် ၁၉၆၂ ခုနှစ် မတ် ၂ ရက်တွင် တပ်မတော်က နိုင်ငံတော် အခြေအနေကို အချိန်မီ ထိန်းသိမ်း လိုက်ရသည်။

နိုင်ငံတော်တော်လှန်ရေး ကောင်စီ အစိုးရသည် (The Revolutionary Council Government) သည် ညီညွတ်ရေး အတွက် ၁၉၆၃ ခုနှစ်တွင် ပြည်တွင်းငြိမ်းချမ်းရေး ဆွေးနွေးပွဲများ ကျင်းပရန် ဖိတ်ခေါ်လိုက်သဖြင့် သောင်းကျန်းသူ အဖွဲ့များ ရန်ကုန်သို့ ရောက်လာကြသည်။ အဆိုပါဆွေးနွေးပွဲတွင် ကရင်တော်လှန်ရေး ကောင်စီမှ  မူဆိုကော့ကဆာ စောဟန် သာတာမွှေး ဦးဆောင်သော အဖွဲ့တစ်ဖွဲ့တည်းသာ သဘောတူညီချက်ရရှိခဲ့ပြီး အခြားအဖွဲ့များက ငြိမ်းချမ်းရေးကို ကျောခိုင်းသွားကြရာ ၎င်းတို့ သွားလိုသော နေရာအထိ တပ်မတော်ပိုင် ယာဉ်ဖြင့် လိုက်ပို့ပေးခဲ့သည်။ ၁၉၇၄ ခုနှစ် ပြည်ထောင်စုဆိုရှယ်လစ်သမ္မတမြန်မာနိုင်ငံတော် ဖွဲ့စည်းအုပ်ချုပ်ပုံ အခြေခံဥပဒေအရ နိုင်ငံတော် တော်လှန်ရေး ကောင်စီအစိုးရက ပြည်ထောင်စုဆိုရှယ်လစ် သမ္မတ  မြန်မာနိုင်ငံတော် အစိုးရထံသို့ နိုင်ငံတော် တာဝန်များ လွှဲပြောင်းပေးပြီးသည့်နောက် ၁၉၈ဝ ပြည့်နှစ်တွင် နိုင်ငံတော် ကောင်စီအမိန့်ကြေညာချက် အမှတ်(၂/၈ဝ) အရ လွတ်ငြိမ်းချမ်းသာခွင့်ပြု လိုက်ချိန်တွင် တပ်မတော်က  အပစ်ရပ်ပေးထားသည်ကို သောင်းကျန်းသူ များက အခွင့်ကောင်းယူ၍ နယ်စွန်နယ်ဖျား၌  ခိုအောင်းနေသော ၎င်းတို့ အဖွဲ့များကို  အတွင်းပိုင်းသို့ ရွှေ့ပြောင်း ခြေကုပ် ယူကြသည်။ ၁၉၈၈ ခုနှစ်တွင် တစ်တိုင်းတစ်ပြည်လုံးမင်းမဲ့စရိုက်များလွှမ်းမိုးပြီး အဘက်ဘက်မှ ယိုယွင်းချိန်တွင် အင်အားကြီးနိုင်ငံတစ်နိုင်ငံမှ စစ်သင်္ဘော တစ်စင်းက နိုင်ငံတော်၏ အချုပ်အခြာအာဏာကို ထိပါးလာသဖြင့် စက်တင် ဘာ ၁၈ ရက်တွင် နိုင်ငံတော်တာဝန် အရပ်ရပ်ကို ထိန်းသိမ်းကာကွယ်လိုက်ရပြီး နိုင်ငံတော်ငြိမ်ဝပ်ပိပြားမှု တည်ဆောက်ရေး အစိုးရအဖွဲ့ကို  ဖွဲ့စည်းလိုက်သည်။

နိုင်ငံတော်ငြိမ်ဝပ်ပိပြားမှုတည်ဆောက်ရေးအစိုးရအဖွဲ့သည်  နိုင်ငံတော်ပြန်လည် တည်ဆောက်ရေး အတွက် မဖြစ်မနေ လိုအပ်သည့်ငြိမ်းချမ်းရေး တည်ဆောက်ရန် တောတွင်းလက်နက်ကိုင်အဖွဲ့များအား ဖိတ်ခေါ်လိုက်သဖြင့် ၁၉၈၉ ခုနှစ် မတ်လမှ ၂ဝ၁ဝ ပြည့်နှစ် ဒီဇင်ဘာလအထိ အဖွဲ့ကြီး ၁၇ ဖွဲ့နှင့် အဖွဲ့ငယ် ၂၃ ဖွဲ့တို့ လက်နက်နှင့်ငြိမ်းချမ်းရေး လဲလှယ်ပြီး ဥပဒေဘောင်အတွင်းဝင်ရောက်လာကြသည်။ ဥပဒေဘောင်အတွင်း ဝင်ရောက်လာသော ငြိမ်းချမ်းရေး အဖွဲ့များသည် မိမိတို့ဒေသ ဖွံ့ဖြိုးရေး လုပ်ငန်းများကို နိုင်ငံတော်အစိုးရ၊ ပြည်သူ၊ တပ်မတော်တို့နှင့် လက်တွဲ ဆောင်ရွက် ခဲ့ကြသဖြင့် ငြိမ်းချမ်းရေး အသီးအပွင့်များကို ပြည်သူတို့နှင့်အတူ မျှဝေခံစားကြရသည်။ ဥပဒေဘောင် အတွင်းဝင်ရောက်ခဲ့သည့် တိုင်းရင်းသား လက်နက်ကိုင်အဖွဲ့အစည်းများမှ ဆန္ဒရှိသော အဖွဲ့များအား နိုင်ငံတော်၏ တရားဝင် လက်နက်ကိုင်ဆောင်သည့် နယ်ခြားစောင့်တပ်များအဖြစ် အသွင်ကူးပြောင်းရေး အစီအစဉ်ကို ၂ဝဝ၉ ခုနှစ်တွင် ဆောင်ရွက်ပေးခဲ့ပြီး ထိုက်သင့်သော အကျိုးခံစားခွင့်များကို စည်းမျဉ်းစည်းကမ်း နှင့်အညီ ပေးအပ်ထားသည်။

တပ်မတော်သည်  နိုင်ငံတော်ပြုပြင်ပြောင်းလဲရေးလုပ်ငန်းများတွင်  နိုင်ငံတော်ငြိမ်ဝပ်ပိပြားမှုတည် ဆောက်ရေးအစိုးရ အဖွဲ့၊ နိုင်ငံတော် အေးချမ်း သာယာရေးနှင့် ဖွံ့ဖြိုးရေးကောင်စီ အစိုးရအဖွဲ့တို့လက်ထက်တွင် အဆင့်ဆင့် ချမှတ်ထားသော အမျိုးသားရေး မူဝါဒ ဒို့တာဝန်အရေး သုံးပါးကို ထိန်းသိမ်းကာကွယ်စောင့်ရှောက်ရင်း နိုင်ငံရေး ဦးတည်ချက်၊ စီးပွားရေးဦးတည်ချက်၊ လူမှုရေး ဦးတည်ချက်များ အကောင်အထည်ဖော်ရာတွင်လည်း တစ်တပ်တစ်အား ပါဝင်ခဲ့သည်။ ပြည်ထောင်စု သမ္မတမြန်မာနိုင်ငံေ တာ် ဖွဲ့စည်းပုံအခြေခံဥပဒေ (၂ဝဝ၈ခုနှစ်)အရ နိုင်ငံတော် အေးချမ်း သာယာရေးနှင့်ဖွံ့ဖြိုးရေးကောင်စီမှ ပြည်ထောင်စု သမ္မတမြန်မာနိုင်ငံတော်အစိုးရအဖွဲ့သို့ နိုင်ငံတော် တာဝန်အရပ်ရပ်ကို လွှဲပြောင်း ပေးလိုက်သည့် ၂ဝ၁၁ ခုနှစ် မတ် ၃၁ ရက်မှ ယနေ့အချိန်ထိ နိုင်ငံတော် တည်ငြိမ် အေးချမ်းရေးနှင့် ပြည်သူတို့ ဘဝဖွံ့ဖြိုးတိုးတက်ရေးအတွက် ပတ်ဝန်းကျင်ထိန်းသိမ်းရေးနှင့် ငြိမ်းချမ်းရေး လုပ်ငန်းစဉ်များတွင် စဉ်ဆက် မပြတ် ပါဝင် ဆောင်ရွက်လျက်ရှိသည်။

ထို့ကြောင့် (၇၄)နှစ်မြောက် တပ်မတော်နေ့ ဦးတည်ချက်များ၌ သမိုင်းကြောင်းအရ နိုင်ငံတော်၏ပကတိ လိုအပ်ချက် ဖြစ်သည့် တည်ငြိမ် အေးချမ်းရေး၊ စည်းလုံးညီညွတ်ရေး၊ လူမှုစီးပွား ဘဝဖွံ့ဖြိုးတိုးတက်ရေး တို့အား တပ်မတော်၏ ဦးတည်ချက်အဖြစ် စဉ်ဆက်မပြတ်ခံယူလုပ်ဆောင်ရေးဟူ၍ ထည့်သွင်း ဖော်ပြထားခြင်း ဖြစ်ပါသည်။   

.............

Read 43 times Last modified on Monday, 25 March 2019 10:47