SJ WorldNews - шаблон joomla Авто

ရေကြည်ရှာရဝေးသော်ကြောင့် အိမ်ဝန်တာက လေးသော်ကြောင့်

Saturday, 23 September 2017 08:23 font size decrease font size decrease font size increase font size increase font size

မြန်မာပြည်သူတို့ သောက်သုံးရေရရှိမှုမှာ နေရာဒေသနှင့် အချိန်ကာလကိုလိုက်၍ အမျိုးမျိုးရှိကြရာ တောင်ကျရေ၊ ချောင်းရေ၊ မြစ်ရေ၊ ဆည်မြောင်းရေ၊စိမ့်ရေတွင်း၊ အဝီစိတွင်း၊ ကန်လှောင်ရေ၊ မိုးရေစသည်တို့ကိုသုံးစွဲကြရာမှ ယနေ့ခေတ်တွင် သောက်ရေသန့်သုံးစွဲသည့်အလေ့အထ တိုးတက် လာသည်။ မိုးများသော တောင်ပေါ်ဒေသများ၌ တောင်ကျရေကို ဝါးရေတံလျှောက်ဖြင့်သွယ်တန်း၍ တစ်နှစ်လုံးသောက်သုံးရေရရှိကြသည်။ အချို့ဒေသများ၌ စိမ့်တွင်းနှင့်အဝီစိတွင်းများတူး၍ သောက် သုံးရေရရှိကြသည်။ အချို့ဒေသများ၌ ချောင်းရေ၊ မြစ်ရေနှင့်ဆည်မြောင်းရေတို့ကို သောက်ရေသုံး ရေအဖြစ်သုံးစွဲကြရသည်။ အချို့ဒေသများ၌ မိုးရေကိုသိုလှောင်ထားသောကန်ရေကို သုံးစွဲကြရသည်။

မိုးရွာသွန်းမှုနည်းပါးသောဒေသများတွင် နေထိုင်ကြသောပြည်သူတို့သည် နွေကာလအတွက် သောက်သုံးရေကို ကျေးရွာနှင့်အလှမ်းဝေးသောနေရာမှ မြစ်ချောင်း မြောင်းနှင့်ရေကန်ရှိသည့်နေရာသို့ သွားရောက်ခပ်ယူကြရသည့်ခရီးမှာ ပျမ်းမျှ သုံးမိုင်မှငါးမိုင်အထိဝေးသည်။သောက်သုံးရေရရှိရန်သွားရသည့် အချိန်ကြာမြင့်မှုကြောင့် အခြားအလုပ်အကိုင်များလစ်ဟင်းကြရသည်။ကျေးလက်နေပြည်သူများမှာ မိသားစုသောက်သုံးရေနှင့်ကျွဲ၊ နွားတိရစ္ဆာန်များအတွက် နေပူပူ လေပူပူ မှာသယ်ယူကြရသည်။

မန္တလေးတိုင်းဒေသကြီး ကျောက်ပန်းတောင်းမြို့နယ်မှ ကျေးရွာများသည် ပုပ္ပားတောင်မကြီးမှ စမ်းရေရရှိ သောကျေးရွာ၊ ကြက်မောက်တောင်ဆည်နှင့်နီးသောကျေးရွာများအတွက် သောက်သုံးရေအခက်အခဲမရှိကြောင်းတွေ့ရသော်လည်း အခြားကျေးရွာများ၌ သောက်သုံးရေအခက်အခဲရှိကြသည်။ သောက်သုံး ရေအခက်အခဲရှိသောကျေးရွာအချို့မှ မိသားစုများသည် မိုးရေကို အုတ်ရေလှောင်ကန် နှင့်လှောင်ထားကြသည်။ ဒေသထွက်ထန်းရည်ကို ရက်ရက်ရောရောပေးနိုင် သည့်စေတနာရှိသည်။ သို့သော်ရေပေးရန်နှမြောတတ်ကြသည်။ယခုရက်ပိုင်းသတင်းစာများ၌ ကျောက်ပန်းတောင်းမြို့နယ် ချောင်းခြားကျေးရွာတွင် သောက်သုံးရေရရှိရေးအတွက် စက်ရေတွင်းတူးဖော်ခဲ့ရာ စက်တင်ဘာ ၁၆ ရက်က ပြီးစီးသွားကြောင်းနှင့် ပိုက်ချအနက်ပေ ၄ဝဝတွင် ရေထိပ်ပေ ၆ဝ မှ တစ်နာရီလျှင် ရေထွက်နှုန်းဂါလန် ၁၅ဝဝ ရရှိကြောင်းသိရသည်။ စက်ရေတွင်းမှရေစုပ်တင်နိုင်ရေး ဆက်လက်ဆောင်ရွက်လျက်ရှိရာ အောက်တို ဘာ ၁၅ ရက်တွင် ပြီးစီးရန်မျှော်မှန်းထားသည်။ လုပ်ငန်းအားလုံးပြီးစီးပါက ချောင်းခြားကျေးရွာရှိ အိမ်ခြေ ၁၃ဝ မှ လူဦးရေ ၆၈၉ ဦးတို့အတွက် သန့်ရှင်းသောသောက်သုံးရေရရှိကြမည်ဖြစ်ကြောင်းသိရသည်။

ရေအသက်တစ်မနက်ဟုဆိုထားသည့်အတိုင်း သက်ရှိသတ္တဝါတို့အသက်ရှင်ရေးအတွက် ရေအဓိက လိုအပ်သည်။ ကျန်းမာရေးပညာရှင်များက ထို့ထက်ပို၍ ကျယ်ပြန့်နက်နဲလေ့လာတွေ့ရှိချက်များအရ သန့်ရှင်းသောသောက် သုံးရေ ရှားပါးမှုနှင့်တစ်ကိုယ်ရေသန့်ရှင်းရေးအားနည်းလျှင် အနာရောဂါဖြစ်နိုင်သည့်အခွင့်အလမ်းများကြောင်း သိရသည်။ဤအကြောင်းတို့ကြောင့် ကမ္ဘောဒီးယားနိုင်ငံနှင့် လာအိုနိုင်ငံတို့တွင် ဆင်းရဲသားရောဂါဟု အမည်ပေးထားသော မျက်ခမ်းစပ် ရောဂါ(trachoma)ဖြစ်ပွားမှု လျှော့ချရေးကို ကမ္ဘာ့ကျန်းမာရေးအဖွဲ့ (WHO) က ကြိုးပမ်းဆောင်ရွက်ခဲ့ရာ အောင်မြင်မှုရရှိကြောင်း မနီလာမှပေးပို့သော ဆင်ဟွာသတင်း၌ဖော်ပြထားသည်။ မျက်ခမ်းစပ်ရောဂါသည် ကမ္ဘောဒီးယားနိုင်ငံ၌ ၁၉၉ဝ ပြည့်နှစ်၊ လာအိုနိုင်ငံ၌ ၁၉၇ဝပြည့်နှစ်များမှစ၍ ကူးစက်ပျံ့နှံ့နေသော ပြည်သူ့ ကျန်းမာရေးပြဿနာဖြစ်ပြီး ကလေးသူငယ်များအတွက် ကူးစက်မှုလွယ်ကူကြောင်း သိရသည်။

 

ပစိဖိတ်ဒေသအနောက်ဘက်ခြမ်းနိုင်ငံအချို့၌ မျက်ခမ်းစပ်ရောဂါဖြစ်ပွားကြောင်း တွေ့ရသကဲ့သို့ ပစိဖိတ်ဒေသတွင်းနိုင်ငံများမှပြည်သူတို့သည် ငါးစားသုံးမှုမှတစ်ဆင့်ပြဒါးအဆိပ်သင့်သည့်အန္တရာယ်ကြုံတွေ့နေရကြောင်း The Guardian  သတင်း စာမှ ပတ်ဝန်းကျင်ရေးရာအယ်ဒီတာ၏ရေးသားချက်ကို ကိုးကားဖော်ပြထားသော ဆောင်းပါးတစ်ပုဒ်၌တွေ့ရသည်။ ကမ္ဘာတွင်ရှိသော ပင်လယ်သမုဒ္ဒရာရေထုအတွင်းပြဒါးပါဝင်မှုဖြစ်စေသောအကြောင်းရင်းများမှာ ကျောက်မီးသွေးဖြင့် လည်ပတ်သောစက်ရုံများနှင့် ပြဒါးအသုံးများ သောရွှေတူးဖော်ရေးလုပ်ငန်းများကြောင့်ဖြစ်ကြောင်း သိရသည်။ ဇီဝမျိုးစုံမျိုးကွဲများသုတေသနဌာနမှ အမှုဆောင်ညွှန်ကြားရေးမှူး David Evers က ပြောကြားရာတွင် ပစိဖိတ်ဒေသ ရှိပြည်သူများ သည် ငါးစားသုံးမှုများပြားသဖြင့် ပြဒါးဆိပ်သင့်သည့်ဒဏ်ကို ပိုမိုခံစားရကြောင်း၊ သို့သော် ငါးစားသုံးမှုကို တားမြစ်ခြင်းမဟုတ်ဘဲမိမိအနေဖြင့် ရေနေသတ္တဝါများအတွက် အန္တရာယ်မဖြစ်ရေးနှင့် သန့်ရှင်းသော သောက်သုံးရေ ရရှိရေးတို့ကို တစ်ပြိုင်တည်းဆောင်ရွက်ကြရန် တိုက်တွန်းခြင်းသာဖြစ်ပါသည်ဟုဆိုသည်။

 

ကုလသမဂ္ဂပတ်ဝန်းကျင်လေ့လာရေးအစီအစဉ်မှ လေ့လာသူများသည် ပစိဖိတ်ဒေသတွင်း ၂၅ နိုင်ငံမှ၃၆ နေရာရှိ အမျိုးသမီးတစ်ထောင်ကျော်တို့၏ ဆံပင်နမူနာများကိုစမ်းသပ်ကြည့်ရာ အမျိုးသမီး ၈၆ ရာခိုင်နှုန်းမှာ ပြဒါးအဆိပ်သင့်မှု အန္တရာယ်မြင့်မားနေကြောင်း တွေ့ရသည်။ ကမ္ဘာ့နိုင်ငံများ၌ ပြည်သူများ အတွက်ပြဒါးအဆိပ်သင့်စေနိုင်သည့်နေရာ ၃၇ဝ ရှိနေခြင်းကြောင့်လိုအပ်သောတားဆီးရေး အစီအစဉ်မရှိပါကအနာဂတ်မျိုးဆက်များအထိ ဆိုးကျိုးသက်ရောက်စေမည် ဖြစ်ကြောင်းလေ့လာသူများက တိုက်တွန်းထားသည်။

 

မြစ်ချောင်း၊ ဆည်မြောင်းများမှရရှိသော သောက်သုံးရေတို့သည် အထက်တွင်တင်ပြခဲ့သည့်အတိုင်း ဖြတ်သန်းစီးဆင်းရာနေရာအလိုက် ရေထုသန့်စင်မှုအနေအထားကွာခြားကြမည်ဖြစ်သည်။ ၄င်း ရေများ နှင့်စာလျှင် မြေအောက်ရေက ပိုမို သန့်စင်သည့်သောက်သုံးရေအဖြစ် အသုံးပြုနိုင်မည်ဖြစ်ရာ ကျေးလက် ပြည်သူများအတွက် ရေကြည်ရှာရမဝေးတော့ဘဲ စီးပွားရေး၊ လူမှုရေးကိစ္စများတွင် အချိန်ပိုမို အသုံးချနိုင်ကြစေရန်ကျေးလက်ရေရရှိရေးလုပ်ငန်းများ ဖော်ဆောင်ရေး သည် အရေးပါသော လုပ်ငန်း ဖြစ်ပါသည်။ ။

 

 

Read 492 times Last modified on Saturday, 23 September 2017 08:43