SJ WorldNews - шаблон joomla Авто

အနာဂတ်ရွှေပြည်တော်ခရီးသို့ လျှောက်လှမ်းကြရာဝယ်

Friday, 12 July 2019 11:53 font size decrease font size decrease font size increase font size increase font size

ပြည်ထောင်စုသမ္မတမြန်မာနိုင်ငံတော်၏မြို့တော်  နေပြည်တော်ကို ၂ဝဝ၈ ခုနှစ် နိုဝင်ဘာ ၂၆ ရက်တွင် စတင်ဖွဲ့စည်းတည်ထောင်စဉ်က ပျဉ်းမနား၊ တပ်ကုန်း၊ လယ်ဝေးမြို့နယ်တို့ပါဝင်ရာမှ ၂ဝဝ၉ ခုနှစ် မတ် ၂၇ ရက်တွင် ဇေယျာသီရိမြို့နယ်၊ ပုဗ္ဗသီရိမြို့နယ်၊ ဥတ္တရသီရိမြို့နယ်၊ ဇမ္ဗူသီရိမြို့နယ်၊ ဒက္ခိဏသီရိမြို့နယ်တို့ကိုတည်ထောင်၍  ထပ်မံထည့်သွင်းလိုက်သည်။ ယနေ့အချိန်တွင်  ဥတ္တရခရိုင်နှင့်  ဒက္ခိဏခရိုင်ဟူ၍ ဖွဲ့စည်းပြီး မြို့နယ်ရှစ်မြို့နယ်ရှိသော နေပြည်တော်ကောင်စီနယ်မြေသည် နိုင်ငံတော်သမ္မတက တိုက်ရိုက်အုပ်ချုပ်သော ပြည်ထောင်စုနယ်မြေအဖြစ် အသိအမှတ်ပြုထားသည်။

မြန်မာသမိုင်းတွင် လောင်း၊ နောင်၊ ဆင်၊ စဥ့်၊ မောင်၊ ဘိုး၊ ဘ၊ သာ၊ ပု၊ မင်း၊ သီ ဟူသော ကုန်းဘောင်မင်းဆက်မှ မင်းတုန်းမင်းတရားကြီး ထီးနန်းစိုးစံစဉ် ကောဇာသက္ကရာဇ် ၁၂၂၁ တွင် မန္တလေးရတနာပုံနေပြည်တော်သို့  ပြောင်းရွှေ့ထီးနန်းစိုက်ခဲ့သည်ကိုအစွဲပြု၍ အောင်ကျော်ချမ်းအေးမန္တလေးဟု အသိအမှတ်ပြုထားကြသည်။ မန္တလေးရတနာပုံနေပြည်တော်တွင်   မြန်မာတို့ဂုဏ်ကျက်သရေတက်နေဝန်းပမာ ထွန်းတောက်ခဲ့သည်များကို ထင်ရှား

တွေ့နိုင်ကြသည်။ ယနေ့အချိန် မျက်မှောက်ခေတ်သမိုင်းမှ ၂၁ ရာစုနှစ်၏ အစောဆုံးဆယ်စုနှစ်ကာလက  တည်ထောင်ထားသော  နေပြည်တော်ပြည်ထောင်စုနယ်မြေတွင်လည်း ရွှေပြည်တော်ရှေ့ခရီးနီးစေရအောင်  တိုင်းရင်း သားသွေးချင်း ညီနောင်တို့နှီးနှောဖလှယ်ကြရာ ပြည်ထောင်စုလွှတ်တော်၊ ပြည်သူ့လွှတ်တော်၊ အမျိုးသားလွှတ်တော်နှင့် ထာဝရငြိမ်းချမ်းရေးတည်ဆောက်ရန် ညှိနှိုင်းဆွေးနွေးကြရာနေရာများသည် အနာဂတ်တွင် သမိုင်းဝင်နေရာများ ဖြစ်လာကြပေမည်။ နိုင်ငံသားတို့အတွက် ဥပဒေပြုတာဝန်ယူထားသည့်လွှတ်တော်များ၊ အုပ်ချုပ်စီမံခန့်ခွဲရေးအတွက် ပြည်ထောင်စုအဆင့်ဝန်ကြီးဌာနရုံးများ၊ တရားစီရင်ရေးအာဏာပိုင်အဖွဲ့ရုံးများကို  နေပြည်တော်တွင်တည်ဆောက်ထားကြသည်။ အမျိုးသားရေးဆိုင်ရာ နိုင်ငံရေး၊ စီးပွားရေး၊  လူမှုရေးအခြေအနေ တို့ကို လေ့လာသိရှိနိုင်ကြစေရန် အမျိုးသားမော်ကွန်းတိုက်၊ အမျိုးသားစာကြည့်တိုက်တို့တွင်လည်း တိုင်းရင်းသားပြည်သူများ လာရောက်ကြည့်ရှုမှတ်သားနိုင်ကြသည်။

နေပြည်တော်တွင် လေ့လာစရာများမှ မြန်မာ့လွတ်လပ်ရေးကြိုးပမ်းမှု သမိုင်းနှင့်ယှဉ်တွဲလျက် တပ်မတော်သမိုင်းကြောင်းကို ပြသထားသော တပ်မတော်စစ်သမိုင်းပြတိုက်၊ လွတ်လပ်ရေးအတွက် အသက်ပေးကြသော တပ်မတော်သားများနှင့် ရရှိပြီးလွတ်လပ်ရေး နောက်တစ်ကြိမ်ပြန်လည်ဆုံးရှုံးမသွားစေရန် အသက်ပေး ကာကွယ်သွားကြသော တပ်မတော်သားတို့အား အမှတ်တရ ဂုဏ်ပြု တည်ဆောက်ထားသည့် သူရဲကောင်းဗိမာန်တို့ ပါဝင်သည်။

၂ဝ၁၈-၂ဝ၁၉ ပညာသင်နှစ် တက္ကသိုလ်ဝင်စာမေးပွဲတွင် ထူးချွန်စွာ အောင်မြင်ခဲ့သော တပ်မတော်(ကြည်း၊ ရေ၊ လေ)မှ စစ်သည်များ၊ တပ်မတော်မိသားစုဝင် သား၊ သမီးများ၊ စစ်မှုထမ်းဟောင်းမိသားစုဝင် သား၊ သမီးများ၊  ဘက်စုံထူးချွန်လူငယ်များ၊ တက္ကသိုလ်ပညာသင်ဆုရရှိခဲ့ကြသော ကျောင်းသား၊ ကျောင်းသူများနှင့် ကျောင်းသား မိဘများသည် တာဝန်ရှိသူများလိုက်ပါ၍ ဇူလိုင် ၈ ရက်တွင် နေပြည်တော်အတွင်း လှည့်လည်ကြည့်ရှုလေ့လာကြသည်။ ထိုသို့လှည့်လည်ကြည့်ရှုလေ့လာရာတွင် သူရဲကောင်းဗိမာန်သို့သွားရောက်၍ ဂုဏ်ပြုပန်းခြင်းဖြင့် စုပေါင်းအလေးပြုကြသည်။ ထို့နောက် တပ်မတော်စစ်သမိုင်းပြတိုက်ရှိ တပ်မတော်(ကြည်း၊ ရေ၊ လေ)ပြခန်းများနှင့် ပြင်ပပြကွက်များမှ တိုက်ခိုက်ရေးယာဉ်များအား သွားရောက်ကြည့်ရှုလေ့လာကြသည်။ ဆက်လက်၍ သတ္တသတ္တာဟ စေတီတော်နှင့် ဖွား၊ ပွင့်၊ ဟော၊ စံ သံဝေဇနိယလေးဌာနတို့အား ဖူးမြော်ကြည်ညိုလေ့လာခဲ့ကြသည့် ကုသိုလ်ကောင်းမှုသဒ္ဓါတရားကို မုဒိတာပွားရ သာဓုခေါ်ရသည်။

ကျောင်းစာကိုသင်ရင်း အပြင်ထွက်၍ ပညာဗဟုသုတတိုးပွားအောင် လေ့လာမှတ်သား ကြိုးစားခဲ့ကြသော ထူးချွန်ကျောင်းသားများသည် မဆုတ်မနစ်သောဇွဲဖြင့် လုံ့လ၊ ဝီရိယစိုက်ထုတ်ကြသူများဖြစ်သည်။ ယခုအောင်မြင်မှုမှ  တစ်ဆင့်တက်၍ နိုင်ငံတော်နှင့်ပြည်သူတို့အား အကျိုးပြုနိုင်သော  အဆင့်မြင့်တက္ကသိုလ်ပညာရပ်ကို ဆက်လက်သင်ယူကြရာတွင် ဆေးပညာနှင့်အင်ဂျင်နီယာပညာရပ်သင်ယူရန် မျှော်မှန်းထားသည်။ ယခုနေပြည်တော်သို့ ဆုယူရန်ရောက်လာကြချိန်တွင် တစ်ဦးနှင့်တစ်ဦးအတွေ့အကြုံမျိုးစုံနှင့် ဗဟုသုတအဖုံဖုံတို့ကို  တွေ့ဆုံဖလှယ်ခွင့်ရကြသဖြင့် ပိုမိုရင်းနှီးချစ်ခင်မှု ရရှိကြသည်။ ထို့ကြောင့် ယခုနေပြည်တော်တွင် တွေ့ဆုံရင်းနှီးချစ်ခင်မှုကို အခြေပြု၍ အနာဂတ်ရွှေပြည်တော်ခရီးသို့ လျှောက်လှမ်းကြရာဝယ် ခိုင်မြဲသောပြည်ထောင်စု စိတ်ဓာတ်မွေးမြူထားရှိကြပါရန် မြဝတီက တိုက်တွန်း နှိုးဆော်လိုက်ရပါသည်။  

Read 68 times