SJ WorldNews - шаблон joomla Авто

ပြည်သူအခြေပြု ငါးသယံဇာတကြွယ်ဝရေး

Sunday, 05 November 2017 08:16 font size decrease font size decrease font size increase font size increase font size

မြန်မာနိုင်ငံတွင် ကာလတိုအမျိုးသားစီမံကိန်းချမှတ်၍ နှစ်အလိုက် ဖွံ့ဖြိုး တိုးတက်မှုမျှော်မှန်း ချက်များဖြင့် အကောင်အထည်ဖော်လျက်ရှိရာ လယ်ယာ၊ သားငါး၊ သစ်တော၊စွမ်းအင်၊ သတ္တုနှင့် တွင်းထွက်၊ စက်မှုလက်မှု၊ လျှပ်စစ်၊ ဆောက်လုပ်ရေး၊ ပို့ဆောင်ဆက်သွယ်ရေး၊ ငွေရေးကြေးရေး၊ လူမှုရေးနှင့် စီမံခန့်ခွဲရေး၊ ငှားရမ်းခနှင့် အခြားဝန်ဆောင်မှု၊ကုန်သွယ်မှုဟူသော ကဏ္ဍအသီးသီးပါဝင်ကြသည်။ သားငါးကဏ္ဍ ရေချိုရေငန်ငါးပုစွန်မွေးမြူထုတ်လုပ်ရေးလုပ်ငန်းများသည် ပြည်ပပို့ကုန်အဖြစ် ၂ဝ၁၅-၂ဝ၁၆ ဘဏ္ဍာနှစ်တွင်မက်ထရစ်တန်ချိန် ၃၆ဝဝဝဝ ကျော်တင်ပို့ခဲ့ရာမှ ၂ဝ၁၆-၂ဝ၁၇ ဘဏ္ဍာနှစ်တွင် မက်ထရစ်တန်ချိန် ၄၃ဝဝဝဝ ကျော်ကို တရုတ်ပြည်သူ့သမ္မတနိုင်ငံ၊ ထိုင်ဝမ်(တရုတ်)၊ အမေရိကန်ပြည်ထောင်စု၊ အရှေ့အလယ်ပိုင်းနိုင်ငံများနှင့် ဥရောပ သမဂ္ဂအဖွဲ့ဝင်နိုင်ငံများအပါအဝင်နိုင်ငံပေါင်း ၄ဝ ကျော်သို့တင်ပို့နိုင်ကြောင်း သိရသည်။

မြန်မာနိုင်ငံ ပင်လယ်ကမ်းရိုးတန်းသည် ၂၈၃၂ ကီလိုမီတာရှည်လျားသဖြင့် ကမ်းဝေးကမ်းနီးငါးဖမ်းလုပ်ငန်းများကလည်း ပြည်တွင်းသားငါးစားသုံးမှုနှင့် ပြည်ပပို့ကုန် တိုးမြှင့်ရေးကို တစ်တပ်တစ်အားပါဝင်ကြသည်။ မုတ္တမပင်လယ်ကွေ့ဒေသ၌ ဥပဒေမဲ့ ငါးဖမ်းသည့်လုပ်ငန်းများကြောင့် ၁ဝ နှစ်အတွင်း ငါးမျိုးစိတ် ၅ဝ ရာခိုင်နှုန်းခန့်ဆုံးရှုံးသွားကြောင်း ဒေသခံများ၏ပြောကြားချက်အရ သိရသည်။ ယနေ့အချိန်တွင် မုတ္တမပင်လယ်ကွေ့ဒေသ၏ တစ်မူထူးခြားသောဇီဝမျိုးစိတ်များအား ထိန်းသိမ်းစောင့်ရှောက်၍ ရေရှည်ဖွံ့ဖြိုးတိုးတက်လာစေရန်ရပ်ရွာအခြေပြု ကမ်းရိုးတန်း စီမံခန့်ခွဲမှုစီမံချက်ကို မွန်ပြည်နယ် သထုံမြို့နယ်၌ စုပေါင်းဆောင်ရွက်နေကြသည်။ အဆိုပါစီမံချက်ကို ဆွစ်ဇာလန်နိုင်ငံမှ ဖွံ့ဖြိုးရေးနှင့် ပူးပေါင်းဆောင်ရွက်ရေးအေဂျင်စီနှင့် နိုင်ငံတကာအဖွဲ့အစည်းလေးဖွဲ့တို့က ပူးပေါင်းဆောင်ရွက်ခြင်းဖြစ်ပြီး မွန်ပြည်နယ် အတွင်းရှိ ဘီးလင်း၊ ကျိုက်ထို၊ ပေါင်နှင့် ချောင်းဆုံမြို့နယ်တို့အတွင်း ငါးသယံဇာတရေရှည်ဖွံ့ဖြိုးရေးအတွက် တရားမဝင် ငါးဖမ်းဆီးခြင်းနှင့် မသမာသောနည်းနှင့် ငါးဖမ်းဆီးခြင်းများ မရှိစေရန် ဆောင်ရွက်သွားမည်ဖြစ်သည်။

မြန်မာနိုင်ငံ ငါးလုပ်ငန်းဖွံ့ဖြိုးရေးလုပ်ငန်းများကို ရခိုင်ပြည်နယ်၊ ရှမ်းပြည်နယ်၊ စစ်ကိုင်းတိုင်းဒေသကြီးနှင့် ဧရာဝတီတိုင်းဒေသကြီးတို့အတွင်း အကောင်အထည်ဖော်ရန် ငါးလုပ်ငန်းဦးစီးဌာနနှင့် နိုင်ငံတကာအဖွဲ့တို့က မြန်မာ့ရေသတ္တဝါမွေးမြူရေးကဏ္ဍ ရေရှည်ဖွံ့ဖြိုးတိုးတက်ရေးစီမံကိန်း(MYSAP) ချမှတ်ထားပြီးဖြစ်သည်။ ပင်လယ် ကမ်းရိုးတန်းဒေသများဖြစ်သော ရခိုင်ပြည်နယ်နှင့် ဧရာဝတီတိုင်းဒေသကြီး၊ ကုန်းတွင်းပိုင်း စစ်ကိုင်းတိုင်းဒေသကြီးနှင့် တောင်ပေါ်ဒေသဖြစ်သော ရှမ်းပြည်နယ် တို့တွင် ၂ဝ၁၆ ခုနှစ်မှ ၂ဝ၂၁ ခုနှစ်အထိဖော်ဆောင်မည့်လုပ်ငန်းများအတွက် ဥရောပသမဂ္ဂနှင့် ဂျာမနီစီးပွားရေးပူးပေါင်းဆောင်ရွက်ရေးနှင့် ဖွံ့ဖြိုးရေးကော်ပိုရေးရှင်း တို့က စီမံကိန်းကုန်ကျငွေထောက်ပံ့ပေးမည်ဖြစ်သည်။

ရခိုင်ပြည်နယ်အတွင်း ငါးပုစွန်မွေးမြူရေးနှင့် ဖမ်းဆီးရေးလုပ်ငန်းများမှာ ပင်လယ် ကမ်းရိုးတန်း၊ မြစ်များ၊ ချောင်းများနှင့် မွေးမြူရေးကန်များတွင် လုပ်ကိုင်ကြ သည်။ ယခုအချိန်တွင် ကမ်းဝေးငါးဖမ်းသင်္ဘောများက ကန့်သတ်ဧရိယာအတွင်း ဝင်ရောက် ဖမ်းဆီးခြင်းနှင့်ဒေသခံရေလုပ်သားများ ဝင်ရောက်လုပ်ကိုင်မှုများပြားလာခြင်းတို့ကြောင့် ငါးပုစွန်ရှားပါးလာကြောင်း သိရသည်။ ၂ဝ၁၆ ခုနှစ် အောက်တိုဘာလအတွင်း ပုစွန်အဝယ်ဒိုင်တစ်ဒိုင်လျှင်တစ်ရက်အတွက် ပိဿာ ၂ဝ ခန့် ဝယ်ယူရရှိခဲ့သော်လည်း ယခုနှစ် အောက်တိုဘာလအတွင်းက တစ်ရက်လျှင် ပုစွန်ဝယ်ယူရရှိမှုမှာ ငါးပိဿာခန့်သာရသည်။ ဤသို့ ပုစွန်အရနည်းရသည့်အကြောင်းရင်းများမှာ ရာသီဥတု နှင့်သက်ဆိုင်သကဲ့သို့ မြစ်အထက်ပိုင်းဒေသများ၌ ငါးဖမ်းသူများက အဆိပ်အသုံးပြုဖမ်းကြခြင်းကြောင့် ပုစွန်များပါသေဆုံးခြင်းဖြစ်ကြောင်း ဒေသခံများထံမှ သိရသည်။

ရခိုင်ပြည်နယ်မြောက်ပိုင်းဒေသများတွင် ARSA အစွန်းရောက်ဘင်္ဂါလီအကြမ်းဖက် သမားများ၏ အကြမ်းဖက်တိုက်ခိုက်မှုဖြစ်စဉ်များဖြစ်ပွားပြီးနောက် ယခုအခါ နယ်မြေလုံခြုံရေးနှင့် တည်ငြိမ်မှုရရှိလာပြီဖြစ်၍ ဝန်ကြီးဌာနများအနေဖြင့် ကဏ္ဍအလိုက် ရေတိုဦးစားပေးလုပ်ငန်းများဆောင်ရွက်နေကြသည်။ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနက ဆောင်ရွက်နေသောလုပ်ငန်းများတွင် တိုင်းရင်းသား ကျေးရွာ ၈၂ ရွာအတွက်တစ်ရွာလျှင် ငါးမွေးမြူရေးကန်တစ်ဧကနှုန်းတူးဖော်ခြင်း၊ ငါးမျိုးနှင့် ကဏန်းမျိုးစိုက်ထည့်ခြင်း၊ တိရစ္ဆာန်အစာနှင့်ဆေးဝါးဖြန့်ဖြူးခြင်း၊ ကမ်းနီးငါးဖမ်းလုပ်ငန်းကို တည်ဆဲဥပဒေနှင့်အညီခွင့်ပြုပေးခြင်း စသည်တို့အပါအဝင် အခြားဖွံ့ဖြိုးရေးလုပ်ငန်းများ ဆောင်ရွက်ပေးနေပြီဖြစ်သည်။

ငါးမွေးမြူရေးရေတိုလုပ်ငန်းအတွက် အစာလိုအပ်မည်ဖြစ်သော်လည်း ရေရှည်အတွက်ရေမှော်နှင့် မြက်ပင်အနုများကို ငါးကန်အတွင်း ထည့်သွင်းကျွေးသော အော်ဂဲနစ် ငါးမွေးမြူနည်းကို ပဲခူးတိုင်းဒေသကြီး၊ ဧရာဝတီတိုင်းဒေသကြီးနှင့် ရန်ကုန်တိုင်း ဒေသကြီးတို့တွင်စမ်းသပ်အောင်မြင်ကြောင်းသိရသဖြင့် နည်းယူမွေးမြူသင့်သည်။ ၂ဝ၁၅ ခုနှစ် က စတင်ခဲ့သော အဆိုပါအော်ဂဲနစ်ငါးမွေးမြူနည်းသည် အချိန်ကြာအောင် စောင့်ရသော်လည်းအစာဖိုးသက်သာသဖြင့်သာမန်ငါးမွေးမြူရေးလုပ်ငန်းများထက် အမြတ်ငွေနှစ်ဆခန့်ရရှိကြောင်း သိရသည်။

သို့ဖြစ်၍ ငါးသယံဇာတပေါကြွယ်ဝရေး ကမ်းဝေးကမ်းနီးနှင့် ကုန်းတွင်းဒေသများ၌ပါကြိုးစား နေကြရာ ဥပဒေနှင့်မညီသောငါးဖမ်းသူများကို ပြည်သူအခြေပြုနည်းဖြင့် တားဆီးကြပါရန် မြဝတီက တိုက်တွန်းနှိုးဆော်လိုက်ရပါသည်။ ။

Read 91 times Last modified on Sunday, 05 November 2017 08:40