SJ WorldNews - шаблон joomla Авто

နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ဂျပန်နိုင်ငံသို့ အလုပ်သဘောခရီး သွားရောက်ခဲ့ခြင်းနှင့် ပတ်သက်သည့် သတင်းထုတ်ပြန်ချက်

Friday, 12 October 2018 12:18 font size decrease font size decrease font size increase font size increase font size

ပြည်ထောင်စု သမ္မတ မြန်မာနိုင်ငံတော် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်သည် ဂျပန်နိုင်ငံ ဝန်ကြီးချုပ် မစ္စတာရှင်ဇိုအာဘေး၏ ဖိတ်ကြားချက်အရ နှစ်နိုင်ငံဆွေးနွေးပွဲများ ပြုလုပ်ရန်နှင့် ၂ဝ၁၈ ခုနှစ် အောက်တိုဘာလ ၈ ရက်နေ့မှ ၉ ရက် နေ့အထိ တိုကျိုမြို့၌ ကျင်းပခဲ့သည့် (၁ဝ)ကြိမ်မြောက် မဲခေါင်-ဂျပန်ထိပ်သီး အစည်းအဝေးသို့ တက်ရောက်ရန်အတွက် ဂျပန်နိုင်ငံသို့ အလုပ်သဘော ချစ်ကြည်ရေးခရီး သွားရောက်ခဲ့ပြီး အောက်တိုဘာလ ၁ဝ ရက်နေ့တွင် ရန်ကုန်မြို့သို့  ပြန်လည်ရောက်ရှိခဲ့သည်။  အဆိုပါ ခရီးစဉ်သို့ ပြည်ထောင်စု အစိုးရအဖွဲ့ရုံး ဝန်ကြီးဌာန ပြည်ထောင်စုဝန်ကြီး ဦးသောင်းထွန်း၊ အပြည်ပြည်ဆိုင်ရာ ပူးပေါင်းဆောင်ရွက်ရေး ဝန်ကြီးဌာန ပြည်ထောင်စုဝန်ကြီး ဦးကျော်တင်၊ သမ္မတရုံးဝန်ကြီးဌာန ဒုတိယဝန်ကြီး ဦးမင်းသူနှင့်  စီမံကိန်းနှင့်  ဘဏ္ဍာရေးဝန်ကြီးဌာန၊ ဒုတိယဝန်ကြီး ဦးဆက်အောင်တို့ လိုက်ပါသွား ခဲ့သည်။

နိုင်ငံတော်၏အတိုင်ပင်ခံ ပုဂ္ဂိုလ်သည်(၈-၁ဝ-၂ဝ၁၈)ရက်နေ့၊ ညပိုင်းတွင် ဂျပန်ဝန်ကြီးချုပ် ရှင်ဇိုအာဘေးက မဲခေါင်-ဂျပန် ထိပ်သီးအစည်းအဝေးသို့ တက်ရောက်လာသည့် မဲခေါင်နိုင်ငံများမှ ကိုယ်စားလှယ်အဖွဲ့ ခေါင်းဆောင်များအား   ဝန်ကြီးချုပ် အိမ်တော်တွင် တည်ခင်းဧည့်ခံသည့်  ညစာစားပွဲသို့ တက်ရောက်ခဲ့သည်။

နိုင်ငံတော်၏ အတိုင်ပင်ခံပုဂ္ဂိုလ်သည်(၉-၁ဝ-၂ဝ၁၈)ရက်နေ့၊ နံနက်ပိုင်းတွင် ဂျပန်-မဲခေါင်ပါလီမန် ချစ်ကြည်ရေးအသင်းမှ New Otani Hotel တွင် တည်ခင်းဧည့်ခံသည့် နံနက်စာစားပွဲသို့ အခြားမဲခေါင်နိုင်ငံများမှ ခေါင်းဆောင် များနှင့်အတူ တက်ရောက်ခဲ့သည်။

ဆက်လက်၍ တိုကျိုမြို့ရှိ နိုင်ငံတော် ဧည့်ဂေဟာတွင်ပြုလုပ်သော (၁ဝ)ကြိမ်မြောက် မဲခေါင်-ဂျပန်ထိပ်သီး အစည်းအဝေးသို့ တက်ရောက်ခဲ့သည်။ အစည်းအဝေးတွင် ဂျပန်နိုင်ငံ ဝန်ကြီးချုပ် ရှင်ဇိုအာဘေးက သဘာပတိအဖြစ် ဆောင်ရွက်ခဲ့ပြီး ကမ္ဘောဒီးယားနိုင်ငံ ဝန်ကြီးချုပ် ဆမ်ဒက်ဟွန်ဆန်၊ လာအိုနိုင်ငံ ဝန်ကြီးချုပ် ထောင်လွန်းဆီဆုလစ်၊ ထိုင်းနိုင်ငံ ဝန်ကြီးချုပ် ပရာယုဒ်ချန်အိုချာနှင့် ဗီယက်နမ်နိုင်ငံ ဝန်ကြီးချုပ် ငုယင်စွန်ဖုတို့ တက်ရောက်ခဲ့သည်။

နိုင်ငံတော်၏ အတိုင်ပင်ခံပုဂ္ဂိုလ်သည် အစည်းအဝေးတွင် မိန့်ခွန်းတစ်ရပ် ပါဝင်ပြောကြားခဲ့ရာ၌ မဲခေါင်-ဂျပန် ပူးပေါင်းဆောင်ရွက်ရေး၏''၂ဝ၁၅ တိုကျိုမဟာဗျူဟာ (၂ဝ၁၅-၂ဝ၁၈)''အရ ဆောင်ရွက်ခဲ့သည့် ပူးပေါင်းဆောင်ရွက်မှု လုပ်ငန်းစဉ်များကို သုံးသပ်ဆွေးနွေးခဲ့ပြီး အနာဂတ်တွင် ဆောင်ရွက်သွားမည့် အစီအစဉ်များ၊ အထူးသဖြင့် မဲခေါင်နိုင်ငံများ အကြား သယ်ယူပို့ဆောင်ရေးနှင့် စွမ်းအင်ကဏ္ဍများ အပါအဝင် အခြားသောကဏ္ဍများ၏ အခြေခံအဆောက်အဦများ ပေါင်းစည်း ဆက်နွှယ်မှုတိုးမြှင့်ရေး၊ မဲခေါင်နိုင်ငံများနှင့် ဂျပန်နိုင်ငံတို့အကြား စက်မှုကုန်ထုတ်လုပ်မှု ဆိုင်ရာချိတ်ဆက်ဆောင်ရွက်မှု မြှင့်တင်ဆောင်ရွက်သွားရေး၊''ပြည်သူအခြေပြု အသိုက်အဝန်း''တစ်ခု  ထူထောင်သွားရေး၊ နည်းပညာနှင့် လူ့စွမ်းအားအရင်းအမြစ် ဖွံ့ဖြိုးတိုးတက်မှုတို့ အတွက် ဆက်လက် ဆောင်ရွက်သွားမည့် အစီအစဉ်များနှင့် နိုင်ငံတကာနှင့် ဒေသဆိုင်ရာ အရေးကိစ္စများနှင့် ပတ်သက်၍ ထည့်သွင်းဆွေးနွေး ခဲ့သည့် ထိပ်သီးအစည်းအဝေးတွင်  နိုင်ငံခေါင်းဆောင်များသည် ၂ဝ၁၉-၂ဝ၂၁ ခုနှစ်ကာလအတွက် ပူးပေါင်းဆောင်ရွက်မှု မူဘောင်အဖြစ် ''၂ဝ၁၈ တိုကျိုမဟာဗျူဟာ (၂ဝ၁၉-၂ဝ၂၁)''ကို အတည်ပြုထုတ်ပြန် ကြေညာခဲ့သည်။

မြန်မာနိုင်ငံသည် ''၂ဝ၁၅ တိုကျိုမဟာဗျူဟာ (၂ဝ၁၅-၂ဝ၁၈)''အရ နှစ်နိုင်ငံပူးပေါင်း ဆောင်ရွက်မှု စီမံကိန်း (၆ဝ)ကျော် အကောင်အထည်ဖော်နိုင်ခဲ့ပြီး အခြားမဲခေါင်နိုင်ငံများ ပါဝင်သော နိုင်ငံစုံစီမံကိန်း (၁ဝဝ)ကျော်မှလည်း အကျိုးကျေးဇူးများ ရရှိခဲ့သည်။

ယခုအသစ်ထုတ်ပြန်သည့် ''၂ဝ၁၈ တိုကျို မဟာဗျူဟာ (၂ဝ၁၉-၂ဝ၂၁)''တွင် ဒေသတွင်းပေါင်းစည်း ချိတ်ဆက်မှုမြှင့်တင်ရေး ကဏ္ဍ (Vibrant and Effective connectivity)၊ ပြည်သူအခြေပြု အသိုက်အဝန်း ထူထောင်ရေးကဏ္ဍ (People-Centered Society)နှင့် စိမ်းလန်းသော မဲခေါင်ဒေသ တည်ထောင်ရေးကဏ္ဍ(Realization of a Green Mekong) ဟူသော မဏ္ဍိုင်(၃)ရပ် ပါဝင်သည်။ မြန်မာနိုင်ငံအနေဖြင့် ''၂ဝ၁၈ တိုကျိုမဟာဗျူဟာ (၂ဝ၁၉-၂ဝ၂၁)''အရ ကဏ္ဍအလိုက် ပူးပေါင်းဆောင်ရွက်မှုများ ဆက်လက်ပြုလုပ် သွားမည်ဖြစ်သည်။ နိုင်ငံတော်၏ အတိုင်ပင်ခံပုဂ္ဂိုလ်သည် မဲခေါင်-ဂျပန်ထိပ်သီး အစည်းအဝေးအပြီး ပြုလုပ်သည့် ပူးတွဲသတင်းစာ ရှင်းလင်းပွဲ အခမ်းအနားသို့ အခြားခေါင်းဆောင်များနှင့် အတူ ပါဝင်တက်ရောက်၍ ရှင်းလင်းပြောကြားခဲ့သည်။

မဲခေါင်-ဂျပန်ပူးပေါင်း ဆောင်ရွက်ရေး အစီအစဉ်ကို ၂ဝဝ၉ ခုနှစ်တွင် စတင်ခဲ့ပြီး အဖွဲ့ဝင်များအဖြစ်  မြန်မာနိုင်ငံ၊ ကမ္ဘောဒီးယား၊ လာအို၊ ထိုင်း၊ ဗီယက်နမ်နှင့် ဂျပန်နိုင်ငံတို့ ပါဝင်သည်။ မဲခေါင်-ဂျပန်ပူးပေါင်း ဆောင်ရွက်မှု၏ အဓိကရည်ရွယ်ချက်မှာ ဂျပန်နိုင်ငံ၏  ဖွံ့ဖြိုးရေး အကူအညီရန်ပုံငွေဖြင့် မဲခေါင်ဒေသနိုင်ငံများ၏ လူမှုရေး၊ စီးပွားရေး ကဏ္ဍများ ဖွံ့ဖြိုးတိုးတက်လာစေရန်နှင့် ပေါင်းစည်းဆက်နွှယ်မှု မြင့်မားလာစေရန် ဖြစ်ပါသည်။

အောက်တိုဘာလ (၉) ရက်နေ့၊ ညနေပိုင်းတွင် နိုင်ငံတော်၏ အတိုင်ပင်ခံပုဂ္ဂိုလ်သည် ဂျပန်ဝန်ကြီးချုပ် ရှင်ဇိုအာဘေးနှင့် နိုင်ငံတော် ဧည့်ဂေဟာ၌ နှစ်နိုင်ငံတွေ့ဆုံ ဆွေးနွေးပွဲကို ကျင်းပပြုလုပ်ခဲ့သည်။ ထိုသို့တွေ့ဆုံရာတွင် မြန်မာနိုင်ငံ၏ ဒီမိုကရေစီ အသွင်ကူးပြောင်းရေး လုပ်ငန်းစဉ်များ၊   ငြိမ်းချမ်းရေးနှင့် အမျိုးသားပြန်လည် ရင်ကြားစေ့ရေး လုပ်ငန်းစဉ်များတွင် ဂျပန်နိုင်ငံမှ ဆက်လက်အကူအညီများ ပေးအပ်သွားမည့် ကိစ္စများ၊ ရန်ကုန်မြို့တော် ဖွံ့ဖြိုးတိုးတက်ရေး ကိစ္စရပ်များ၊ အထူးသဖြင့် မြို့တွင်းယာဉ်ကြော ပိတ်ဆို့မှု၊ ရေကြီးရေလျှံမှု လျော့ကျစေရေး၊ ရေဆိုးစွန့်ပစ်စနစ်များ ကောင်းမွန်လာစေရေးအတွက် ဂျပန်ယန်းငွေ ၇ဝ ဘီလီယံပံ့ပိုးမည့် စီမံချက်နှစ်ခု အကူအညီပေးရန် အတည်ပြုသည့်ကိစ္စ၊ ကျေးလက်ဒေသ ဖွံ့ဖြိုးရေး ဆောင်ရွက်ပေးနေမှုများ၊ အသေးစားနှင့် အလတ်စားစီးပွားရေး လုပ်ငန်းများ ဖွံ့ဖြိုးတိုးတက်ရေး အတွက် ပူးပေါင်း ဆောင်ရွက်သွားနိုင်မည့် အခြေအနေများ၊ ရခိုင်ပြည်နယ်မှ နေရပ်စွန့်ခွာ သွားသူများအား ပြန်လည်နေရာ ချထားနိုင်ရန်  အိမ်ရာများ ဆောက်လုပ်ပေးသွားမည့် ကိစ္စများနှင့် ရခိုင်ပြည်နယ်တစ်ခုလုံးတွင် ရေနှင့်လျှပ်စစ်ဓာတ်အားဖြန့်ဖြူးရေး၊ လမ်းပန်းဆက်သွယ်ရေး ကောင်းမွန်လာစေရေး အတွက် ဆောင်ရွက်ပေးသွားမည့် ကိစ္စရပ်များကို ရင်းနှီးခင်မင်စွာ အမြင်ချင်းဖလှယ် ဆွေးနွေးခဲ့ကြပြီး နိုင်ငံတော်၏ အတိုင်ပင်ခံ ပုဂ္ဂိုလ်မှ ဂျပန်ဝန်ကြီးချုပ်အား မြန်မာနိုင်ငံသို့ ချစ်ကြည်ရေးခရီး လာရောက်ရန် ဖိတ်ကြားခဲ့သည်။ ထို့နောက် ဝန်ကြီးချုပ် ရှင်ဇိုအာဘေးမှ နိုင်ငံတော်၏ အတိုင်ပင်ခံပုဂ္ဂိုလ်နှင့် မြန်မာကိုယ်စားလှယ်အဖွဲ့အား  နိုင်ငံတော်ဧည့် ဂေဟာ၌ ဂုဏ်ပြုညစာစားပွဲဖြင့် တည်ခင်း ဧည့်ခံခဲ့သည်။

တိုကျိုမြို့တွင်ရှိနေစဉ်အတွင်း နိုင်ငံတော်၏ အတိုင်ပင်ခံပုဂ္ဂိုလ်သည် (၆-၁ဝ-၂ဝ၁၈) ရက်နေ့ နေ့လယ်ပိုင်းတွင် ဂျပန်နိုင်ငံ NHK  သတင်းဌာနအား လက်ခံတွေ့ဆုံပြီး မြန်မာ-ဂျပန် နှစ်နိုင်ငံဆက်ဆံရေး အခြေအနေ၊ မဲခေါင်-ဂျပန် ပူးပေါင်းဆောင်ရွက်မှု လုပ်ငန်းစဉ်များနှင့်(၁ဝ)ကြိမ်မြောက်   မဲခေါင်-ဂျပန်ထိပ်သီး အစည်းအဝေးမှ ရရှိလာနိုင်မည့်ရလဒ်များ၊ ရခိုင်ပြည်နယ် အရေးကိစ္စနှင့် အခြားမေးမြန်းသည့် ကိစ္စရပ်များကို ဆွေးနွေး ဖြေကြားခဲ့သည်။

ညနေပိုင်းတွင် နိုင်ငံတော်၏ အတိုင်ပင်ခံပုဂ္ဂိုလ်သည် တိုကျိုမြို့၊ မြန်မာသံရုံး၊ စစ်သံရုံးတို့မှ ဝန်ထမ်းများ၊ မိသားစုဝင်များနှင့် New Otani Hotel တွင် ခင်မင်ရင်းနှီးစွာ တွေ့ဆုံပြီး သံရုံးဝန်ထမ်းများအနေဖြင့် မြန်မာ-ဂျပန် ဆက်ဆံရေး ဆက်လက်တိုးတက် ကောင်းမွန်စေရေး၊ ဂျပန်နိုင်ငံမှ ကုန်သွယ်ရေးနှင့် ရင်းနှီးမြှုပ်နှံမှုများ ပိုမိုမြှင့်တင်နိုင်ရေးနှင့် ဂျပန်နိုင်ငံရောက် မြန်မာနိုင်ငံသားများ အကျိုး ကာကွယ်စောင့်ရှောက်ရေး တို့အတွက် ကြိုးပမ်းဆောင်ရွက်ကြရန် မှာကြားခဲ့သည်။

နိုင်ငံတော်၏အတိုင်ပင်ခံ ပုဂ္ဂိုလ်ဦးဆောင်သော မြန်မာကိုယ်စားလှယ် အဖွဲ့သည် (၇-၁ဝ-၂ဝ၁၈) ရက်နေ့၊ နံနက်ပိုင်းတွင် တိုကျိုမြို့မှ ဖူကူရှီးမားခရိုင်၊ အီဇူမီဇာကီစံပြကျေး ရွာသို့သွားရောက်ခဲ့ပြီး   ကျေးရွာအတွင်း စိုက်ပျိုးရေး လုပ်ငန်း ဆောင်ရွက်နေမှု အခြေအနေများ၊ စိုက်ပျိုးရေး ထွက်ကုန်များနှင့် ကုန်ချောပစ္စည်းများ တင်ပို့ရောင်းချမှု အခြေအနေများကို  လှည့်လည်ကြည့်ရှု လေ့လာခဲ့သည်။

နိုင်ငံတော်၏ အတိုင်ပင်ခံပုဂ္ဂိုလ်သည် (၈-၁ဝ-၂ဝ၁၈)ရက်နေ့   နံနက်ပိုင်းတွင် New Komeito Party ၏ ဥက္ကဋ္ဌ၊ Mr. Natsuo Yamaguchi နှင့် Nippon Foundation ဥက္ကဋ္ဌ Mr.Yohei Sasakawa အား သီးခြားစီ လက်ခံတွေ့ဆုံခဲ့သည်။ New Koneito Party ၏ဥက္ကဋ္ဌ  Mr. Natsuo Yamaguchi နှင့်တွေ့ဆုံရာတွင် မြန်မာ-ဂျပန် နှစ်နိုင်ငံ ဆက်ဆံရေးနှင့် ပူးပေါင်းဆောင်ရွက်မှု မြှင့်တင်ရေး၊ မြန်မာနိုင်ငံ၏ ဒီမိုကရေစီအသွင် ကူးပြောင်းရေး လုပ်ငန်းစဉ်၊ စီးပွားရေးဖွံ့ဖြိုး တိုးတက်ရေးကြိုးပမ်းမှုနှင့် လူ့စွမ်းအားအရင်းအမြစ် ဖွံ့ဖြိုးတိုးတက်မှု ကဏ္ဍများတွင် ဂျပန်နိုင်ငံမှ ဆက်လက်အကူအညီ ပေးအပ်မည့်ကိစ္စများကို  ဆွေးနွေးခဲ့သည်။

Nippon Foundation  ဥက္ကဋ္ဌ Mr. Yohei Sasakawa နှင့်တွေ့ဆုံရာတွင် မြန်မာနိုင်ငံ၏   ငြိမ်းချမ်းရေးနှင့် အမျိုးသားပြန်လည် ရင်ကြားစေ့ရေး လုပ်ငန်းစဉ်များ၊ ရခိုင်ပြည် နယ်အပါအဝင်  ပြည်နယ်အများအပြား၌ စာသင်ကျောင်းများ ဆောက်လုပ်ပေးလျက်ရှိမှုနှင့် အနာကြီးရောဂါ တိုက်ဖျက်ရေးအတွက် ကြိုးပမ်းဆောင်ရွက်မှု အခြေအနေများကို ဆွေးနွေးခဲ့ကြသည်။

ထို့ပြင် နိုင်ငံတော်၏ အတိုင်ပင်ခံပုဂ္ဂိုလ်သည် ASEAN-Japan Centre ၌ ကျင်းပသည့် မြန်မာ့ပိုးထည်မြှင့်တင်ရေး အခမ်းအနားသို့ တက်ရောက်ပြီး ဂျပန်ဝန်ကြီးချုပ်၏ အကြံပေး ပုဂ္ဂိုလ် Mr. Hiroto  Izumi ၊ ASEANJapan  Centre၏ အထွေထွေ အတွင်းရေးမှူးတို့နှင့် အတူ အခမ်းအနားအား ဖဲကြိုးဖြတ် ဖွင့်လှစ်ပေးခဲ့သည်။

နိုင်ငံတော်၏ အတိုင်ပင်ခံပုဂ္ဂိုလ်နှင့် မြန်မာကိုယ်စားလှယ် အဖွဲ့သည် Meiji  Kinenkan ခန်းမ၌ JETRO ၏ အမှုဆောင်အရာရှိချုပ်  Mr. Hiroyuki  Ishige နှင့်  တွေ့ဆုံခဲ့ပြီး မြန်မာနိုင်ငံ၌ ဂျပန်စီးပွားရေး လုပ်ငန်းရှင်များ မြန်မာနိုင်ငံတွင် ပိုမိုလာရောက် ရင်းနှီးမြှုပ်နှံ နိုင်ရေးကိစ္စရပ်များကို ဆွေးနွေးပြောကြားခဲ့သည်။

ထို့နောက် နိုင်ငံတော်၏ အတိုင်ပင်ခံပုဂ္ဂိုလ်သည် Meiji  Kinenkan ခန်းမ၌ ကျင်းပပြုလုပ်သည့် မြန်မာနိုင်ငံနှင့်   ဂျပန်နိုင်ငံအကြား ချိတ်ဆက်မှု မြှင့်တင်ရေး (Strengthening the  Bond  between  Myanmar  and  Japan)ခေါင်းစဉ်ဖြင့် ကျင်းပပြုလုပ်သည့် မြန်မာနိုင်ငံရင်းနှီးမြှုပ်နှံမှု ဆွေးနွေးပွဲသို့ တက်ရောက်၍ အဖွင့်အမှာစကားပြောကြားခဲ့ပြီး ဂျပန်နိုင်ငံ မှလုပ်ငန်းရှင်များ  မြန်မာနိုင်ငံ၌  ရင်းနှီးမြှုပ်နှံမှု တိုးမြှင့်ဆောင်ရွက်ကြရန် ဖိတ်ခေါ်ခဲ့ သည်။ အဆိုပါ မြန်မာနိုင်ငံ ရင်းနှီးမြှုပ်နှံမှု ဆွေးနွေးပွဲသို့ ဂျပန်နိုင်ငံမှ စီးပွားရေး လုပ်ငန်းရှင် စုစုပေါင်း ၄ဝဝ ကျော် တက်ရောက်ခဲ့ကြသည်။

ညနေပိုင်းတွင် နိုင်ငံတော်၏ အတိုင်ပင်ခံပုဂ္ဂိုလ်သည် ဂျပန်ဝန်ကြီးချုပ် ရှင်ဇိုအာဘေး၏ ဇနီး Mrs. Akie  Abe အား New  Otani Hotel တွင် လက်ခံတွေ့ဆုံခဲ့သည်။

နိုင်ငံတော်၏ အတိုင်ပင်ခံပုဂ္ဂိုလ် ဦးဆောင်သည့် မြန်မာကိုယ်စားလှယ် အဖွဲ့သည် ၁ဝ-၁ဝ-၂ဝ၁၈ ရက်နေ့၊  နံနက်ပိုင်းတွင် ဂျပန် နိုင်ငံ၊ နာရီတာ အပြည်ပြည်ဆိုင်ရာ လေဆိပ်မှ လေကြောင်းခရီးဖြင့် ပြန်လည်ထွက်ခွာလာ ခဲ့ရာ ရန်ကုန်အပြည်ပြည်ဆိုင်ရာ လေဆိပ်သို့ ညနေပိုင်းတွင် ပြန်လည်ရောက်ရှိခဲ့သည်။

နိုင်ငံခြားရေးဝန်ကြီးဌာန

နေပြည်တော်

ရက်စွဲ၊ ၂ဝ၁၈ ခုနှစ်၊

အောက်တိုဘာလ ၁၁ ရက်

Read 245 times Last modified on Friday, 12 October 2018 12:24