SJ WorldNews - шаблон joomla Авто

နိုင်ငံတော်သမ္မတ ဦးဝင်းမြင့် နန့်မြစ်ခတံတား တည်ဆောက်ရေး စီမံကိန်းနှင့် မြစ်ကြီးနားမြို့ နယ်စပ်ဒေသ တိုင်းရင်းသား လူငယ်များ ဖွံ့ဖြိုးရေး သင်တန်းကျောင်းတို့သို့ သွားရောက်ကြည့်ရှု စစ်ဆေး

Saturday, 23 March 2019 10:01 font size decrease font size decrease font size increase font size increase font size

နေပြည်တော်   မတ်   ၂၂

ကချင်ပြည်နယ် မြစ်ကြီးနားမြို့၌ ရောက်ရှိနေသည့် နိုင်ငံတော်သမ္မတ ဦးဝင်းမြင့်သည် ပြည်ထောင်စုဝန်ကြီးများ ဖြစ်ကြသော ဒုတိယဗိုလ်ချုပ်ကြီးကျော်ဆွေ၊ ဒုတိယဗိုလ်ချုပ်ကြီး ရဲအောင်၊ ဒေါက်တာမြင့်ထွေး၊ ဦးဟန်ဇော်၊ နိုင်သက်လွင်၊ ပြည်နယ်ဝန်ကြီးချုပ်   ဒေါက်တာခက်အောင်၊ ပြည်နယ် ဝန်ကြီးများ၊ မြန်မာနိုင်ငံ ရဲတပ်ဖွဲ့ ရဲချုပ် ဒုတိယရဲဗိုလ်ချုပ်ကြီး အောင်ဝင်းဦး၊ တာဝန်ရှိသူများနှင့်အတူ ယနေ့နံနက်ပိုင်းတွင် မြစ်ကြီးနား-ဝိုင်းမော် ကားလမ်းပေါ်ရှိ နန့်မြစ်ခတံတား တည်ဆောက်နေမှုကို သွားရောက် ကြည့်ရှု စစ်ဆေးသည်။

နိုင်ငံတော်သမ္မတအား တံတား တည်ဆောက်ရေး စီမံကိန်း ရှင်းလင်းဆောင်၌ တံတားဦးစီးဌာနမှ ဒုတိယ ညွှန်ကြားရေးမှူးချုပ် ဦးခင်မောင်ဆွေက တံတားစီမံကိန်းဆိုင်ရာ အချက်အလက်များနှင့် စပ်လျဉ်း၍ ရှင်းလင်း တင်ပြသည်။

တင်ပြချက်များအပေါ် နိုင်ငံတော်သမ္မတက လုပ်ငန်းများ အချိန်မီပြီးစီးရေး၊ စံချိန်စံညွှန်းပြည့်မီ စေရေး၊ နိုင်ငံ့ဘဏ္ဍာငွေ အလေအလွင့် မဖြစ်စေရေး၊ တံတားခံနိုင်ဝန်နှင့် ပတ်သက်ပြီး ယာဉ်ဖြတ်သန်းမှုများအား ပြည်နယ်အစိုးရ အဖွဲ့အနေဖြင့် ကြပ်မတ်ဆောင်ရွက်ရေးတို့နှင့် စပ်လျဉ်း၍ မှာကြားသည်။

ထို့နောက် နိုင်ငံတော် သမ္မတသည် နန့်မြစ်ခလေးလမ်းသွား တံတားအနက် ကျန်ရှိနေသည့် နှစ်လမ်းသွားတံတား တည်ဆောက်နေမှု၊ တည်ဆောက်ပြီးစီးသည့် နှစ်လမ်းသွား တံတားနှင့် တံတားအောက်ခြေတွင် ချောင်းရေ တိုက်စားမှု ကာကွယ်ရန် ကွန်ကရစ်မြေထိန်းနံရံ တည်ဆောက်နေမှုတို့ကို လိုက်လံကြည့်ရှုသည်။

အဆိုပါ နန့်မြစ်ခတံတားမှာ မန္တလေး-လားရှိုး-ဗန်းမော်-မြစ်ကြီးနား လမ်းပေါ်တွင် တည်ရှိပြီး တံတားအမျိုးအစားမှာ သံကူကွန်ကရစ်၊ သံမဏိသံပေါင် အမျိုးအစားဖြစ်ပြီး ယာဉ်တစ်စီးချင်း ခွင့်ပြုခံနိုင်ဝန်မှာ ၇၅ တန်ဖြစ်ကြောင်း၊ ယင်းနန့်မြစ်ခ တံတားမှာ လေးလမ်းသွား တံတားဖြစ်ပြီး လက်ရှိတွင် နှစ်လမ်းသွား တည်ဆောက်ပြီးစီးပြီဖြစ်ကာ ယခုအခါ လေးလမ်းသွား တံတားဖြစ်ရန် ထပ်မံ တည်ဆောက်နေခြင်း ဖြစ်ကြောင်း သိရသည်။

ယင်းနောက် နိုင်ငံတော်သမ္မတသည် မြစ်ကြီးနားမြို့ နယ်စပ်ဒေသ တိုင်းရင်းသား လူငယ်များဖွံ့ဖြိုးရေး သင်တန်းကျောင်းသို့ ရောက်ရှိပြီး ကျောင်းသား၊ ကျောင်းသူများနှင့် တွေ့ဆုံသည်။

ထို့သို့တွေ့ဆုံရာတွင် နိုင်ငံတော်သမ္မတအား နယ်စပ်ရေးရာဝန်ကြီးဌာန၊ ပညာရေး နှင့် လေ့ကျင့်ရေး ဦးစီးဌာန၊ ဒုတိယညွှန်ကြားရေးမှူးချုပ် ဦးတင်မောင်မြင့်က နယ်စပ်ဒေသ တိုင်းရင်းသားလူငယ်များ ဖွံ့ဖြိုးရေး သင်တန်းကျောင်း ဖွင့်လှစ်ထားရှိမှု၊    အခြေခံပညာ၊ အဆင့်မြင့်ပညာ၊ သက်မွေးပညာများ သင်ကြားပေးနေမှု၊ သင်တန်းကျောင်းဆိုင်ရာ အချက် အလက်များနှင့် တိုင်းရင်းသား လူငယ်များအား လေ့ကျင့်မွေးထုတ်ပေးနေမှု အခြေအနေများကို ရှင်းလင်း တင်ပြသည်။

ယင်းနောက် နိုင်ငံတော် သမ္မတက ကျောင်းသား၊ ကျောင်းသူများနှင့် ဝန်ထမ်းများအတွက် ထောက်ပံ့ငွေများ ပေးအပ်ပြီး ကျောင်းသား၊ ကျောင်းသူများ၏ အိပ်ဆောင်၊ စားရိပ်သာနှင့် စာကြည့်တိုက်တို့ကို လှည့်လည် ကြည့်ရှုပြီး ဆရာ၊ ဆရာမများ၊ ကျောင်းသား၊ ကျောင်းသူများနှင့် မှတ်တမ်းတင် ဓာတ်ပုံရိုက်သည်။

ထို့နောက်   နိုင်ငံတော်သမ္မတသည် မြစ်ကြီးနားမြို့၏ ဖွံ့ဖြိုးတိုးတက်မှု အခြေအနေအား မော်တော်ယာဉ်ဖြင့် လှည့်လည်ကြည့်ရှုပြီး စီတာပူမနောကွင်း၌ ပြည်ထောင်စုဝန်ကြီးများ၊ ကချင်ပြည်နယ်ဝန်ကြီးချုပ်၊ ပြည်နယ်ဝန်ကြီးများ၊ တာဝန်ရှိသူများနှင့်အတူ မှတ်တမ်း ဓာတ်ပုံရိုက်သည်။

ယင်းနောက် နိုင်ငံတော်သမ္မတနှင့် အဖွဲ့ဝင်များသည်   မြစ်ကြီးနားမြို့မှ  တပ်မတော် လေယာဉ်ဖြင့် ပြန်လည်ထွက်ခွာကြရာ မွန်းလွဲပိုင်းတွင် နေပြည်တော်သို့ ရောက်ရှိကြကြောင်း သိရသည်။

(၅ဝဝ)

Read 147 times Last modified on Saturday, 23 March 2019 10:03