SJ WorldNews - шаблон joomla Авто

သေသော်မှတည့် သြော် ကောင်း၏

Monday, 29 July 2019 10:10 Written by  font size decrease font size decrease font size increase font size increase font size

ယမန်နေ့မှအဆက်

ဦးမြတ်ထွန်း၊ ဦးရွှေပန်းနှင့်တကွ မြရွက်တို့သည် နေပြည်တော်သို့ ဆက်သွားကြ၏။ ရန်ကုန်မြို့ဝန်မင်းကြီး၏ မြင်းစေကျော်တို့လည်း နေပြည်တော်သို့ အမိန့်တော်မြတ်ခံရန် တက်သွားကြ၏။ ဆွေဆက်တို့၏ ခြေမြန်ရဲမက် အချို့လည်း ရွှေနန်းတော်ကြီးမှ ချမှတ်သည့် အမိန့်တော်မြတ်ကို သိရှိနိုင်ရန် နေပြည်တော်ဘက်သို့ လိုက်သွားကြ၏။  ဤသို့ထွက်သွားလေသမျှသော သူတို့သည် စူဠလိပ်ကို ရေထဲလွှတ်လိုက်ဘိသို့ တစ်ယောက်တစ်လေ မျှပေါ်မလာ။ သတင်းအစအန မကြားရ...

ဤသို့ဆိုသော် ယခုအရေးတော်နီးလာချိန်၌ နေပြည်တော်မှ ပြန်လာကြမည့်သူများကို စောင့်နေ၍မဖြစ်။ အနေအရပ် စခန်းသာသောမြင်းစာ၊ မြက်၊ ရေတို့ ကောင်းမွန်သည့်နေရာကို ရွေးချယ်လျက် တပ်စခန်းချရပ်မှ သင့်မည်ဟု ဟံသာဝတီရန်ကုန်မြို့တော် မြောက်အနောက်ဘက်သို့ အနည်းငယ်ယွန်းသည့် ထန်းတစ်ပင်အရပ်ကို သစ်တပ်၏ အခိုင်အခံ့ ဆောက်လုပ်တပ်စွဲ၏။

တပ်ပတ်ဝန်းကျင်၌ မြင်းခလုတ်၊ ဆင်ခလုတ်၊ ရဲမက်သစ်ငုတ် အထူအပျစ်စိုက်၏။ မိမိတို့ဝင်လမ်းထွက်လမ်းကို အဖုံးအကွယ်ဖြင့် သီးသန့်ထား၏။ အနီးပတ်ဝန်းကျင်သို့ ဆက်သွယ်သွားလာနိုင်သည့် ဆုတ်လမ်းတက်လမ်းကို ရှာဖွေခုတ်ထွင်ထား၏။ ဟံသာဝတီရန်ကုန်မြို့သို့ လည်းကောင်း၊ လှည်းကူးမှတစ်ဆင့် ပဲခူးသို့ လည်းကောင်း၊ ခရီးလမ်းအမြွှာမြွှာ ရှာဖွေခုတ်ထွင်၏။

ထိုစဉ် ဟံသာဝတီရန်ကုန်မြို့ကို ကုလားဖြူတို့ စတိုက်ကြပြီဟူသည့် သတင်းကိုကြားရ၏။ ၁၂၁၄ ခု နှောင်းတန်ခူးလပြည့်ကျော် ၇ ရက် သင်္ကြန်အကြိုနေ့ ကုလားဖြူ သက္ကရာဇ် ၁၈၅၂ ခု ဧပြီလ ၁၂ ရက်နေ့ဖြစ်၏။

ကုလားဖြူအမြောက်တင်...စစ်မီးသင်္ဘောကြီးများ ဖြစ်ကြသော ဆဆော့ထရစ်၊ မိုဇူဖား၊ ဖရိုဇီတို့ရှေ့ဆောင်၍ နောက်ပါတိုက်သင်္ဘော အများအပြားနှင့်  ကုလားဖြူ ရေတပ်ဗိုလ် ကွန်မင်ဒိုလင်းဘတ် ကိုယ်တိုင် ကွပ်ကဲလျက် မီးပြသီလဝါဆိပ်နှင့် ကင်းတပ်များကို ပစ်ခတ်တိုက်ခိုက်၏။

ဤတွင် ရန်ကုန်မြို့ဝန်ကြီးသည် အနီးအပါး၌ အသင့်စောင့်ရံထားခဲ့သော တပ်များကို ချက်ချင်းမြို့တွင်းသို့ ခေါ်သွင်း၏။ အရေးပေါ်လာပြီဖြစ်သောကြောင့် ဆွေဆက်လည်း ရောက်သွား၏။

မြို့ဝန်မင်းကြီးက အလွန်တည်ငြိမ်စွာနှင့် အဆုံးအဖြတ် ပေးလိုက်သည်။

''ငါတို့မနိုင်၊ ရှုံးကြမည်သာဖြစ်၏။ သို့သော် ဗမာ တိုင်းရင်းသားတို့သည် သူတစ်ပါးက အနိုင်အထက်လာရောက် နှိပ်စက်သော် နှလုံးခိုင်မာစွာ အသေခံကြ၏။ ကွဲသောဦးထိပ်သည် ညွှတ်မကျ။ ပြတ်သောဦးခေါင်း၌ မျက်လုံးသည် နှိပ်စက်သူတို့ကို စူးစူးကြည့်၏။ မည်သူမျှမမှိတ်ဟု သင်းတို့ကုလားဖြူများ သိရန် ငါတို့အစွမ်းကုန် တိုက်ခိုက်ရန် အသေခံပြကြရမည်။ ငါတို့ ရန်ကုန်က အစွမ်းကုန်ခံမည်။ ငါတို့ကို အသေသတ်၍ သင်းတို့ထက်ကို လွန်လာခဲ့သော် မောင့်တာဝန်ရှိပစေ။ မောင် ကုန်းဘက်က တာဝန်ယူတော့၊ ရေလမ်းက ကြံခင်းမြို့သူကြီးကို ဆီးကြိုတိုက်ခိုက်ရန် စောင့်စေမည်။ မောင် ပဲခူးအနီးတစ်ဝိုက်က စောင့်လျှင်တန်သင့်ပြီ...''

ရန်ကုန်မြို့ဝန်ကြီး အမိန့်အတိုင်း ဆွေဆက်သည် အခိုင်အမာ ဆောက်ထားသည့် ခံတပ်ကိုစွန့်ပစ်ခဲ့လျက် ပဲခူးအနီးတစ်ဝိုက်၌ တပ်စွဲသည်။ ပဲခူးချောင်းမှ တက်လာမည့် သင်္ဘောတို့ကို ဆီးကြိုတိုက်ခိုက်နိုင်ရန် နေရာယူ၍ သစ်တပ်ဆောက်၏။ ချောင်းအတွင်း၌လည်း ငရဲသစ်ငုတ်များ အပြည့်စိုက်ထောင်၏။ တက်လမ်းမှန်သမျှကိုလည်း ညှောင်း၊ ကျင်းများ၊ ကျားလန်၊ သုတ်ကိုင်းများ၊ ဂျမ်းများ နေရာအကွက်ချ၍ ထောင်၏။

ထိုအတွင်း  ရန်ကုန်သတင်းကို ကြားရသည်။ ဗမာရဲမက်တို့သည် ရှေ့ဆောင်တက်လာသည့်  ကုလားဖြူ သင်္ဘောသုံးစင်းကို   ဗမာအမြောက်ကြီး သုံးလက်တို့ဖြင့်  ဆီးကြိုပစ်ခတ် တိုက်ခိုက်ကြ၏။ ဗမာအမြောက် တစ်ချက်ပစ်လျှင် ကုလားဖြူတို့က အချက်ငါးဆယ်ခန့် စက်အမြောက်တို့ဖြင့် သင်္ဘောသုံးစင်း ဆိုင်၍ပစ်ကြ၏။

ဗမာတို့အပြုံလိုက် အပြုံလိုက်သေသော်လည်း မမှုကြဘဲ မဆုတ်မရွေ့တိုက်၏။ ဗမာအမြောက်ကြီး သုံးလုံးကွဲကုန်မှ အပစ်ရပ်၏။

၁၂၁၄ ခု တန်ခူးလပြည့်ကျော် ၈ ရက် တနင်္ဂနွေနေ့ သင်္ကြန်အကျနေ့ ကုလားဖြူသက္ကရာဇ် ၁၈၅၂ ခု ဧပြီလ ၁၂ ရက်နေ့ ရန်ကုန်ဆိပ်ကမ်းသို့ တက်၏။ ၁၂၁၄ ခု နှောင်းတန်ခူးလပြည့်ကျော် ၉ ရက် သင်္ကြန်အကြတ်နေ့ ကုလားသက္ကရာဇ် ၁၈၅၂ ခု ဧပြီလ ၁၄ ရက်နေ့ ရန်ကုန်မြို့ဝန်မင်းကြီး အိမ်တော်နှင့်တကွ ရန်ကုန်တစ်မြို့လုံးကို ကုလားဖြူတို့သိမ်း၏။ ၁၂၁၄ ခု တန်ခူးလပြည့်ကျော် ၁၂ ရက် ကုလားဖြူသက္ကရာဇ် ၁၈၅၂ ခု ဧပြီလ ၁၇ ရက်နေ့၌ ရန်ကုန်မြို့ဝန်မင်းကြီး ကိုယ်တိုင် ပြန့်ကျဲနေသော လူသူလက်နက်တို့ကို စုစည်း၍ ရွှေတိဂုံတောရကျောင်းမှ ရပ်တည်ခံသည်ဟူသော သတင်းတို့ကို ကြားလာရ၏။

ထို့နောက် တပ်အခိုင်အမာရှိသည့် နေရာတို့၌ တိုက်ပွဲမဖြစ်ပွား။ ပတ်ဝန်းကျင် အနီးအနားသို့ ကုလားဖြူတို့ ထွက်ကြသည်နှင့် ဗမာတိုင်းတို့က လစ်လျှင်လစ်သလို ထိုးခုတ်တိုက်ခိုက်၏။ ကုလားဖြူတို့နှင့် ကူးလူးဆက်ဆံနေကြသော မြို့တော်သား ကုန်သည်ကြေးရတတ်တို့မှ အပ ဗမာတိုင်းရင်းသား အားလုံးက ကုလားဖြူတို့သည် ငါတို့၏ ဗမာတိုင်းပြည်ကို လာရောက် စော်ကားကြသည်ဟု မည်မျှမသွန်သင်မညွှန်ကြားဘဲ အလိုလိုသိကြ၏။

ထို့နောက် ကုလားဖြူတို့လေးယောက်၊ ငါးယောက်အစုငယ်မျိုး ထွက်လာသည်နှင့် ဗမာကျေးတောရွာသားတို့က ရရာလက်နက်များဖြင့် ထိုးခုတ်ရိုက်ပုတ် သတ်ဖြတ် ပစ်လိုက်သောကြောင့် ကုလားဖြူတို့သည် ဗမာတို့၏ တပ်များကို  ထောင်းထောင်းကြေအောင် အမြောက်စိန်ပြောင်းတို့ဖြင့်  တိုက်ဖျက်နိုင်သော်လည်း  တပ်၏ဝန်းကျင် အပြင်ပသို့မထွက်နိုင် မထွက်ရဲကြ။

ယင်းသို့စစ်နိုင်သည့် ကုလားဖြူတို့ နှောင့်နှေးလျက်ရှိစဉ်  ဟံသာဝတီရန်ကုန်မြို့ကို ဆုတ်ပေးပြီး ရွှေတိဂုံ တောရကျောင်း၌ တပ်စွဲနေရကြောင်း၊ ၁၂၁၄ ခု ကဆုန်လပြည့်ကျော် ၁ ရက် ၁၈၅၂ ခု မေလ ၅ ရက်နေ့၌ နေပြည်တော်သို့ သတင်းပို့၏။ 

ဆက်လက်ဖော်ပြပါမည်။

Read 66 times
Rate this item
(0 votes)
Last modified on Monday, 29 July 2019 10:12

Latest from ကေတု