SJ WorldNews - шаблон joomla Авто

သေသော်မှတည့် သြော် ကောင်း၏

Monday, 05 August 2019 09:29 Written by  font size decrease font size decrease font size increase font size increase font size

ယမန်နေ့မှအဆက်

ခပ်နာနာကလေး တုံ့ပြန်လိုက်မှဖြစ်မည်ဟု ကပ္ပိတန်လောက်ဒ်က ထိုနေရာတစ်ဝိုက်ကို အစုံအဆန်ပြုလျက် ကမ်းနှစ်ဖက်လုံး ကြေမွအောင် အမြောက်ဖြင့်ပစ်၏။

ကမ်းပေါ်ရှိ သစ်ပင်အားလုံး အရိုးပြိုင်းပြိုင်း ကျစေပြီးမှ-

''သည်နေရာပဲလား  မောင်မင်းတို့  ဘာကြောင့်သည်မှာ ရန်သူရှိနေသည်ကို မပြောသလဲ''ဟု မိမိသင်္ဘော၌ ပါလာသည့် မိမိခန့်ထားသော မြန်မာသူကြီးတို့ကို ကြိမ်း၏။

သူကြီးတို့က ''သည်နေရာမဟုတ်ပါ။ မြတ်ထွန်းတို့ နေရာသည် အဝေးကြီး လိုပါသေးသည်။ ညနေလောက်မှ ရောက်နိုင်ပါလိမ့်မည်''ဟု ပြောကြ၏။

သို့သော်...ကပ္ပီတန်လောက်ဒ်က မယုံ၊ မိမိ၏ ကမ်းတက်တပ်သားများကို ကမ်းပေါ်သို့တက်၍ ကြည့်စေ၏။

ကုလားဖြူကမ်းတက် တပ်သားတို့သည် လှေထက်မှ လတာပေါ်သို့  တက်လိုက်ကြသည်နှင့် လတာပြင်ထဲသို့ ပေါင်လယ်ပေါင်ရင်း နစ်မြုပ်ကုန်ကြ၏။ ရွှံ့ညွန်အလူးလူးနှင့် လတာမှလွတ်၍ ကမ်းထက်ချုံစပ်သို့ ဝင်လိုက်မိသည်နှင့် အရှိန်ပြင်းစွာ...စုပြုံပစ်ထိုးလိုက်ကြသော လှံများ၏ စူးဝင်ခြင်းကို ခံကြရ၏။

ရန်သူသည် မည်သည့်နေရာမှစောင့်၍ ပစ်ခတ်လိုက်သည်ဟု မသိမမြင်လိုက်ကြ၊ မိမိအဖော်များ၏ အဖြစ်ဆိုးကို မြင်လိုက်ကြရသော ကုလားဖြူစစ်သားတို့သည် မိမိတို့၏ ရှေ့နောက်ဝဲယာ သစ်ချုံပုတ်များအတွင်းသို့ မိုးသီးမိုးပေါက်ရွာသလို သေနတ်များဖြင့် ပစ်ခတ်ကြ၏။

ထို့နောက် အစုလိုက်အစုလိုက် လူချင်းမခွဲဘဲ တောတွင်းသို့ ပြေးဝင်စီးနင်း၏။

အချို့သော ကုလားဖြူအုပ်စုရှိရာသို့ ရန်သူကို မမြင်လိုက်ရပါပဲ ပစ်ခတ်လိုက်သော ဆိပ်လူးမြားတို့သည် သဲဖြင့်ဆုပ်ပက်ခြင်း ခံရဘိသကဲ့သို့   အပြုံလိုက် လာရောက် ထိမှန်ကုန်ကြ၏။

ကုလားဖြူစစ်သားတို့အဖို့ သရဲခြောက်လှန့်ခြင်း ခံရသကဲ့သို့ ထိတ်လန့်ရွံ့ကြောက်၏။ သစ်ပင်ချုံပုတ်တို့ကလည်း တကယ်ထူထဲလှသည်မဟုတ်၊ ချောင်းကမ်းပါး၌သာ ပိတ်ဆို့ပေါက်နေကြခြင်းဖြစ်၏။ ကုန်းဘက်သို့ တက်လိုက်လျှင် ပြန့်ပြန့်ကျယ်သော လယ်ကွင်းပြင်ကိုသာ တွေ့ရ၏။ လူသူဟူ၍ အရိပ်အယောင်မျှမမြင်ရ အားလုံး တိတ်ဆိတ်နေ၏။ လေတိုက်သဖြင့် လှုပ်ရှားသော သစ်ရွက်ခတ်သံ၊ တောချုံပုတ်တို့ အတွင်း၌သာ နေလေ့ရှိသည့်အဝေးမှ အော်မြည်လိုက်သော ငှက်ငယ်တို့၏ အသံကိုသာ ခပ်သဲ့သဲ့ကြားရ၏။

ကုလားဖြူစစ်သားတို့သည် နေရာမှမရွှေ့ဝံ့၊ မလှုပ်ရှားဝံ့ကြ၊ ရန်သူဟု မမြင်ရသည့်နေရာမှန်သမျှ၊ ရန်သူ၏လှုပ်ရှားသံမျိုး မကြားရသည့် နေရာမှန်သမျှ ရန်သူပေါ်လာနိုင်သည့် နေရာတွေချည်းဖြစ်၏။ မမြင်ရလေ ကြောက်ဖွယ်ကောင်းလေ၊ တိတ်ဆိတ်လေ ကြောက်ဖွယ်ကောင်းလေဖြစ်နေ၏။ အရှေ့၊ အနောက်၊ တောင်၊ မြောက်ဝဲယာတို့ရှိ သက်ရှိသတ္တဝါဟူ၍ ဘာမျှမမြင်ရသည့် နေရာဟူသမျှကို မျက်လုံးဝိုင်းအောင် ကြည့်နေကြရ၏။ သက်ရှိအကောင် တစ်ကောင်တလေကိုမျှ မမြင်မကြားရသည့်နေရာတိုင်း ရန်သူရှိနေသော နေရာတွေချည်းဖြစ်နေ၏။

လေနှင့်ဖက်ပြိုင် စစ်တိုက်နေရသလိုဖြစ်နေ၏။ ထို့ကြောင့် ချက်ချင်း အထက်လူကြီးရှိရာ သင်္ဘောသို့ သတင်းပို့၏။

ကပ္ပီတန်လောက်ဒ်၏ အမိန့်အရ  မိမိတို့နှင့်အတူ ပါလာသည့် မြန်မာသူကြီးများ ချက်ချင်းကုန်းပေါ်သို့ ရောက်လာကြ၏။

ဘာအကြောင်းဟူ၍မသိဘဲ ကုလားဖြူတို့ လမ်းညွှန်ရာကို ကုလားဖြူခန့် မြန်မာသူကြီးတို့က ရှေ့ကသွားကြ၏။ ကုလားဖြူစစ်သားတို့သည် မြန်မာသူကြီးတို့၏ နောက်မှ ကိုက် ၂ဝ ခန့်ခွာလျက် မျက်လုံးအဝိုင်းသားနှင့် မျက်ခြည်မပြတ် တထိတ်ထိတ်လိုက်ကြ၏။ စူးဝါးနက်ကျယ်သော အော်သံနှင့်အတူ မြောက်ခနဲ လွင့်တက်သွားသော မြန်မာသူကြီးတစ်ယောက်သည် သစ်ပင်တို့ထိပ်ဖျား လေထဲ၌ ဇောက်ထိုးရမ်းခါနေ၏။

တစ်ပြိုင်နက်တည်းပင် မြေပြင်မှ လှံပျံအချို့လည်း ထက်ကြပ်မကွာ ထွက်လာကြလျက် ထို...ဇောက်ထိုးလှုပ်ရမ်းနေသည့် လူကောင်ကြီးကို အရှိန်ပြင်းစွာ အစုအပြုံလိုက် စူးဝင်ကုန်ကြ၏။

အလုံးစုံမြင်တွေ့ကြရသော ကုလားဖြူစစ်သားတို့သည် နောက်သို့လည်းကောင်း၊ ဘေးသို့လည်းကောင်း ထိတ်လန့်တကြား အော်ဟစ်ပြေးဆုတ်ကြ၏။ ထိုစဉ် ကုလားဖြူငါးယောက် လွင့်မြောက်သွားကြပြန်လျက် မြန်မာသူကြီး၏ လမ်းစဉ်အတိုင်း သစ်ပင်ထိပ်ဖျား၌ ဇောက်ထိုးလှုပ်ရမ်းနေ၏။ အစုအပြုံလိုက် စူးဝင်နေသော လှံတို့မှ သွေးပေါက်တို့ စက်စက်ယိုကျ၏။

ယင်းသည်တို့ကိုကြည့်လျက် မျက်စိမျက်နှာပျက်ပျက်နှင့် နောက်သို့ဆုတ်မှန်းမသိ ဆုတ်နေကြဆဲ...

မြေပြိုသလို ဝေါခနဲမြည်လျက် ရုတ်ခြည်းကျင်းကြီးတစ်ခု ပေါ်လာကာ ကုလားဖြူရှစ်ယောက် ကျင်းကြီးထဲသို့ ကျ၏။ တစ်ပြိုင်နက်တည်း သစ်သီးများ ကြွေကျသကဲ့သို့ လှံတွေတစ်ပြုံချည်း ကောင်းကင်မှ အရှိန်နှင့်စူးစိုက်ကျ၏။

နက်ကျောကျော အော်သံကြီးများ ချက်ချင်းတိတ်လျက် ကျင်းဝ၌ ဖုန်မှုန့်များ မီးခိုးဝေ့သလိုဝေ့နေ၏။

ဖုန်မှုန့်များ ရှင်းသွားသည်နှင့် အထက်အောက်တံစို့ဖြင့် ထိုးထားဘိသို့ မရှုမလှ ကျဆုံးနေကြပြီဖြစ်သော ကုလားဖြူရှစ်ယောက်တို့ကို တွေ့ရ၏။ ကုလားဖြူတို့သည် သွေးပျက်မတတ် ထိတ်လန့်ကြောက်ရွံ့ကုန်ကြ၏။ မိမိရပ်နေရာမှ မရွှေ့ဝံ့၊ မလှုပ်ဝံ့ ဖြစ်ကုန်ကြ၏။

 ဆက်လက်ဖော်ပြပါမည်။

Read 55 times
Rate this item
(0 votes)
Last modified on Monday, 05 August 2019 09:31