SJ WorldNews - шаблон joomla Авто

နိုင်ငံတော် ကာကွယ်ရေးနှင့် နိုင်ငံသားတို့ တာဝန်

Thursday, 01 February 2018 09:08 font size decrease font size decrease font size increase font size increase font size

မြန်မာနိုင်ငံ လွတ်လပ်ရေး ဗိသုကာ၊ တပ်မတော်ဖခင်ကြီး ဗိုလ်ချုပ်အောင်ဆန်းသည် ရန်ကုန်မြို့တော်ခန်းမကြီးတွင် ကျင်းပသော ကျောင်းဆရာများ ကျောင်းပိတ်ရက် ခေတ်သစ်ပညာ သင်တန်း၌ သေနင်္ဂဗျူဟာစစ်ပညာ မိန့်ခွန်းကို ၁၉၄၂ ခုနှစ် နိုဝင်ဘာ ၁ ရက်တွင် ပြောကြားစဉ်  ''ကာကွယ်ရေးဆိုလို့ ဘယ်လိုနည်း ကာကွယ်မယ်ဆိုတဲ့ အကောင်းဆုံး နည်းလမ်းတွေ၊ ပါးစပ်ပြောနဲ့ စိတ်ကူးထဲမှာရှိတဲ့ နည်းလမ်းတွေချည်းဆိုရင်လည်း မောရုံပဲ။

နွားခြေရာကွက်ကွက်ကလေး ကိုယ့်တိုင်းပြည်ကလေးချည်း ကြည့်ပြောနေလို့ မောရုံပဲ။ အခြားတိုင်းကြီးပြည်ကြီးတွေနဲ့ ကမ္ဘာ့ရေးရာ ဗမာပြည်(မြန်မာပြည်)ရဲ့ လက်ရှိအခြေအနေတွေကို ကြည့်ပြီး စဉ်းစားမှ အရာရောက်ပါလိမ့်မည်''ဟူ၍ ကာကွယ်ရေးအမြင် ကျယ်ရန် ပြောကြားခဲ့ဖူးသည်မှာ ယနေ့ခေတ်ကို ကြိုတင်တွက်ဆ ပြောခဲ့လေသလား မေးနေရန်မလိုတော့ပေ။

နိုင်ငံတော်ကာကွယ်ရေး တာဝန်ကို မည်သူတွေ ထမ်းဆောင်ရမည်ကို ဆက်လက်ပြောကြားရာ၌ ''စစ်ရေး စစ်ရာဆိုတာလည်း အခုခေတ်စစ်မျိုးက ရှေးခေတ်ကစစ်မျိုးလို တိုက်တဲ့လူက ထွက်တိုက်နေရုံနဲ့ မပြီးဘူး။ စစ်သားတွေသာ စစ်စိတ်စစ်သွေး ရှိနေရုံနဲ့မပြီးဘူး။ တိုင်းပြည်ထဲမှာ ကျန်ရစ်ခဲ့တဲ့ ယောက်ျား၊ မိန်းမ၊ ကလေး၊ လူကြီးတစ်ယောက်မကျန် စစ်စိတ်စစ်သွေး ရှိကြမှ နိပွန်လို ''ဘူရှီဒို''စိတ်ရှိကြမှဖြစ်တယ်''ဟူ၍ နိုင်ငံသားတိုင်း မျိုးချစ်စိတ်ရှိကြရန် လိုကြောင်း ပြောကြားခဲ့ဖူးသည်။ ဗိုလ်ချုပ်အောင်ဆန်း မှာကြားခဲ့သည့်အတိုင်း မြန်မာနိုင်ငံ လွတ်လပ်ရေး ကြိုးပမ်းစဉ်ကာလတွင် တိုင်းရင်းသား ပြည်သူအားလုံးတို့ စွမ်းနိုင်သည့်ဘက်မှ ပါဝင်ခဲ့ကြသည်မှာလည်း သမိုင်းမှတ်တမ်းရှိပြီးဖြစ်သည်။

လွတ်လပ်ရေးရပြီး မြန်မာနိုင်ငံအတွင်း ဖြစ်ပေါ်ခဲ့သည့် ပြည်တွင်းသောင်းကျန်းမှု နှိမ်နင်းရေးနှင့် ပြည်ပကျူးကျော်မှု တိုက်ထုတ်ရေးတို့တွင်လည်း တပ်မတော်ကို ဗဟိုပြု၍ ပြည်သူများပါဝင်သော ပြည်သူ့စစ်အသွင်ဖြင့် ဆင်နွှဲအောင်ပွဲရခဲ့ကြသည့် သမိုင်းမှတ်တမ်းများ ရှိပြီးဖြစ်သည်။ ကမ္ဘာတည်သရွေ့ မြန်မာနိုင်ငံ တည်ရှိရေးအတွက် ကာကွယ်ရေး အင်အားတောင့်တင်းရေးကို စဉ်ဆက် မပြတ်ဖြည့်ဆည်း တည်ဆောက်နေကြရမည် ဖြစ်သည်။ ကမ္ဘာ့နိုင်ငံ အသီးသီးတို့သည်လည်း မိမိတို့နိုင်ငံ တည်မြဲရေး၊ မိမိနိုင်ငံသားများ လုံခြုံရေးနှင့် ဖွံ့ဖြိုးရေးကို စဉ်ဆက်မပြတ် ကြိုးစား အားထုတ်နေကြသည်မှာ ထင်သာမြင်သာရှိသည်။ ကာကွယ်ရေးအင်အား တောင့်တင်းရေး အတွက် နိုင်ငံသားတိုင်း စစ်မှုထမ်းကြရန် နိုင်ငံဖွဲ့စည်းပုံ အခြေခံဥပဒေက ပြဋ္ဌာန်းထားသည့် အတိုင်း သတ်မှတ်ကာလအတွင်း စစ်မှုထမ်းကြရသည့် နိုင်ငံများ ရှိကြသည်။ မြန်မာပြည်သူများ အကြည့်များသော တောင်ကိုရီးယား နိုင်ငံသား ရုပ်ရှင်သရုပ်ဆောင်များ စစ်မှုထမ်းကြရသည့် သတင်းကိုလည်း သတိထားမိကြပေမည်။

ကမ္ဘာ့နိုင်ငံများမှ ဖွံ့ဖြိုးပြီး၊ ဖွံ့ဖြိုးဆဲနှင့် ဖွံ့ဖြိုးစနိုင်ငံများတွင် နိုင်ငံတော်ကာကွယ်ရေး တာဝန်ကို နိုင်ငံသားတိုင်း ထမ်းဆောင်ရန် ဖွဲ့စည်းပုံအခြေခံဥပဒေအရ ထမ်းဆောင်ကြရသည့် နိုင်ငံများရှိသကဲ့သို့ ဖွဲ့စည်းပုံ အခြေခံဥပဒေ ပြဋ္ဌာန်းချက် မရှိသော်လည်း သက်ဆိုင်သူတို့၏ စိတ်ဆန္ဒအလျောက် တာဝန်ထမ်းဆောင်ကြသည့် နိုင်ငံများလည်း ရှိသည်။ ပြည်ထောင်စုသမ္မတ မြန်မာနိုင်ငံတော် ဖွဲ့စည်းပုံအခြေခံ ဥပဒေ(၂ဝဝ၈ ခုနှစ်) အခန်း(၈) နိုင်ငံသား ၊နိုင်ငံသားများ၏ မူလအခွင့်အရေးနှင့် တာဝန်များ ပြဋ္ဌာန်းချက်ပုဒ်မ ၃၈၆ တွင် နိုင်ငံသားတိုင်းသည် ဥပဒေပြဋ္ဌာန်းချက်များနှင့်အညီ စစ်ပညာသင်ကြားရန်နှင့် နိုင်ငံတော် ကာကွယ်ရေးအတွက် စစ်မှုထမ်းရန် တာဝန်ရှိသည်ဟူ၍ ဖော်ပြထားသည်ကို တွေ့ရသော်လည်း ယနေ့အထိ တပ်မတော်သို့ ဝင်ရောက်တာဝန် ထမ်းဆောင်ကြ သူများမှာ မိမိသဘောဆန္ဒအလျောက် ဝင်ရောက်တာဝန် ထမ်းဆောင်ကြသူများသာဖြစ်သည်။

မြန်မာနိုင်ငံ၌ အရွယ်မရောက်သေးသူ ကလေးသူငယ်များအား စစ်မှုထမ်းခြင်းမှ ကာကွယ်တားဆီးရန် ရည်ရွယ်ချက်ဖြင့် ၂ဝ၁၂ ခုနှစ် ဇွန် ၂၇ ရက်မှစ၍ ကုလသမဂ္ဂ၏ ငယ်ရွယ်သူ ကလေးစစ်သားများ အသုံးပြုသည့် နိုင်ငံစာရင်းမှ ပယ်ဖျက်မှု ရရှိရန်အတွက် UNCTFMR (United Nations Country Task Force on Monitoring and Reporting)ဖြင့် ပူးပေါင်း ဆောင်ရွက်လျက်ရှိသည်။ ၂ဝ၁၂ ခုနှစ်မှ ၂ဝ၁၇ ခုနှစ်အတွင်း ကာကွယ်ရေး ဦးစီးချုပ်ရုံး(ကြည်း)နှင့် မြန်မာနိုင်ငံ စောင့်ကြည့်လေ့လာရေးနှင့် အစီရင်ခံစာတင်ပြရေး လုပ်ငန်းအဖွဲ့တို့၏ အစီအမံဖြင့် တပ်မတော်အတွင်း အရွယ်မရောက်သေးသူ ကလေးသူငယ်များကို စိစစ်လျက် ၈၇၇ ဦးတို့ကို မိဘရပ်ထံသို့ အခမ်းအနားဖြင့် ပြန်လည်အပ်နှံပေးခဲ့သည်။ ဆက်လက်၍ မိမိသဘော ဆန္ဒအလျောက် တပ်မတော်သို့ ဝင်ရောက်လာသူများကိုလည်း Action Plan များအတိုင်း တာဝန်ရှိသူများက စနစ်တကျ စိစစ်လက်ခံ ဆောင်ရွက်လျက်ရှိသည်။

သို့ဖြစ်၍ ဗိုလ်ချုပ်အောင်ဆန်း သက်ရှိထင်ရှားရှိစဉ်က အမြော်အမြင်ကြီးမားစွာ ပြောကြားခဲ့သော နိုင်ငံတော် ကာကွယ်ရေး အမြင်ကျယ်ရေးကို လည်းကောင်း၊ စစ်သားတွေသာ စစ်စိတ်စစ်သွေး ရှိနေရုံနဲ့မပြီးဘူး ဆိုသည်ကို လည်းကောင်း အလေးအနက်ထား၍ နိုင်ငံတော် ကာကွယ်ရေးသည် နိုင်ငံသားတိုင်း၏ တာဝန်ဖြစ်သည်ဟူသော ယုံကြည်ချက် ခံယူချက်ရှိကြရန် ဖြစ်ကြောင်း မြဝတီက ထပ်လောင်း နှိုးဆော်လိုက်ရပါသည်။   

Read 520 times Last modified on Thursday, 01 February 2018 09:09