SJ WorldNews - шаблон joomla Авто

နိုင်ငံတည်ဆောက်ရေးနှင့် ပြည်သူတို့အခန်းကဏ္ဍ

Thursday, 15 February 2018 08:28 font size decrease font size decrease font size increase font size increase font size

မြန်မာပြည်သူတို့၏ အမျိုးသားခေါင်းဆောင် တပ်မတော်ဖခင်ကြီး ဗိုလ်ချုပ်အောင်ဆန်း၏ (၁ဝ၃)နှစ်မြောက် မွေးနေ့ အထိမ်းအမှတ် အခမ်းအနားများကို တိုင်းဒေသကြီးများနှင့် ပြည်နယ်များ၌ စည်ကားသိုက်မြိုက်စွာ ကျင်းပကြသည့်မြို့နယ်များနှင့် ဗိုလ်ချုပ်အောင်ဆန်းရုပ်တု ဖွင့်လှစ်သည့်မြို့နယ်များမှ သတင်းများကို မီဒီယာများမှ တစ်ဆင့် တွေ့မြင်ကြားသိရသည်မှာ  မြန်မာတို့၏ ဇာတိမာန် ကို ပြန်လည်သတိရစေပါသည်။

ဇာတိမာန်ထက်သန်၍  အမျိုးအတွက် စွန့်လွှတ်စွန့်စား ပေးဆပ်မှုတွင် အနှိုင်းမဲ့ ထူးချွန်သော ဗိုလ်ချုပ်အောင်ဆန်းသည် လက်ရုံးရည်ရော နှလုံးရည်ပါ ပြည့်စုံသူဖြစ်ကြောင်း မြန်မာပြည်သူ အပေါင်းတို့သိကြပြီးဖြစ်သည်။ တစ်နှစ်အတွင်း လွတ်လပ်ရေးရရမည် ဟူသော ကြွေးကြော်သံနှင့်  မနေမနားကြိုးပမ်းမှုများတွင် ၁၉၄၇ ခုနှစ် ဇွန်လ ၇ ရက်နေ့က ရန်ကုန်မြို့ ပြည်လမ်းရှိ ဆိုရန်တိုဗီလာ အဆောက်အအုံ (ယခုဟံသာဝတီ အဝိုင်းအနီးမှ ဆက်သွယ်ရေးရုံး အဆောက်အအုံ)၌ တိုင်းပြည်ပြန်လည် ထူထောင်ရေး ကွန်ဖရင့် ကျင်းပစဉ် ပြောကြားခဲ့သော မိန့်ခွန်းကို အမှတ်ရပြန်လည်တင်ပြလိုသည်။ ဗိုလ်ချုပ်အောင်ဆန်း ပြောကြားခဲ့သော ဆိုရန်တိုဗီလာ မိန့်ခွန်း၌ ''အချို့က စီးပွားရေးအခြေခံကောင်း ပြန်လည်ထူထောင်သလို နိုင်ငံရေးဘက်ကလည်း အခြေခံကောင်းကောင်းနှင့် ပြန်လည်ထူထောင်ရန် လိုသည်ဟု ဆိုကောင်း ဆိုကြပါလိမ့်မည်။ စီးပွားရေးနှင့် နိုင်ငံရေးဆိုသည်မှာ အချင်းချင်း အပြန်အလှန် ဆက်သွယ်နေသည့်အတွက် တစ်ခုနှင့်တစ်ခု သီးခြားစီခွဲထားလို့ မရနိုင်ပါဘူး''ဟု ပြောကြားသည်။

နိုင်ငံတစ်နိုင်ငံတွင်ရှိသော နိုင်ငံသား တစ်ဦးချင်းစီတို့၏ စားဝတ်နေမှု ရေးရာတို့ကို ပေါင်းစုလိုက်သောအခါ ထိုနိုင်ငံနှင့် စပ်ဆိုင်သော အရေးအရာများဖြစ်လာသည်ကို နိုင်ငံရေးဟု ခေါ်ကြခြင်းဖြစ် သည်။ နိုင်ငံသားဆိုသည်မှာ နိုင်ငံတော်၏ သစ္စာကို ခံယူစောင့်ထိန်းသော၊ နိုင်ငံတော်က ပေးအပ်သော တာဝန်ကို ထမ်းဆောင်ရသော၊ နိုင်ငံတော်က ခွင့်ပြုသည့် အခွင့်အရေးများကို ရရှိသောသူ ဟူ၍ မြန်မာအဘိဓာန်က အဓိပ္ပာယ်ဖွင့်ဆိုထားသည်။ မြန်မာနိုင်ငံ၌ ပြဋ္ဌာန်းထားသော ၁၉၈၂ ခုနှစ် နိုင်ငံသားဖြစ်မှု ဥပဒေအရ မြန်မာနိုင်ငံသားဖြစ်ပြီး သူများသည်   မြန်မာအဘိဓာန်က အဓိပ္ပာယ်ဖွင့်ဆိုထားသော  နိုင်ငံသားတစ်ဦး၏ တာဝန်နှင့်ရပိုင်ခွင့်တို့ကို အလေးအနက် သိရှိလိုက်နာကြရမည်ဖြစ်သည်။

ဆိုရန်တိုဗီလာမိန့်ခွန်း၌ စီးပွားရေး စီမံကိန်းရေးဆွဲရာတွင် သတိပြုရမည့် အချက်များကို ဗိုလ်ချုပ်အောင်ဆန်းက ပြောကြားရာ၌ ''ရေးဆွဲမည့် အစီအစဉ်သည် လွန်မင်းစွာကျပ်တည်းခြင်း၊ ပုံသေသတ်မှတ်ထားခြင်းမျိုး မရှိစေဘဲ ဖြစ်ပေါ်လာသော အကြောင်းအားလျော်စွာ ပြုပြင်ပြောင်းလဲ၍ ရနိုင်သော အစီအစဉ်ဖြစ်ရမည်။ ပုံသေသတ်မှတ်ထားသော အစီအစဉ်မျိုးမှာ များသောအားဖြင့် ကောင်းသော အစီအစဉ်မျိုးမဟုတ်၊ တိုင်းပြည်တွင် ပေါ်ပေါက်ဆဲ ပေါ်ပေါက်လတ္တံ့သော အကြောင်းတရား အမျိုးမျိုးနှင့် သင့်လျော်ပြေပြစ်အောင် ရေးဆွဲသော အစီအစဉ်မျိုးသာလျှင် ကျေနပ်လောက်သော အစီအစဉ်ဖြစ်ပါသည်''ဟုပြောကြားသည်။

မြန်မာနိုင်ငံတွင် ၁၉၈၈ ခုနှစ်နောက်ပိုင်းမှစ၍ ပြည်သူတို့ဆန္ဒနှင့်အညီ ပါတီစုံဒီမိုကရေစီ အတွက် အခြေခံ အဆောက်အဦများ တည်ဆောက်ပေးခြင်းနှင့် ဈေးကွက်စီးပွားရေးစနစ် တည်ဆောက်ခြင်း တို့ကို ဆောင်ရွက်ခဲ့သည်။ နိုင်ငံတော်၏ စီးပွားရေးလုပ်ငန်းများကိုလည်း လက်မှုလယ်ယာမှ စက်မှုလယ်ယာသို့ ကူးပြောင်းရေးနှင့် ဈေးကွက်စီးပွားရေးကို ပီပြင်စွာတည်ဆောက်ရန် ကုန်ထုတ်လုပ်ငန်းများ အပါအဝင် ပုဂ္ဂလိက ကဏ္ဍဖွံ့ဖြိုးရေး ဦးစားပေးဆောင်ရွက်ရန် ပြည်တွင်းပြည်ပ ရင်းနှီးမြှုပ်နှံမှုဥပဒေများ ပြဋ္ဌာန်းပေးထားပြီးဖြစ်သည်။ ဤသို့သော ဆောင်ရွက်ချက်များမှာ  ဆိုရန်တိုဗီလာ စီမံကိန်းအတွက်  ဗိုလ်ချုပ်အောင်ဆန်း မိန့်ကြားခဲ့သည့်အတိုင်း တိုင်းပြည်တွင် ပေါ်ပေါက်ဆဲ ပေါ်ပေါက်လတ္တံ့သော အကြောင်းတရား အမျိုးမျိုးနှင့် သင့်လျော်ပြေပြစ်အောင် ရေးဆွဲသော အစီအစဉ်များပင်ဖြစ်သည်။   နိုင်ငံတော်၏ စီးပွားရေးသည်   စိုက်ပျိုးရေးလုပ်ငန်းဖြစ်သဖြင့် စက်မှုလယ်ယာစနစ်သို့ ကူးပြောင်း၍   နောင်တိုးလာမည့် လူဦးရေသန်း ၁ဝဝ အတွက်မျှော် မှန်းပြီး ခေတ်မီစိုက်ပျိုးနည်းစနစ်နှင့် အထွက်တိုးသီးနှံ စိုက်ပျိုးရေးကို ဖော်ဆောင်ခြင်းနှင့် တစ်ပြိုင်တည်းမှာပင် ပြည်ပပို့ကုန် အမည်သစ်များ ဈေးကွက်ရရှိရေးကို ဆောင်ရွက်လျက်ရှိသည်။

စက်မှုကုန်ထုတ်လုပ်ငန်းများ ဖွံ့ဖြိုးရေးသည်   လျှပ်စစ်စွမ်းအင်ရရှိမှုနှင့် လမ်းခရီး ဆက်သွယ်မှုလုံခြုံချောမွေ့ရေး တစ်နည်းအားဖြင့် ကုန်ထုတ်လမ်းများ လုံခြုံချောမွေ့ရေးတို့ အဓိကဖြစ်သည်။ လမ်းခရီးဆက်သွယ်ရေး လုံခြုံချောမွေ့စေရန် လမ်းတံတားများကို နိုင်ငံတော်အစိုးရက တည်ဆောက်ခြင်း၊ တည်ဆောက်ပြီးသော လမ်းတံတားများကို အဆင့်မြှင့်တင်ခြင်း၊  ဆက်သွယ်ရေးစနစ် လွယ်ကူလျင်မြန်စေရန် အခြေခံအဆောက်အဦများ တည်ဆောက်ခြင်းတို့ကို ဆောင်ရွက်လျက်ရှိသည်။  စက်မှုကုန်ထုတ်လုပ်ငန်းများ ဖွံ့ဖြိုးရေးသည်

ပြည်တွင်းအင်အား တစ်ခုတည်းဖြင့် မလုံလောက်သဖြင့်   ပြည်ပအင်အားကို ရယူရသည်ဖြစ်ရာ အခြေခံ အဆောက်အဦများ ပြည့်စုံရန် တည်ဆောက်သူက တည်ဆောက်နေချိန်တွင်  ဖျက်ဆီးသူက ဖျက်ဆီးနေကြလျှင် ရလဒ်မကောင်းနိုင်သည်ကို အားလုံးသိကြပြီးဖြစ်သည်။ လမ်းခရီးဆက်သွယ်မှု မကောင်းသဖြင့် အခြေခံစားကုန်များ ဈေးတက်သည့်ဒဏ်ကို ပြည်သူများခံနေကြရသည်။ အချို့ဒေသများမှ ကျောင်းနေအရွယ် ကလေးငယ်များ ကျောင်းပြင်ပရောက်နေကြရသည်။ လူတန်းစားမရွေး မိဘတိုင်းက သားသမီးတို့ရှေ့ရေးကို တွေးပူတတ်ကြသူတွေသာ ဖြစ်ကြောင်း ကိုယ်ချင်း စာတရား ထားကြရပေမည်။

ဆိုရန်တိုဗီလာကွန်ဖရင့်မှာပင် ပြည်သူ့အကျိုးကို အမှန်တကယ် သယ်ပိုးလိုသော လုပ်ငန်းမှန်သမျှတွင် ပြည်သူတို့အသံကို နားစွင့်ရန်လိုကြောင်း    ဗိုလ်ချုပ်အောင်ဆန်းက မိန့်ကြားရာ၌ ''အဆိုး အကောင်း ဝေခွဲတတ်သော သာမန်လူစုတို့၏ အတွေ့အကြုံ၊ အကြံဉာဏ်၊ ဗဟုသုတတို့သည်လည်း ကျွန်တော်တို့လုပ်မည့် ကိစ္စများအတွက် အရေးကြီးပါသည်''ဟု ပြောကြားသည်မှာ  ငါတကောမကောဘဲ လောကကို သဟဇာတဖြစ်အောင် ပြုပြင်ပြောင်းလဲ တည်ဆောက်ကြရန် ဖြစ်ကြောင်း တိုင်းရင်းသားပြည်သူ အပေါင်းတို့ အစဉ်သတိရ နေကြရမည်ဖြစ်ပေသည်။   

Read 407 times Last modified on Thursday, 15 February 2018 08:29