SJ WorldNews - шаблон joomla Авто

မြေပြန့်တောင်တန်းပွင့်သည့်ပန်း လန်းဆန်းဝေစည် ရှေ့သို့ချီ

Friday, 16 February 2018 08:30 font size decrease font size decrease font size increase font size increase font size

''လူမျိုးဆိုသည်မှာ သုခ၊ ဒုက္ခအတူခံစားကြ၍ နီးနီးစပ်စပ် အကျိုးချင်းထပ်ပြီးလျှင် နှစ်ပရိစ္ဆေဒ ရှည်လျားစွာ တစ်မျိုးတစ်စားတည်းပင်ဟု စိတ်ထားရှိသူတို့ကို ပေါင်း၍ခေါ်ဝေါ်ခြင်းသာဖြစ်သည်။ အမျိုးအနွယ်ကိုးကွယ်သည့် ဘာသာတရား၊ ပြောဆိုသည့် ဘာသာစကားတို့ကို အရေးထားရမည် ဖြစ်သော်လည်း စင်စစ်မှာ အေးအတူပူအမျှ၊ ကောင်းတူဆိုးဖက် ပူးပေါင်းလျက်နေလိုသော အစဉ်အလာဆန္ဒပေါ်တွင် ဝံသာနုရက္ခိတတရားသည် တည်နေပေ၏'' ဟူ၍ ၁၉၄၆ ခုနှစ် ဇန်နဝါရီ ၂ဝ ရက် ရွှေတိဂုံအလယ်ပစ္စယာ၌ ကျင်းပသော ဖဆပလ ညီလာခံကြီးတွင် ဗိုလ်ချုပ်အောင်ဆန်း မိန့်ခွန်းပြောကြားစဉ် ထည့်သွင်းပြောကြားခဲ့သည်။

ပြည်ထောင်စုသမ္မတ မြန်မာနိုင်ငံတော်ကြီးအတွင်း၌ တိုင်းရင်းသားလူမျိုး ၁ဝဝ ကျော်တို့သည် ရှေးနှစ်ပေါင်းများစွာကပင် အေးအတူပူအမျှ၊ ကောင်းတူဆိုးဖက် အတူတကွ နေထိုင်လာခဲ့ ကြသည်။ ကံမကောင်းအကြောင်းမလှ၍ တိုင်းတစ်ပါးလက်အောက် ကျရောက် ခဲ့ရသည့် ဘဝမှလွတ်မြောက်ရေးကိုလည်း တိုင်းရင်းသား ပြည်သူအပေါင်းနှင့် တပ်မတော်တို့ အတူတကွ စွန့်လွှတ်စွန့်စား တိုက်ပွဲဝင်၍ ရုန်းထွက်ခဲ့ကြသည်။ လွတ်လပ်ရေးရပြီးချိန်၌ တိုင်းရင်းသားသွေးချင်းများ တစ်ဦးအပေါ်တစ်ဦး သံသယစိတ်ကြောင့် စိတ်ဝမ်းကွဲပြားကြရာမှ ပြဿနာကို လက်နက်ကိုင် လမ်းစဉ်ဖြင့်ဖြေရှင်းရန် နည်းလမ်းရွေးချယ်ခဲ့ကြသဖြင့် ပြည်တွင်းပဋိပက္ခများ ပေါ်ပေါက်လာသည်။ လက်နက်ကိုင်ပဋိပက္ခများ ကြာရှည်သည်နှင့်အမျှ နိုင်ငံတော်နှင့် နိုင်ငံသားတို့ ဖွံ့ဖြိုးတိုးတက်မှု နောက်ကျနေရသည်။

မြန်မာနိုင်ငံပြုပြင် ပြောင်းလဲရေးအရှိန်အဟုန် တိုးမြှင့်ဆောင်ရွက်သည့် ၂ဝ၁၁ ခုနှစ်မှစ၍ နိုင်ငံရေးပြုပြင် ပြောင်းလဲမှုအတွက် တိုင်းရင်းသား လက်နက်ကိုင်အဖွဲ့များနှင့် ပြည်ထောင်စုအဆင့် ငြိမ်းချမ်းရေး ဆွေးနွေးပွဲများ ကျင်းပနိုင်ခဲ့သည်။ ပြည်ထောင်စုအဆင့် ငြိမ်းချမ်းရေး ဆွေးနွေးကြရာ၌ ဦးတည်ထားသော ရည်ရွယ်ချက်များမှာ ပြည်ထောင်စုအတွင်း အမြဲတမ်းအတူတကွ နေထိုင်ကြရေး၊ ပြည်ထောင်စု မပြိုကွဲရေး၊ တိုင်းရင်းသား စည်းလုံးညီညွတ်မှု မပြိုကွဲရေးနှင့် အချုပ်အခြာအာဏာ တည်တံ့ခိုင်မြဲရေးတို့ကို သဘောတူရေး၊ စီးပွားရေး ဖွံ့ဖြိုးတိုးတက်ရေးအတွက် ဥပဒေနှင့်အညီ နှစ်ဖက်ညှိနှိုင်းပြီး ပူးပေါင်းဆောင်ရွက်ကြရေး၊ မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများ တိုက်ဖျက်ရေးတွင် ပူးပေါင်း ဆောင်ရွက်ကြရေး၊ နိုင်ငံရေးပါတီ ထူထောင်၍ ရွေးကောက်ပွဲ၌ ပါဝင်ယှဉ်ပြိုင်ရေး၊ ဖွဲ့စည်းပုံအခြေခံ ဥပဒေအားလက်ခံပြီး ပြင်ဆင်ရန်ရှိပါက လွှတ်တော်အတွင်း အများသဘော ဆန္ဒနှင့်အညီ ဆောင်ရွက်ရေး၊ ထာဝရငြိမ်းချမ်းရေးအတွက် ဥပဒေဘောင်အတွင်း အပြီးအပိုင်ဝင်ရောက်ပြီး    တန်းတူညီတူ လုပ်ကိုင်စားသောက်ရေးနှင့်    ဖွဲ့စည်းပုံအခြေခံ ဥပဒေနှင့်အညီ တစ်ခုတည်းသော လက်နက်ကိုင်အဖွဲ့အစည်းအဖြစ် အသွင်ကူးပြောင်းကြရေးတို့ ဖြစ်သည်။

ပြည်ထောင်စုအဆင့် ငြိမ်းချမ်းရေးဆွေးနွေးကြရာ၌ ဦးတည်ထားသော ရည်ရွယ်ချက်များအတိုင်း နိုင်ငံတော်အစိုးရ၊  တိုင်းရင်းသားလက်နက်ကိုင် အဖွဲ့အစည်းများမှ ခေါင်းဆောင်များ၊ ပြည်သူများနှင့် တပ်မတော်တို့ တစ်ဦးအပေါ်တစ်ဦး နားလည်မှု၊ ချစ်ကြည်ရင်းနှီးမှု၊ စိတ်ရှည်သည်းခံမှုတို့ဖြင့် အစဉ်တစိုက် ညှိနှိုင်းဆွေးနွေးခဲ့ကြသည့် ရလဒ်အဖြစ် ၂ဝ၁၅ ခုနှစ် အောက်တိုဘာ ၁၅ ရက်တွင် တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ် (NCA)ကို တိုင်းရင်းသား လက်နက်ကိုင်အဖွဲ့ ရှစ်ဖွဲ့တို့က  လက်မှတ်ရေးထိုး ခဲ့ကြသည်။

NCA တွင် လက်မှတ်ရေးထိုးခဲ့သော အဖွဲ့များမှာ ကရင်အမျိုးသား အစည်းအရုံး (KNU)၊ ဒီမိုကရေစီ အကျိုးပြု ကရင်အမျိုးသား တပ်မတော် (DKBA)၊ ကရင်အမျိုးသား လွတ်မြောက်ရေး တပ်မတော်-ငြိမ်းချမ်းရေး ကောင်စီ (KNU/KNLA-PC)၊ ချင်းအမျိုးသားတပ်ဦး (CNF)၊ ပအိုဝ်းအမျိုးသား လွတ်မြောက်ရေး အဖွဲ့ချုပ် (PNLO) ၊မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး (ABSDF)၊ ရခိုင်ပြည်လွတ်မြောက်ရေး ပါတီ (ALP)၊ ရှမ်းပြည်ပြန်လည် ထူထောင်ရေးကောင်စီ/ ရှမ်းပြည်တပ်မတော် (တောင်ပိုင်း) (RCSS/SSA-S)တို့ဖြစ်ကြသည်။ လက်မှတ်ရေးထိုးရန် ကျန်ရှိနေသေးသော အဖွဲ့များမှ မွန်ပြည်သစ်ပါတီ (NMSP)နှင့် လားဟူဒီမိုကရက်တစ် အစည်းအရုံး (LDU)တို့သည် ဖေဖော်ဝါရီ ၁၃ ရက်တွင် နေပြည်တော် အပြည်ပြည်ဆိုင်ရာ ကွန်ဗင်းရှင်းစင်တာ-၂ ၌ လက်မှတ်ရေးထိုးကြသည်။

အဆိုပါအခမ်းအနားသို့ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင် တက်ရောက်၍ နှုတ်ခွန်းဆက်အမှာစကား ပြောကြားရာ၌  ''ဘက်ပေါင်းစုံမှ ခြိမ်းခြောက်မှု အန္တရာယ်တွေကလည်း ကျွန်တော်တို့ နိုင်ငံအပေါ်မှာ အချိန်မရွေး ကျရောက်လာနိုင်တဲ့ အခြေအနေတွေ ဖြစ်ကောင်း ဖြစ်လာနိုင်တာမို့လို့ နိုင်ငံတော်ရဲ့လွတ်လပ်ရေးနဲ့ အချုပ်အခြာအာဏာ တည်တံ့ခိုင်မြဲရေးအတွက် ဒို့တာဝန်အရေးသုံးပါးကို လက်ကိုင်ထားပြီး ခေတ်မီဖွံ့ဖြိုးတိုးတက်တဲ့ ဒီမိုကရေစီနဲ့ ဖက်ဒရယ်စနစ်ကို အခြေခံသည့် ပြည်ထောင်စုကြီး အချိန်တိုအတွင်း အမြန်ဆုံးဖြစ်ထွန်း ပေါ်ပေါက်လာစေရေး  ''စုပေါင်းညီညာ အောင်ကြောင်းဖြာ''ဆိုသလို  တစ်မြေတည်းနေ၊ တစ်ရေတည်းသောက်နေကြတဲ့ လေးစားချစ်ကြည် ရင်းနှီးအပ်ပါသော   ကျွန်တော်တို့ တိုင်းရင်းသားပြည်သူ တစ်ရပ်လုံးက ကျွန်တော်တို့အားလုံးနဲ့ ဝိုင်းဝန်းပူးပေါင်း အကောင်အထည်ဖော် ဆောင်ရွက်ပေးကြပါလို့ မေတ္တာရပ်ခံ'' ပြောကြားသည်။

သို့ဖြစ်၍ တိုင်းရင်းသားပြည်သူ အပေါင်းတို့ နေထိုင်ကြရာတွင် ပထဝီအနေအထားအရ မြေပြန့်နှင့်တောင်ပေါ်ဟု ဆိုသော်ငြား ရှေးနှစ်ပေါင်းများစွာကပင် တစ်မြေတည်းနေ တစ်ရေတည်း သောက်ခဲ့ကြသည့် သွေးချင်းများပင် ဖြစ်ရကား တစည်းတလုံးတည်းသော စိတ်ဓာတ်ဖြင့် ပြည်ထောင်စုကြီး ဖွံ့ဖြိုးဝေစည်ရေးကို ဆက်လက် တည်ဆောက်ကြပါရန် မြဝတီက တိုက်တွန်း နှိုးဆော် လိုက်ရပါသည်။  

Read 429 times Last modified on Friday, 16 February 2018 08:31