SJ WorldNews - шаблон joomla Авто

နှလုံးရည်လှလျှင် လုပ်ငန်းလှပါသည်

Wednesday, 21 February 2018 08:25 font size decrease font size decrease font size increase font size increase font size

မြန်မာနိုင်ငံ ပြုပြင်ပြောင်းလဲရေး လုပ်ငန်းများ ဆောင်ရွက်ရာတွင် ဗဟိုမှထိန်းချုပ်မှုကို ဖြေလျှော့၍ အောက်ခြေမှ တင်ပြချက်များအပေါ် အလေးထားလျက်  လူထုဗဟိုပြုစီမံကိန်းများ ဖော်ဆောင်ရေးကို ဆောင်ရွက်လျက်ရှိသည်။

ယခုရက်ပိုင်းအတွင်း တွေ့ရသော သတင်းများ၌ ကယားပြည်နယ် လွိုင်ကော်မြို့နှင့် ရှားတောမြို့နယ်တို့မှ လူထုဗဟိုပြုစီမံကိန်း (ဒုတိယနှစ်စက်ဝန်း) စည်းရုံးရေးမှူးများ မွမ်းမံသင်တန်းကို ကယားပြည်နယ် ကျေးလက်ဒေသ ဖွံ့ဖြိုးတိုးတက်ရေး ဦးစီးဌာန အစီအစဉ်ဖြင့် ဖေဖော်ဝါရီ ၁၅ ရက်နှင့် ၁၆ ရက်တို့တွင် လွိုင်ကော်မြို့၌ ပို့ချသည်။ အဆိုပါသင်တန်း၏ ရည်ရွယ်ချက်များမှာ သင်တန်းသား၊ သင်တန်းသူများ အနေဖြင့် စီမံကိန်း လုပ်ငန်းများကို စီမံကိန်း အကောင်အထည်ဖော်ရေး လက်စွဲစာအုပ်ပါ အချက်များအတိုင်း ကူညီစည်းရုံး ပေးနိုင်စေရန်၊ လူထုဗဟိုပြုစီမံကိန်း၏ တာဝန်ခံမှု၊ တာဝန်ယူမှုနှင့် သက်ဆိုင်သည်များကို ပြည်သူများအား ရှင်းပြတတ်ရန်၊ ကျေးရွာလူထုအား ကူညီဆောင်ရွက်ပေးရေးတို့ကို သိရှိနားလည်ကြစေရန် သင်တန်းဖွင့်လှစ် ပို့ချပေးခြင်းဖြစ်ပြီး သင်တန်းသား၊ သင်တန်းသူ ၅ဝ ဦး တက်ရောက်ကြကြောင်း သိရသည်။

နေပြည်တော်ကောင်စီနယ်မြေ လယ်ဝေးမြို့နယ် ကျေးလက်ဒေသ ဖွံ့ဖြိုးတိုးတက်ရေး ဦးစီးဌာနက ဖွင့်လှစ်သော လူထုဗဟိုပြုစီမံကိန်း (တတိယနှစ်စက်ဝန်း)တွင် ကျား၊ မရေးရာတန်းတူ ပါဝင်ဆောင်ရွက်ရေး အလုပ်ရုံဆွေးနွေးပွဲကို ဖေဖော်ဝါရီ ၁၅ ရက်တွင် သာဝတ္ထိမြို့၌ ပြုလုပ်သည်။ အလုပ်ရုံဆွေးနွေးပွဲ၌ လူထုဗဟိုပြု စီမံကိန်းများတွင် ကျား၊ မရေးရာ လိုအပ်ချက်ဖြစ်သည့် လုပ်ငန်းကော်မတီတိုင်းတွင် အမျိုးသားနှင့် အမျိုးသမီး အချိုးကျပါဝင်ရေး၊ ဆပ်ကော်မတီတိုင်းတွင် အမျိုးသမီးတစ်ဦး ပါဝင်ရေး၊   အထောက်အကူပြု ကော်မတီတိုင်းတွင် အမျိုးသမီး ခေါင်းဆောင် တစ်ဦးထားရှိရေး၊ အမျိုးသားနှင့် အမျိုးသမီး တူညီလုပ်အားခရရှိရေး၊ စီမံကိန်း လုပ်ငန်းစဉ်တိုင်းတွင် ကျား၊ မရေးရာအမြင်များ ထည့်သွင်းဆောင်ရွက်ရေးတို့ကို လယ်ဝေးမြို့နယ် ကျေးလက်ဒေသ ဖွံ့ဖြိုးတိုးတက်ရေး ဦးစီးဌာန လူထုဗဟိုပြုစီမံကိန်း ကျား၊မ ရေးရာ တာဝန်ခံနှင့် ကျေးလက်ဒေသ ဖွံ့ဖြိုးတိုးတက်ရေး ဦးစီးဌာန ဦးစီးမှူးတို့က ရှင်းလင်းဆွေးနွေးကြသည်။

စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ကျေးလက်ဒေသ ဖွံ့ဖြိုးတိုးတက်ရေး ဦးစီးဌာနက လူထုဗဟိုပြု စီမံကိန်းများကို ထိရောက်စွာ အကောင်အထည်ဖော်နိုင်ရေး ကြိုးစားနေသကဲ့သို့ ပြည်ထဲရေးဝန်ကြီးဌာန အထွေထွေအုပ်ချုပ်ရေး ဦးစီးဌာနအနေဖြင့်လည်း ရပ်ကွက်နှင့် ကျေးရွာအုပ်စု အုပ်ချုပ်ရေးမှူးများအား လုပ်ငန်းစွမ်းရည်မြှင့် သင်တန်းများ ဖွင့်လှစ်သင်ကြားပေးလျက် ရှိသည်။

ပဲခူးတိုင်းဒေသကြီး ပေါင်းတည်မြို့နယ် အထွေထွေအုပ်ချုပ်ရေး ဦးစီးဌာနက မြို့နယ်အတွင်းရှိ ရပ်ကွက်နှင့် ကျေးရွာအုပ်စု  အုပ်ချုပ်ရေးမှူးများ လုပ်ငန်းစွမ်းရည်မြှင့် သင်တန်းကို ဖေဖော်ဝါရီ ၁၆ ရက်မှ ၂ဝ ရက် အထိဖွင့်လှစ်၍ စာတွေ့လက်တွေ့ပို့ချပေးခဲ့သည်။  အဆိုပါသင်တန်းမှ သင်တန်းသား ၅၅ ဦးတို့အား ပို့ချပေးသည့် သင်ခန်းစာများမှာ တရားစီရင်ရေး၊ တရားဥပဒေ စိုးမိုးရေး၊ စီမံကိန်းရေးဆွဲရေး၊ စည်ပင်သာယာရေး လုပ်ငန်းများ၊ ၂ဝ၁၂ ခုနှစ် လယ်ယာမြေဥပဒေနှင့် နည်းဥပဒေ၊ မြေလွတ်မြေလပ်ဥပဒေ၊ ပညာရေးဆိုင်ရာ ကိစ္စရပ်များ၊ မြန်မာ့လယ်ယာ ဖွံ့ဖြိုးရေးဘဏ်၏ လုပ်ထုံးလုပ်နည်းများ၊ မြန်မာနိုင်ငံ မီးသတ်တပ်ဖွဲ့ဥပဒေ၊ငွေစာရင်းရေးဆွဲနည်း၊ စိုက်ပျိုးရေးဦးစီးဌာန၏ လုပ်ငန်းတာဝန်များ၊ ဆည်မြောင်းတာတမံ ဥပဒေ၊ အထူးကုန်စည်ခွန် ဥပဒေ၊ အကျဉ်းဦးစီး ဌာန၏ လုပ်ငန်းတာဝန်များ၊ ယစ်မျိုးဆိုင်ရာ စီမံခန့်ခွဲမှု၊ အသင်းအဖွဲ့ မှတ်ပုံတင်ခြင်းဆိုင်ရာ ဥပဒေ၊ သစ်တောဦးစီးဌာန လုပ်ငန်းတာဝန်များ၊ စက်မှုလယ်ယာ ဦးစီးဌာန လုပ်ငန်းတာဝန်များ၊ မြန်မာ့စီးပွားရေးဘဏ်၏ လုပ်ထုံးလုပ်နည်းများ၊ ပြန်ကြားရေးနှင့် ပြည်သူ့ဆက်ဆံရေး ဦးစီးဌာန၏ လုပ်ငန်းတာဝန်များ၊ တိရစ္ဆာန်မွေးမြူရေးနှင့် ကုသရေးဦးစီးဌာန၏ လုပ်ငန်းတာဝန်များ၊ လျှပ်စစ်ဥပဒေနှင့် နည်းဥပဒေ၊ ရွေးကောက်ပွဲဆိုင်ရာ ကိစ္စရပ်များ၊ ကျေးလက်လမ်းတံတားများ အကြောင်း၊ သမဝါယမဦးစီးဌာန၏ လုပ်ငန်းတာဝန်များ၊ မြန်မာ့မီးရထားဥပဒေ၊ တိုင်းရင်းဆေးကုဌာန၏ လုပ်ငန်းတာဝန်များ၊ အားကစားနှင့် ကာယပညာဦးစီးဌာန၏ လုပ်ငန်းတာဝန်များ၊ စားသုံးသူရေးရာ ဦးစီးဌာန၏ ဆောင်ရွက်မှုများ၊ အုပ်ချုပ်ရေးဥပဒေနှင့် နည်းဥပဒေ၊ ရုံးလုပ်ငန်းများနှင့် ရပ်ကွက်/ကျေးရွာ အုပ်ချုပ်ရေးမှူးရုံး တစ်ရုံးတွင် ပြည့်စုံရမည့် အင်္ဂါရပ်များကို သက်ဆိုင်ရာဌာနများမှ တာဝန်ရှိသူတို့က လာရောက်ပို့ချ ပေးကြသည်။

ရပ်ကွက်နှင့်ကျေးရွာများ၌ ပြည်သူနှင့်အနီးကပ် ထိတွေ့နေရသူများအား နိုင်ငံတော်အစိုးရက ဆောင်ရွက်နေသော လူထုဗဟိုပြုစီမံကိန်းနှင့် သက်ဆိုင်သည့် ကိစ္စများကို  ဆွေးနွေးပို့ချပေးခြင်း၊ ရပ်ကွက်နှင့်ကျေးရွာအုပ်စု အုပ်ချုပ်ရေးမှူးများအား လုပ်ငန်းစွမ်းရည်မြှင့် သင်တန်းဖွင့်လှစ်၍ တတ်သိ နားလည်သင့်သည်များကို စာတွေ့လက်တွေ့ ပို့ချပေးခြင်းတို့၏ ရည်ရွယ်ချက်များ ပေါက်မြောက်စေရန် သက်ဆိုင်သူတို့က စိတ်အားထက်သန်မှု ရှိရှိဖြင့် လက်တွေ့ဆောင်ရွက်ကြရာတွင် နှလုံးရည်လှလျှင် လုပ်ငန်းလှသည် ဆိုစကားကို အလေးအနက်ထား လိုက်နာကျင့်သုံး ရမည်ဖြစ်ကြောင်း မြဝတီက တိုက်တွန်းနှိုးဆော် လိုက်ရပါသည်။   

Read 605 times Last modified on Wednesday, 21 February 2018 08:26