SJ WorldNews - шаблон joomla Авто
×

Warning

JUser: :_load: Unable to load user with ID: 107

မီဒီယာ လောကသားနှင့် သမိုင်းမျက်နှာစာ

Sunday, 01 April 2018 12:46 font size decrease font size decrease font size increase font size increase font size

၂၁ ရာစုနှစ် ကမ္ဘာပြုမှု ဖြစ်စဉ်များမှ သတင်းမီဒီယာသည် အရေးပါသော အခန်းကဏ္ဍတွင် ရှိနေခြင်းကြောင့် စဉ်ဆက်မပြတ် ပြောင်းလဲ တိုးတက်နေသော နိုင်ငံရေး၊ စီးပွားရေး၊ လူမှုရေးရာ အဖြာဖြာ တို့ကို သတင်းမီဒီယာတို့က မျက်ခြည်မပြတ် စောင့်ကြည့်လေ့လာ အကဲဖြတ် နေကြရမည် ဖြစ်သည်။ ဤသို့ မျက်ခြည်မပြတ် စောင့်ကြည့် လေ့လာ အကဲဖြတ်ရာတွင် မီဒီယာသည် ဥပဒေပြုရေး အဖွဲ့ဝင် မဟုတ်သကဲ့သို့ အုပ်ချုပ်ရေးနှင့် တရားစီရင်ရေး အဖွဲ့မဟုတ်ဘဲ အခြေအနေမှန်ကို တိကျခိုင်လုံသော အထောက်အထား အကိုးအကား နှင့်တကွ အများပြည်သူ သိရှိကြစေရန် တင်ပြခြင်းနှင့် လမ်းကြောင်းမှန်ကို ရွေးချယ်၍ တရားနည်းလမ်းတကျ လျှောက်လှမ်းကြရန် တိုက်တွန်းခြင်း တို့သည် သတင်းမီဒီယာ၏ အဓိကတာဝန် ဖြစ်သည်။ သတင်းမီဒီယာ တာဝန်ကို သမာသမတ် ကျသော နည်းလမ်းဖြင့် ထမ်းဆောင်နိုင်ရန် နိုင်ငံသားတစ်ဦး အနေဖြင့် တရားဥပဒေ များကို လေးစား လိုက်နာခြင်းနှင့် သတင်းမီဒီယာ ကျင့်ဝတ်တို့ကို စောင့်ထိန်း လိုက်နာကြရသည်။

သတင်းဆက်သွယ်ရေး နည်းပညာ အလျင်အမြန် ထွန်းကားလာသော ယနေ့ခေတ်တွင် သတင်းထူး၊ သတင်းဦးရရှိမှုနှင့် ဖြန့်ဝေနိုင်ရေးကို အပြိုင်အဆိုင် ကြိုးစားနေကြသည်။ သတင်းမီဒီယာ တို့သည် စဉ်ဆက်မပြတ် ပြောင်းလဲတိုးတက်နေသော နိုင်ငံရေး၊ စီးပွားရေး၊ လူမှုရေးရာ အဖြာဖြာတို့ ပြည်သူတို့ သိသင့်သော်လည်း မသိသေးသော သတင်းထူး၊ သတင်းဦး ရရှိရန် သတင်းအချက်အလက် စုဆောင်းရာတွင် ဘာသာစကား တတ်ကျွမ်းနားလည်မှု ရှိရမည် ဖြစ်သည်။ နိုင်ငံရေး၊ စီးပွားရေး၊ လူမှုရေးတို့တွင် နယ်ပယ် အလိုက် ဘာသာရပ်ဆိုင်ရာ ဝေါဟာရများမှာ ထူးခြားသော အဓိပ္ပာယ်များ ရှိကြသည်။ ဝေါဟာရ တစ်လုံးသည် စာလုံးပေါင်းတူသည်ဖြစ်စေ၊ အသံတူသည်ဖြစ်စေ ဘာသာရပ် အလိုက် အဓိပ္ပာယ် ကွဲပြားသွားသည်။

မြန်မာနိုင်ငံမှ စွန့်ဦးတီထွင် လုပ်ငန်းရှင် တစ်ဦး၏ နိုင်ငံခြားခရီးစဉ် တစ်ခုမှ အတွေ့အကြုံကို ဥပမာအဖြစ် တင်ပြလိုသည်။ မြန်မာနိုင်ငံမှ စွန့်ဦးတီထွင် လုပ်ငန်းရှင်နှင့် ပြည်ပမှ လုပ်ငန်းရှင် တို့ အလုပ်သဘော တွေ့ဆုံညှိနှိုင်း ဆွေးနွေးကြစဉ် ကြားခံစကားပြန် တစ်ဦးမှ တစ်ဆင့် ပြောဆိုကြသည်။ ပထမနေ့က ညှိနှိုင်းသဘော တူညီထားသည်များကို နှစ်ဦးနှစ်ဖက် လက်မှတ် ရေးထိုးကြသည့် နောက်တစ်နေ့တွင် အငြင်းအခုန် ဖြစ်ရတော့သည်။ အငြင်းအခုန် ဖြစ်ရသည့် အကြောင်းမှာ စွန့်ဦးတီထွင် လုပ်ငန်းရှင် ကိုယ်တိုင်က ဟန်ကိုယ့်ဖို့ အနေအထားဖြင့် လိုက်လိုက်လျောလျော ပြောခဲ့သည့် အခြေအနေနှင့် စကားပြန်က အင်္ဂလိပ် စကားကို ရေရေလည်လည် ပြောတတ်သူ မှန်သော်လည်း စီးပွားရေး ဝေါဟာရကို မနိုင်နင်းသည့် အခြေအနေ နှစ်ရပ်ကြောင့် ယခင်နေ့က နှစ်ဦးနှစ်ဖက် သဘောတူညီချက် ဆိုသော စာလုံးများကို စာရွက်ပေါ် မြင်ရသောအခါ သဘောမတူနိုင်သည့် အချက်များ ဖြစ်နေသဖြင့် ပြန်လည် ညှိနှိုင်းရကြောင်း သိရသည်။ မီဒီယာသည် ပြည်တွင်း၊ ပြည်ပ အခြေအနေ အရပ်ရပ်တို့၏ သတင်း ရယူရာတွင် ဒေသအလိုက် ပြောဆိုသော ဘာသာစကားကို နားလည်တတ်ကျွမ်းမှု မရှိလျှင် ခိုင်လုံတိကျသော သတင်းအချက်အလက် ရရှိရန် အခက်အခဲ ရှိမည်။ ကြားခံစကားပြန် တစ်ဦးမှတစ်ဆင့် ပြောဆိုမေးမြန်းရလျှင်လည်း ရာနှုန်းပြည့် တိကျခိုင်လုံသော သတင်းအချက်အလက် ရရှိရန် သေချာမည် မဟုတ်ပေ။

ကမ္ဘာပြုမှု ဖြစ်စဉ်အရ နိုင်ငံရေး၊ စီးပွားရေး၊ လူမှုရေးတို့ အလျင်အမြန် ပြောင်းလဲနေသော ကမ္ဘာကြီးအတွက် အရေးပါသော အခန်းကဏ္ဍမှ ပါဝင်သော သတင်းမီဒီယာ တို့သည် ဒီမိုကရေစီနှင့် လူ့အခွင့်အရေးသည် နိုင်ငံရေး၊ စီးပွားရေးနှင့် လူမှုရေးမျက်နှာစာ ဟူသော မျက်နှာစာ သုံးရပ်ကို သဟဇာတ ဖြစ်အောင် ပေါင်းစပ်ရာမှ ပေါ်ထွက်လာသောပြယုဂ် (Three-dimensional Figure) ဖြစ်ကြောင်း သိကြပြီး ဖြစ်သည်။ အထူးသဖြင့် လူ့အခွင့်အရေးသည် ဆိုခဲ့သော မျက်နှာစာသုံးရပ်ကို လွှမ်းခြုံထားသည့် ပြောင်းလဲ၍ မရသော သမိုင်းကြောင်း မျက်နှာစာ(Historical Dimension) ကို မေ့ပျောက်ထားကြလျှင် ထိုနိုင်ငံနှင့် နိုင်ငံသားတို့၏ အနာဂတ် မရေရာ မသေချာနိုင်တော့ပေ။ အမြစ်မရှိသော သစ်ပင်သည် မရှင်သန်နိုင် သကဲ့သို့ သမိုင်းမရှိသော လူမျိုးသည်လည်း ရှင်သန်နိုင်ခွင့်ရှိတော့မည် မဟုတ်ပါ။

မျက်မှောက်ကာလ ကမ္ဘာ့နိုင်ငံများမှ နိုင်ငံရေးအရ လွတ်လပ်မှု ရှိပါသည် ဆိုသော နိုင်ငံများ၌ မီဒီယာနှင့် နိုင်ငံရေး အသိုင်းအဝိုင်းတို့ ထိပ်တိုက်တွေ့ဆုံမှုများ ရှိနေကြသည်။ ထို့အတူ စီးပွားရေးနှင့် လူမှုရေးအသိုင်းအဝိုင်း တို့မှာလည်း ထိပ်တိုက်တွေ့ဆုံမှုများ ရှိနေကြခြင်းကြောင့် စုပေါင်း အဖြေရှာ နေကြရဆဲ အခြေအနေများ ရှိကြရာတွင် ဒီမိုကရေစီနှင့် လူ့အခွင့်အရေး ရှေ့တန်းတင် ပြောဆိုကြသော်လည်း ပြောင်းလဲ၍ မရသောသမိုင်းကြောင်း မျက်နှာစာကို မေ့ပျောက်မထားဘဲ မိမိတို့နိုင်ငံနှင့် နိုင်ငံသားတို့ အနာဂတ် ခိုင်မာသည် ထက်ခိုင်မာအောင် ကာကွယ်နေကြကြောင်း တွေ့ရသည်။

သို့ဖြစ်၍ မီဒီယာဖွံ့ဖြိုးရေးသည် မီဒီယာလောကသား များအနေဖြင့် ဘာသာစကား နားလည် တတ်ကျွမ်းမှု နှင့်အတူ နိုင်ငံရေး၊ လူမှုရေး၊ စီးပွားရေးတို့ကို လွှမ်းခြုံထားသော သမိုင်းကြောင်း မျက်နှာစာကိုပါ မြင်အောင်ကြည့်၊ သိအောင်လေ့လာကြရန် လိုအပ်ကြောင်း မြဝတီက အကြံပြု လိုက်ရပါသည်။ ။

Read 413 times Last modified on Sunday, 01 April 2018 12:47