SJ WorldNews - шаблон joomla Авто

ဒီမိုကရေစီ ရှင်သန်ရေးနှင့်ဖွံ့ ဖြိုးရေး

Friday, 20 April 2018 08:07 font size decrease font size decrease font size increase font size increase font size

ပြည်ထောင်စုသမ္မတ မြန်မာနိုင်ငံတော် နိုင်ငံတော်သမ္မတ ဦးဝင်းမြင့်က မြန်မာပြည်သူအပေါင်းသို့ နှစ်သစ်ကူး နှုတ်ခွန်းဆက်စကား ပြောကြားရာ၌ နိုင်ငံတော်အစိုးရက ဆက်လက်ဆောင်ရွက်မည့် ပြုပြင်ပြောင်းလဲရေး လုပ်ငန်းစဉ်များနှင့် စပ်လျဉ်း၍ ''ဒီလုပ်ငန်းစဉ်တွေကို ဆောင်ရွက်ရာမှာ ကျွန်တော်တို့ လိုက်နာရမယ့် အခြေခံမူကတော့ ''တည်ငြိမ်မှုကိုလည်း မထိခိုက်စေ၊ အပြောင်း အလဲတွေလည်းဖြစ်ပေါ်စေ''ဆိုတဲ့ နည်းလမ်းနဲ့ ဆောင်ရွက်ဖို့ဖြစ်ပါတယ်။ အထူးသဖြင့် ပွင့်လင်းမြင်သာမှုနဲ့ တာဝန်ခံမှု၊ တာဝန်ယူမှု အဆင့်ဆင့်ရှိရေး ဆိုတဲ့ စံနှုန်းကို အခြေခံပြီး ပြုပြင်ပြောင်း လဲမှုတွေကို ပြည်ထောင်စုအစိုးရ၊ အခြားသော မဏ္ဍိုင်ကြီးတွေ၊ တတ်သိပညာရှင်တွေ၊ အရပ်ဘက်လူ့အဖွဲ့အစည်းတွေ၊ သတင်းမီဒီယာတွေနဲ့ ပြည်သူတွေရဲ့ စုပေါင်းအင်အားနဲ့ စုပေါင်း ဆောင်ရွက်မှာဖြစ်ကြောင်း တင်ပြလိုပါတယ်''ဟူ၍ ထည့်သွင်းပြောကြားသည်။

တည်ငြိမ်မှုကို မထိခိုက်စေရန်မှာ နိုင်ငံရေး၊ စီးပွားရေး၊ လူမှုရေးဟူသော ပဓာနအချက်ကြီး သုံးချက်စလုံး အကျုံးဝင်လျက်ရှိသည်။ ခေတ်သစ်ကမ္ဘာ့သမိုင်းမှ စစ်အေးခေတ်(၁၉၄၅-၁၉၉ဝ)ဟုဆိုကြသော အမုန်းပြိုင်ပွဲကာလ ကျော်လွန်ခဲ့သည်မှာ ယခုဆိုလျှင် ၂၈ နှစ်ရှိပြီဖြစ်ပြီး စစ်အေးလွန်ခေတ်သို့ ရောက်ရှိနေပြီဖြစ်သည်။

စစ်အေးခေတ်နှင့် စစ်အေးလွန်ခေတ်တို့တွင် ဖြစ်ပွားသော ပြည်တွင်းပဋိပက္ခများနှင့် အကြမ်းဖက်သမားတို့ လက်ချက်ကြောင့် သေဆုံးသူဦးရေနှင့် ပစ္စည်းဥစ္စာ ဆုံးရှုံးမှုတန်ဖိုး စုစုပေါင်းတို့သည် ကမ္ဘာစစ်ကြီးဖြစ်ပွားသည့် ကာလထက် ပိုမိုများပြားကြောင်း လေ့လာသူများက ဖော်ထုတ်ထားကြသည်။ စစ်အေးလွန်ခေတ် ကမ္ဘာ့ပြည်သူတို့၏ မျှော်မှန်းချက်မှာ ပဋိပက္ခများမှသည် ဒီမိုကရေစီနှင့် စီးပွားရေး ဖွံ့ဖြိုးတိုးတက်မှုကို တည်ဆောက်ကြရန် ဖြစ်သည်ဟု ပညာရှင်များက မှတ်ချက်ပြုထားကြသည်။ မြန်မာနိုင်ငံ လွတ်လပ်ရေးရခဲ့သည့် ၁၉၄၈ ခုနှစ်သည် စစ်အေးခေတ်ဖြစ်သဖြင့် ကမ္ဘာ့အမုန်းပြိုင်ပွဲများ၏ ဂယက်နှင့် ပြည်တွင်းပဋိပက္ခတို့၏ ဒဏ်ကို ပြည်သူများ ခံစားခဲ့ကြရသည့် ခါးသီးသော အတွေ့အကြုံတို့ကြောင့် ထိုသို့သော အဖြစ်ဆိုးမျိုး ထပ်မံမကြုံတွေ့လိုတော့သည်မှာ တိုင်းရင်းသားပြည်သူ အပေါင်းတို့၏ တူညီသောဆန္ဒဖြစ်သည်။

မြန်မာနိုင်ငံ၏ နိုင်ငံရေး အပြောင်းအလဲ ခေတ်ရေစီးကြောင်းသည် ၁၉၈၉ ခုနှစ်မှစ၍ မြစ်ဖျားခံ စီးဆင်းခဲ့ရာမှ ၂ဝ၁ဝ ပြည့်နှစ် ပါတီစုံဒီမိုကရေစီ အထွေထွေရွေးကောက်ပွဲနှင့် ၂ဝ၁၂ ခုနှစ် ကြားဖြတ်ရွေးကောက်ပွဲတို့က အပြောင်းအလဲ အရှိန်အဟုန် တိုးမြှင့်ပေးနိုင်ခဲ့သည်။ စစ်အေးခေတ်၏ ဂယက်မှဖြာထွက်လာသော တိုင်းရင်းသား အချင်းချင်း သံသယစိတ်များ ပယ်ဖျောက်၍ တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူ စာချုပ်(NCA)ကို ၂ဝ၁၅ ခုနှစ် အောက်တိုဘာ ၁၅ ရက်တွင် တိုင်းရင်းသား လက်နက်ကိုင်အဖွဲ့များနှင့် တောတွင်းလက်နက်ကိုင် အဖွဲ့ရှစ်ဖွဲ့တို့ ပါဝင်လက်မှတ်ရေးထိုးကြသည်။ ၂ဝ၁၅ ခုနှစ် နိုဝင်ဘာတွင် ဒုတိယအကြိမ် ပါတီစုံဒီမိုကရေစီ အထွေထွေရွေးကောက်ပွဲ ကျင်းပခဲ့ပြီးဖြစ်သည်။ တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ်(NCA)ကို တိုင်းရင်းသား လက်နက်ကိုင်အဖွဲ့ နှစ်ဖွဲ့တို့က ၂ဝ၁၈ ခုနှစ် ဖေဖော်ဝါရီ ၁၃ ရက်တွင် ပါဝင်လက်မှတ်ရေးထိုးကြပြီး ဖြစ်သည်။ ယနေ့အချိန်တွင် တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ်၌ ပါဝင်လက်မှတ် ရေးထိုးထားသည့် အဖွဲ့များက နိုင်ငံတော်အစိုးရနှင့် အတူ ပြုပြင်ပြောင်းလဲရေး လုပ်ငန်းများကို ဆောင်ရွက်နေကြပြီဖြစ်သည်။ NCA တွင် ပါဝင်လက်မှတ် မရေးထိုးရသေးသော အဖွဲ့များကိုလည်း နိုင်ငံတော်အစိုးရ၊ ပြည်သူနှင့်တပ်မတော်တို့က လက်ကမ်းကြိုဆိုလျက်ရှိသည်။

ကမ္ဘာ့ငြိမ်းချမ်းရေးအတွက် ဆင်းရဲမှု တိုက်ဖျက်ရေးကို တွန်းအားပေး၍ ဆင်းရဲမှုတိုက်ဖျက်ရေးမှ တစ်ဆင့် ဖွံ့ဖြိုးရေးကို ဦးတည်ရွေ့လျားနေကြရာ မြန်မာနိုင်ငံ၏ ပြုပြင်ပြောင်းလဲရေးသည်လည်း ပြည်တွင်းငြိမ်းချမ်းရေး အတွက် ဆင်းရဲမှုလျော့နည်း ပပျောက်ရေးနှင့် ဖွံ့ဖြိုးရေးတို့ကို အကောင်အထည်ဖော်လျက် ရှိသည်။ ဆင်းရဲမှု လျော့နည်းပပျောက်ရေး ဆောင်ရွက်ရာတွင် ပြည်သူများအလုပ်အကိုင် အခွင့်အလမ်း ရရှိရေးအတွက် ပြည်တွင်းပြည်ပ ရင်းနှီးမြှုပ်နှံမှုများ နှစ်စဉ်တိုးတက်စေရန် ဆောင်ရွက်ရာတွင် ၂ဝ၁၁-၂ဝ၁၂ ဘဏ္ဍာနှစ်မှစ၍ ပြည်ပရင်းနှီးမြှုပ်နှံမှု အခြေအနေမှာ နိမ့်တစ်ခါမြင့်တစ်လှည့်ဖြင့် ၂ဝ၁၅-၂ဝ၁၆ ဘဏ္ဍာနှစ်တွင် အမေရိကန်ဒေါ်လာသန်းပေါင်း ၉၄၈၁ ဒသမ ၂၈ သည် အမြင့်ဆုံး အညွှန်းကိန်းဖြစ်သည်။ ၂ဝ၁၇-၂ဝ၁၈ ဘဏ္ဍာနှစ်တွင် ပြည်ပရင်းနှီးမြှုပ်နှံမှု အမေရိကန်ဒေါ်လာ သန်းပေါင်း ၄၉၂ဝ ဒသမ ၂၅ ဖြစ်ကြောင်းတွေ့ရသည်။ ဤသို့ ၂ဝ၁၅-၂ဝ၁၆ ဘဏ္ဍာနှစ်က ပြည်ပရင်းနှီးမြှုပ်နှံမှုထက် ၂ဝ၁၇-၂ဝ၁၈ ဘဏ္ဍာနှစ်တွင် ရင်းနှီးမြှုပ်နှံမှု လျော့နည်းခြင်းသည် စီးပွားရေးရပ်ဝန်း အခြေအနေနှင့် ဈေးကွက်အခြေအနေတို့ကြောင့် ဖြစ်နိုင်ဖွယ်ရှိသည်ဟု ခန့်မှန်းရသည်။

လေ့လာသူများ၏ အဆိုအရ ၂၁ ရာစုခေတ်သည် ကမ္ဘာ့နိုင်ငံများ အချင်းချင်း ဖွံ့ဖြိုးရေး ယှဉ်ပြိုင်သောခေတ် ဖြစ်သည်ဟုဆိုကြသည်။ ဖွံ့ဖြိုးရေးဟူသော စကားသုံးခွန်း၏ အဓိပ္ပာယ်သည် ကျယ်ပြန့်သည်နှင့်အမျှ နက်နဲသိမ်မွေ့သော အသွင်သဏ္ဌာန်နှင့် အတွင်းသရုပ်တို့ရှိခြင်းကြောင့် တစ်ဦးကောင်း တစ်ယောက်ကောင်း တစ်သင်းတစ်ဖွဲ့ကောင်းဖြင့် ဆောင်ရွက်၍မရနိုင်သည်မှာ သေချာသော အဖြေဖြစ်သည်။

ထို့ကြောင့် အပြန်အလှန် ရစ်ပတ်ဖွဲ့နှောင်လျက်ရှိသော တည်ငြိမ်မှုနှင့် ဖွံ့ဖြိုးမှုအတွက် အပြောင်းအလဲတို့ ဖြစ်ပေါ်စေရန်မှာ တည်ငြိမ်မှုကို တန်ဖိုးထားသော စိတ်ဓာတ်၊ အများပြည်သူတို့ဘဝ အေးချမ်းသာယာစေလိုသော စိတ်ရင်းစေတနာကောင်း ထားရှိမှု၊ ကိုယ်ချင်းစာတရား ထားရှိမှုတို့နှင့် ပြည့်စုံကြလျှင် မြန်မာနိုင်ငံ၏ ဒီမိုကရေစီရှင်သန်ရေးနှင့် ဖွံ့ဖြိုးရေးလုပ်ငန်းစဉ်တို့သည် အချိန်တိုအတွင်း အောင်မြင်နိုင်မည်ဟူ၍ မြဝတီက သုံးသပ်ရပါသည်။ ။

Read 329 times Last modified on Friday, 20 April 2018 08:08