Print this page

စိုက်ပျိုးရေး ထုတ်ကုန်မြှင့်တင်ရေးနှင့် နည်းပညာ

Saturday, 05 August 2017 14:36 font size decrease font size decrease font size increase font size increase font size

မြန်မာနိုင်ငံ၏ အဓိကစီးပွားရေးသည်  စိုက်ပျိုးရေးလုပ်ငန်း ဖြစ်သည့်အားလျော်စွာ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနသည် စိုက်ပျိုးရေး ကုန်ထုတ်လုပ်ငန်းများ ဖွံ့ဖြိုးရေးအတွက်

ကမ္ဘာ့ဘဏ် အပါအဝင် နိုင်ငံတကာ အဖွဲ့အစည်းများနှင့် ပူးပေါင်းဆောင်ရွက်လျက် ရှိရာ ရှမ်းပြည်နယ်(တောင်ပိုင်း) အင်းလေးဒေသရှိ ကျွန်းမျောစိုက်ပျိုးရေး ပိုမိုဖြစ်ထွန်းအောင်မြင်ရေး အလုပ်ရုံဆွေးနွေးပွဲကို ယခုရက်သတ္တပတ် အတွင်း ညောင်ရွှေမြို့၌ ကျင်းပခဲ့သည်။ အင်းလေးဒေသ ကျွန်းမျောစိုက်ပျိုးရေး လုပ်ငန်းများ ပိုမိုဖြစ်ထွန်းအောင်မြင်ရေး လုပ်ငန်းစီမံချက်ကို ကမ္ဘာ့ဘဏ်အုပ်စုမှ အပြည်ပြည်ဆိုင်ရာ ဘဏ္ဍာရေး ကော်ပိုရေးရှင်း၊ ယူနိုက်တက်ကင်းဒမ်းမှ နိုင်ငံတကာဖွံ့ဖြိုးရေးဌာန၊ သြစတြေးလျနိုင်ငံ ကူးသန်းရောင်းဝယ်ရေးနှင့် ပြည်ပရေးရာဌာန၊ ဂျပန်နိုင်ငံ အစိုးရတို့က မြန်မာနိုင်ငံ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနနှင့် ပူးပေါင်းဆောင်ရွက် ကြမည်ဖြစ်သည်။

အလုပ်ရုံဆွေးနွေးပွဲ၌ သိပ္ပံနည်းကျစိုက်ပျိုးရေးနှင့် သက်ဆိုင်သော အကြောင်းအရာများ ဆွေးနွေးခဲ့ကြရာ ညောင်ရွှေမြို့နယ် အတွင်းမှ ခရမ်းချဉ်သီးစိုက်တောင်သူ ၂ဝဝ အပါအဝင် တောင်သူစုစုပေါင်း ၃ဝဝ တက်ရောက်ကြပြီး ကျွန်းမျောစိုက်ပျိုးရေး လုပ်ငန်းများ ဖွံ့ဖြိုးရေးအတွက် ဆောင်ရွက်ရမည့် လုပ်ငန်းနှင့် သီးနှံများစိုက်ပျိုးရာတွင် ဓာတုပစ္စည်း သုံးစွဲမှုလျှော့ချရေးတို့ကို ဆွေးနွေးကြသည်။ ဒေသခံတောင်သူများ အနေဖြင့် ပိုးသတ်ဆေး ကိုင်တွယ်အသုံးပြုသူ ကျန်းမာရေးအတွက် အန္တရာယ်မဖြစ်စေရန် ကာကွယ်အသုံးပြုနည်းနှင့် ရေထုမြေထုအပေါ် ဆိုးကျိုးသက်ရောက်မှု တို့ကို သတိမပြုမိကြသောကြောင့် ကျန်းမာရေး အတွက်သာမကဘဲ သီးနှံများနှင့် ငါးသတ္တဝါများ အတွက်ပါ အန္တရာယ်ဖြစ်နေရသည်။ ထို့ကြောင့် စိုက်ပျိုးရေး ဦးစီးဌာနက ဒေသခံ ခရမ်းချဉ်စိုက် တောင်သူများအား ဓာတုပစ္စည်းနှင့်ပိုးသတ်ဆေးများကို စနစ်တကျ ကိုင်တွယ်အသုံးပြုခြင်းအားဖြင့် စိုက်ပျိုးရေးလုပ်ငန်း၊ ငါးလုပ်ငန်းနှင့် ကမ္ဘာလှည့်ခရီးသွား လုပ်ငန်းတို့ကိုပါ အထောက်အကူဖြစ်စေကြောင်း အသိပညာပေးလျက် ရှိသည်။ အင်းလေးဒေသသို့ ၂ဝ၁၆ ခုနှစ်အတွင်း ပြည်တွင်းခရီးသွား လေးသိန်းနှင့် ပြည်ပခရီးသွား ၂၅၂ဝဝဝ ခန့် လာရောက်ခဲ့ကြသဖြင့် ဒေသခံပြည်သူများ အတွက် အလုပ်အကိုင် အခွင့်အလမ်းနှင့် ဝင်ငွေပိုမိုရရှိစေခဲ့ကြောင်း သိရသည်။

အလျဉ်းသင့်သဖြင့် လွန်ခဲ့သောဆယ်စုနှစ်အတွင်းက အစ္စရေးနိုင်ငံ၏ သဲကန္တာရအတွင်းမှ စိုက်ပျိုးမွေးမြူရေး လုပ်ငန်းများအကြောင်း ကြားဖူးသမျှတင်ပြလိုသည်။ အစ္စရေးနိုင်ငံ ဧရိယာ၏ ၅ဝ ရာခိုင်နှုန်းသည် သဲကန္တာရ ကုန်းမြေဖြစ်ပြီး ရာသီဥတု ဆိုးရွားသောကြောင့် စိုက်ပျိုးရေးအတွက် ရေအရင်းအမြစ် ရှားပါးသဖြင့် နိုင်ငံဧရိယာ၏ ၂ဝ ရာခိုင်နှုန်းသာလျှင် စိုက်ပျိုးရေး ဖြစ်ထွန်းနိုင်သည့် အနေအထားရှိသည်။ အစ္စရေးနိုင်ငံအတွင်း မိုးရွာသွန်းမှုမှာ နှစ်စဉ် စက်တင်ဘာမှ ဧပြီအထိ မိုးရွာသွန်းသော်လည်း တစ်ပြည်လုံးတွင် ရွာသွန်းခြင်းမဟုတ် သဖြင့် ရေမလုံလောက်မှုသည် နိုင်ငံအတွက် အဓိကပြဿနာဖြစ်သည်။ တစ်နှစ်ပတ်လုံး မိုးရွာသွန်းမှုမှာ မြောက်ပိုင်း၌ ၂၈ လက်မရရှိပြီး တောင်ပိုင်း၌ ၂ လက်မသာရရှိသည်။ တစ်နှစ်ပတ်လုံး ရေအရင်းအမြစ်များမှ ရေရရှိမှုမှာ ကုဗပေ ၅ ဒသမ ၆ ဘီလီယံရရှိသည့်

အနက် ၇၅ ရာခိုင်နှုန်းကို စိုက်ပျိုးရေးအတွက် အသုံးချသည်။ နေ့အပူချိန်နှင့် ညအပူချိန် ခြားနားချက် ၂ဝ ဒီဂရီစင်တီဂရိတ် ရှိသည်။

လိုလျှင်ကြံဆနည်းလမ်းရဟု ဆိုကြသည့်အတိုင်း ပီရူးနိုင်ငံမှ အလေ့ကျပေါက်သော ခရမ်းချဉ်သီးမျိုးကို အချိုသီးဖြစ်အောင် ၁၂ နှစ်ကြာ စမ်းသပ်စိုက်ပျိုးခဲ့ရာမှ ယနေ့စားသုံး သီးနှံအဖြစ် အောင်မြင်စွာ စိုက်ပျိုးနိုင်လျက်ရှိသည်။ နိုင်ငံတစ်ဝန်း စပျစ်ခြံများ စိုက်ပျိုး၍ စပျစ်ဝိုင်ချက်လုပ်ပြီး ကမ္ဘာ့ဈေးကွက်သို့ တင်ပို့သည်။ နိုင်လွန်ဝါ စိုက်ပျိုးရေးကို ကောင်းကင် ရေပိုက်လိုင်းမှ ရေပက်ဖျန်းသည့် စနစ်ဖြင့်စိုက်ပျိုးရာ စိုက်ပျိုးမြေ တစ်ဟက်တာမှ နိုင်လွန်ဝါ ၅ ဒသမ ၅ တန်ထွက်သဖြင့် ကမ္ဘာ့အမြင့်ဆုံး စံချိန်တင်အထွက်နှုန်းဖြစ်သည်။ ၂ဝဝ၆ ခုနှစ် စာရင်းများအရ အစ္စရေးနိုင်ငံ၏ စိုက်ပျိုးရေးထွက်ကုန်များမှ စားသုံးသီးနှံ ၃၃ ရာခိုင်နှုန်း၊ ပန်းမျိုးစုံ ၂၇ ရာခိုင်နှုန်း၊ သစ်သီးဝလံ ၁၅ ရာခိုင်နှုန်း၊ ရှောက်လိမ္မော် ၉ ရာခိုင်နှုန်းနှင့် အခြားသီးနှံ ၁၆ ရာခိုင်နှုန်းတို့ကို ပြည်ပသို့ တင်ပို့နိုင်ခဲ့ကြောင်း သိရသည်။

ရေချိုငါးမွေးမြူရေးလုပ်ငန်း ရှေ့ပြေးနည်းပညာကို နိုင်ငံတောင်ဘက်ပိုင်းမှ နီဂက်ဗ် သဲကန္တာရတွင်ရှိသော ကီဘတ်ဇင်မ်သဘာဝရေကန်နှင့် သီးခြားတူးဖော်ထားသော မွေးမြူရေးကန်တို့တွင် စမ်းသပ်အောင်မြင်နေကြောင်း သိရသည်။ မြေထဲပင်လယ် ကမ်းခြေတွင် ရေငန်ငါးဖမ်းလုပ်ငန်းနှင့် ကင်နာရက်ရေကန်တွင် ရေချိုငါးလုပ်ငန်း လုပ်ကိုင်ကြသည်။ ကင်နာရက်ရေကန်၌ ငွေငါးကြင်း၊ မြက်စားငါးကြင်း၊ ကျောက်ငါးကြင်း၊ ငါးကုန်ညိုနှင့် ကကတစ်၊ သြစတြေးလျ နိုင်ငံမှတစ်ဆင့် မျိုးပွားလာသော ပင်လယ်ငါးကြင်းတို့ကို မွေးမြူထုတ်လုပ်သည်။ ထို့ပြင် ဥရောပမှ ပင်လယ်ငါးမျိုးများနှင့် တောင်အမေရိကတိုက်မှ ငါးမျိုးများရှိကြပြီး ဂျော်ဒန်မြစ်အတွင်းသို့ စီးဝင်သော ဒန်းမြစ်အတွင်း၌ ရေချိုငါးသလောက်နှင့် ပင်လယ်ငါးသလောက်များ ရှိကြောင်း သိရသည်။

သို့ဖြစ်၍ ရေခံမြေခံကောင်းနှင့် သင့်တင့်သော လူဦးရေရှိသည့် မြန်မာနိုင်ငံအတွက် သမားရိုးကျစိုက်ပျိုးရေးမှ တိုးတက်လိုသည့် စိတ်ဓာတ်နှင့် ခေတ်မီစိုက်ပျိုးနည်းပညာ မြှင့်တင်ပေးလျှင် စိုက်ပျိုးရေး ကုန်ထုတ်လုပ်ငန်းများ ဖွံ့ဖြိုးရေး အရှိန်အဟုန်ဖြင့် တိုးတက်လာမည် ဖြစ်ကြောင်း မြဝတီက သုံးသပ်ရပါသည်။  

Read 782 times Last modified on Friday, 18 August 2017 11:44