SJ WorldNews - шаблон joomla Авто

ရေထုနှင့်လေထုအတွင်းရှိ အမှုန်အမွှားလေးများ

Sunday, 10 September 2017 16:57 font size decrease font size decrease font size increase font size increase font size

မြန်မာတို့ဆိုရိုးစကားတစ်ခုမှာ ရေအသက်တစ်မနက်ဟုဆိုထားသည့်အားလျော်စွာလူတို့နေ့စဉ် အသက်ရှင်ရပ်တည်ရေးအတွက် ရေသည်မရှိမဖြစ် လိုအပ်ချက်ဖြစ်ကြောင်း လူတိုင်းသိကြသော်ငြား နေ့စဉ်သောက်သုံးနေကြသောရေတွင်ကျန်းမာရေးအတွက် ကောင်းကျိုး ဆိုး ပြစ်ဖြစ် စေနိုင်သည့် ဓာတ်ပစ္စည်းများ မည်မျှပါဝင်ကြသည်ကိုကား သတိမပြုမိသူကများသည်။

သုတေသီများ၏တွေ့ရှိချက်အရ ကမ္ဘာ့နိုင်ငံများ၌ သုံးစွဲနေကြသောဘုံပိုင်ရေများမှ၈ဝ ရာခိုင်နှုန်းတွင် ပလတ်စတစ်အမှုန်အမွှားလေးများပါဝင်လျက်ရှိကြောင်း သိရသည်။သုံးစွဲနေကြသည့်ရေထဲ၌ ပလတ်စတစ်အမှုန်အမွှားအနည်းဆုံးပါရှိပါသည်ဆိုသောပြင်သစ်၊ ဂျာမနီ၊ ဗြိတိန် နိုင်ငံတို့၌ ၇၂ ရာခိုင်နှုန်းအသီးသီးတွေ့ရပြီး အမေရိကန်ပြည်ထောင်စု၌ ၉၃ ရာခိုင်နှုန်း၊ ၄င်း၏နောက်၌ လက်ဘနွမ်နှင့် အိန္ဒိယတို့ဖြစ်သည်။ မီနီဆိုတာတက္ကသိုလ်မှ သိပ္ပံပညာရှင် များသည် ယူဂန္ဓာ၊ အီကွေဒေါနှင့် အင်ဒိုနီးရှားနိုင်ငံတို့အပါအဝင်နိုင်ငံပေါင်း ၁၅၉ နိုင်ငံမှ ရေနမူနာ ၈၃ ရာခိုင်နှုန်းကို စမ်းသပ်လေ့လာခဲ့ကြရာ ရေထဲ၌ပါဝင်သော အရွယ်အစားအားဖြင့် ၅ မီလီမီတာထက် သေးငယ်သည့်  ပလတ်စတစ်အမှုန်အမွှားများသည် လူ၏ခန္ဓာကိုယ်တွင် ရှိသော ဆဲလ်များနှင့်ခန္ဓာကိုယ်အစိတ်အပိုင်းများ အတွင်းသို့ ထိုးဖောက်ဝင်ရောက် သွားနိုင် ကြောင်း ဂါဒီယန်သတင်းစာ၌ ဖော်ပြသတိပေးထားကြသည်။

အိုင်ယာလန်နိုင်ငံ၌သုံးစွဲသော ဘုံပိုင်ရေထဲတွင် ပလတ်စတစ်အမှုန်အမွှားပါဝင်မှုကို ဂဲလ်ဝေးမေယို နည်းပညာတက္ကသိုလ်မှ သုတေသီတစ်ဦးက လေ့လာခဲ့ဖူးရာမှ တွေ့ရှိချက်မှာ အဆိပ်ဖြစ်စေတတ်သောဓာတ်များကို ပလတ်စတစ်အမှုန်အမွှားလေးများက စုပ်ယူထားကြ သဖြင့် ၄င်းရေကိုသုံးစွဲကြသူများ၏ အူအတွင်းသို့ရောက်သွားကြောင်း တွေ့ရသည်ဟုဆိုသည်။ အခြားလေ့လာတွေ့ရှိချက်တစ်ခုမှာ လေထုအတွင်း၌လည်း ပလတ်စတစ်အမှုန်အမွှားလေးပါဝင်မှုကြောင့် လူတို့၏ကျန်းမာရေးအတွက် မည်သို့ဆိုးကျိုးဖြစ်မည်ကို မပြော နိုင် သေးသော်လည်း အမြန်လေ့လာဖော်ထုတ်၍ လူများကိုလည်း ကြိုတင်သတိပေးထား သင့်ကြောင်း အကြံပြုထားသည်။ လန်ဒန်မြို့၌ရှိသော ဘုရင့်ကောလိပ်မှပါမောက္ခတစ်ဦးက လူတို့ရှူရှိုက်သည့်လေထဲ၌ပါလာသော ဓာတ်များသည် အဆုတ်မှတစ်ဆင့်ခန္ဓာကိုယ်အတွင်း ပျံ့နှံ့သွားနိုင်သဖြင့် ဖြစ်ပေါ်လာမည့်ကျန်းမာရေးအန္တရာယ်ကို လောလောဆယ်ပြောရန် ခက်ခဲကြောင်း သိရသည်။

ရေဘုံပိုင်အတွင်း ပလတ်စတစ်အမှုန်အမွှားလေးများ ရောက်လာနိုင်သည့်အခြေအနေမှာ အဝတ်အထည်များကိုလျှော်ဖွပ်ရာမှတစ်ဆင့် ရောက်လာနိုင်သည်။ အဝတ်အထည်များကို လေပူဖြင့်ခြောက်စေသောကိရိယာများမှထုတ်လွှတ်သောအခိုးအငွေ့များအတွင်းပါဝင်သည့်အ မှုန်အမွှားလေးများက လေထုအတွင်းလွင့်ပါသွားသည်။ အဝတ်အထည်များလျှော်ဖွပ်ခြင်း နှင့် အခြောက်ခံခြင်းတို့ကြောင့် နေ့စဉ်ထွက်လာသော ပလတ်စတစ်အမှုန်အမွှားလေးများ၏ အရေ အတွက်သည် ၇ဝဝဝဝဝ ခန့်ရှိကြောင်း သုတေသီများ၏ ယခင်တွေ့ရှိချက်အရ သိရသည်။ ရေထုအတွင်း၌ပါဝင်သည့် ပလတ်စတစ်အမှုန်အမွှားအရွယ်အစားအမျိုးမျိုးရှိနေခြင်းကြောင့် ယခုလက်ရှိအသုံးပြုနေကြသော ရေပေးဝေရေးစနစ်များက ရေထုညစ်ညမ်းမှုကာကွယ်ရန် စစ်ထုတ်နိုင်သည့်အခြေအနေမရှိသေးကြောင်း မီနီဆိုတာ တက္ကသိုလ် မှသိပ္ပံပညာရှင်များက လေ့ လာတွေ့ရှိထားကြသည်။

အမေရိကန်ပြည်ထောင်စု ကာလီဖိုးနီးယားတက္ကသိုလ် စက်မှုဂေဟဗေဒဌာနမှ တွဲဖက်ပါမောက္ခတစ်ဦးက မိမိတို့အနေဖြင့် ပလတ်စတစ်ကြောင့် ဂေဟစနစ်များထိခိုက်မှုကို စိုးရိမ်မိကြောင်းနှင့် ဆိုးကျိုးသက်ရောက်မှုများအား လေ့လာဖော်ထုတ်နိုင်သည့်တိုင်အောင် ယခု အချိန်သည် အခါနှောင်းနေပြီဟုထင်မိကြောင်း ပြောကြားသည်။ အခြားပညာရှင်တစ်ဦးက ပလတ်စတစ်ကြောင့်ရေထုညစ်ညမ်းမှုမှတစ်ဆင့် လူတို့ကျန်းမာရေးအတွက်မည်သို့ ထိခိုက် နိုင်သည်ကိုဖော်ထုတ်ရန် သုတေသနလုပ်ငန်းပိုမိုလုပ်ဆောင်ရန် လိုအပ်သည်။ သုတေသန လုပ်ငန်းလုပ်ဆောင်နေစဉ်အတွင်း ပြည်သူများအနေဖြင့် ပလတ်စတစ်ပစ္စည်းများ ထုတ်လုပ်သုံးစွဲကြရာတွင် အန္တရာယ်မရှိစေရန် မည်သို့စီမံကြမည်ဟူသော အသိတရားရှိကြ ရမည်ဖြစ်ကြောင်း အကြံပြုပြောကြားသည်။

နည်းပညာထွန်းကားသောနိုင်ငံများမှ ပြည်သူများသည် သောက်သုံးရေရရှိစေရန် နည်းလမ်း မျိုးစုံဖန်တီးကြသည့်တိုင်အောင် ပလတ်စတစ်အမှုန်အမွှားလေးကို ရာခိုင်နှုန်းပြည့် စစ်မထုတ် နိုင်သေးသဖြင့် ကျန်းမာရေးအတွက် စိုးရိမ်မှုရှိနေသေးကြောင်း ပညာရှင်များ၏လေ့လာ ဆန်းစစ်မှုများတွင် ဖော်ပြထားကြသည်။ မြန်မာပြည်သူတို့သည် ဆည် မြောင်းချောင်း ကန်များမှရေကို အဓိကအားထားသုံးစွဲကြသူက အများစုဖြစ်သည်။ ရေသိုလှောင်သော ဆည်မြောင်းချောင်းကန်များသည် အကာအကွယ်အဖုံးအအုပ်မရှိသော လေဟာနယ်၌သာ တည်ရှိကြလေရာ ပလတ်စတစ်အမှုန်အမွှားလေးများအပါအဝင် ကျန်းမာရေးကို ထိခိုက်စေ သော မမြင်နိုင်သည့်အခြားဓာတ်ပစ္စည်းများက ရေတွင်ပါဝင်နိုင်ခြေရှိခြင်းကြောင့် ရေကိုကျို ချက်အအေးခံသောက်သုံးသင့်ကြောင်း မြဝတီကတိုက်တွန်းနှိုးဆော်လိုက်ရပါသည်။ ။

Read 711 times Last modified on Sunday, 10 September 2017 17:08