Print this page

တစ်ဦးမေတ္တာ တစ်ဦးမှာ ရှည်ကြာခိုင်မြဲ ကြစေကြောင်း

Monday, 07 August 2017 08:52 font size decrease font size decrease font size increase font size increase font size

မြန်မာသက္ကရာဇ် ၁၃၇၉ ခုနှစ် ဝါခေါင်လပြည့် ယနေ့သည် ဂေါတမမြတ်စွာဘုရားက ရဟန်း ၅ဝဝ ကို အကြောင်းပြု၍ မေတ္တသုတ္တန် ဟောကြားတော်မူခဲ့သော မေတ္တာအခါတော်နေ့ဖြစ်သည်။

ဂေါတမမြတ်စွာဘုရား ဟောကြားတော်မူခဲ့သော မေတ္တသုတ္တန် ဒေသနာတော် အပိုဒ်(၃) ကရဏီယမတ္ထ ကုသလေနမှစ၍ အပိုဒ်(၄) အပ္ပဂဗ္ဘောကုလေသွနနုဂိဒ္ဓေါ အဆုံးအထိသည် ငြိမ်သက်အေးချမ်းသော နိဗ္ဗာန်ကို ဖောက်ထွင်းသိမြင်၍ နေလိုသော အကျိုးစီးပွား၌   လိမ္မာသူသည်ပြုကျင့်ရမည့် သိက္ခာသုံးပါးအကျင့်များကို ပြုကျင့်ရမည်။ ထိုသူကား စွမ်းဆောင်နိုင်ရမည်။ ဖြောင့်မတ်ရမည်။ အလွန်ဖြောင့်မတ်ရမည်။ ဆိုဆုံးမလွယ်ရမည်။ နူးညံ့ပျော့ပျောင်းရမည်။ မာနမကြီးရ။ ရောင့်ရဲလွယ်ရမည်။ အမွေးအမြူလွယ်သူဖြစ်ရမည်။ ကိစ္စနည်းပါးရမည်။ ပေါ့ပါးသောအဖြစ်မျိုး ရှိရမည်။ ငြိမ်သက်သော ဣနြေ္ဒရှိရမည်။ ရင့်ကျက်သော ပညာရှိရမည်။ မကြမ်းတမ်းမရိုင်းပျ ယဉ်ကျေးသူဖြစ်ရမည်။ လူတို့၌ တွယ်တာမက်မောခြင်း မရှိသူဖြစ်ရမည်တည်း ဟူသော အဓိပ္ပာယ်တို့ကို ဆောင်သည်။

သိက္ခာသုံးပါး အကျင့်တရားဟူသည်မှာ သီလသိက္ခာပုဒ်ကို စောင့်ထိန်းခြင်း၊ သမာဓိရအောင် အားထုတ်ခြင်းနှင့် ဝိပဿနာပညာပွားခြင်း (အဓိသီလသိက္ခာ၊ အဓိစိတ္တသိက္ခာ၊ အဓိပညာသိက္ခာ) တို့ဖြစ်သည်။ လောက၌ သီလနှင့်လည်း ပြည့်စုံဉာဏ်အမြင်နှင့်လည်း ပြည့်စုံ၍ တရား၌တည်ကာ အမှန်တရားကိုလည်း သိတတ်သော မိမိပြုဖွယ် အမှုကိစ္စကိုလည်း ပြုတတ်သူကို လူအပေါင်းတို့ ချစ်ခင်မြတ်နိုး၏ဟူ၍ ခုဒ္ဒကနိကာယ်၊ ဓမ္မပဒတရားတော် -၂၁၇ ၌ညွှန်ပြထားသည်။

အရာခပ်သိမ်းတို့သည် အကြောင်းတရားကို အခြေခံ၍  အကျိုးတရားဖြစ်ရသည်။ ထို့ကြောင့် ဖြစ်စဉ်ဖြစ်ရပ် အကြောင်းအရာတစ်ခုကို စဉ်းစားဆုံးဖြတ်ရာတွင်  လူကိုအခြေမခံဘဲ အကြောင်းတရားကို အခြေခံစဉ်းစား ဆုံးဖြတ်ခြင်းသည် အဂတိတရားကင်းသော သမာဓိဖြစ်သည်။ ဖြစ်စဉ်ဖြစ်ရပ်မှန်ကို အခြေခံ၍ မည်သို့ဖြေရှင်း ဆောင်ရွက်ရမည်ကို အကြောင်းအကျိုး ဆီလျော်သော နည်းလမ်းမှန်ရွေးချယ်ခြင်းသည် ပညာဖြစ်သည်။

ဖြစ်စဉ်ဖြစ်ရပ်မှန်ကို အခြေခံ၍ အကြောင်းအကျိုး ဆီလျော်သော နည်းလမ်းမှန်ကို တရားဓမ္မနှင့်အညီ ဥပဒေ စည်းမျဉ်းစည်းကမ်း ကျင့်ဝတ်များနှင့်အညီဖြစ်အောင် ရွေးချယ်ခြင်းသည် သီလဖြစ်သည်။ ထို့ကြောင့် သူတော်ကောင်းတို့အတွက် အကျင့်သုံးပါးဟူသည် သီလ၊ သမာဓိ၊ ပညာပင်ဖြစ်သည်။ မိမိထံရောက်လာသော အမှုကိုမိမိအလိုကျ ဆုံးဖြတ်သောသူသည် တရား၌တည်သူမဟုတ်၊ ပညာရှိဆိုသူသည် အဖြစ်မှန်ကိုလည်းကောင်း၊ အဖြစ်မှားကိုလည်းကောင်း နှစ်ပါးစုံကို လေ့လာသင့်သည်ဟု ဓမ္မပဒ၊ ဓမ္မဝဂ်-၂၅၆၌ ဖော်ပြထားသည်မှာ ဂေါတမမြတ်စွာဘုရား ဟောကြားတော်မူသော မေတ္တသုတ္တန်မှ သိက္ခာသုံးပါး အကျင့်တရားကို လိုက်နာပွားများကြရန် နည်းလမ်းမှန်ကို ညွှန်ပြထားခြင်းဖြစ်သည်။

အဂတိတရားလေးပါးဟူသည် ချစ်ခင်သဖြင့် တစ်ဖက်သတ်စီရင်ခြင်း၊ အမျက်ဒေါသကြောင့် တစ်ဖက်သတ် စီရင်ခြင်း၊ ကြောက်ရွံ့သဖြင့် တစ်ဖက်သတ်စီရင်ခြင်း၊ တွေဝေ၍ တစ်ဖက်သတ်စီရင်ခြင်း (ဆန္ဒာဂတိ၊ ဒေါသာဂတိ၊ ဘယာဂတိ၊ မောဟာဂတိ)တို့ဖြစ်သည်။ ချစ်ခြင်း၊ မုန်းခြင်း၊ ကြောက်ရွံ့တွေဝေခြင်းတို့သည် ပုထုဇဉ်တို့ သဘာဝဖြစ်တတ်ကြသည် မှန်သော်ငြား  သူ့နေရာတွင်  မိမိကိုယ်တိုင်ဖြစ်ခဲ့သော် မည်သို့ ခံစားရလေမည်နည်း ဆိုသော ကိုယ်ချင်းစာတရားရှိကြမှသာ အဂတိတရားလေးပါးကို ရှောင်ကြဉ်နိုင်ကြမည်ဖြစ်သည်။ မေတ္တာသည် ရန်ကင်းငြိမ်းကြောင်း အင်္ဂုတ္တိုရ်ပါဠိတော်၌ ဖော်ပြထားသည်မှာ အကြင်သူသည် သတ္တဝါအားလုံးတို့အပေါ်၌ မေတ္တာစိတ်အဖို့အစုရှိသည်ဖြစ်၍  တစ်စုံတစ်ယောက်ကိုမျှ မိမိကိုယ်တိုင်လည်း မညှဉ်းဆဲ၊ သူတစ်ပါးကိုလည်း မသတ်ဖြတ်စေ၊ မိမိကိုယ်တိုင်လည်း အနိုင်မယူ၊ သူတစ်ပါးတို့ကိုလည်း အနိုင်မကျင့်စေ၊ ထိုမေတ္တာပွားသူအား တစ်စုံတစ်ခုသော အတွင်းရန်၊ အပြင်ရန်ဟူ၍ မရှိနိုင်ဟုဖော်ပြထားသည်ကို ဗုဒ္ဓဘာသာဝင် သူတော်စင်အပေါင်းတို့မှတ်သားကြပြီး ဖြစ်သည်။

ပုထုဇဉ်လူသားတို့သည် မိမိစီးပွားတိုးတက်အောင် မေတ္တာနှင့်ယှဉ်၍ အားထုတ်ကြရာ၌ သူတစ်ပါး၏ အကျိုးစီးပွားအတွက် မိမိအကျိုးစီးပွား ဆုတ်ယုတ်အောင် မပြုသင့်ပေ။ မိမိသည်သာ အားကိုးရာဖြစ်၍ အများ၏ အကျိုးစီးပွားနှင့် မိမိ၏အကျိုးစီးပွား ကြုံဆုံပေါ်ပေါက်လာသောအခါ မိမိစီးပွားဆုတ်ယုတ်မခံဘဲ အားထုတ်သင့်ကြောင်း ဓမ္မပဒ၌ ညွှန်ပြထားသည်မှာ အစွဲကင်း၍ အဂတိတရားလေးပါး ရှောင်ကြဉ်ခြင်းဖြင့်  မိမိစီးပွား ဆုတ်ယုတ်မခံဘဲ အားထုတ်ရန်သင့်သည်ဟု ညွှန်ပြထားခြင်းဖြစ်သည်။

စံကင်းဆရာတော်ကြီး၏ ဆုံးမစာ၌  မိတ်ဆွေချင်းသာ ပေါင်းသင်းရာ မေတ္တာအမြတ်ဆုံးဟု ဆိုထားသည်။

မိတ်ဆွေဆိုသည်မှာ မိမိအားကျေးဇူးပြုဖူးသူ၊ ချမ်းသာဆင်းရဲအတူဖြစ်သူ၊ အကျိုးစီးပွားကို ညွှန်ပြတတ်သော ဆရာနှင့်တူသူ၊ ညှာညှာတာတာ စောင့်ရှောက်တတ်သူတို့ကိုသာ မိတ်ဆွေစစ် သတ်မှတ်ပေါင်း သင်းရန်ဖြစ်သည်။

လူတို့၌ တွယ်တာမက်မောခြင်း မရှိသူဖြစ်ရမည်ဟု  မေတ္တသုတ္တန်၌ မြတ်ဗုဒ္ဓ ဟောမိန့်ထားခြင်းကြောင့် မေတ္တာတရားသည် လူတစ်ဦးတစ်ယောက် အတွက်သာ မဟုတ်ဘဲ ဝေနေယျသတ္တဝါ အားလုံးတုိ့အပေါ် ထားရှိရမည်ဖြစ်သည်။ လူတို့စိတ်၌ ဖြစ်ပေါ်တတ်သော ချစ်ခြင်း၊ မုန်းခြင်းတို့သည် လူပုဂ္ဂိုလ်တစ်ဦး တစ်ယောက်ကို အကြောင်းပြု၍ အားလုံးအပေါ်ချစ်ခြင်း၊ မုန်းခြင်းစိတ်ထားခြင်းကို သူတော်ကောင်းတို့ မနှစ်မြို့ကြပေ။

သို့ဖြစ်၍ မြန်မာပြည်သူ အပေါင်းတို့သည် တစ်ဦးအပေါ်တစ်ဦး ထားအပ်သောရှိရင်းစွဲ မေတ္တာတရားကို ဝါခေါင်လပြည့် မေတ္တာအခါတော်နေ့မှစ၍ ဆတက်ထမ်းပိုးတိုးကာ မေတ္တာပန်းခိုင် ကိုယ်စီကိုင်လျက် ဘဝတစ်သက်တာ ပျော်ရွှင်စရာ နေ့ရက်များကိုသာ ပိုင်ဆိုင်နိုင်ကြပါစေကြောင်း မြဝတီက ဆုတောင်းမေတ္တာ ပို့သလိုက်ပါသည်။    

Read 787 times Last modified on Friday, 18 August 2017 11:43