Print this page

တုပ်ကွေးရောဂါ ကာကွယ်ပေး ပြည်သူ့ကျန်းမာရေး

Wednesday, 19 June 2019 09:23 font size decrease font size decrease font size increase font size increase font size

မုတ်သုံမိုးဖြိုင်ဖြိုင်ရွာသည်နှင့်  မိုးတွင်းကာလ အဖြစ်များသော ရာသီတုပ်ကွေးနှင့် သွေးလွန်တုပ်ကွေးရောဂါ မဖြစ်ပွားစေရန် ကြိုတင်ကာကွယ်ရေး လုပ်ငန်းများ ဆောင်ရွက်နေကြသည့် သတင်းကို ကြားသိနေရသည်။

သွေးလွန်တုပ်ကွေးရောဂါသည် ၁၉၇ဝ ပြည့်နှစ်ဝန်းကျင်ခန့်တွင် မြန်မာနိုင်ငံသို့ ရောက်ရှိလာပြီး ၁၉၉ဝ ပြည့်နှစ်နောက်ပိုင်းတွင် တစ်နှစ်လုံးဖြစ်ပွားသော ရောဂါအဖြစ်သို့ ရောက်ရှိလာကာ အပူပိုင်းနှင့် စွတ်စိုထိုင်းမှိုင်းသော ဒေသများ၌ မိုးတွင်းကာလအတွင်း ပို၍အဖြစ်များကြောင်း ကျန်းမာရေး ပညာရှင်များက သတိပေးထားကြသည်။ သွေးလွန်တုပ်ကွေးဖြစ်စေသော အကြောင်းရင်းမှာ ခြင်ကျားက သယ်ဆောင်လာသော ဗိုင်းရပ်စ်ပိုးကြောင့်ဖြစ်ပြီး ယခုကဲ့သို့ မိုးတွင်းကာလတွင် ခြင်ကျားပေါက်ပွားမှု ပိုမိုများပြားသည်။ လူကိုကိုက်သော ခြင်ကျားသည် အမကသာနေ့အချိန်၌ ကိုက်သော်လည်း အထီးက မကိုက်ကြောင်း သိရသည်။ သွေးလွန်တုပ်ကွေး အဖြစ်များသော အသက်အရွယ်မှာ ငါးနှစ်မှကိုးနှစ်ကြားဖြစ်၍ နေ့လယ်ပိုင်းတွင် ခြင်ကိုက်သဖြင့် ကျောင်းတက်နေသော ကလေးများအတွက် ခြင်မကိုက်အောင် ကြိုတင်ကာကွယ်ရေးကို ဦးစားပေး ဆောင်ရွက်ရခြင်းဖြစ်သည်။ လူနေအိမ် များတွင်လည်း အလင်းရောင်ရအောင် ဖန်တီးခြင်းနှင့် ခြင်အောင်းနိုင်သည့် နေရာများကို ရှင်းလင်းပေးရန် လိုသည်။ သွေးလွန်တုပ်ကွေး ဖြစ်စေသော အေးဒီးစ်ခြင်သည် ကိုက် ၁ဝဝ အထိပျံနိုင်သဖြင့် ခြင်ဆေးမှုတ်လျှင် အိမ်ပတ်လည်ကိုက် ၁ဝဝ အထိ မှုတ်ရန်ဖြစ်သည်။ ခြင်၏ သက်တမ်းသည် ၁၄ ရက်အသက်ရှင်နိုင်ပြီး ခြင်မကဥသော အရေအတွက်မှာ ဥနှစ်ထောင်ခန့်ရှိရာ ခြင်မကို ဆေးမှုတ်နှိမ်နင်းလိုက်ခြင်းဖြင့် ပေါက်ပွားမှု မရှိစေရန် ကာကွယ်ပြီးဖြစ်သွားသည်။ ခြင်မ ဥမဥနိုင်ရန် အိမ်တိုင်းတတ်နိုင်သော ကာကွယ်နည်းမှာ ပတ်ဝန်းကျင် သန့်ရှင်းရေး ရှိစေခြင်းနှင့် ဖုံးသွန်လဲစစ်ကို ပုံမှန်ပြုလုပ် ပေးကြရန်ဖြစ်သည်။

အရှေ့တောင်အာရှနိုင်ငံများ၌ အလွန်သန့်ရှင်း ပါသည်ဆိုသော စင်ကာပူနိုင်ငံမှာပင် သွေးလွန်တုပ်ကွေးဖြစ်သဖြင့် လိုက်လံစစ်ဆေးကြရာ လူနေအိမ် ရေတံလျှောက်များ၌ တင်နေသော ရေထဲတွင် ခြင်ပေါက်ပွားခြင်းကြောင့် ဖြစ်ကြောင်း သိရသည်။  ခြင်ပေါက်ပွားမှု မရှိစေရန် ကာကွယ်နည်းတစ်နည်းမှာ ပိုးလောက်လမ်းကို စားသောငါးအား ရေကန်တွင် ထည့်မွေးရန်ဖြစ်သည်။  ကမ္ဘာ့ကျန်းမာရေးအဖွဲ့က တိုက်တွန်းထားချက်အရ ရေတွင်အဘိတ်ဆေး ထည့်ရာ၌ သုံးရေမှာသာ ထည့်သင့်ပြီး သောက်ရေတွင် မထည့်ရန် တားမြစ်ထားသည်။ မူလတန်းကျောင်းသားအရွယ် ကလေးငယ်များတွင် အဖြစ်များသော ရာသီတုပ်ကွေးနှင့် သွေးလွန်တုပ်ကွေးရောဂါ ကြိုတင်ကာကွယ်မှု အနေဖြင့် ကျောင်းများ မဖွင့်မီကပင် ကျောင်းတွင်း၊ ကျောင်းပြင်သန့်ရှင်းရေးအတွက်  အမှိုက်များ ရှင်းလင်းခြင်း၊ ချုံနွယ်မြက်ပင် ပေါင်းပင်များ ခုတ်ထွင်ရှင်းလင်းခြင်း၊ ရေစီးရေလာ ကောင်းမွန်စေရန် ရေနုတ်မြောင်းများ တူးဖော်ခြင်း၊  ချိုင့်ခွက်များအား မြေဖို့ခြင်းတို့ကို  တိုင်းစစ်ဌာနချုပ်နယ်မြေ အလိုက် နယ်မြေခံ တပ်မတော်သားများက ဆောင်ရွက်ပေးကြသည်။ ဇွန် ၃ ရက်တွင် အခြေခံပညာကျောင်းများ စတင်ဖွင့်လှစ်ချိန်မှစ၍ ကျောင်းတွင်း၊ ကျောင်းပြင် သန့်ရှင်းရေး ဆောင်ရွက်ပေးခြင်းနှင့် ကျောင်းကျန်းမာရေး စောင့်ရှောက်မှု လုပ်ငန်းတို့ ဆောင်ရွက်ပေးနေကြသည်။

သွေးလွန်တုပ်ကွေးသည် အသက်အရွယ်မရွေး ဖြစ်တတ်သော ရောဂါဖြစ်သဖြင့် ရဟန်းသံဃာများ သီတင်းသုံးရာ ကျောင်းများ၌ ကြိုတင်ကာကွယ်ရေး အထောက်အကူဖြစ်စေရန် တပ်မတော်သားများက ဆောင် ရွက်ပေးနေကြ သည်။ ရန်ကုန်တိုင်း ဒေသကြီး မှော်ဘီမြို့နယ် အောက်ဝါးနက်ချောင်းကျေးရွာရှိ ဓမ္မဒူတဇေတဝန်တောရ ဆေကိန္ဒာရာမကျောင်းတိုက် ပတ်ဝန်းကျင် သန့်ရှင်းသာယာမှု ရှိစေရေးအတွက် ဇွန် ၅ ရက် နံနက်ပိုင်းတွင် ရန်ကုန်တိုင်း စစ်ဌာနချုပ် မှော်ဘီတပ်နယ်မှ တပ်မတော်သားများက  ကျောင်းတိုက်အတွင်း၊ အပြင်ရှိ ချုံနွယ်ပေါင်းမြက်များ ခုတ်ထွင်ရှင်းလင်းခြင်း၊ အမှိုက်များ ရှင်းလင်းခြင်းနှင့် သန့်ရှင်းရေး ပြုလုပ်ခြင်းတို့ကို  စုပေါင်းဆောင်ရွက် ပေးခဲ့ကြသည်။ အလားတူ နေပြည်တော် ကောင်စီနယ်မြေ ဒက္ခိဏသီရိမြို့နယ်ရှိ ကရုဏာကမ္ဘာ ဘိုးဘွားရိပ်သာ ပရိဝုဏ်သန့်ရှင်းသာယာစေရေးအတွက် နေပြည်တော်တိုင်း စစ်ဌာနချုပ် ကွပ်ကဲမှုအောက်ရှိ တပ်မတော်သားများက ဇွန် ၁ ရက်တွင် ဆောင်ရွက်ပေးခဲ့ကြသည်။

သို့ဖြစ်၍ ကြိုတင်ကာကွယ်ခြင်းသည် ကုသခြင်းထက် ထိရောက်သည်ဟူသော ဆိုရိုးစကားနှင့်အညီ မိုးတွင်းကာလ အဖြစ်များသော ရာသီတုပ်ကွေး ရောဂါနှင့် သွေးလွန်တုပ်ကွေး ရောဂါမဖြစ်ပွားရေး  အလေးထား ကာကွယ်ကြ ပါရန်  မြဝတီက  တိုက်တွန်း နှိုးဆော်လိုက်ရပါသည်။     

 

Read 71 times Last modified on Wednesday, 19 June 2019 09:25