SJ WorldNews - шаблон joomla Авто

တူညီအနာဂတ်ဖော်ဆောင်ဖို့

Tuesday, 24 September 2019 08:56 font size decrease font size decrease font size increase font size increase font size

ပြည်ထောင်စုသမ္မတမြန်မာနိုင်ငံတော် ဒုတိယသမ္မတ ဦးမြင့်ဆွေသည် တရုတ်ပြည်သူ့သမ္မတနိုင်ငံ နန်နင်း အပြည်ပြည်ဆိုင်ရာ ကွန်ဗင်းရှင်းဗဟိုဌာန၌ စက်တင်ဘာ ၂၁ ရက် နံနက်ပိုင်းကကျင်းပသော (၁၆)ကြိမ်မြောက် တရုတ်-အာဆီယံ ကုန်စည်ပြပွဲနှင့်(၁၆)ကြိမ်မြောက်  တရုတ်-အာဆီယံ စီးပွားရေးနှင့်ရင်းနှီးမြှုပ်နှံမှု ထိပ်သီး အစည်းအဝေး ဖွင့်ပွဲအခမ်းအနားသို့ တက်ရောက်မိန့်ခွန်းပြောကြားသည်။

ဒုတိယသမ္မတကမိန့်ခွန်းပြောကြားရာတွင် (၁၆)ကြိမ်မြောက် တရုတ်-အာဆီယံကုန်စည်ပြပွဲအတွက် ''တူညီအနာဂတ် ဖော်ဆောင်ဖို့ ရပ်ဝန်းနဲ့ပိုးလမ်းမလမ်းကြောင်း ထူထောင်စို့''ဆောင်ပုဒ်ကို ရွေးချယ်သတ်မှတ်ခြင်းသည် အချိန်ကိုက်ဖြစ်ပြီး လျော်ကန်သင့်မြတ်မှု ရှိကြောင်း၊ တရုတ်ပြည်သူ့သမ္မတနိုင်ငံ၏ ရပ်ဝန်းနှင့် ပိုးလမ်းမစီမံကိန်းသည် ကုန်သွယ်မှု မြှင့်တင်ရန်နှင့် ဒေသတွင်းနိုင်ငံများအကြား ထိတွေ့ဆက်ဆံမှုတိုးမြှင့်ရန်တို့အတွက် အခွင့်အလမ်းကောင်းများကို ဖော်ဆောင်ပေးမည့် ကောင်းမွန်သည့်အခြေခံအဆောက်အဦနှင့် အုပ်ချုပ်မှုပိုင်းဆိုင်ရာ အထောက်အပံ့များကို ဖြည့်ဆည်းပေးနိုင်မည်ဟု ယုံကြည်ကြောင်း၊ မြန်မာနိုင်ငံအနေဖြင့် ''မြန်မာ-တရုတ်စီးပွားရေး စင်္ကြံ''၊ ''မြန်မာ-တရုတ်နှစ်နိုင်ငံနယ်စပ် စီးပွားရေး ပူးပေါင်းဆောင်ရွက်မှုဇုန်''၊ ''ကျောက်ဖြူရေနက်ဆိပ်ကမ်းနှင့် အထူးစီးပွားရေးဇုန်''၊ ''မဲခေါင်-လန်ချန်းပူးပေါင်းဆောင်ရွက်ရေးအစီအစဉ်''များကို တရုတ်ပြည်သူ့သမ္မတနိုင်ငံနှင့် အတူတကွဆောင်ရွက်လျက်ရှိကြောင်း၊ မိမိတို့အနေဖြင့် အာဆီယံ၏ ''ပေါင်းစည်းဆက်သွယ်မှုမဟာစီမံကိန်း ၂ဝ၂၅''နှင့် တရုတ်ပြည်သူ့သမ္မတနိုင်ငံ၏ ''ရပ်ဝန်းနဲ့ပိုးလမ်းမစီမံကိန်း''တို့၏ ဦးစားပေးလုပ်ငန်းများအကြား ဟန်ချက်ညီပြီး သဟဇာတ ဖြစ်စေရန်အတွက် ပူးပေါင်းဆောင်ရွက်မှု တိုးမြှင့်နိုင်မည့် နည်းလမ်းများကို ရှာဖွေဖော်ထုတ်သွားရန် လိုအပ်ကြောင်း တိုက်တွန်းပြောကြားသည်။

ပိုးလမ်းမဟူသည် လွန်ခဲ့သော နှစ်ပေါင်းနှစ်ထောင်ကျော်က ယူရေးရှားမှ ပြည်သူများက အာရှ၊ ဥရောပနှင့် အာဖရိကရှိ ယဉ်ကျေးမှုများကို ဆက်သွယ်ချိတ်ဆက်ပေးမည့် လမ်းကြောင်းကို ရှာဖွေပြီး ကုန်သွယ်မှုနှင့် ယဉ်ကျေးမှု ဖလှယ်ခဲ့ကြသည်။ ထိုလမ်းကြောင်းကိုပင် နှောင်းလူတို့က ပိုးလမ်းမကြီးဟု ခေါ်ကြခြင်း ဖြစ်သည်။

ပိုးလမ်းမကြီးသည် ကမ္ဘာ့အနောက်ပိုင်းနှင့်အရှေ့ပိုင်းကို ဆက်သွယ်ထားသဖြင့် လမ်းမကြီးဖြတ်သန်းရာ တစ်လျှောက်ရှိ နိုင်ငံများမှာ ကုန်သွယ်ရေးနှင့်လူမှုဆက်ဆံရေး တိုးတက်မှု ရရှိကြသည်။ ယနေ့ကာလတွင် တရုတ်ပြည်သူ့သမ္မတနိုင်ငံက အဆိုပါ လမ်းမကြီးကို ပြန်လည်အသက်သွင်းပြီး ရုရှားနိုင်ငံအထိကုန်သွယ်နိုင်မည့်  Belt  ဟူသောကုန်းလမ်းခရီးနှင့် ပုလဲသွယ်စီမံကိန်းဟုခေါ်သော ရေလမ်းထွက်ပေါက် Road  ကိုဖန်တီးလိုက်ပြီး ချမှတ်ထားသော မဟာဗျူဟာကို One Belt,One Road (OBOR) ဟု အမည်ပေးထားသည်။ OBOR ကို ရပ်ဝန်းတစ်ခု လမ်းကြောင်းတစ်သွယ်ဟု မြန်မာမှုပြုထားကြပြီး ဒေသတွင်းနိုင်ငံများအပေါ် သက်ရောက်လာနိုင်သည့် အလားအလာများကို စိတ်ဝင်တစား လေ့လာသုံးသပ်နေကြသည်။ ရပ်ဝန်းတစ်ခု လမ်းကြောင်းတစ်သွယ်စီမံကိန်းသည် အာရှတိုက်နှင့်ဥရောပတိုက်တို့၏ကုန်းမြေကို တစ်ဆက်တစ်စပ်တည်း ဖြစ်သွားစေမည့် အလားအလာရှိသည်။ တရုတ်နိုင်ငံကို ဗဟိုပြု၍ အာရှ၊ ဥရောပ၊ အာဖရိက၊ အာရှတိုက် အလယ်ပိုင်း၊ အရှေ့အလယ်ပိုင်းဒေသများကြား ကုန်သွယ်မှု၊ ရင်းနှီးမြှုပ်နှံမှု၊ ပြည်သူအချင်းချင်း ထိတွေ့ဆက်ဆံမှု များပြားသော လူမှုအသိုက်အဝန်း တစ်ခု ဖြစ်လာနိုင်သည်ဟု သုံးသပ်ကြသည်။

မြန်မာနိုင်ငံသည် ရပ်ဝန်းတစ်ခုလမ်းကြောင်းတစ်သွယ် မဟာဗျူဟာတွင် ပထဝီအနေအထားအရ အရေးပါသော အစိတ်အပိုင်းအဖြစ် ပါဝင်လျက်ရှိသည်။  အရှေ့တောင်အာရှဒေသတွင်း ရေကြောင်းပိုးလမ်းမ(Marine Silk Road)၏အလယ်ဗဟိုဖြစ်သည့် အိန္ဒိယသမုဒ္ဒရာနှင့် ပစိဖိတ်သမုဒ္ဒရာများအား ဆက်စပ်ထားသကဲ့သို့ တည်ရှိနေသော မြန်မာ့ပင်လယ်ပြင်၏အရေးပါမှုကို အပြည့်အဝအသုံးချပြီး လက်တွေ့အကောင်အထည် ဖော်နိုင်ပါက မြန်မာနိုင်ငံ၏ အမျိုးသားအကျိုးစီးပွားမြှင့်တင်ရေးအတွက် အကျိုးဖြစ်ထွန်းစေမည့် အလားအလာကောင်းများ ရှိလာမည်ဖြစ်သည်။

ထို့ကြောင့် အာဆီယံအဖွဲ့ဝင်နိုင်ငံများ၏ ဆွေးနွေးဖက်နိုင်ငံဖြစ်ပြီး အာဆီယံ၏ဖွံ့ဖြိုးရေးအစီအစဉ်များကို  ထောက်ခံအားပေး လျက်ရှိသော တရုတ်ပြည်သူ့သမ္မတနိုင်ငံ နန်နင်းအပြည်ပြည်ဆိုင်ရာ ကွန်ဗင်းရှင်းဗဟိုဌာန၌ ကျင်းပသည့် (၁၆)ကြိမ်မြောက် တရုတ်-အာဆီယံကုန်စည်ပြပွဲအတွက် ဆောင်ပုဒ်ဖြစ်သည့် ''တူညီအနာဂတ် ဖော်ဆောင်ဖို့ ရပ်ဝန်းနဲ့ပိုးလမ်းမလမ်းကြောင်း ထူထောင်စို့''ဆောင်ပုဒ်နှင့် သဟဇာတဖြစ်စေမည့် ပူးပေါင်း ဆောင်ရွက်မှုများကို ယခုကျင်းပသော ထိပ်သီးအစည်းအဝေး မှတစ်ဆင့် ဖော်ဆောင်နိုင်ကြမည်ဟု မြဝတီက မျှော်လင့်ကြောင်း ရေးသားအပ်ပါသည်။        

Read 72 times Last modified on Tuesday, 24 September 2019 08:59