SJ WorldNews - шаблон joomla Авто

အစဉ်အလာသမိုင်းမှတ်တိုင်တည်တံ့ရေး

Friday, 25 October 2019 08:42 font size decrease font size decrease font size increase font size increase font size

ဗုဒ္ဓဘာသာကလျာဏယုဝအသင်းချုပ်(YMBA)၏ ရာသက်ပန်ဂုဏ်ထူးဆောင်နာယက မဟာမင်္ဂလဓမ္မဇောတိကဓဇ ဗိုလ်ချုပ်မှူးကြီး မင်းအောင်လှိုင်သည် ရန်ကုန်တိုင်းဒေသကြီး ပုဇွန်တောင်မြို့နယ်ရှိ အဆိုပါ အသင်းချုပ်ရုံးသို့ အောက်တိုဘာ ၂၂ ရက် နံနက်ပိုင်းတွင် သွားရောက်၍ အသင်းချုပ်ဥက္ကဋ္ဌ ဦးရဲထွန်းနှင့် အလုပ်အမှုဆောင် အဖွဲ့များအား တွေ့ဆုံပြီး အသင်းချုပ်၏ ရည်ရွယ်ချက်ဖြစ်သည့်  အမျိုး၊ဘာသာ၊ သာသနာ၊ ပညာရေးလုပ်ငန်းများအား ယခုထက်ပိုမို ဆောင်ရွက်နိုင်ရေးအတွက် ဆွေးနွေးအကြံပြုပြောကြားသည်။

ဗိုလ်ချုပ်မှူးကြီးမင်းအောင်လှိုင်က ဆွေးနွေးအကြံပြုပြောကြားရာတွင်  အတွေ့အကြုံများအား ဆွေးနွေးအကြံပြု ဖလှယ်နိုင်ရေးအတွက် ယခုကဲ့သို့ လာရောက်တွေ့ဆုံခြင်း ဖြစ်ပါကြောင်း၊ အသင်းအဖွဲ့တိုင်းတွင် နာယကဆိုသည်မှာ အသိပညာနှင့်အတတ်ပညာတို့ကို ဆင်ခြင်သုံးသပ်၍ ကောင်းရာကောင်းကျိုးအတွက် အကြံဉာဏ် ပေးကြရသူများ ဖြစ်ကြောင်း၊ ဥက္ကဋ္ဌဆိုသည်မှာ အသင်းအဖွဲ့၊ အဖွဲ့အစည်းကို  ဦးဆောင်၍ ဆောင်ရွက်ကြရသူများ ဖြစ်ပြီး အတွင်းရေးမှူးများက အကောင်အထည်ဖော် ဆောင်ရွက်ကြရသူများ ဖြစ်ပါကြောင်း၊ လုပ်ငန်းတစ်ခုအား ဆောင်ရွက်မည်ဆိုပါက စုပေါင်းဝိုင်းဝန်းတိုင်ပင်၍ အဖြေရှာရမည်ဖြစ်ပြီး ရရှိလာသည့် အဖြေကို ဆင်ခြင်သုံးသပ်ကာ အကောင်းဆုံး ဖြစ်စေနိုင်သည့်အဖြေကို အကောင်အထည်ဖော်ဆောင် ရွက်ကြရမည် ဖြစ်ပါကြောင်း၊ အတိတ်ဆိုသည်မှာ သင်ခန်းစာယူရန်သာ ဖြစ်ပြီး အတိတ်က ဖြစ်ခဲ့သည့်မကောင်းသည့် ဖြစ်စဉ်များအား နောင်မဖြစ်စေရေး အဖြေရှာရန်၊ ကောင်းသည့်အကြောင်းအရာများကို ပိုမိုကောင်းမွန်စေရေး ဆောင်ရွက်ရန်ဖြစ်ကာ  လက်ရှိပစ္စုပ္ပန်တွင် ရှိနေကြသူများက  အနာဂတ်ကို ကောင်းမွန်အောင် တည်ဆောက်ကြရမည်သာ ဖြစ်ပါကြောင်းဖြင့် ပြောကြားသည်။

မြန်မာတစ်မျိုးသားလုံး   ဗြိတိသျှကိုလိုနီ လက်အောက်ကျရောက်နေသည့်ကာလ  ၁၉ဝ၆ ခုနှစ်တွင် ခေတ်ပညာတတ် လူငယ်များက စတင်ဖွဲ့စည်းခဲ့သော  ဗုဒ္ဓဘာသာကလျာဏယုဝအသင်းချုပ်(YMBA)သည် အမျိုး၊ ဘာသာ၊ သာသနာ၊ ပညာအကျိုးကိုသာ ဦးတည်ဆောင်ရွက်ခဲ့သည်မှာ ယခုဆိုလျှင် နှစ်ပေါင်း ၁၁၃ နှစ်ရှိပြီဖြစ်သည်။ မြန်မာတို့အမျိုးသားရေးနိုးကြားမှုသမိုင်းမှတ်တိုင်တွင် ဗုဒ္ဓဘာသာကလျာဏယုဝအသင်းချုပ်(YMBA)၏ အခန်းကဏ္ဍ အရေးပါလျက်ရှိကြောင်း ၁၉၂ဝ ပြည့်နှစ် အမျိုးသားရေး လှုပ်ရှားမှုများအထိ တွေ့ရသည်။ မြန်မာနိုင်ငံ လွတ်လပ်ရေးရသည့် ၁၉၄၈ ခုနှစ်မှစ၍ နိုင်ငံရေး သက်သက် ဆောင်ရွက်ရန် ဖွဲ့စည်းထားသော အသင်းအဖွဲ့များမှာ ဖြူ၊ နီ၊ ဝါ၊ ပြာ၊ စိမ်းဟူသော အရောင်အမျိုးမျိုးကွဲသွားကြပြီး ပဋိပက္ခကို ဖန်တီးကြသဖြင့်  ပြည်သူများ ဆင်းရဲဒုက္ခရောက်ကြရသည်။  ဗုဒ္ဓဘာသာကလျာဏယုဝအသင်းချုပ် (YMBA)သည် နိုင်ငံရေးကို အခြေခံခဲ့သော  လူမှုရေး အဖွဲ့အစည်းဖြစ်သော်ငြား  နိုင်ငံတော်နှင့်နိုင်ငံသားတို့၏ အကျိုးစီးပွားအတွက် အကျိုးပြုလျက် ရပ်တည်သော အဖွဲ့အစည်း ဖြစ်သည်မှာ အတုယူဖွယ် စံနမူနာဖြစ်သည်။

ဗုဒ္ဓဘာသာကလျာဏယုဝအသင်းချုပ် (YMBA)၏   ရာသက်ပန်ဂုဏ်ထူးဆောင်နာယက မဟာမင်္ဂလဓမ္မဇောတိကဓဇ ဗိုလ်ချုပ်မှူးကြီးမင်းအောင်လှိုင်က အသင်းချုပ်၏ ရည်ရွယ်ချက်များကို မမှိတ်မသုန် ဆောင်ရွက်ကြရန် ပြောကြားရာ၌ အမျိုး၊ ဘာသာ၊ သာသနာ၊ ပညာကိုအားပေးပြီး မိမိတိုင်းပြည်တိုးတက်ရေးအတွက် ကောင်းရာကောင်းကျိုးကို ဆောင်ရွက်နေကြသဖြင့် လူတစ်ဦးချင်း၏ ရုပ်ပိုင်း၊ စိတ်ပိုင်းဆိုင်ရာ ကြံ့ခိုင်မှုရှိမှသာလျှင် လုပ်ငန်းအောင်မြင်နိုင်မည် ဖြစ်ပါကြောင်း၊ အိမ်နီးချင်းနိုင်ငံဆိုသည်မှာ ရွေးချယ်၍မရဘဲ မိတ်ဆွေကိုသာ ရွေးချယ်နိုင်မည် ဖြစ်ကြောင်း၊ မိမိတိုင်းပြည် တိုးတက်ရေးအတွက် မိမိတို့ကိုယ်တိုင်သာ ကြိုးပမ်းဆောင်ရွက်ကြရမည် ဖြစ်ကြောင်း၊ အမျိုး၊ ဘာသာ၊ သာသနာနှင့်ပတ်သက်၍ အစွန်းမရောက်သောထိန်းသိမ်းမှုဖြင့် ထိန်းသိမ်းရမည်ဖြစ်ပြီး ရုပ်ပိုင်းဆိုင်ရာ၊ စိတ်ပိုင်းဆိုင်ရာ ကြံ့ခိုင်မှုများကို အသိပညာ၊ အတတ်ပညာကြွယ်ဝသူတို့၏ ဦးဆောင်မှုများ၊ ဥက္ကဋ္ဌ၊ အတွင်းရေးမှူးတို့၏ အနီးကပ်ကြပ်မတ် ကွပ်ကဲမှုများဖြင့် တိုင်းပြည်ကောင်းရာ ကောင်းကျိုးကို ဆက်လက်ကြိုးပမ်းကြစေလိုကြောင်းဖြင့် တိုက်တွန်းပြောကြားသည်။

ထို့ကြောင့်  ဗုဒ္ဓဘာသာကလျာဏယုဝအသင်းချုပ်(YMBA)၏ ကောင်းမြတ်သော အစဉ်အလာနှင့် သမိုင်းမှတ်တိုင် တည်တံ့ရေး တိုင်းရင်းသား ပြည်သူအပေါင်းတို့က   ဝိုင်းဝန်းထိန်းသိမ်းကြရန် ဖြစ်ကြောင်း မြဝတီက တိုက်တွန်းနှိုးဆော်အပ်ပါသည်။     

Read 59 times Last modified on Friday, 25 October 2019 09:09