SJ WorldNews - шаблон joomla Авто

ရေကြောင်းလမ်းခရီး အန္တရာယ်ကင်းဝေးရေး

Saturday, 30 November 2019 10:34 font size decrease font size decrease font size increase font size increase font size

အရှေ့တောင် အာရှနိုင်ငံများနှင့် ဒေသတွင်းနိုင်ငံများဖွံ့ဖြိုးရေး ပူးပေါင်းဆောင်ရွက်ကြ ရာတွင် အာဆီယံ+၃ တွင် တောင်ကိုရီးယားနိုင်ငံက တက်ကြွစွာပါဝင်ပြီး မြန်မာ-တောင်ကိုရီးယား ချစ်ကြည်ရေးအဖြစ် တည်ဆောက်လျက်ရှိသည့် ရန်ကုန်-ဒလတံတား စီမံကိန်း လုပ်ငန်းများနှင့် စပ်လျဉ်းသော ညှိနှိုင်းအစည်းအဝေးကို နိုဝင်ဘာ ၂၆ ရက် တွင် ရန်ကုန်တိုင်းဒေသကြီး ဆိပ်ကမ်းမြို့နယ်ရှိ တံတားတည်ဆောက်ရေး ရှင်းလင်း ဆောင်၌ ကျင်းပသည်။

ညှိနှိုင်းအစည်းအဝေးတွင် ရေပြင်ဆောက်လုပ်ရေး လုပ်ငန်းများ ဆောင်ရွက်စဉ်အတွင်း ရေယာဉ်ကြီး၊ ရေယာဉ်ငယ်များ အန္တရာယ်ကင်းစွာ ၀င်ထွက်သွားလာနိုင်ရန် ယာယီ တံတားထိုးသည့် လုပ်ငန်းများ ဆောင်ရွက်ထားမှုကို ဆွေးနွေးကြရာ ရေယာဉ်များ သွားလာရန် ရေလမ်းကင်းလွတ် နယ်မြေအကျယ် မီတာ ၃၀၀ သတ်မှတ်ထားပြီး ရေလမ်းကြောင်းကို အချက်ပြပြီး ဗော်ယာအစိမ်းနှစ်လုံးနှင့် အနီနှစ်လုံးဖြင့် သတ်မှတ် ထားကြောင်းသိရသည်။ လုပ်ငန်းခွင်ဧရိယာ၏ တစ်ဖက်တစ်ချက်တွင် အချက်ပြမီး ဗော်ယာအ၀ါနှစ်လုံး စီချထားမည်ဖြစ်သည်။ ရန်ကုန်ဘက်ကမ်း၌ အချက်ပြမီးဗော်ယာ အစိမ်းနှစ်လုံး၊ အ၀ါနှစ်လုံးရှိမည်ဖြစ်ပြီး ဒလဘက်ကမ်း မီးနီနှစ်လုံးမှ မြစ်ကမ်းအထိကို လုပ်ငန်းခွင်ဧရိယာ သတ်မှတ်ထားသကဲ့သို့ ရန်ကုန်ဘက်ကမ်း၌လည်း မီးစိမ်းနှစ်လုံးမှ မြစ်ကမ်းအထိကို လုပ်ငန်းခွင်ဧရိယာ သတ်မှတ်မည်ဖြစ်သည်။ ရေပြင်ဆောက်လုပ်ရေး လုပ်ငန်းဧရိယာအတွင်း မည်သည့်ရေယာဉ်မျှ ၀င်ခွင့်မပြုဘဲ ရေယာဉ်အားလုံးအတွက်  သတ်မှတ်ထားသော အချက်ပြမီးနီနှင့် မီးစိမ်းအကြားမှသာ သွားလာရမည်ဖြစ်သည်။

ရေပြင်ဆောက်လုပ်ရေး လုပ်ငန်းများ ဆောင်ရွက်နေစဉ်အတွင်း ရေယာဉ်ငယ်များ အနေဖြင့် သတ်မှတ်ထားသော ရေလမ်းကြောင်းအတွင်း သွားလာပါက မိမိဦးတည်ရာ လမ်းကြောင်း၏ ယာဘက်ခြမ်းကိုကပ်၍ သွားလာရန်ဖြစ်ပြီး ပင်လယ်ကူးသင်္ဘောများ ဖြတ်သန်းချိန်တွင် ကျန်ရှိသော ရေယာဉ်များအား ဖြတ်သန်းခွင့်မပြုဘဲ ရေလမ်းကြောင်း အပြင်ဘက်ခြမ်းရှိ စောင့်ဆိုင်းရန် သတ်မှတ်ထားသော နယ်မြေအတွင်းရှိ ၀င်ရောက် စောင့်ဆိုင်းပြီး လွတ်ကင်းမှသာ ဖြတ်သန်းသွားလာရမည်ဖြစ်သည်။ ရေလမ်းကြောင်း အတွင်း သွားလာနေကြသော ရေယာဉ်များသည် အချင်းချင်း ကျော်တက်ခြင်းမပြုဘဲ ရေစုန်ဖြင့် သွားသည့်ရေယာဉ်ကို ဦးစားပေးရမည်ဖြစ်သည်။ ၀န်တွဲပါရေယာဉ်များသည် ရေဆန်ကိုသာ ဖြတ်သန်းရမည်ဖြစ်ပြီး တွဲဆွဲရေယာဉ်များအနေဖြင့် လုံလောက်သည့် စက်အားရှိရမည်ဖြစ်ကြောင်း သိရသည်။

ယာယီတံတားထိုးရန် ရေပြင်တည်ဆောက်ရေး လုပ်ငန်းများကို ယခုနှစ် နိုဝင်ဘာမှ စတင်ဆောင်ရွက်လျက်ရှိပြီး ရန်ကုန်-ဒလဆိပ်ကမ်းသို့ ကူးသန်းသွားလာနေကြသော စက်လှေ၊ ကုန်တင်လှေနှင့် ရေယာဉ်ငယ်များအနေဖြင့် ဘေးအန္တရာယ် ကင်းရှင်းစွာ သွားလာနိုင်ရန် မြန်မာ့ဆိပ်ကမ်း အာဏာပိုင် ရေကြောင်းဌာနက သတ်မှတ်ထားသော စည်းကမ်းများကို လိုက်နာကြရမည်ဖြစ်သည်။ လွန်ခဲ့သော နှစ်ပေါင်း ၄၀ ကျော်က ရန်ကုန်-ဒလ ခရီးသည်ပို့ဆောင်ရေး ရေယာဉ်တိုးအေးသင်္ဘောသည် ဂျပန်နိုင်ငံမှ ရန်ကုန်ဆိပ်ကမ်းသို့ ၀င်ရောက်လာသော ပင်လယ်ကူး သင်္ဘောကြီးနှင့် တိုက်မိသဖြင့် တိမ်းစောင်းနစ်မြုပ်သွားရာ လူအမြောက်အမြား ရေနစ်သေဆုံးသွားကြသည်။ သင်္ဘော နစ်မြုပ်ပြီး ဌာနဆိုင်ရာတို့က ရှာဖွေကယ်ဆယ်ရေး လုပ်ငန်းများ ဆောင်ရွက်ကြရာ ၁၅ ရက် ခန့်အကြာတွင် သင်္ဘောအတွင်း၌ သားငယ်ကို ရင်ခွင်ပိုက်လျက် အသက်မဲ့ နေသောမိခင်ကို ရင်နင့်ဖွယ်တွေ့မြင် ကြရသည်။ မိမိအသက် အန္တရာယ်လွတ်ရာလွတ် ကြောင်းမရှာဖွေဘဲ  သားငယ်နှင့်အတူ ကြေကွဲဖွယ် ဘ၀ဇာတ်သိမ်းသွားသည့် မိခင်၏ မေတ္တာသရုပ်ပေါ်လွင်အောင် ကဗျာဆရာတစ်ဦးက ဤသို့ရေးဖွဲ့ ထားသည်။ “ရေစီးက လှုပ်၊ လှိုင်းကပုတ်၍၊ စုပ်သည့်ရေမွှား၊ စားသည့်ရေပိုး၊ အကြောင်းဆိုးလည်း၊ တိုးကာ ထပ်ကာ၊ မေ့သည်းချာအား၊ မကွာမကွဲပွေ့ပိုက်ဆဲ”။ ဤကဗျာကို ဖတ်ရသူများ စာနာ စိတ်ဖြင့် မျက်ရည်လည်ကြရသည်နှင့်အတူ မိခင်မေတ္တာကို ပို၍တန်ဖိုးထား နားလည် လာကြသည်။

ရန်ကုန်-ဒလနေ့စဉ် ကူးသန်းသွားလာနေကြသော ပြည်သူများသည် ယနေ့အချိန် အထိ ရေကြောင်းခရီးကိုသာ အားထားနေကြရသူဦးရေ များပြားလျက်ရှိရာ ရေကြောင်း အတွင်း မျောပါလာသော အမှိုက်နှင့်ဒိုက်များ၊ ဗေဒါများက စက်တပ်ရေယာဉ်ပန်ကာများ ကိုငြိတွယ်ခြင်းကြောင့် ရေယာဉ်စီးခရီးသည်များ အန္တရာယ်ဖြစ်ကြရသည်လည်းရှိသည်။ အထူးသဖြင့် ယခုလိုဆောင်းနှင်းဝေသော နံနက်ပိုင်း အချိန်များတွင် ပို၍အန္တရာယ်များ သည်။

ထို့ကြောင့် ရန်ကုန်နှင့်ဒလ နိစ္စဓူဝကူးသန်း သွားလာနေကြသော ရေကြောင်းလမ်း ခရီးသွားပြည်သူများ အန္တရာယ်ကင်းဝေးစေရန် စည်းကမ်းလိုက်နာ ဘေးကင်းကွာ ဆောင်ပုဒ်ကို အလေးထားလိုက်နာကြရန်ဖြစ်ကြောင်း မြ၀တီက ထပ်လောင်း၍တိုက် တွန်းနှိုးဆော်လိုက်ရပါသည်။       

Read 190 times Last modified on Saturday, 30 November 2019 10:35