SJ WorldNews - шаблон joomla Авто

နိုင်ငံတော်ဖွံ့ဖြိုးရေးနှင့် ကာကွယ်ရေးတာဝန်

Thursday, 13 February 2020 09:25 font size decrease font size decrease font size increase font size increase font size

တက္ကသိုလ်များတွင်ပညာသင်ကြားလျက်ရှိသော ကျောင်းသား၊ ကျောင်းသူများကို အခြေခံ စစ်ပညာများ သင်ကြားပေးခြင်းဖြင့် နိုင်ငံတော်ကာကွယ်ရေးဆိုင်ရာ အသိအမြင်များ ရရှိ၍ အနာဂတ်နိုင်ငံတော်၏ တာဝန်များ ထမ်းဆောင်သည့်အခါတွင် အထောက်အကူ ရရှိကာ နိုင်ငံချစ်စိတ်၊ မျိုးချစ်စိတ်များ ပိုမိုရင့်သန်လာစေရန် ရည်ရွယ်ချက်ဖြင့် လေ့ကျင့်ရေးသင်တန်းများ ဖွင့်လှစ်၍ ကိုယ်တိုင်ဆန္ဒပြုသည့် တက္ကသိုလ်ဆရာ၊ ဆရာမ၊ ကျောင်းသား၊ ကျောင်းသူများအား စစ်ရေးပြ၊ လက်နက်ငယ်၊ ကိုယ်စီစစ်မြေပြင် ကျွမ်းကျင်မှု၊ စစ်နည်းဗျူဟာ၊ အုပ်ချုပ်မှုဘာသာရပ်၊ စက်ပစ်ကွင်းပစ်ခတ်စဉ်၊ မြေပုံဖတ်နည်း၊ စစ်မြေပြင်အင်ဂျင်နီယာ၊ ကျန်းမာရေး၊  ရှေးဦးသူနာပြုနှင့် စုပေါင်းလေ့ကျင့်ခန်း စသည့် ဘာသာရပ်များကို ကာကွယ်ရေးဦးစီးချုပ်ရုံး(ကြည်း) ပြည်သူ့စစ်နှင့် နယ်ခြားတပ်များ ညွှန်ကြားရေးမှူးရုံးက စီစဉ် ဆောင်ရွက်ပေးလျက် ရှိသည်။

ထိုသို့ဖွင့်လှစ် သင်ကြားပေးရာတွင် ၂၀၁၉-၂၀၂၀ ပညာသင်နှစ်အတွက် လေ့ကျင့်ရေး သင်တန်းဖွင့်ပွဲများကို ဖေဖော်ဝါရီ ၁၀ ရက်နံနက်ပိုင်းတွင် ရေဆင်းစိုက်ပျိုးရေး တက္ကသိုလ်၊ တောင်ကြီးတက္ကသိုလ်၊ မန္တလာဒီဂရီကောလိပ်၊ ပုသိမ်တက်္ကသိုလ်၊ မော်လမြိုင်တက္ကသိုလ်နှင့် တောင်ငူတက္ကသိုလ်တို့၌ အသီးသီး ကျင်းပသည်။

အဆိုပါသင်တန်းများတွင် နေပြည်တော်ကောင်စီ နယ်မြေအတွင်းရှိ တက္ကသိုလ်သုံးခု၊ ရန်ကုန်တိုင်းဒေသကြီးအတွင်းရှိ တက္ကသိုလ် ၁၁ ခု၊ မန္တလေးတိုင်း ဒေသကြီးအတွင်းရှိ တက္ကသိုလ်၊ ကောလိပ်ခုနစ်ခု၊ မော်လမြိုင်တက္ကသိုလ်၊ တောင်ကြီးမြို့ရှိ တက္ကသိုလ်လေးခု၊ ပုသိမ်မြို့ရှိ တက္ကသိုလ်လေးခု၊ တောင်ငူမြို့ရှိ တက္ကသိုလ် လေးခု စုစုပေါင်းတက္ကသိုလ်၊ ကောလိပ် ၃၄ ခုမှ သင်တန်းသားဆရာ၊ ဆရာမများနှင့် ကျောင်းသား၊ ကျောင်းသူများ စုစုပေါင်း ၅၈၉၈ ဦးတို့အား အခြေခံစစ်ပညာ သင်တန်းနှင့် တန်းမြင့်စစ်ပညာ သင်တန်းများကိုပထမနှစ်၊  ဒုတိယနှစ် သင်တန်းများတွင်  သတ်မှတ်ကာလအတွင်း လေ့ကျင့်ရေးတပ်မှ နည်းပြအရာရှိ၊ စစ်သည်များက သင်တန်းသားများအား လေ့ကျင့် သင်ကြားပေးမည်ဖြစ်သည်။

ကမ်္ဘာ့နိုင်ငံပေါင်း နှစ်ရာကျော်ရှိကြရာ ဖွံ့ဖြိုးပြီး၊ ဖွံ့ဖြိုးဆဲ၊ ဖွံ့ဖြိုးစနှင့် ဖွံ့ဖြိုးမှု နောက်ကျနေသော နိုင်ငံများဟူ၍ နိုင်ငံအမျိုးအစား လေးမျိုး သတ်မှတ်ထားကြသော်လည်း မည်သည့်နိုင်ငံမဆို လွတ်လပ်ရေးနှင့် အချုပ်အခြာအာဏာကို ကာကွယ်ရန် တပ်မတော် တည်ထောင်ထားကြသည်။ မြန်မာနိုင်ငံ ကာကွယ်ရေးနှင့် စပ်လျဉ်း၍ တပ်မတော်ဖခင်ကြီး ဗိုလ်ချုပ်အောင်ဆန်းက ရန်ကုန်နေပြည်တော်ခန်းမကြီး၌ ကျင်းပသော ကျောင်းဆရာများ ကျောင်းပိတ်ရက် ခေတ်သစ်ပညာသင်တန်း၌ ၁၉၄၂ ခုနှစ်နိုဝင်ဘာ ၁ ရက်တွင် သေနင်္ဂဗျူဟာ စစ်ပညာအကြောင်း ဟောပြောခဲ့သည်။ ဗိုလ်ချုပ်အောင်ဆန်းက ပြောကြားရာတွင် ““နွားခြေရာ ကွက်ကွက်ကလေး ကိုယ့်တိုင်းပြည်လေးချည်း ကြည့်ပြောနေလို့ မောရုံပဲ။ အခြားတိုင်းကြီးပြည်ကြီးတွေနဲ့ ကမ္ဘာ့ရေးရာ ဗမာပြည်ရဲ့လက်ရှိအခြေအနေတွေကို ကြည့်ပြီးစဉ်းစားမှ အရာရောက်ပါလိမ့်မယ်””ဟူ၍ လည်းကောင်း၊ ““ဗမာပြည်ဟာ အရှေ့အာရှတိုက်ရဲ့အချက်အချာ တိုင်းပြည်ဖြစ်လာစရာ ရှိတယ်။ စစ်ရေးစစ်ရာနဲ့ဖြစ်ဖြစ်၊ တိုင်းရေးပြည်ရေးနဲ့ ဖြစ်ဖြစ်၊ ကာကွယ်ရေးနဲ့ဖြစ်ဖြစ် အရေးကြီးဆုံးပဲ။ ဗမာပြည်ရဲ့ ကာကွယ်ရေးသည် အရှေ့အာရှတိုက်ရဲ့ ကာကွယ်ရေး၊ အရှေ့အာရှတိုက်ရဲ့ ကာကွယ်ရေးသည် ဗမာပြည်ရဲ့ ကာကွယ်ရေးဖြစ်ရမယ်””ဟူ၍ လည်းကောင်း  နိုင်ငံကိုကာကွယ်ရေးအတွက် ပစ္စုပ္ပန်ကို မြင်အောင်ကြည့်၍ အနာဂတ်ကို မျှော်မှန်းတတ်ရန် လမ်းညွှန်ခဲ့သည်။

ကမ္ဘာ့နိုင်ငံများ၏ သမိုင်းစဉ်ကို လေ့လာကြည့်လျှင် ပဒေသရာဇ်အုပ်ချုပ်ရေးစနစ်မှ အဆင့်ဆင့် ကူးပြောင်းလာခဲ့ပြီး ဒီမိုကရေစီ အုပ်ချုပ်ရေးစနစ်သို့ ရောက်ရှိလာသည့် တိုင်အောင် လွတ်လပ်ရေးနှင့် အချုပ်အခြာအာဏာကို တပ်မတော်(ကြည်း၊ ရေ၊ လေ)တပ်ဖွဲ့များဖြင့် ကာကွယ်နေကြရသည်။ နိုင်ငံရေး၊ စီးပွားရေး၊ လူမှုရေးတို့ အတွက် အာမခံချက်ရှိသော လုံခြုံရေး တည်ဆောက်ရန် ရေခြား၊ မြေခြား မိုင်ပေါင်းထောင်နှင့်ချီ၍ ဝေးသော နေရာများအထိ တပ်အင်အား ဖြန့်ကြက်ထားကြသည်။ ကမ္ဘာ့အင်အားကြီး နိုင်ငံများနှင့် ပူးတွဲကာကွယ်ရေး သဘောတူညီချက် ရယူထားသော နိုင်ငံအနည်းစုမှာ မိမိတပ်ဖွဲ့ဝင် အင်အားလျှော့ချရန် အစီအစဉ်ရှိသော်လည်း ပြည်ပတပ်ဖွဲ့ များအတွက် စရိတ်မျှပေးရမည့် ပမာဏများပြားခြင်းကြောင့် ဆွေးနွေးဆဲဖြစ်ကြောင်း နောက်ဆက်တွဲ သတင်း ကြားသိရသည်။

နိုင်ငံတော် ကာကွယ်ရေးသည် စစ်ရေးတစ်ခုတည်းသာ မဟုတ်ဘဲ တိုင်းရင်းသားပြည်သူတို့၏ အသက်အိုးအိမ်စည်းစိမ်ကို ကာကွယ်ရေးနှင့် ပြည်သူတို့ စား၊၀တ်၊ နေရေး အဆင်ပြေစေရေးစသည်တို့ ပါဝင်သည်။

ထိုတာဝန်များကို  တပ်မတော်က ထမ်းဆောင်လျက်ရှိရာ တက္ကသိုလ် အသီးသီးမှ  ဆရာ၊ ဆရာမများ၊ ကျောင်းသား၊ ကျောင်းသူများက အထောက်အကူပေးရန် မိမိတို့ဆန္ဒအလျောက် အခြေခံစစ်ပညာနှင့် တန်းမြင့်စစ်ပညာ သင်တန်းများသို့ တက်ရောက်သင်ယူ လေ့ကျင့်ကြစဉ် နိုင်ငံတော်ဖွံ့ဖြိုး တိုးတက်ရေးနှင့် ကာကွယ်ရေး ဟန်ချက်ညီရန် လိုကြောင်း  အသိအမြင်ပို၍ ကျယ်ပြန့်လာခြင်းနှင့်အတူ နိုင်ငံချစ်စိတ်၊ မျိုးချစ်စိတ်များ ပိုမိုရင့်သန်လာမည်မှာ အနာဂတ် နိုင်ငံတော်အတွက် အားထားဖွယ်ဖြစ်ပါသည်။ 

Read 116 times Last modified on Thursday, 13 February 2020 09:26