SJ WorldNews - шаблон joomla Авто

စည်းကမ်းစနစ်ချမှတ်လိုက်နာခြင်းဖြင့် နိုင်ငံတော်တိုးတက်ဖွံ့ဖြိုးရေးလုပ်ဆောင် Featured

Thursday, 07 May 2020 08:57 font size decrease font size decrease font size increase font size increase font size

စည်းကမ်းစနစ်ချမှတ်လိုက်နာခြင်းဖြင့် နိုင်ငံတော်တိုးတက်ဖွံ့ဖြိုးရေးလုပ်ဆောင်

 

စည်းကမ်းမဲ့စွာပြုမူနေထိုင်ခြင်းများကိုမြင်တွေ့ရသောအခါ စည်းကမ်းရှိမှတိုးတက်မည်ဟူသောဆောင်ပုဒ်

ကလေးကို အမြဲတမ်းပြန်လည်မြင်ယောင်မိသည်။ လေးလေးနက်နက်စဉ်းစားလိုက်သောအခါ စည်းကမ်း

ရှိသောသူနှင့် စည်းကမ်းမလိုက်နာသောသူတို့၏အနာဂတ်ခရီးလမ်းသည် မတူညီကြောင်း ဘ၀အတွေ့ အကြုံများအရ လူတိုင်းသိပြီးဖြစ်သည်။ စည်းကမ်းလိုက်နာမှုအတွက် အဓိကကျသောအရာသည် အစဉ်သတိရှိနေခြင်းဖြစ်သည်။

အစဉ်သတိရှိခြင်းမှာ လူတိုင်းအတွက်လိုအပ်လေသည်။ မိမိတို့ပြုပြီး၊ ပြုဆဲ၊ ပြုအံ့သောအမှုတို့ကို အကျိုးအပြစ်စိစစ်ရပေမည်။ အမှုမဲ့အမှတ်မဲ့နေထိုင်သွားလာစားအိပ်ခြင်းမှာ လူညံ့တို့အလေ့သာ ဖြစ်လေ သည်။မည်သည့်အရာသည် မည်သို့အကျိုးအပြစ်ဖြစ်စေခဲ့သနည်း၊ ဖြစ်စေလျက်ရှိသနည်း၊ ဖြစ်စေလိမ့် မည်နည်း။

ထိုသို့ဆင်ခြင်တိုင်းထွာခြင်းအလေ့ရှိမှသာ မသင့်မလျော်မကောင်းသောအရာများကို ကိုယ်တိုင် သိမြင်လာနိုင်မည်ဖြစ်သည်။ ထိုသို့သိမြင်လာသည်နှင့်အမျှ မိမိနှင့်သက်ဆိုင်သော စည်းကမ်းများကို လိုက်နာရန် အလေ့အကျင့်ကောင်းရရှိသွားမည်ဖြစ်သည်။

ထိုအလေ့အကျင့်ကောင်းသည် စာရိတ္တကိုပုံသွင်းရာတွင် အနေမှန်၊ အသွင်မှန်ကိုရရှိ စေလိမ့် မည်ဖြစ်သည်။မိမိကိုယ်မိမိ ရိုးဖြောင့်စွာစစ်တမ်းထုတ်ရပေမည်။ ငါသည် အမှိုက်မပစ်ရနေရာတွင် အမှိုက်ပစ်ခဲ့လေသလား၊ကွမ်းသွေးမထွေးရနေရာတွင် ကွမ်းသွေးထွေးခဲ့မိလေသလားဟူသော အခြေခံ စည်းကမ်းလိုက်နာမှုကိုဆန်းစစ်၍မိမိအမှားကိုဖော်ထုတ်ရပေမည်။ အခြားသူ၏ရှေ့မှောက်တွင် အပြစ်ကို ၀န်ခံရန်  အလေ့မထုံသေးစေကာမူမိမိအတွင်းစိတ်ကိုကား ဖြောင့်မတ်စွာဝန်ခံရပေမည်။ သို့ဖြင့် ပြုပြင် နိုင်ခွင့်လမ်းမှန်ကိုရပေမည်။ အမှားကိုပြုမိလျက် မိမိအမှားကို ဘယ်သောအခါမှ အမှားဟု မသိမြင်လျှင် စည်းကမ်းရှိသူတစ်ယောက်ဖြစ်လာနိုင်မည့်အခွင့်အရေးကား ဝေးသည်ထက်ဝေးနေပေမည်။

ပြုလုပ်သမျှသောအပြုအမူတို့သည် မိမိစာရိတ္တကိုထိခိုက်နိုင်လေသလောဟူ၍လည်း အစဉ်သတိပြုရမည်။ ထိုသို့သတိရှိမှသာ ပျက်ပြားအံ့သောစာရိတ္တကို အချိန်မီကာကွယ်ဖြည့်ဆည်းနိုင်ပေမည်။ လူတို့သည် လွတ်လပ်ရာကိုလုပ်တတ်၊ ပြောတတ်သောအလေ့ရှိ၏။ ထို့ကြောင့် စားမှု၊ နေမှု၊ ၀တ်မှု၊ ပြောဆိုကျင့်ကြံ မှုမှစ၍အလွယ်ကိုသာလိုက်တတ်၏။ ဖြစ်သလိုစား၊ ဖြစ်သလိုနေ၊ ဖြစ်သလိုဝတ်၊ ဖြစ်သလိုပြော ကျင့်ကြံလိုကြ၏။ဤစရိုက်သည် စည်းကမ်းမရှိခြင်းကိုဖြစ်ပေါ်စေသည့် စာရိတ္တပျက်စီးရာ ပျက်စီးကြောင်း ဖြစ်သည်။

ထို့ကြောင့် စားစားသွားသွား မည်သည့်အမှုတွင်မဆိုစည်းကမ်းရှိရန်လို၏။ စားချင်တိုင်းမစားရ၊ သွားချင် တိုင်းမသွားရပေ။ စားသင့်၊ သွားသင့်၊ မစားသင့်၊ မသွားသင့်သောအရေးအရာအခါအခွင့်ကို မပြုမီကပင် ကြိုတင်စိစစ်လျက် သင့်ရာစည်းကမ်းထားကာ ထိုစည်းကမ်းအရ သွားရ၊ စားရပေမည်။ စည်းကမ်းသည် လူ၏လုပ်ရပ်များကိုပဲ့ကိုင်ပေးသောအားဖြင့် စာရိတ္တကိုခိုင်မတ်စေလေသည်။

ငါသည် ဘယ်အလုပ်မျိုးကိုမှလုပ်မည်ဟူသော ရည်မှန်းချက်လမ်းကြောင်းချမှတ်ခြင်းသည် စည်းကမ်း ချက်ချခြင်းပင်ဖြစ်၍ ထိုစည်းကမ်းအတိုင်းဆောင်ရွက်ရပေမည်။ ဤသို့အားဖြင့် အရာဌာနတိုင်းသည် စည်းစနစ်ထားရှိကာ ပရမ်းပတာမပြုမူဘဲ စနစ်ကျကျကျင့်ဆောင်သွားခြင်းဖြင့် စာရိတ္တဖြည့်တင်းရာတွင် ထိရောက်အောင်မြင်နိုင်လေသည်။ စနစ်မရှိက စိတ်လည်းမတည်။ လုပ်ငန်းစဉ်လည်းမဖြောင့်ဖြူးနိုင်ပေ။ သို့ဖြစ်သော်စာရိတ္တကိုထိခိုက်နိုင်ပေသည်။ လုပ်ငန်းကိုစနစ်တကျလုပ်တတ်သောအလေ့မှ စိတ်ဓာတ်ကို လည်း စနစ်တကျထားတတ်အောင် ပြုပြင်နိုင်ပေသည်။ စိတ်ဓာတ်သည်လည်း စည်းစနစ်ကျကျ တည်တံ့ကာ စာရိတ္တမကျိုးပေါက်နိုင်တော့ပေ။

စိတ်အလိုကို စည်းစနစ်အထိန်းမရှိလျှင် မုန်တိုင်းထဲ၌ကျောက်မချသောလှေငယ်ကဲ့သို့ လွင့်ပါးသွားပေ မည်။ စိတ်ဓာတ်မှ ရည်မှတ်သောစည်းစနစ်ကို စိတ်ဓာတ်ကလိုက်နာနိုင်ပေသည်။ ဘာသာတရား ကိုဖြစ်စေ၊လောကီဝါဒကိုဖြစ်စေ စိတ်ကယုံကြည်ရင်းရှိမှ စူးစိုက်ဆောင်ရွက်နိုင်ပေရာ ရှေးဦးစွာ စိတ်၏ ယုံကြည်မှုရှိအောင် အားထုတ်ရပေသည်။ သူတစ်ပါးအပြော၊ သူတစ်ပါးခိုင်းစေသော အလုပ်တာဝန် အနေထက် မိမိစိတ်ကပြောခြင်း၊ ခိုင်းစေခြင်းကို မပင်မပန်းလုပ်နိုင်ပေရာ မိမိစိတ်ကပြောမှု၊ ခိုင်းစေမှုဖြစ်စေရန် စိတ်သဘောပေါက်ထင်မြင်အောင်လုပ်ရပေသည်။

ထို့ကြောင့် သင့်လျော်သောလူ့လောကစည်းကမ်းကိုလည်း ကိုယ်တိုင်လိုက်နာရန် ကိုယ်တိုင်သတ်မှတ် ခြင်းမျိုးဖြစ်အောင် ရည်မှန်းရပေမည်။ စင်စစ်လည်း ကိုယ်အကျိုးသာဖြစ်၍ ကိုယ့်စိတ်ကိုသာ ကိုယ်ကျွန် ခံနိုင်ပေသည်။ ကိုယ့်စိတ်ထက် စည်းကမ်းကသာပိုကောင်းသဖြင့်လည်း စိတ်ကို စည်းကမ်းစနစ်ချပေးရန် ကိုယ်စီတာဝန်အဖြစ်မှတ်ယူရပေမည်။

နိုင်ငံသားအားလုံး နိုင်ငံတော်မှပြဋ္ဌာန်းထားသော တရားဥပဒေ၊ စည်းမျဉ်းစည်းကမ်းများ၊ ဒေသန္တရအမိန့် များကို ကိုယ်စီအသိတရားနှင့်ယှဉ်ကာ လိုက်နာကြမည်ဆိုလျှင် အေးချမ်းသာယာခေတ်မီဖွံ့ဖြိုးသော ဒီမိုကရေစီနိုင်ငံတော်ဖြစ်လာမည်။ စည်းကမ်းရှိစွာ နေထိုင်သွားလာလုပ်ကိုင်ပါက တစ်ဦးချင်းမှသည် မိသားစု၊ မိသားစုမှသည် အဆင့်ဆင့်တိုးတက်လာပေလိမ့်မည်။ နိုင်ငံတစ်ခုတိုးတက်ရန် အဓိကလိုအပ် ချက်သည် ပြည်သူအများစည်းကမ်းလိုက်နာမှုပင်ဖြစ်ပါကြောင်း မြ၀တီက မီးမောင်းထိုးပြလိုက်ရပါသည်။    

 

Read 49 times