SJ WorldNews - шаблон joomla Авто

မြန်မာဂန္ထဝင်စာပေအညွန့်အဖူးများ အစဉ်ရှင်သန်ရေး

Thursday, 21 May 2020 09:52 font size decrease font size decrease font size increase font size increase font size

 မြန်မာစာသည် မြန်မာလူမျိုးတို့၏ယဉ်ကျေးမှုအသက်ဝိညာဉ်ဖြစ်သည်။ စာပေယဉ်ကျေးမှုမရှိသောလူမျိုး သည် အသက်ဝိညာဉ်ကင်းမဲ့သောရုပ်ကိုယ်ခန္ဓာနှင့်တူသည်။ စာပေယဉ်ကျေးမှုထွန်းကားသောလူမျိုးသည်ကမ္ဘာပေါ်တွင် တင့်တောင့်တင့်တယ်နေနိုင်သောလူမျိုးအဖြစ် ရပ်တည်နေနိုင်ကြောင်း တွေ့မြင်ကြရသည်။

ထို့ကြောင့် ဖွံ့ဖြိုးတိုးတက်ဆဲနိုင်ငံများသည်လည်းကောင်း၊ ဖွံ့ဖြိုးတိုးတက်သည့်နိုင်ငံများသည်လည်းကောင်း စာပေယဉ်ကျေးမှုထွန်းကားနေရန်အတွက် အစဉ်ကြိုးပမ်းဆောင်ရွက်ပုံနှိပ်ထုတ်ဝေနေသည်ကို ဖတ်ရှုလေ့လာ သိရှိနေရသည်။

မြန်မာနိုင်ငံ သူ့ကျွန်ဘ၀ ဗြိတိသျှကိုလိုနီနယ်ချဲ့လက်အောက်သို့ကျရောက်ခဲ့ရစဉ် ဇာတိသွေး၊ ဇာတိမာန် အမျိုးသားရေးစိတ်ဓာတ်ပြင်းထန်လှသော မြန်မာ့တော်လှန်ရေးသမားတို့သည် ဗြိတိသျှကိုလိုနီနယ်ချဲ့သံဖနောင့် အောက်မှ လွတ်မြောက်ရေးအတွက် ကြိုးပမ်းအားထုတ်ကြသည်။ ထိုသို့ လွတ်မြောက်ရေးအတွက်ကြိုးပမ်း အားထုတ်ရာတွင် လူတိုင်း၏ရင်ထဲ၌ စွဲစွဲမြဲမြဲထင်ကျန်အောင် ဆောင်ပုဒ်ရေးသား၍ တိုင်းပြည်သို့ဖြန့်ချိကြသည်။

ယခုဆိုလျှင် ထိုဆောင်ပုဒ်သည် မြန်မာလူမျိုးတို့၏ အမျိုးသားလွတ်မြောက်ရေးသမိုင်းဝင်မှတ်တိုင်တစ်တိုင်အဖြစ် ထင်ရှားစွာတည်ရစ်နေပြီဖြစ်ပါသည်။

ထိုဆောင်ပုဒ်သည်ကားဗမာပြည်သည်...တို့ပြည်ဗမာစာသည်...တို့စာဗမာစကားသည်...တို့စကားတို့ပြည်ကို...ချစ်ပါတို့စာကို...ချီးမြှင့်ပါတို့စကားကို...လေးစားပါဟူသည့် ရဲရဲတောက်ဇာတိမာန် စကားစုဖြစ်ပါသည်။ ဤဆောင်ပုဒ်ကို အားနှင့်မာန်နှင့်ရွတ်ဆိုလေတိုင်း ဇာတိသွေး၊ဇာတိမာန်တို့သည် ရင်ထဲမှအလိပ်လိပ်တက်လာကာ ဇာတိမာန်စိတ်ဓာတ်သည် တဟုန်းဟုန်းတောက်လောင်ရမြဲဖြစ်ပေသည်။

မြန်မာလူမျိုးများသည် မြန်မာစာကိုဖွံ့ဖြိုးတိုးတက်စည်ပင်သည်ထက် ဖွံ့ဖြိုးတိုးတက်စည်ပင်အောင် အစဉ်ကြိုး ပမ်းရမည်သာမက ဖျက်ဆီးဖြိုဖျက်မည့်ဘေးအန္တရာယ်မှလည်း အစဉ်ကာကွယ်စောင့်ရှောက်ရမည့် တာဝန်ရှိ နေသည်။ ထိုတာဝန်သည် ဘိုးဘေးဘီဘင်အစဉ်အဆက်မှ သားမြေးမြစ်တီတွတ်ကျွတ်ဆတ်တိုင်အောင် ထမ်းဆောင်သွားကြရမည့်တာဝန်ကြီးတစ်ရပ်လည်းဖြစ်သည်။ မြန်မာဂန္ထဝင်စာပေများကို ဂရုတစိုက်မှတ်သား ထိန်းသိမ်းကြရန်လိုပေသည်။

မြန်မာလူမျိုးများကို ဘုရင်ထီးနန်းသာမက လူမျိုးပါပျက်သုဉ်းစေအံ့ဟု တရားဝင်၊ သမိုင်းဝင်ကြေညာကာ ဖျက်ဆီးခဲ့သောနယ်ချဲ့ဗြိတိသျှကိုလိုနီဝါဒသမား လူဆိုးလူညစ် ဆာဖရက်ဒရစ်ကရော့စ်ဝိတ်နှင့် မြန်မာနိုင်ငံအား ကျွန်အဖြစ်သွတ်သွင်းလျက် ဗြိတိသျှဘုရင်မကြီးအတွက် နှစ်သစ်ကူးလက်ဆောင်အဖြစ် ၁၈၈၆ ခုနှစ် ဇန်နဝါရီ၁ ရက် နှစ်သစ်ကူးချိန် ညဉ့်သန်းခေါင်ယံတွင်ကြေညာခဲ့သူ ဗြိတိသျှနန်းရင်းဝန် ရန်းဒေါ့ချာချီတို့ကိုလည်း မျိုးဆက်သစ်တို့မေ့မပစ်ရန်လိုပေသည်။

မြန်မာနိုင်ငံ၏သမိုင်းကြောင်းသည် ယနေ့ ၂၀၂၀ ပြည့်နှစ်မှပြန်လည်ရေတွက်သော် အတိတ်ကာလ လွန်ခဲ့သေ ာနှစ်ပေါင်း ၁၉၆ နှစ်ဖြစ်သော ၁၈၂၄ ခုနှစ်မှစ၍ နယ်ချဲ့ဗြိတိသျှတို့သည် မြန်မာနိုင်ငံကိုဝင်ရောက် တိုက်ခိုက်ကျူးကျော်လျက် မြန်မာလူမျိုးတို့၏အမျိုးအနွယ်၊ စာပေယဉ်ကျေးမှု၊ စီးပွားရေး၊ နိုင်ငံရေး၊ တရားရေး၊ လူမှုရေး၊ သာသနာရေး၊ စစ်ရေး၊ ဓလေ့ထုံးစံတို့ကို ဖျက်ဆီးရိုက်ချိုးပစ်ခဲ့ကြသည်မှာ  အထင်အရှားဖြစ်သည်။

မြန်မာစာပေအမွေအနှစ်သည် ဗုဒ္ဓယဉ်ကျေးမှုမှ အခြေခံလာခြင်းဖြစ်သည်။ မြတ်ဗုဒ္ဓ၏တရားဓမ္မများသည် မြန်မာတို့ကို ယဉ်ကျေးသောလူမျိုးဖြစ်စေခဲ့သည်။ မေတ္တာတရားပြည့်ဝသောလူမျိုးများဖြစ်စေခဲ့သည်။ မြန်မာ စာပေယဉ်ကျေးမှုကို စနစ်တကျလေ့လာကြည့်လျှင် ခေတ်အလျောက်စာပေရေးဖွဲ့မှုဖြစ်သည့် ကဗျာ၊ လင်္ကာ၊ရတု၊ ဧချင်း၊ အိုင်ချင်း၊ တျာချင်း၊ သဖြန်၊ ဒွေးချိုး၊ လေးချိုး၊ ပျို့၊ မော်ကွန်း၊ သံပေါက်၊ လူးတား၊ ကြိုးဘွဲ့၊ပတ်ပျိုး၊ ယိုးဒယား၊ မွန်သံ၊ ဗုံကြီးသံ စသည်ဖြင့် စာပေကဗျာမျိုးစုံတို့ကို တအံ့တသြတွေ့ရမည်ဖြစ်သည်။

ဤစာပေအဖွဲ့အနွဲ့များ၊ ပြဇာတ်များ၊ စကားပြေများသည် မြန်မာလူမျိုးတို့၏စာပေယဉ်ကျေးမှုအဆင့်အတန်း မြင့်မားမှုကို သက်သေပြလျက်ရှိသည်။ကမ္ဘာပေါ်၌ စာပေယဉ်ကျေးမှုမြင့်မားသော အခြားတိုင်းပြည်များနှင့် မြန်မာလူမျိုးတို့သည် ရင်ပေါင်တန်းရပ်တည်နိုင်သည်။ မြန်မာတစ်နိုင်ငံလုံး သူ့ကျွန်အဖြစ်နွံမှာနစ်စဉ် မန္တလေး နေပြည်တော်ရှိ စာပေပုရပိုက်များကိုအင်္ဂလိပ်တို့မီးရှို့ဖျက်ဆီးခဲ့သည်မှာ ခုနစ်ရက်မျှကြာမြင့်ခဲ့သည်။ စာပေ ရတနာများဖျက်ဆီးခြင်းခံလိုက်ရသည်မှာလွန်စွာရင်နင့်ဖွယ်ဖြစ်သည်။

မျိုးဆက်သစ်လူငယ်မောင်မယ်အပေါင်းတို့သည် မိမိနိုင်ငံ၊ မိမိလူမျိုးတို့၏ မြန်မာဂန္ထဝင်စာပေအမွေအနှစ် စာပေအညွန့်အဖူးများ ထာဝစဉ်ရှင်သန်ရေး ထိန်းသိမ်းကာကွယ်ကြပါရန် အသိပေးအပ်ပါသည်။  

Read 42 times Last modified on Friday, 22 May 2020 10:49