SJ WorldNews - шаблон joomla Авто

တည်ကြည်ဖြောင့်မတ်သော သမာဓိတရားနှင့် မေတ္တာထား

Friday, 20 October 2017 08:25 font size decrease font size decrease font size increase font size increase font size

တိုင်းရင်းသားလူမျိုး တစ်ရာကျော်တို့ စုပေါင်းနေထိုင်ကြသော ပြည်ထောင်စုသမ္မတ မြန်မာနိုင်ငံတော်တွင် နိုင်ငံသားတိုင်း လွတ်လပ်စွာ ယုံကြည်ကိုးကွယ်ခွင့်ကို ပြည်ထောင်စုသမ္မတ မြန်မာနိုင်ငံတော်

ဖွဲ့စည်းပုံအခြေခံ ဥပဒေ (၂ဝဝ၈ ခုနှစ်)အရ ခွင့်ပြုထားသည့်အတိုင်း ရရှိကြပြီးဖြစ်သည်။ နိုင်ငံတော်ဖွဲ့စည်း တည်ဆောက်ထားသည်မှာ လည်း လူမျိုးရေးကိုသော် လည်းကောင်း၊ ဘာသာရေးကိုသော် လည်းကောင်း အခြေခံတည်ဆောက်ထားခြင်း မဟုတ်ဘဲ ပြည်ထောင်စုစနစ်ဖြင့် ဖွဲ့စည်းတည်ဆောက်ထားခြင်း ဖြစ်သည်။

ဗုဒ္ဓအလိုကျချမ်းသာ သုခကောင်းကျိုး အမျိုးမျိုးကိုရစေနိုင်သည့်   ပြုလုပ်ထိုက်သော ကောင်းမှုလုပ်ငန်းများမှာ စွန့်ကြဲပေးကမ်းလှူဒါန်းခြင်း၊ ကိုယ်နှင့်စိတ်ကို စောင့်ထိန်းခြင်း၊ ကောင်းမှုကုသိုလ် တိုးပွားအောင်ပြုခြင်း၊ ရိုသေထိုက်သူကို ရိုသေလေးစားခြင်း၊  သူတစ်ပါး၏ ကောင်းမှုကုသိုလ် ကိစ္စကြီးငယ်များ၌ ပါဝင်လုပ်ဆောင်ခြင်း၊ မိမိပြုလုပ်သော ကုသိုလ်အဖို့ကို အမျှအတန်းပေးဝေခြင်း၊ သူတစ်ပါးတို့က ကုသိုလ်အမျှပေးဝေသည်ကို ဝမ်းမြောက်ဝမ်းသာ သာဓုခေါ်ခြင်း၊ တရားကိုကောင်းစွာနာယူ မှတ်သားခြင်း၊ တရားကိုဟောပြောပြသခြင်း၊ အယူကိုဖြောင့်မှန်အောင် ယူခြင်းတည်းဟူသော ပုညကိရိယာ ဝတ္ထုဆယ်ပါးတို့ဖြစ်သည်။

ပြည်ထောင်စုသမ္မတ မြန်မာနိုင်ငံတော်အတွင်း နေထိုင်ကြသော ပြည်သူတို့ယုံကြည် ကိုးကွယ်ကြသည့် ဘာသာတရားများမှာ ထေရဝါဒဗုဒ္ဓဘာသာ၊ အစ္စလာမ်ဘာသာ၊ ဟိန္ဒူဘာသာ၊ မဟာယာနဗုဒ္ဓဘာသာ၊ ခရစ်ယာန် ဘာသာနှင့် အခြားနတ်ကိုးကွယ်မှု စသည်တို့ဖြစ်သည်။ ဘာသာတရား အားလုံးတို့၏ တူညီသော အဆုံးအမသည် မကောင်းမှုရှောင်၊ ကောင်းမှုဆောင်ကြရန်ဖြစ်သည်။ မကောင်းမှု အကုသိုလ်ပြုရန် စိတ်ကို ဦးဆောင်သော အကြောင်းတရားတို့မှာ လောဘ၊ ဒေါသ၊ မောဟတို့ဖြစ်သည်။

လောဘဖြစ်ပေါ်လာပုံမှာ တွေ့မြင်နေရသော အာရုံ၌ အသင့်အတင့် နှလုံးမသွင်းနိုင်သောကြောင့် အာသာငမ်းငမ်း တရကြမ်းပင် သာယာတပ်မက်နှစ်သက်မှု လောဘတရားဖြစ်ပေါ်လာသည်။ ထိုလောဘစိတ်သည် တွေ့ထိသောအာရုံကို မလွတ်စေဘဲ မကွေမကွာကပ်ထားသည်။ ဥပမာအားဖြင့် မျောက်နှဲစေးပင်နှင့်တူသည်။

မျောက်တစ်ကောင်သည်  မျောက်နှဲစေးပင်မှ အစေးတို့ကို  လက်နှင့်တို့သော် လက်ကပ်နေသည်။ နောက်တစ်ဖန် ခြေထောက်၊ နှုတ်သီးတို့နှင့်တို့သော် ကပ်နေပြန်၏။ ထို့အတူ အာရုံငါးပါးတို့ကို နှစ်သက်သောစိတ်ဖြင့် ဆုပ်ကိုင်ထားသူသည် လိုချင်တပ်မက်မှု လောဘတရားဖြစ်ရသည်။

ဒေါသစိတ်ဟူသည် လူတိုင်းနားလည်ကြသော ဆိုးသည့်စိတ်ဖြစ်သည်။ ဆိုးသည့်စိတ် ဖြစ်လာသောသူကို အမူအရာအားဖြင့် လည်းကောင်း၊ အသံအားဖြင့် လည်းကောင်း သိနိုင်သည်။ ဒေါသစိတ်ဖြစ်ပေါ်စေသော အကြောင်းတရားတို့မှာ သူတစ်ပါးကို မုန်းတီးသောစိတ်၊ လွမ်းဆွတ်ကြေကွဲ ဝမ်းနည်းသောစိတ်၊ ငိုကြွေးတမ်းတသောစိတ်၊ သူတစ်ပါးပစ္စည်းဥစ္စာ ပေါကြွယ်ဝသည်ကို မနာလိုသောစိတ်၊  မိမိပစ္စည်းဥစ္စာကို ဆွေမျိုးမိတ်သင်္ဂဟတို့အား မဝေငှလို၊ သူတစ်ပါးနှင့် မဆက်ဆံလိုသည့် ဝန်တိုသောစိတ်တို့သည် ဒေါသစိတ်ကို ဖြစ်ပေါ်စေသည်။ ဒေါသစိတ်သည် ကြမ်းတမ်းသည့် သဘောရှိသောကြောင့် တုတ်နှင့်ရိုက်ခတ်မိသော မြွေဟောက်နှင့်တူသည်ဟူ၍ လည်းကောင်း၊ မြွေဆိပ်နှင့်တူသည်ဟူ၍ လည်းကောင်း ခိုင်းနှိုင်းပြထားသည်။

ဝိစိကိစ္ဆာမောဟစိတ် ဟူသည် အာရုံ၌ယုံမှား သံသယဖြစ်၍ တွေဝေမိုက်မဲ မသိသောစိတ် တစ်နည်းအားဖြင့် အမှန်ကိုတိကျပြတ်သားအောင် မသိဘဲ အာရုံ၌တွေဝေ ယုံမှားသောစိတ်ဖြစ်သည်။ ဝိစိကိစ္ဆာမောဟစိတ် ရှစ်မျိုးရှိကြရာ ဘုရား၊ တရား၊ သံဃာ၌ ယုံမှားသံသယဖြစ်ခြင်း၊ အကျင့်၌ ယုံမှားသံသယဖြစ်ခြင်း၊ သံသရာ၏ ရှေ့အစွန်း၌ ယုံမှားသံသယဖြစ်ခြင်း၊ သံသရာ၏ နောက်အစွန်း၌ ယုံမှားသံသယဖြစ်ခြင်း၊ ရှေ့အစွန်းနှင့်နောက်အစွန်း နှစ်ပါးစလုံး၌ ယုံမှားသံသယရှိခြင်း၊ အကြောင်းတရားကြောင့် အကျိုးတရားဖြစ်သည်ဟူသော တရားတို့၌ ယုံမှားသံသယ ဖြစ်ခြင်းတို့သည် ဝိစိကိစ္ဆာမောဟ စိတ်မျိုးဖြစ်သည်။ ဥဒ္ဓစ္စမောဟ စိတ်ဆိုသည်မှာ အာရုံ၌တည်ကြည်မှု မရှိဘဲ ပျံ့လွင့်သောအားဖြင့် တွေဝေမိုက်မဲမသိသော စိတ်ဖြစ်သည်။ ၎င်းစိတ်သည် သမာဓိခေါ် တည်ကြည်မှုတရား၏ ဆန့်ကျင်ဘက်ဖြစ်သောကြောင့် တည်ကြည်ဖြောင့်မတ် မှုမရှိသူကို သမာဓိမရှိသူဟုခေါ်ကြသည်။

ဤသို့ဆိုလျှင် ပုထုဇဉ်လူသားတို့အဖို့ မည်သူတွေအပေါ် တည်ကြည်ဖြောင့်မတ်ရမည်နည်း ဆိုသော် နိုင်ငံသားတစ်ယောက်အနေဖြင့် နိုင်ငံတော်နှင့် တိုင်းရင်းသားပြည်သူတို့အပေါ် တည်ကြည်ဖြောင့်မတ်ရမည် ဖြစ်သည်။ စိတ်သည် သတ္တလောကကြီးကို ဦးဆောင်နေ၏။ သတ္တဝါအားလုံးတို့သည် စိတ်၏အလိုသို့ လိုက်ပါနေကြရ၏ဟု မြတ်ဗုဒ္ဓဟောကြားတော် မူထားသည်။ ထို့ကြောင့် မကောင်းမှုကိုရှောင်၍  ကောင်းမှုကိုဆောင်ကာ လူသားကမ္ဘာ သာယာရေး တည်ကြည်ဖြောင့်မတ်သော သမာဓိတရားနှင့် အားလုံးအပေါ် မေတ္တာထားကြပါရန် မြဝတီက တိုက်တွန်းနှိုးဆော် လိုက်ရပါသည်။ 

Read 628 times Last modified on Friday, 20 October 2017 08:26