SJ WorldNews - шаблон joomla Авто

နည်းပညာ အသုံးချမှုနှင့် နိုင်ငံကြီးသား စိတ်ဓာတ်

Monday, 30 October 2017 08:12 font size decrease font size decrease font size increase font size increase font size

နေပြည်တော်ရှိ လွှတ်တော်အဆောက်အအုံကို ဓာတ်ပုံရိုက်ယူရန် တူရကီနိုင်ငံ အခြေစိုက် TRT  သတင်းဌာန စင်ကာပူရုံးခွဲမှ

သတင်းထောက် စင်ကာပူနိုင်ငံသားတစ်ဦး၊ မလေးရှားနိုင်ငံသူ တစ်ဦးနှင့် မြန်မာနိုင်ငံမှ စကားပြန်တစ်ဦးတို့ပါဝင်သော အဖွဲ့သည် လျှပ်စစ်နှင့်စွမ်းအင်ဝန်ကြီးဌာန အနီးရှိ ကားမှတ်တိုင်ရှေ့၌ Hiace ခဲရောင်မော်တော်ယာဉ်ကို ရပ်တန့်ပြီး ယာဉ်နောက်တွင် နိုင်ငံခြားသားတစ်ဦးက ဒရုန်းယာဉ်တစ်စင်း လွှတ်တင်နေကြောင်း လွှတ်တော်လုံခြုံရေး ဆောင်ရွက်နေသည့် လှည့်ကင်းရဲတပ်ဖွဲ့က အောက်တိုဘာ ၂၇ ရက် နံနက် ၁ဝ နာရီခန့်တွင်  စစ်ဆေးတွေ့ရှိသည်။ ယင်းဖြစ်စဉ်နှင့်ပတ်သက်၍ နေပြည်တော်ကောင်စီနယ်မြေ ဇမ္ဗူသီရိမြို့နယ်အမှတ်(၅) နယ်မြေရဲစခန်း၌ (ပ)၄၁/၂ဝ၁၇၊ သွင်းကုန်/ပို့ကုန်ဥပဒေပုဒ်မ-၈ အရ သတင်းထောက်သုံးဦးနှင့် ယာဉ်မောင်းတို့ကို အရေးယူထားကြောင်း သိရသည်။

ဖြစ်စဉ်တွင် 16 GB Memory Card ပါသော Mavic အမျိုးအစား ခဲရောင်ဒရုန်းယာဉ်နှင့် အဝေးထိန်းကိရိယာတို့ကို တွေ့ရှိရခြင်းကြောင့် သွင်းကုန်/ပို့ကုန် ဥပဒေနှင့် အရေးယူမည်ဟု သိရသဖြင့် အဆိုပါနိုင်ငံခြားသားများ မြန်မာနိုင်ငံအတွင်း ဝင်ရောက်စဉ်က ဤပစ္စည်းများအား မည်သို့ယူဆောင်လာကြသည်ကို ပြည်သူများ ဝေဖန်သံကြားရသည်။ နယ်စပ်ကုန်သွယ်ရေး လမ်းကြောင်းများမှ  ရေပူစစ်ဆေးရေးစခန်းနှင့် မရမ်းချောင် စစ်ဆေးရေးစခန်းတို့တွင် လိုင်စင်မဲ့မော်တော်ယာဉ်များ၊ ခွင့်ပြုချက်ထက် ပိုမိုတင်သွင်းလာသော ကုန်ပစ္စည်းများ၊ ခွင့်ပြုချက်ပါသော ကုန်ပစ္စည်းများနှင့် ရောနှောသယ်ဆောင်လာသည့် တရားမဝင် ကုန်ပစ္စည်းများ ဖော်ထုတ်နိုင်ကြသည့် ဝန်ထမ်းများအား ချီးကျူးသံများလည်း ကြားရသည်။

မောင်းသူမဲ့လေယာဉ် (Drone) ကို မြန်မာနိုင်ငံလေကြောင်းနှင့် အာကာသပညာ တက္ကသိုလ် မောင်းသူမဲ့ လေယာဉ်သုတေသနဌာနက တီထွင်ခဲ့ပြီးဖြစ်သည်။ ကလေးမြို့နယ်အတွင်း ရေကြီးခဲ့သည့် ၂ဝ၁၅ ခုနှစ်က အဆိုပါဒရုန်းယာဉ်များ အသုံးပြု၍ ရှာဖွေကယ်ဆယ်ရေးနှင့် ပြန်လည်တည်ထောင်ရေး လုပ်ငန်းများအတွက် ဆောင်ရွက်ခဲ့ဖူးသည်။ ဆက်လက်၍ သယံဇာတများ ဆန်းစစ်လေ့လာခြင်း၊ သစ်တောဧရိယာများ တိုင်းတာခြင်း၊ မော်တော်ကားလမ်း၊ ရထားလမ်းဖောက်လုပ်ရန် လမ်းအူကြောင်း ရွေးချယ်ခြင်း၊ ဗီဒီယို ရိုက်ကူးခြင်းတို့အတွက် အသုံးပြုရန် မြန်မာနိုင်ငံလေကြောင်းနှင့် အာကာသပညာ တက္ကသိုလ် မောင်းသူမဲ့လေယာဉ် သုတေသနဌာနက ကူညီဆောင်ရွက်ပေးသည်။ အထူးသဖြင့် မီးငြှိမ်းသတ်သည့် လုပ်ငန်းများတွင် ဒရုန်းယာဉ်အသုံးပြုခြင်းဖြင့် မီးလောင်သည့်နေရာကို အပေါ်စီးမြင်ကွင်းမှ တိုက်ရိုက်သိရှိနိုင်သဖြင့် မီးသတ်ယာဉ်များနှင့် တပ်ဖွဲ့ဝင်များကို အသင့်လျော်ဆုံး လမ်းကြောင်းမှ အချိန်တိုအတွင်း စေလွှတ်နိုင်မည်ဖြစ်သည်။ မီးငြှိမ်းသတ်နိုင်ရန်နှင့် ရှာဖွေကယ်ဆယ်ရေး လုပ်ငန်းများ ဆောင်ရွက်ရာတွင် မီးကူးစက်နိုင်သော နေရာကို ကြိုတင်သိနိုင်သည့်အပြင် မီးလောင်သည့် နေရာ၌ ပိတ်မိနေသူလူများ ရှိ၊ မရှိကို ဒရုန်းယာဉ်က ကြည့်ရှုပေးနိုင်သည်။

မီးငြှိမ်းသတ်ပြီးနောက် မီးကြွင်းမီးကျန်ရှာဖွေခြင်းနှင့် ပျက်စီးဆုံးရှုံးမှု အခြေအနေများ သုံးသပ်နိုင်ခြင်း စသည့်အကျိုးကျေးဇူးများ ရရှိနိုင်သည်။ မြန်မာနိုင်ငံ လေကြောင်းနှင့် အာကာသပညာတက္ကသိုလ် မောင်းသူမဲ့ လေယာဉ်သုတေသနဌာနသည် မြန်မာနိုင်ငံ မီးသတ်တပ်ဖွဲ့နှင့် ပူးတွဲလေ့ကျင့်ထားပြီး ဒရုန်းများမှတစ်ဆင့် မီးသတ်ဆေးဘူးဖြင့်ငြှိမ်းသတ်ခြင်း၊  ရေအိတ်များပစ်ချခြင်းတို့ ဆောင်ရွက်နိုင်သည်အထိ ဆောင်ရွက် သွားမည်ဖြစ်သည်။ ထို့ပြင် ပြည်သူ့အကျိုးပြု လုပ်ငန်းများနှင့် သဘာဝဘေးအန္တရာယ် ကြုံတွေ့ရသည့် အချိန်များအတွက် အကူအညီတောင်းခံလာပါက သက်ဆိုင်ရာ၏ ခွင့်ပြုချက်အရ ကူညီဆောင်ရွက် ပေးမည်ဖြစ်ကြောင်း သိရသည်။

၂၁ ရာစု ကမ္ဘာ့နိုင်ငံများတွင် စက်မှုနည်းပညာ ထွန်းကားလျက်ရှိရာ ဝန်ထမ်းပေါင်း ၃၂ဝဝဝ ရှိသည့် နော်ဒီယာဘဏ် လုပ်ငန်းကြီးသည် စက်ရုပ်များနှင့် ဝန်ဆောင်မှုပေးသော ဘဏ်လုပ်ငန်းစနစ်သို့ ကူးပြောင်းရန် စမ်းသပ်အောင်မြင်မှုရသဖြင့် နောက်ထပ်လေးနှစ်ကြာ ကာလတွင်  ဘဏ်ဝန်ထမ်းအင်အား  ၆ဝဝဝ လျှော့ချပြီး စက်ရုပ်များ အစားထိုး၍ လုပ်ငန်းလည်ပတ်မည်ဖြစ်ကြောင်း အဆိုပါဘဏ်လုပ်ငန်း အမှုဆောင်အရာရှိချုပ်၏ ပြောကြားချက်ကို ကိုးကားပြီး  ဆင်ဟွာသတင်းဌာနက အောက်တိုဘာ ၂၇ ရက်တွင်ဖော်ပြထားသည်။ ရင်းနှီးငွေ သန်းပေါင်းအမြောက်အမြား မြှုပ်နှံထားသော  နည်းပညာလုပ်ငန်းကြီး Soft Bank အမှုဆောင်အရာရှိချုပ် မာဆာရိုရှီဆန်၏ ပြောပြချက်အရ ၎င်းတို့တီထွင်ထားသော စက်ရုပ်  047 AI သည် နောင်နှစ်ပေါင်း ၃ဝ ကြာသည့်အချိန်တွင်   သာမန်လူတစ်ဦး၌ ရှိနေသော ဉာဏ်ရည်ဉာဏ်သွေးထက်  အဆပေါင်း တစ်ရာပိုမိုရှိမည်ဟုဆိုသည်။

နောက် ၁ဝ နှစ် သို့မဟုတ် နှစ်ပေါင်း ၃ဝ သို့ လှမ်းမျှော်တွေးဆကြည့်သော် စက်ရုပ်နည်းပညာ ထွန်းကားသကဲ့သို့ အချို့လူသားတို့၏ ကြံစည်စိတ်ကူးမှုကလည်း စက်ရုပ်တို့၏ စွမ်းရည်ထက် ပိုလာမည်ဖြစ်သည်။ လူသားတို့ ဦးနှောက်စွမ်းရည်သည် အကန့်အသတ်မရှိ တွေးခေါ်ကြံစည်စိတ်ကူးနိုင်စွမ်း ရှိခြင်းကြောင့် လူတို့အစွမ်းသတ္တိကလည်း မဆုံးနိုင်အောင်ရှိကြသည်။ ထို့ကြောင့် သက်ရှိလူသားနှင့် စက်ရုပ်တို့ ဉာဏ်ရည် ဉာဏ်သွေး ပြိုင်ဆိုင်မှုမှာ အဆုံးမသတ်နိုင်ကြောင်း မာဆာရိုရှီဆန်က ထပ်လောင်းပြောကြားသည်။

နောင်လာမည့်အနာဂတ်တွင် စက်ရုပ်နည်းပညာ တိုးတက်သကဲ့သို့ ဒရုန်းနည်းပညာလည်း တိုးတက်လာမည် ဖြစ်သည်။ တိုးတက်လာမည့် နည်းပညာကို လူတို့အတွက် အကျိုးရှိရှိအသုံးချကြရာတွင် သက်ဆိုင်ရာ နိုင်ငံအလိုက် ပြဋ္ဌာန်းထားသော ဥပဒေနှင့်ညီညွတ်မှုရှိစေရန် ဧည့်သည်ရော အိမ်ရှင်တို့ကပါ    နိုင်ငံကြီးသား ပီသသော စိတ်ဓာတ်ဖြင့် လေးစားလိုက်နာကြပါရန် မြဝတီက တိုက်တွန်း နှိုးဆော်အပ်ပါသည်။  

Read 687 times Last modified on Monday, 30 October 2017 08:14