Print this page

နည်းပညာအောက်မှာ ဖုံးကွယ်လို့ မရတော့တဲ့မျက်နှာ

Tuesday, 10 March 2020 09:22 font size decrease font size decrease font size increase font size increase font size

ကမ္ဘာကြီးမှာနည်းပညာက တစ်ဆင့်ပြီး တစ်ဆင့်တိုးတက်လာပါပြီ။ အတိုးတက်ဆုံးကတော့ လူတူအသိဉာဏ်လို့ ဆိုရမယ့် AI  စနစ်နဲ့  မျက်နှာခွဲခြားသိရှိမှု စနစ်ပဲ ဖြစ်ပါတယ်။

ဒီနည်းပညာဟာ အရင်တုန်းကဆိုရင် လူတစ်ယောက်ရဲ့ မျက်နှာတစ်ပြင်လုံးကို တွေ့ရှိမှသာ ဒီလူဟာ ဘယ်သူဖြစ်တယ်၊ အသက်ဘယ်လောက်ရှိတယ်၊ ရာဇဝတ်မှုမှတ်တမ်းရှိလား၊ မရှိဘူးလား စတဲ့ အချက်အလက်တွေကိုသာ ဖော်ပြပေးနိုင်တာပါ။

အခုတော့    ဒီလိုမဟုတ်တော့ပါဘူး။ လူတစ်ယောက်ဟာ ရုပ်ဖျက်တဲ့အနေနဲ့ပဲ ဖြစ်ဖြစ်၊  ကျန်းမာရေးကြောင့်ပဲဖြစ်ဖြစ် အကြောင်းအမျိုးမျိုးကြောင့် နှာခေါင်းစည်း တပ်ထားရတယ် ဆိုရင်တောင်မှ အဲဒီလူဟာ ဘယ်သူဘယ်ဝါ ဖြစ်တယ်ဆိုတာကို ခွဲခြားသိရှိနိုင်တဲ့အထိ နည်းပညာက  တိုးတက်လာပါပြီ။

ဒီလိုနည်းပညာကို တိုးတက်အောင် ဖန်တီးလိုက်နိုင်တာက တရုတ်နိုင်ငံက နည်းပညာကုမ္ပဏီတစ်ခု ဖြစ်ပါတယ်။   ကုမ္ပဏီရဲ့ နာမည်ကတော့ ဟန်ဗွန်ပါ။

အခုဖန်တီးလိုက်တဲ့ နည်းပညာတစ်ခု အောင်မြင်ဖို့အတွက် ဟန်ဗွန်ကုမ္ပဏီက လူအယောက် ၂ဝ နဲ့ ၁ဝ နှစ်ကျော်ကြာသုတေသန လုပ်ခဲ့တာပါ။

အဲဒီသုတေသနမှာ   နှာခေါင်းစည်းမတပ်ထားတဲ့  လူခြောက်သန်းရဲ့ အချက်အလက်တွေ ပါဝင်တဲ့ ဒေတာဘေ့(စ်) တစ်ခုနဲ့ နှာခေါင်းစည်း တပ်ထားတဲ့ လူတွေပါဝင်တဲ့ ဒေတာဘေ့(စ်)တစ်ခု တည်ဆောက်မှုတို့လည်း ပါဝင်ပါတယ်။

တိုးတက်လာတဲ့ နည်းပညာအရဆိုရင် အဲဒီစနစ်ကို အပူချိန်တိုင်းကိရိယာ တစ်ခုနဲ့ ချိတ်ဆက်လိုက်တဲ့အခါ အပူချိန်တိုင်းခြင်း ခံရတဲ့လူရဲ့ ခန္ဓာကိုယ်အပူချိန်ကို တိုင်းတာပေးနိုင်ရုံသာမက   အဲဒီလူရဲ့နာမည်ကိုပါ သိရှိစေနိုင်ပါတယ်။  အဲဒီနောက်မှာတော့ စနစ်က စတင်အလုပ်လုပ်ပြီး   လိုအပ်တဲ့ အချက်အလက်တွေကို ထုတ်ပေးနိုင်ပါလိမ့်မယ်။

ဒါ့အပြင် အဲဒီစနစ်ဟာ အပူချိန်တိုင်းခြင်း ခံရသူရဲ့ ခန္ဓာကိုယ်အပူချိန်က ၃၈ ဒီဂရီစင်တီဂရိတ် ထက်ကျော် လွန်နေတယ်ဆိုရင်လည်း သက်ဆိုင်ရာကို သတိပေးပါလိမ့်မယ်။

ဒီစနစ်ကို  စတင်စမ်းသပ်သုံးစွဲတာကတော့ တရုတ်နိုင်ငံမှာ နိုဗယ်ကိုရိုနာဗိုင်းရပ် ကူးစက်မှု အရှိန်အဟုန် မြင့်တက်တဲ့ ကာလဖြစ်တဲ့  ဇန်နဝါရီလမှာပါ။  တစ်လနီးပါး ကြာပြီးတဲ့ နောက်မှာတော့  အဲဒီစနစ်ကို ဈေးကွက်ထဲ ဖြန့်လိုက်ပါတယ်။

အဲဒီနည်းပညာ အသုံးပြုထားတဲ့ ဟန်ဗွန်ကုမ္ပဏီရဲ့ အဓိက ထုတ်ကုန်နှစ်ခုကတော့ ရုံးဝင်ပေါက်တွေမှာ တပ်ဆင်တဲ့   မျက်နှာခွဲခြား သိရှိမှုစနစ်နဲ့  အမျိုးမျိုးသော စောင့်ကြည့်ကင်မရာတွေမှာ သုံးတဲ့    ပိုမိုအစွမ်းထက်  မျက်နှာခွဲခြား သိရှိမှုစနစ်တို့ ဖြစ်ပါတယ်။

ဒီစနစ်ဟာ လူအယောက်  ၃ဝ  အထိ ပါဝင်တဲ့ လူစုလူဝေးတစ်ခုမှာ လူအားလုံးကို ခွဲခြားသိရှိနိုင်ပြီး    ကြာမြင့်ချိန်ကလည်း တစ်စက္ကန့်လောက်သာ ရှိတယ်လို့ ဟန်ဗွန်ကုမ္ပဏီ ဒုတိယဥက္ကဋ္ဌ ဟွမ်လေက ပြောပါတယ်။

အခုစနစ်ရဲ့တိကျမှု ရာခိုင်နှုန်းကလည်း မြင့်မားပါတယ်။ နှာခေါင်းစည်းတပ်ထားတဲ့ သူတွေဆိုရင်  ၉၅  ရာခိုင်နှုန်းအထိနဲ့ နှာခေါင်းစည်းမတပ်ထားတဲ့ သူတွေဆိုရင် ၉၉ ဒသမ ၅ ရာခိုင်နှုန်းအထိ ခွဲခြားသိရှိနိုင်တာပါ။

ဒါပေမဲ့ နှာခေါင်းစည်းလည်း တပ်ထားမယ်၊ နေကာမျက်မှန်လည်း တပ်ထားမယ် ဆိုရင်တော့ ဒီစနစ်က အလုပ်မလုပ်နိုင်ပါဘူး။ ဒီလိုအခြေအနေကလွဲလို့ ကျန်အခြေအနေတွေမှာတော့   စနစ်ကကောင်းစွာ အလုပ်လုပ်ပါတယ်။

ဒါကြောင့် ရုပ်ပြောင်းရုပ်လွှဲလုပ်တာကလွဲလို့ နည်းပညာမြင့်မားလာတဲ့ ဒီလိုခေတ်ကြီးမှာ ကိုယ်ကဘယ်သူ ဘယ်ဝါဖြစ်တယ်ဆိုတာကို ဖုံးကွယ်ဖို့ဆိုတာ မဖြစ်နိုင်တော့တဲ့ အနေအထားကို ရောက်ရှိလာပြီ ဖြစ်ပါတယ်။

Read 80 times Last modified on Tuesday, 10 March 2020 09:23