SJ WorldNews - шаблон joomla Авто

၁၉၆၅ ခုနှစ်မှ ၁၉၈၅ ခုနှစ်အထိ (စင်ထရယ်) အထက(၁) လသာ ကျောင်းသားဟောင်းများ၏ (၂၇) ကြိမ်မြောက် အာစရိယပူဇော်ပွဲ အခမ်းအနား ကျင်းပ

Sunday, 20 October 2019 19:35 font size decrease font size decrease font size increase font size increase font size

နေပြည်တော်၊ အောက်တိုဘာ - ၂ဝ

 ၁၉၆၅ ခုနှစ်မှ ၁၉၈၅ ခုနှစ်အထိ (စင်ထရယ်) အထက(၁) လသာ ကျောင်းသားဟောင်းများ၏ (၂၇) ကြိမ်မြောက် အာစရိယပူဇော်ပွဲ အခမ်းအနားကို ရန်ကုန်မြို့၊ လသာမြို့နယ်ရှိ အဆိုပါကျောင်း၊ ဗဟိုစံပြခန်းမ၌ ကျင်းပပြုလုပ်သည်။

  အဆိုပါ အခမ်းအနားသို့ ဆရာကြီး၊ ဆရာမကြီး ၅ဝ ဦး တက်ရောက်ကန်တော့ခံကြပြီး အလယ်တန်းမှ အထက်တန်းအထိ ပညာသင်ကြားခဲ့သည့် တပ်မတော် ကာကွယ်ရေး ဦးစီးချုပ် ဗိုလ်ချုပ်မှူးကြီး မင်းအောင်လှိုင်နှင့်အတူ ၁၉၆၅ ခုနှစ်မှ ၁၉၈၅ ခုနှစ်အထိ ကျောင်းသားဟောင်းများ တက်ရောက်၍ ဆရာကြီး၊ ဆရာမကြီးများအား ကန်တော့ကြသည်။

  ဦးစွာ တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်နှင့် ကျောင်းသားဟောင်းများသည် အာစရိယပူဇော်ပွဲ အခမ်းအနားပြုလုပ်သည့် ဗဟိုစံပြခန်းမသို့ ရောက်ရှိကြရာ  အာစရိယပူဇော်ပွဲ ကျင်းပရေး ကော်မတီအဖွဲ့ဝင်များက ကြိုဆိုကြသည်။ ယင်းနောက် တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က  အခမ်းအနားသို့တက်ရောက်လာသည့် ဆရာကြီး၊ ဆရာမကြီးများအား ရင်းရင်းနှီးနှီး လိုက်လံ ဂါရဝပြုနှုတ်ဆက်ကာ ကန်တော့ပစ္စည်းများ ပေးအပ်၍ လက်ဆယ်ဖြာ ဦးထိပ်ထား ရိုသေစွာ ဂါရဝပြုကန်တော့ရာ ဆရာကြီး၊ ဆရာမကြီးများက သြဝါဒစကား ပြန်လည်ချီးမြှင့်သည်။ ၎င်းနောက် တပ်မတော် ကာကွယ်ရေးဦးစီးချုပ်သည် တက်ရောက်လာကြသည့် ကျောင်းသားဟောင်းများကို ရင်းရင်းနှီးနှီး နှုတ်ဆက်ကာ ဂုဏ်ထူးရကျောင်းသား၊ ကျောင်းသူများအား ချီးမြှင့်ငွေ ပေးအပ်ခဲ့သည်။

  ထို့နောက် အခမ်းအနားကို အစီအစဉ်အတိုင်း ဆက်လက် ကျင်းပပြုလုပ်ရာ ကျောင်းခေါင်းလောင်း ၂၇ ချက်တီး၍ ဟိုက်စကူးကျောင်းတော်ကြီး သီချင်းအား သီဆိုဂုဏ်ပြုပြီး အခမ်းအနားကို စတင်ဖွင့်လှစ်သည်။

  ထို့နောက် အခမ်းအနား တက်ရောက်လာကြသည့် ကျောင်းသားဟောင်းများက ကျေးဇူးရှင် ဆရာကြီး၊ ဆရာမကြီးများအား လက်ဆယ်ဖြာ ဦးထိပ်ထား၍ ထုံးတမ်းစဉ်လာ နှင့်အညီ ရိုသေစွာ ဂါရဝပြု ကန်တော့ကြရာ ကန်တော့ခံ ဆရာကြီး၊ ဆရာမကြီးများ ကိုယ်စား ဆရာကြီး ဦးကောင်းနှင့် ဆရာမကြီး ဒေါ်ဖြူဖြူတို့က သြဝါဒစကား  ချီးမြှင့်ပြောကြားသည်။

  ထို့နောက် ကျောင်းအုပ်ကြီး ဦးတင်မောင်အေး၊ အာစရိယ ပူဇော်ပွဲကျင်းပရေး ကော်မတီဥက္ကဌ ဦးတင်မောင်မြင့်နှင့် ကျန်းမာရေးနှင့် ကူညီစောင့်ရှောက်မှုအဖွဲ့ နာယက ဦးခင်မောင်စိန်တို့က နှုတ်ခွန်းဆက်ဂါရဝစကားများ အသီးသီး ပြောကြားကြသည်။ ယင်းနောက် ဆရာကြီး၊ ဆရာမကြီးများအား ကျန်းမာရေး စောင့်ရှောက်ပေးခဲ့ကြသော ဆရာဝန်များ၊ သူနာပြုများနှင့် အာစရိယပူဇော်ပွဲတွင် ကူညီဆောင်ရွက်ပေးခဲ့ကြသည့် ဆရာမများအား လက်ဆောင်ပစ္စည်းများ ပေးအပ်ကြသည်။ ထို့နောက် တက်ရောက် လာကြသည့် ကျောင်းသားဟောင်းများကိုယ်စား ကျောင်းသားဟောင်း ဦးဇော်လွင်က ကျေးဇူးတင်စကား ပြောကြားခဲ့ပြီး ဆရာကြီး၊ ဆရာမကြီးများအား ကန်တော့ပစ္စည်း များဖြင့် ကန်တော့ကြသည်။ ယင်းနောက် ဟိုက်စကူးကျောင်းတော်ကြီး သီချင်းဖြင့် သီဆို ဂုဏ်ပြုကြပြီး အမှတ်တရ စုပေါင်းဓာတ်ပုံများ ရိုက်ခဲ့ကြကြောင်း သတင်း ရရှိသည်။

Read 126 times Last modified on Sunday, 20 October 2019 19:46