SJ WorldNews - шаблон joomla Авто

တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင် နောင်တရားမြို့ရှိ ဒေသခံ ပြည်သူများအား ရင်းရင်းနှီးနှီး တွေ့ဆုံ

Monday, 02 December 2019 23:26 font size decrease font size decrease font size increase font size increase font size

နေပြည်တော်၊ ဒီဇင်ဘာ - ၂

မိမိဒေသ ဖွံ့ဖြိုးတိုးတက်ရေးအတွက် အဓိကလိုအပ်ချက်ဖြစ်သည့် လူသား အရင်းအမြစ်သည် အရေးအကြီးဆုံးဖြစ်သဖြင့် အသိပညာ၊ အတတ်ပညာနှင့် ပြည့်စုံသည့် မျိုးဆက်သစ်များ မွေးထုတ်ပေးရန် အတွက် ပညာရေးကို အားပေးကြရန်လိုကြောင်း၊ မြေသယံဇာတများစွာရှိသည့် အတွက် စိုက်ပျိုးရေးလုပ်ငန်းနှင့် တွဲဖက်၍ မွေးမြူရေးလုပ်ငန်းကိုပါ ဆောင်ရွက်ကြစေလိုပြီး သမ္မာ အာဇီဝနည်းလမ်းများဖြင့် မိမိဒေသတစ်ခုလုံး ဖွံ့ဖြိုးတိုးတက်အောင် ဆောင်ရွက်ကြစေလိုကြောင်းဖြင့် တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က ယနေ့မွန်းလွဲပိုင်းတွင် ရှမ်းပြည်နယ်(တောင်ပိုင်း)၊ ပင်လောင်းမြို့နယ်၊ နောင်တရားမြို့ ရှိ ဒေသခံပြည်သူများအား ရင်းရင်းနှီးနှီး တွေ့ဆုံစဉ် ထည့်သွင်းပြောကြားသည်။

အဆိုပါ တွေ့ဆုံပွဲသို့ တပ်မတော်ကာကွယ်ရေး ဦးစီးချုပ်နှင့်အတူ ကာကွယ်ရေးဦးစီးချုပ် (ရေ)ဗိုလ်ချုပ်ကြီး တင်အောင်စန်း၊ ကာကွယ်ရေးဦးစီးချုပ်(လေ) ဗိုလ်ချုပ်ကြီး မောင်မောင်ကျော်၊ ကာကွယ်ရေးဦးစီးချုပ်ရုံး(ကြည်း)မှ တပ်မတော်အရာရှိကြီးများ၊ အရှေ့ပိုင်းတိုင်း စစ်ဌာနချုပ်တိုင်းမှူး၊ ပအိုဝ်းကိုယ်ပိုင် အုပ်ချုပ်ခွင့်ရဒေသ ဦးစီးဥက္ကဋ္ဌ ဦးခွန်စံလွင်၊ ပအိုဝ်းကိုယ်ပိုင် အုပ်ချုပ်ခွင့်ရဒေသမှ လွှတ်တော်ကိုယ်စားလှယ်များ၊ ဌာနဆိုင်ရာ ၀န်ထမ်းများ၊ ရပ်မိရပ်ဖများနှင့် ဒေသခံပြည်သူများ တက်ရောက်ကြသည်။

ဦးစွာ တပ်မတော်ကာကွယ်ရေး ဦးစီးချုပ်နှင့် အဖွဲ့ဝင်များသည် တွေ့ဆုံပွဲပြုလုပ်မည့် နောင်တရားမြို့၊ ရတနာရန်နိုင်စေတီသို့ ရောက်ရှိကြရာ ဦးစီးဥက္ကဋ္ဌ ဦးခွန်စံလွင်နှင့် ဒေသခံပြည်သူများက လှိုက်လှိုက်လှဲလှဲ ကြိုဆိုနှုတ်ဆက်ကြသည်။ ထို့နောက် ခင်းကျင်း ပြသထားသည့် ဒေသထွက် သီးနှံများနှင့် သီးနှံထွက်ကုန်ပစ္စည်းများအား ကြည့်ရှုကြပြီး  အပြန်အလှန် ဆွေးနွေးကြသည်။ယင်းနောက် ဒေသခံပြည်သူများနှင့် ရင်းရင်းနှီးနှီး တွေ့ဆုံ ရာတွင် ပင်လောင်းမြို့နယ်၊ အထွေထွေ အုပ်ချုပ်ရေးမှူးက ဒေသဆိုင်ရာ အချက်အလက်များနှင့် ဒေသအတွင်း စီးပွားရေး အခြေအနေများနှင့် ဒေသခံပြည်သူများက ဒေသတွင်း စိုက်ပျိုးရေးဆိုင်ရာနှင့် ဖွံ့ဖြိုးတိုးတက်ရေး ဆိုင်ရာ လိုအပ်ချက်များကို အသီးသီး တင်ပြကြသည်။

တပ်မတော်ကာကွယ်ရေးဦးစီးချုပ်က ဒေသဖွံ့ဖြိုးရေး ဆိုင်ရာကိစ္စရပ်များနှင့် ပတ်သက်၍ ပြန်လည် ဆွေးနွေးပြောကြားရာတွင် တပ်မတော်၏ တာဝန်မှာ နိုင်ငံတော် ကာကွယ်ရန်ဖြစ်ပြီး ပြည်သူလူထု၏ အကျိုးစီးပွား ကို ဖော်ဆောင်ရန်၊ အသက်အိုးအိမ် စည်းစိမ်ကို ကာကွယ်စောင့်ရှောက်ရန် အတွက်လည်း တာဝန်ရှိကြောင်း၊  ထို့ကြောင့် ပအိုဝ်းကိုယ်ပိုင် အုပ်ချုပ်ခွင့်ရဒေသရှိ ပြည်သူများ၏ အကျိုးစီးပွားအတွက် တပ်မတော်က တတ်နိုင်သမျှ ကူညီပံ့ပိုး ဆောင်ရွက်ပေးလျက်ရှိကြောင်း၊ ပင်လောင်းမြို့နယ်သည် စိုက်ပျိုးရေးကို အခြေခံသော ဒေသတစ်ခုဖြစ်ပြီး အာလူး၊ လက်ဖက်၊  စပါး၊ မြေပဲ၊ ပဲစင်းငုံ၊ အစေ့ထုတ်ပြောင်း၊ ပဲပုတ်နှင့် ယာကွန်တို့ကို စိုက်ပျိုးကြသည်ဟု သိရှိရပါကြောင်း၊ ထိုသို့စိုက်ပျိုးရာတွင် ဓာတ်မြေသြဇာ သုံးစွဲမှုများကို ဆင်ခြင်သုံးစွဲကြစေလိုကြောင်း၊  ဓာတ်မြေသြဇာသည် လူသားတို့၏ ကျန်းမာရေးကို  အန္တရာယ်ဖြစ်စေနိုင်သောကြောင့် သဘာဝဓာတ်မြေသြဇာ ကိုသာ စနစ်တကျ သုံးစွဲကြစေလိုကြောင်း၊ ပင်လောင်းဒေသသည် မြေသယံဇာတ များစွာရှိသည့်အတွက် စိုက်ပျိုးရေးအပြင် မွေးမြူရေးကိုပါ ဆောင်ရွက်နိုင်သည့် ဒေသဖြစ်ကြောင်း၊ မိမိတို့နိုင်ငံတွင်  နို့ထွက်ပစ္စည်းလိုအပ်ချက် ဒေါ်လာ သန်း ၁၀၀ ကျော်ဘိုးကို နှစ်စဉ်ပြည်ပမှ တင်သွင်းရလျက် ရှိကြောင်း၊ ထို့ကြောင့် နို့စားနွား၊ အသားစားနွား မွေးမြူရေးလုပ်ငန်းများကို ဆောင်ရွက်ခြင်းဖြင့် ပြည်ပမှနို့ထွက်ပစ္စည်း လိုအပ်ချက်ကို လျှော့ချနိုင်မည်ဖြစ်ပြီး နို့နှင့်နို့ ထွက်ပစ္စည်းများ၊ အသားထွက် ကုန်များ ထုတ်လုပ်ခြင်းဖြင့်  ဒေသဖွံ့ဖြိုး တိုးတက်မှုကို ရရှိစေနိုင်မည်ဖြစ်ကြောင်း၊ ထို့ပြင်နွားချေးမှ ရရှိသော သဘာဝ ဓာတ်မြေသြဇာနှင့် တီကောင်မြေဆွေးများကိုလည်း စိုက်ပျိုးရေး လုပ်ငန်းများတွင် အသုံးပြုနိုင်ကြောင်း၊ စိုက်ပျိုးရေးထုတ်ကုန် ၊ မွေးမြူရေးထုတ်ကုန်များကို အရည်အသွေး ပြည့်မီစွာဖြင့် ပြည်ပသို့ တင်ပို့နိုင်သည်အထိ ထုတ်လုပ်နိုင်ရမည်ဖြစ်ကြောင်း၊ ပြည်ပသို့ တိုက်ရိုက်တင်ပို့ရန် အတွက် ဟဲဟိုးလေယာဉ်ကွင်းကို အသုံးပြုနိုင်သည့် အခွင့်အလမ်း ရှိနေပြီဖြစ်ကြောင်း ပြောကြားသည်။

ဆက်လက်ပြီး ဓာတ်မြေသြဇာများနှင့် ပိုးသတ်ဆေးများသည် ကင်ဆာရောဂါများကို ဖြစ်စေနိုင် သောကြောင့် အတတ်နိုင်ဆုံး မသုံးစွဲကြစေလိုကြောင်း၊ ပိုးသတ်ဆေးများကို မသုံးမဖြစ် အသုံးပြုရပါက သတ်မှတ်စံချိန်စံညွှန်းများ အတိုင်းသာ စနစ်တကျ သုံးစွဲရန်လိုကြောင်း၊ လူတိုင်းသည် မိမိဒေသ ဖွံ့ဖြိုးတိုးတက်ရေးကို လိုလားကြသော်လည်း သမ္မာအာဇီဝနည်းဖြင့်သာ မိမိအကျိုး၊ ဒေသအကျိုးကို ဆောင်ရွက်ကြစေလိုကြောင်း၊ ဒေသတစ်ခု၊ နိုင်ငံတစ်နိုင်ငံ ဖွံ့ဖြိုးတိုးတက်ရေးအတွက် လျှပ်စစ်စွမ်းအားပြည့်စုံလုံ လောက်ခြင်း၊ ဆက်သွယ်မှုစနစ် ကောင်းမွန်ခြင်း၊ လမ်းပန်း ဆက်သွယ်ရေးကောင်းမွန်ခြင်းနှင့်  စည်းကမ်းတကျ လုပ်ဆောင်တက်သော လူသားအရင်းအမြစ် ပြည့်စုံမှုတို့ လိုအပ်ပါကြောင်း၊ ထိုအထဲတွင် လူသားအရင်းအမြစ်သည် အရေးအကြီးဆုံးဖြစ်ပြီး အတတ်ပညာ၊ အသိပညာနှင့် ပြည့်စုံသူများ မွေးထုတ်ပေးရမည်ဖြစ်ကြောင်း၊ အတတ်ပညာသည် အင်ဂျင်နီယာပညာ၊ ဆရာဝန်ပညာ၊ စိုက်ပျိုးရေးပညာ စသည့် သင်ကြားရသည့် ပညာရပ်များဖြစ်ပြီး အသိပညာသည် ဖြတ်သန်းလာသည့် အတွေ့အကြုံများ ဖြစ်ကြောင်း၊ ငယ်စဉ်ကပင် ကလေးငယ်များအား ကျောင်းထားစေလိုပြီး အတန်းစဉ် ကူးပြောင်းမှု ရာခိုင်နှုန်းမြင့်မားရန်လည်း လိုအပ်ကြောင်း၊  ပင်လောင်းဒေသတွင်လည်း ပညာတတ်များ ထွက်ပေါ်လာရန် လိုအပ်ပြီး ဒေသအတွက် လက်တွေ့ လိုအပ်ချက်များအပေါ် မူတည်၍  စိုက်ပျိုးမွေးမြူရေး ဆိုင်ရာ ကျောင်း များ၊ ကောလိပ်များ၊ တက္ကသိုလ်များ တစ်ဆင့်ပြီးတစ်ဆင့် ဖွင့်လှစ်နိုင်ရေး စဉ်းစားဆောင်ရွက်ရန်လိုကြောင်း ပြောကြားသည်။

ထို့ပြင် အုပ်ချုပ်ရေးပိုင်းဆိုင်ရာများတွင်လည်း ပအိုဝ်းကိုယ်ပိုင် အုပ်ချုပ်ခွင့်ရဒေသ၊ အုပ်ချုပ်ရေးပိုင်း ဆိုင်ရာများနှင့် အခြားကဏ္ဍများတွင်လည်း ပအိုဝ်းလူမျိုးများ၊ ဒေသခံများ ၀င်ရောက် ပါဝင် လုပ်ကိုင်ဆောင်ရွက်နိုင်ရေးအတွက် ကြိုးစားကြရမည်ဖြစ်ကြောင်း၊ စားကုန်၊ သောက်ကုန်၊ သုံးကုန်ပစ္စည်းများကို ဒေသတွင်း ထုတ်လုပ်နိုင်အောင် ဆောင်ရွက်ကြရမည်ဖြစ်ပြီး အထူးသဖြင့် စားကုန်အတွက် ရေခံ၊ မြေခံ အခြေခံရှိပြီးသားဖြစ်၍ အထွက်နှုန်းကောင်း အောင်ကြိုးစားကြ ရမည်ဖြစ်ကြောင်း၊ စိုက်ပျိုးရေးတွင် ရေ၊ အစာ၊ ဆေးကို လူသားများကဲ့သို့ သင့်တင့် လျောက်ပတ်အောင် သုံးစွဲပေးရမည်ဖြစ်ပြီး စနစ်တကျ ပြုပြင်ထိန်းသိမ်းခြင်းများဖြင့် အထွက်နှုန်းတိုးအောင် ဆောင်ရွက်ကြရမည်ဖြစ်ကြောင်း၊ မိရိုးဖလာ နည်းလမ်းများကိုသာ ဖက်တွယ်နေ၍မရဘဲ ခေတ်မီနည်းစနစ်များဖြင့် အထွက်နှုန်းနှင့် အရည်အသွေး ကောင်းစေနိုင်မည့် နည်းလမ်းများကို သင်ယူ သုံးစွဲရမည်ဖြစ်ကြောင်း၊ ဒေသဖွံ့ဖြိုးရေးအတွက် အဓိကလိုအပ်ချက်ဖြစ်သည့် လျှပ်စစ်စွမ်းအင် ထုတ်ယူသုံးစွဲမှုတွင်လည်း သဘာဝပတ်ဝန်းကျင်နှင့် ကျန်းမာရေး၊ လူမှုစီးပွားဘ၀ကို  ဆိုးဆိုးရွားရွား ထိခိုက်စေနိုင်မည့် အကြောင်းအရာများမှအပ ကန့်ကွက်မှုများကို စဉ်းစား ဆောင်ရွက်ကြစေလို ကြောင်း၊ လျှပ်စစ်စွမ်းအား မရှိပါက စီးပွားရေးဖွံ့ဖြိုးတိုးတက်မှုကို နောက်ကျစေနိုင်သဖြင့် လျှပ်စစ်စွမ်းအားကို အကျိုးရှိရှိ ထုတ်လုပ်သုံးစွဲကြစေလိုကြောင်း၊ ထင်းသုံးစွဲမှုများသည် ရာသီဥတုကို ဖောက်ပြန်စေနိုင်သော်လည်း လိုအပ်ချက်များ ရှိနေဆဲဖြစ်၍ ရပ်မိရပ်ဖများ၏ အစီအမံဖြင့် တစ်အုပ်တစ်မ သစ်တော၊ ထင်းစိုက်ခင်းများကို ဆောင်ရွက်ပြီး သစ်ပင်စိုက်ပျိုးကြစေလိုကြောင်း၊ အချုပ်အားဖြင့် မိမိဒေသ ဖွံ့ဖြိုးတိုးတက်ရေး အတွက် စိုက်ပျိုးမွေးမြူရေးကို စနစ်တကျဖြင့် အောင်မြင်အောင် ဆောင်ရွက်ကြစေ လိုကြောင်း၊ ပညာရေးကို အားပေးရန်လိုပြီး အသိပညာ၊ အတတ်ပညာများ ပြည့်စုံသော ပညာရှင်များပေါ်ထွက်စေရေး ကြိုးစားအားပေးကြစေလိုကြောင်း၊ တိုင်းပြည်အတွက်လည်း ကြိုးစားကြစေလိုကြောင်း၊ အမျိုးသားယဉ်ကျေးမှု စရိုက်လက္ခဏာကို ထိန်းသိမ်းနိုင်မည် ဆိုပါက စည်းလုံးညီညွတ်မှု ရရှိမည်ဖြစ်ပြီး ဖွံ့ဖြိုးတိုးတက်မည်ဖြစ်ကြောင်း၊ စည်းကမ်း လိုက်နာမှုမရှိ၊ ဥပဒေကိုလေးစား လိုက်နာမှုမရှိပါက တိုးတက်မှုမရှိဘဲ ဆုတ်ယုတ်မှုများသာ ဖြစ်လာနိုင်ကြောင်း ဆွေးနွေးပြောကြားသည်။

ထို့နောက် တပ်မတော်ကာကွယ်ရေး ဦးစီးချုပ်က ဒေသခံပြည်သူများအတွက် စား သောက်ဖွယ်ရာများအား ပေးအပ်ရာ ပအိုဝ်းကိုယ်ပိုင် အုပ်ချုပ်ခွင့်ရဒေသ ဦးစီးဥက္ကဋ္ဌ ဦးခွန်စံလွင်နှင့် တာဝန်ရှိသူများက လက်ခံ ရယူကြပြီး ဒေသထွက်သီးနှံများအား လက်ဆောင်အဖြစ် ပြန်လည်ပေးအပ်ကြသည်။ ယင်းနောက် တပ်မတော်ကာကွယ်ရေး ဦးစီးချုပ်သည် တက်ရောက်လာကြသူများအား ရင်းရင်းနှီးနှီး လိုက်လံနှုတ်ဆက်ခဲ့သည်။

၎င်းနောက် တပ်မတော်ကာကွယ်ရေးဦးစီးချုပ်နှင့် အဖွဲ့ဝင်များသည် နောင်တရားမြို့၊ နောင်ဘုရားကုန်းသို့ သွားရောက်၍ နောင်ပီ၊ ပေါ့အင်၊ လွယ်မော ကျေးရွာအုပ်စုများမှ လက်ဖက်စိုက်ဒေသခံ တောင်သူများအား တွေ့ဆုံကာ လက်ဖက်သီးနှံနှင့် ယာကွန်သီးနှံ တန်ဖိုးမြင့်ထုတ်ကုန်များ ထုတ်လုပ်ဖြန့်ဖြူးမှု အခြေအနေများနှင့် ဒေသဖွံ့ဖြိုး တိုးတက်ရေးအတွက် လက်ဖက်ခြောက်စက်ရုံ ဆောက်လုပ်နိုင်မည့် အခြေအနေများအား အပြန်အလှန် ဆွေးနွေးခဲ့ကြပြီး တက်ရောက်လာကြသူများအား ရင်းရင်းနှီးနှီး နှုတ်ဆက်ခဲ့ကြောင်း သတင်းရရှိသည်။

Read 58 times Last modified on Monday, 02 December 2019 23:31