SJ WorldNews - шаблон joomla Авто

(၇၂)နှစ်မြောက် ချင်းအမျိုးသားနေ့တွင် တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင် ပေးပို့သည့် သဝဏ်လွှာ

Thursday, 20 February 2020 09:09 font size decrease font size decrease font size increase font size increase font size

ချစ်ခင်လေးစားရပါသော ချင်းတိုင်းရင်းသား ညီအစ်ကို မောင်နှမများ ခင်ဗျား-

ယနေ့ကျရောက်သည့် (၇၂)နှစ်မြောက် ချင်းအမျိုးသားနေ့အခါ သမယတွင် ချင်းတိုင်းရင်းသား ညီအစ်ကို မောင်နှမများအားလုံး စိတ်၏ချမ်းသာခြင်း၊ ကိုယ်၏ကျန်းမာခြင်းနှင့် ပြည့်စုံနိုင်ကြပါစေကြောင်း ဆုမွန် ကောင်း တောင်းလျက် နှုတ်ခွန်းဆက်သ အပ်ပါသည်။

ချင်းတိုင်းရင်းသားများသည်  တိဗက်မြန်မာ အနွယ်ဝင်များဖြစ်ပြီး တိဗက်မှတစ်ဆင့် မြန်မာနိုင်ငံအတွင်းသို့ ဝင်ရောက်ပျံ့နှံ့ နေထိုင်ခဲ့ကြခြင်း ဖြစ်သည်ဟု မှတ်သားရပါသည်။ အောက်ချင်းငှက်နှင့် တောင်ဇလပ်ပန်းတို့သည် ချင်းပြည်နယ်နှင့် ချင်းအမျိုးသားတို့၏ သင်္ကေတများ ဖြစ်ပါသည်။

တောင်ဇလပ်ပန်းသည် ရဲရဲနီပြီး သတ္တိနှင့် ရဲရင့်မှုကို ပြသကာ တောင်စွန်းတောင်ဖျားများပေါ်တွင် ဝင့်ကြွားစွာ ပေါက်ရောက်တတ်သောကြောင့် ချင်းလူမျိုးတို့၏ ရဲရင့်မှု၊ သတ္တိရှိမှုနှင့် ဝင့်ကြွားမှုဟူသည့် လက်ရုံးရည်ကို ပြသခြင်း ဖြစ်ပါသည်။ အောက်ချင်းငှက်တို့သည် မေတ္တာတရားနှင့် သစ္စာတရားကြီးမားသော ငှက်မျိုးဖြစ်သည့်အတွက် အောက်ချင်း ငှက်သင်္ကေတသည်လည်း ချင်းလူမျိုးတို့၏ မေတ္တာတရားနှင့် သစ္စာတရားကြီးမားမှုကို ဖော်ညွှန်းလျက်ရှိပါသည်။ အောက်ချင်းငှက်ဖိုနှင့် ငှက်မတို့၏ သစ္စာတရား ကြီးမားစွာဖြင့် ဥမကွဲ၊ သိုက်မပျက် အတူတကွ နေထိုင်တတ်သည့် အလေ့အကျင့် အတိုင်းပင် ချင်းလူမျိုးတို့သည် ကျွန်ုပ်တို့ ပြည်ထောင်စု မြန်မာနိုင်ငံတော်ကြီးတွင် ဥမကွဲ၊ သိုက်မပျက် အတူတကွ လက်တွဲနေထိုင် လာခဲ့သည်မှာ နှစ်ပေါင်းများစွာ ကြာမြင့်ခဲ့ပြီ ဖြစ်ပါသည်။

ရှေးအတိတ်ကာလ နယ်ချဲ့ဆန့်ကျင်ရေးနှင့် ဖက်ဆစ်တော်လှန်ရေး တိုက်ပွဲများတွင် ချင်းလူမျိုး မျိုးချစ်ပုဂ္ဂိုလ်ကြီးများ ရွပ်ရွပ်ချွံချွံ၊ စွမ်းစွမ်းတမံ ပါဝင်ဆောင်ရွက်ခဲ့ပြီး ချင်းတိုင်းရင်းသားများအား ခေါင်းဆောင်ကာ တိုက်ပွဲဝင်ခဲ့ကြသည့်  ဗိုလ်ကြွန်ဘိခ်နှင့်  ဗိုလ်ခိုင်ကမ်းတို့သည် ရဲစွမ်းသတ္တိနှင့် ပြည့်စုံသော  ချင်းတိုင်းရင်းသား ခေါင်းဆောင်ကြီးများအဖြစ်  ဂုဏ်ယူဖွယ်ရာ မှတ်တမ်းများ ရှိခဲ့ပြီး ဖြစ်ပါသည်။  နယ်ချဲ့လက်အောက် ကျရောက်ခဲ့စဉ် ဗြိတိသျှအစိုးရထံမှ ချင်းလူမျိုးတို့၏အခွင့်အရေးနှင့် နစ်နာချက်များ တောင်းယူရန်အတွက် ချင်းတောင်ညီညွတ်ရေးအဖွဲ့ကို ၁၉၂၈ ခုနှစ်၊ ဖေဖော်ဝါရီလ ၂ဝ ရက်နေ့တွင်  စတင်ဖွဲ့စည်းခဲ့ပါသည်။  လွတ်လပ်ရေး ရရှိပြီးနောက် ၁၉၄၈ ခုနှစ်၊ ဖေဖော်ဝါရီလ ၂ဝ ရက်နေ့တွင် ချင်းပြည်နယ်၊ ဖလမ်းမြို့တွင် လူထုညီလာခံတစ်ရပ် ကျင်းပခဲ့ပြီး မျိုးနွယ်စု အကြီးအကဲဖြစ်သော တိုက်သူကြီးများအုပ်ချုပ်သည့် စနစ်မှ ဒီမိုကရေစီအုပ်ချုပ်ရေး စနစ်သို့ ပြောင်းလဲကျင့်သုံးရန် ဆုံးဖြတ်ခဲ့ကြပါသည်။ ထိုကဲ့သို့ လူထုညီလာခံ ကျင်းပခဲ့သည့် ၁၉၄၈ ခုနှစ်၊ ဖေဖော်ဝါရီလ ၂ဝ ရက်နေ့အား ချင်းအမျိုးသားနေ့ အဖြစ် ရွေးချယ်သတ်မှတ် အတည်ပြုခဲ့သည်မှာ ယခုဆိုလျှင် (၇၂)နှစ်မြောက်ခဲ့ပြီ ဖြစ်ပါသည်။

၁၉၄၇ ခုနှစ်၊ ဖေဖော်ဝါရီလ ၁၂ ရက်နေ့၌ လက်မှတ်ရေးထိုး ချုပ်ဆိုခဲ့သော ပင်လုံစာချုပ်တွင်  ပြည်မနှင့် တောင်တန်းဒေသများ အတူတကွလွတ်လပ်ရေး ရယူရန်အတွက် ချင်းအမျိုးသား ကိုယ်စားလှယ်များ ဖြစ်သည့် ဦးလှူရ်မှုန်၊ ဦးထောင်ဇာခုပ်နှင့် ဦးကီယိုမန်းတို့က ပါဝင်လက်မှတ်ရေးထိုးခဲ့ကာ ချင်းအမျိုးသားများ၏ အမြော်အမြင် ကြီးမားမှုကို ပြသနိုင်ခဲ့ပါသည်။

လွတ်လပ်ရေးရပြီး နောက်ပိုင်းတွင်လည်း ချင်းလူမျိုးတို့သည် ပြည်ထောင်စုမြန်မာနိုင်ငံတော်ကြီးအတွင်း   အခြားသော တိုင်းရင်းသားညီအစ်ကို မောင်နှမများနှင့်အတူ ကောင်းတူ၊ ဆိုးဖက်၊ အေးအတူပူအမျှ၊ ညီညီညွတ်ညွတ် နေထိုင်လာ ခဲ့သည်ကို တွေ့ရှိရပါသည်။

ချင်းတိုင်းရင်းသား  ညီအစ်ကိုမောင်နှမများ အနေဖြင့်  ကျွန်ုပ်တို့၏ ပြည်ထောင်စုကြီးအား  ငြိမ်းချမ်းသာယာဝပြောပြီး  ဖွံ့ဖြိုးတိုးတက်သည့် ပြည်ထောင်စု မြန်မာနိုင်ငံတော်ကြီး ဖြစ်ပေါ်စေရေး ဝိုင်းဝန်းကြိုးပမ်း ဆောင်ရွက်ရန်၊ ပြည်ထောင်စု မြန်မာနိုင်ငံတော်၏ အမျိုးသား အကျိုးစီးပွားဖြစ်သည့် ဒို့တာဝန်အရေး (၃)ပါးကို ဦးထိပ်ပန်ဆင်လျက် ချင်းလူမျိုးတို့၏ ရိုးရာယဉ်ကျေးမှု၊ ဓလေ့ထုံးတမ်း၊ ဘာသာစကား၊ စာပေများကို ထိန်းသိမ်းမြှင့်တင်ပြီး ပြည်ထောင်စုကြီး၏ အလှကို ဖန်တီးပုံဖော် ပေးကြပါရန် တိုက်တွန်းနှိုးဆော်ရင်း သဝဏ်လွှာပေးပို့ အပ်ပါသည်။

ဗိုလ်ချုပ်မှူးကြီးမင်းအောင်လှိုင်

တပ်မတော်ကာကွယ်ရေးဦးစီးချုပ်

Read 101 times Last modified on Thursday, 20 February 2020 09:15