SJ WorldNews - шаблон joomla Авто
×

Warning

JUser: :_load: Unable to load user with ID: 107

၂၀၁၈- ၂ဝ၁၉ ခုနှစ် အမျိုးသား စီမံကိန်း ဥပဒေကြမ်းနှင့် ပြည်ထောင်စု၏ ဘဏ္ဍာငွေ အရအသုံးဆိုင်ရာ ဥပဒေကြမ်းတို့၏ မူနှင့်အခြေခံသဘောများ၊ စီမံကိန်း လုပ်ငန်းများ၊ ရငွေသုံးငွေများနှင့် စပ်လျဉ်း၍ လွှတ်တော်တွင်ဆွေးနွေး

Tuesday, 04 September 2018 11:43 font size decrease font size decrease font size increase font size increase font size

ပြည်ထောင်စုလွှတ်တော်အစည်းအဝေး

နေပြည်တော် စက်တင်ဘာ ၃

ဒုတိယအကြိမ် ပြည်ထောင်စုလွှတ်တော် နဝမပုံမှန် အစည်းအဝေး ၁၆ ရက်မြောက်နေ့ကို ယနေ့နံနက် ၁ဝ နာရီတွင် ပြည်ထောင်စု လွှတ်တော်အစည်းအဝေး ခန်းမ၌ ကျင်းပသည်။ အစည်းအဝေးတွင် နိုင်ငံတော် သမ္မတထံမှ သဘောထား မှတ်ချက်ဖြင့် ပြန်လည်ပေးပို့ လာသော မြေလွတ်၊ မြေလပ်နှင့် မြေရိုင်းများ စီမံခန့်ခွဲရေး ဥပဒေကို ပြင်ဆင်သည့် ဥပဒေကြမ်းနှင့် စပ်လျဉ်း၍ ဥပဒေကြမ်း ပူးပေါင်းကော်မတီ၏ လေ့လာတွေ့ရှိချက်နှင့် သဘောထားမှတ်ချက် အစီရင်ခံစာကို ဖတ်ကြားပြီး ယင်းဥပဒေကြမ်းနှင့် စပ်လျဉ်း၍ ဆွေးနွေးလိုသည့် လွှတ်တော် ကိုယ်စားလှယ်များ ရှိပါက အမည်စာရင်း တင်သွင်းနိုင်ကြောင်း ကြေညာသည်။ ထို့နောက် ပြည်ထောင်စု အစိုးရ အဖွဲ့က ပေးပို့သော ပြည်သူ့ကြွေးမြီ စီမံခန့်ခွဲမှု ဥပဒေကို ပြင်ဆင်သည့် ဥပဒေ(မူကြမ်း)နှင့် စပ်လျဉ်း၍ စီမံကိန်းနှင့် ဘဏ္ဍာရေး ဝန်ကြီးဌာန ဒုတိယဝန်ကြီး ဦးမောင်မောင်ဝင်းက လွှတ်တော်သို့ တင်သွင်းပြီး ဥပဒေကြမ်း ပူးပေါင်းကော်မတီ၏ လေ့လာတွေ့ရှိချက်နှင့် သဘောထားမှတ်ချက် အစီရင်ခံစာကို ဖိတ်ကြားကာ အဆိုပါ ဥပဒေကြမ်းနှင့် စပ်လျဉ်း၍ ဆွေးနွေးလိုသည့် လွှတ်တော် ကိုယ်စားလှယ်များ ရှိပါက အမည်စာရင်း တင်သွင်းနိုင်ကြောင်း ကြေညာသည်။ ယင်းနောက် ၂ဝ၁၈-၂ဝ၁၉ ခုနှစ် အမျိုးသား စီမံကိန်း ဥပဒေကြမ်းနှင့် ပြည်ထောင်စု၏ ဘဏ္ဍာငွေ အရအသုံးဆိုင်ရာ ဥပဒေကြမ်း တို့၏မူနှင့် အခြေခံသဘောများ၊ စီမံကိန်း လုပ်ငန်းများ၊ ရငွေသုံးငွေများနှင့် စပ်လျဉ်း၍ လွှတ်တော်ကိုယ်စားလှယ်များက ဆွေးနွေးကြသည်။ ယင်းကိစ္စနှင့် စပ်လျဉ်း၍ မင်းလှမဲဆန္ဒနယ်မှ ဒေါက်တာသန်းအောင်စိုးက စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီး ဌာနအတွက် ဆွေးနွေးသွားမည်ဖြစ်ကြောင်း၊ နိုင်ငံတစ်နိုင်ငံ ဆိုသည်မှာ အိမ်တစ်အိမ်ကဲ့သို့ပင် ဖြစ်ကြောင်း၊ ဝင်ငွေနည်းပြီး သုံးငွေများနေပါက အကြွေးတင်မည်ဖြစ်ကြောင်း၊ ဝင်ငွေကို မြှင့်တင်ရန် ဆိုပါက မိမိတို့နိုင်ငံသည် စိုက်ပျိုးရေးကို အဓိက အားထားသည် ဆိုသော်လည်း ရာသီဥတု ဆိုးရွားနေသည့်အတွက် စိုက်ပျိုးရေးကို အဓိကထား၍ မရတော့ကြောင်း၊ ထို့ကြောင့် ရာသီဥတုကို အဓိက အားမထားရသည့် မွေးမြူရေးကိုသာ အားထားရမည်ဖြစ်ကြောင်း၊ လူဦးရေများသည့် နိုင်ငံကြီး နှစ်နိုင်ငံကြားတွင် တည်ရှိနေသည့်အတွက် ဈေးကွက်ရှိပြီးသား ဖြစ်ကြောင်း၊ အချိန်တိုအတွင်း ဝင်ငွေများစွာ ရရှိသည့် မွေးမြူရေး လုပ်ငန်းများတွင် ဘတ်ဂျက်သုံးစွဲမှု ပုံစံပြောင်းလဲ သုံးစွဲရန် လိုအပ်ကြောင်း၊ ကမ္ဘာ့ဘဏ်၏ လေ့လာတွေ့ရှိမှုများတွင် ၂ဝဝ၉-၂ဝ၁၇ ခုနှစ်အထိ ဆည်မြောင်းတွင် ၉၃ ရာခိုင်နှုန်း၊ သားငါးနှင့် သမကိစ္စများတွင် ၇ ရာခိုင်နှုန်းသာ သုံးထားသည်ကို တွေ့ရကြောင်း၊ ၂ဝ၁၆-၂ဝ၁၇ ခုနှစ်တွင်လည်း ဆည်မြောင်းအတွက် ၅ဝ ရာခိုင်နှုန်း၊ မွေးမြူရေးနှင့် ကုသရေး ဦးစီးဌာနတွင် ၃ ရာခိုင်နှုန်းနှင့် မွေးမြူရေးဆိုင်ရာ ဆေးတက္ကသိုလ်တွင် သုည ဒသမ ၃ နှင့် သုည ဒသမ ၂ ရာခိုင်နှုန်းသာ သုံးထားသည်ကို တွေ့ရကြောင်း၊ သုတေသနနှင့် ပတ်သက်၍ အာရှနှင့် အခြားနိုင်ငံများတွင် သုည ဒသမ ၃၊ သုည ဒသမ ၄ နှင့် သုည ဒသမ ၆၊ ၁ ဒသမ ၃၊ ၂ ဒသမ ၅၁ အထိ သုံးထားသည်ကို တွေ့ရသော်လည်း မြန်မာနိုင်ငံတွင် သုည ဒသမ ၂ နှင့် သုည ဒသမဝ၄ ရာခိုင်နှုန်းခန့်သာ သုံးထားသည်ကို တွေ့ရကြောင်း၊ သုတေသန ကောင်းမှသာ ဖွံ့ဖြိုးတိုးတက်မည် ဖြစ်သည့်အတွက် တိရစ္ဆာန် ဆေးသုတေသနဌာန တစ်ခုဖွင့်လှစ်ပေးရန် လိုအပ်နေကြောင်း၊ သို့မှသာ ထွက်နှုန်းကောင်းသည့်မျိုးများ၊ မိမိတိုင်းပြည်နှင့် ကိုက်ညီသည့် မျိုးများကို တီထွင် ထုတ်လုပ်နိုင်မည် ဖြစ်ကြောင်း၊ ရောဂါအသစ်အဆန်း များကိုလည်း အချိန်နှင့်တစ်ပြေးညီ ကာကွယ်ကုသနိုင်မည် ဖြစ်ကြောင်း၊ ထို့ကြောင့် နိုင်ငံတော် အစိုးရ အနေဖြင့် မွေးမြူရေး ဖွံ့ဖြိုးတိုးတက်အောင် တွန်းအားပေး လုပ်ဆောင်ရန် လိုအပ်ကြောင်း ဆွေးနွေးသည်။ ပုလဲမဲဆန္ဒနယ်မှ ဒေါ်ခင်စန်းလှိုင်က မြစ်သာစီမံကိန်းသည် တိုးမြှင့်တောင်းခံလာသည့် ၃၄ ဘီလီယံကို ခွင့်ပြုပေးသည့် တိုင်အောင် စီမံကိန်း လုပ်ငန်းကို အပြီးသတ် ဆောင်ရွက်နိုင်ခြင်း မရှိသည်ကို ပြည်ထောင်စုလွှတ်တော် ပြည်သူ့ငွေစာရင်း ပူးပေါင်းကော်မတီ အစည်းအဝေးတွင် ဝန်ကြီးဌာနကိုယ်စား လာရောက်ရှင်းလင်းသည့် စီမံကိန်း ဒါရိုက်တာက တရားဝင်ပြောကြားခဲ့ကြောင်း၊ မြန်မာနိုင်ငံ၏ ဘဏ္ဍာရေး စည်းမျဉ်းစည်းကမ်းအရ လွှတ်တော်၏ ခွင့်ပြုချက်ရရှိပြီး ဘဏ္ဍာငွေ အရအသုံးဆိုင်ရာ ဥပဒေက အတည်ပြု ပြဋ္ဌာန်းပြီးမှသာ သုံးစွဲခွင့်ရှိမည်ဖြစ်ကြောင်း၊ အခုတင်ပြတောင်းခံ လာသည့် ၁၄ ဒသမ ၃၇၁ ဘီလီယံသည် ဘတ်ဂျက်ခွင့်မပြုခင် ကတည်းက ကြိုတင်ဆောင်ရွက်စေခဲ့သည့် အတွက် ပြင်ပပုဂ္ဂလိက ကုမ္ပဏီ၂၁ ခု၏ စိုက်ထုတ်ငွေ အများစု ပါဝင်နေသည်ကို တွေ့ရကြောင်း၊ ဥပဒေကြမ်း ပူးပေါင်းကော်မတီ အစီရင်ခံစာအရ စိစစ်ရေးပူးပေါင်း အဖွဲ့က စုံစမ်းစစ်ဆေးရေး ကော်မတီအဖွဲ့ ဖွဲ့စည်းပြီး ဘဏ္ဍာရေး စည်းမျဉ်းစည်းကမ်းနှင့် ကိုက်ညီမှု မရှိသော်လည်း လုပ်ငန်း လိုအပ်ချက်အရ အချိန်နှင့် တစ်ပြေးညီ ပြီးစီးအောင် ဆောင်ရွက်ခဲ့ရသော လုပ်ငန်းဖြစ်သည့်အတွက် ထိုသို့မဖြစ်မနေ ကြိုတင်ဆောင်ရွက်ရန် လိုအပ်သည့် အကြောင်းရင်းများကို စစ်ဆေးဆောင်ရွက်သွားရန် ဟူသည့် သဘောထား မှတ်ချက်ကို တွေ့ရကြောင်း၊ ဘတ်ဂျက်စိစစ်ရေးနှင့် စပ်လျဉ်း၍ ပြည်ထောင်စုလွှတ်တော် ပြည်သူ့ငွေစာရင်း ပူးပေါင်းကော်မတီက ဘတ်ဂျက်စိစစ်သည့် နေရာတွင် လုပ်ငန်းစီမံကိန်းများ ကြိုတင်ဆောင်ရွက်ထားပြီး နောက်ကြောင်း ပြန်တောင်းခံမှုကို လုံးဝခွင့်မပြုရန် စိစစ်ရေးပူး ပေါင်းအဖွဲ့ ၂၀ ကို တရားဝင်ပန်ကြားလွှာ ထုတ်ပြန်ကာ အတိအလင်း ညွှန်ကြားထားပြီး ဖြစ်ကြောင်းနှင့် ဘဏ္ဍာရေး စည်းမျဉ်းစည်းကမ်းနှင့် ကိုက်ညီမှု မရှိသည့် နောက်ကြောင်းပြန် ဘတ်ဂျက်ငွေ တောင်းခံမှုကို ခွင့်မပြုသင့်ကြောင်း ဆွေးနွေးသည်။ ဧရာဝတီတိုင်း ဒေသကြီး မဲဆန္ဒနယ်မှ ဒေါက်တာပြည့်ဖြိုးက ဆောက်လုပ်ရေး ဝန်ကြီးဌာန၏ ထောက်ကြန့်ခုံးကျော် တံတားစီမံကိန်းအတွက် ငွေကျပ်သန်း ၁ဝဝဝ တင်ပြတောင်းခံမှုတွင် ချေးငွေ သို့မဟုတ် ပြင်ပအကူအညီ ဆိုသည်ကို ကွာခြားမှုမရှိကြောင်း၊ ဖြန့်ဝေထားသည့် ဘဏ္ဍာစာအုပ်ထဲတွင် နှစ်လမ်းသွားအရှည် ၃၇၈ မီတာနှင့် စီမံကိန်း လျာထားတန်ဖိုး ၆ ဘီလီယံဟု ဖော်ပြထားကြောင်း၊ သို့သော်လည်း အသေးစိတ် တင်ပြမှုတွင် လေးလမ်းသွား၊ အရှည် ၃၂၈ မီတာ စီမံကိန်း လျာထားတန်ဖိုးမှာ ၇ ဒသမ ၅ ဘီလီယံ ဖြစ်နေပြီး ကွဲလွဲမှုများကို တွေ့ရှိရကြောင်း၊ ထောက်ကြန့်လမ်းဆုံသည် လမ်းပိတ်ပြီး သွားလာရ ခက်ခဲနေကြောင်း၊ ခုံးကျော်တံတား တည်ဆောက်ပြီး ဖြေရှင်းရလောက်သည်အထိ အဓိကကျသည့် အကြောင်း အရာများကို သေချာမသုံးသပ်ဘဲ ငွေကြေးအမြောက်အမြား သုံးစွဲရမည့် ကိစ္စမဟုတ်ကြောင်း၊ မော်တော်ယာဉ်များ လွယ်ကူစွာ သွားလာနိုင်ရန် လူကူးခုံးကျော် တံတားများကို တည်ဆောက်ပေးခြင်း၊ လမ်းပေါ်၌ ရောင်းချနေသော ဈေးဆိုင်များကို စည်းကမ်းရှိအောင် ထိန်းကျောင်းခြင်း၊ ခြံစည်းရိုး ကာခြင်းစသည့် လွယ်ကူသော နည်းလမ်းများနှင့် မဖြေရှင်းဘဲ ခုံးကျော်တံတား ဆောက်လုပ်မည် ဆိုပါက နိုင်ငံတော် ဘဏ္ဍာငွေကို ဦးစားပေးလိုက် မသုံးစွဲဘဲ ဖြုန်းတီးသကဲ့သို့ ဖြစ်နေကြောင်း၊ ထို့ပြင် ထောက်ကြန့်လမ်းဆုံသည် မဟာဗျူဟာ ကျသည့် လမ်းကြောင်းထဲ၌ ပါဝင်နေသောကြောင့် အနာဂတ်ကာလတွင် မိုးပျံတံတားအတွက် ထည့်သွင်း စဉ်းစားထားသင့်ကြောင်း၊ ယခုခုံးကျော်တံတားကို တည်ဆောက်ထားမည် ဆိုလျှင် အနာဂတ် စီမံကိန်းအတွက် ထိခိုက်မည်ဖြစ်ကြောင်း၊ ထို့ကြောင့် ထောက်ကြန့်ခုံးကျော်တံတား တည်ဆောက်မှုကို ကန့်ကွက်ကြောင်း ဆွေးနွေးသည်။

Read 313 times Last modified on Tuesday, 04 September 2018 11:43