SJ WorldNews - шаблон joomla Авто

ကျောက်ပန်းတောင်း အောက်တိုဘာ ၆

ကျေးလက်နေပြည်သူများ စာပေဖတ်ရှုလေ့လာမှု အလေ့အထကောင်းများရရှိစေရန်နှင့် စာပေမှရရှိသည့် အသိပညာများဖြင့် ဘဝရပ်တည်မှု မှန်ကန်စေရန်  ရည်ရွယ်ဖွင့်လှစ်သည့် ယဉ်ကျေးမြန်မာစာကြည့်တိုက်ဖွင့်ပွဲကို ယနေ့နံနက် ၉ နာရီ ၁၅ မိနစ်တွင်  မန္တလေးတိုင်းဒေသကြီး  ကျောက်ပန်းတောင်းမြို့နယ်   ဆည်ပေါက်ကျေးရွာအုပ်စု အင်ချောင်း ကျေးရွာရှိ အဆိုပါစာကြည့်တိုက်ရှေ့၌ ကျင်းပသည်။

ရှေးဦးစွာ စာကြည့်တိုက်ကို  အမျိုးသားလွှတ်တော်ကိုယ်စားလှယ် ဦးကျော်တုတ်၊ မြို့ နယ်အုပ်ချုပ် ရေးမှူး ဦးဝင်းကိုကို၊ မြန်မာနိုင်ငံစာရေးဆရာများအသင်းဥက္ကဋ္ဌ   မနုဿကျော်ဝင်း၊ စာကြည့်တိုက်အလှူရှင်ကိုယ်စားဆရာကြီး ဦးယုရှိန်တို့က ဖဲကြိုးဖြတ်ဖွင့်လှစ် ပေးပြီး စာကြည့်တိုက်အတွင်း   လှည့်လည်ကြည့်ရှုလေ့လာကြသည်။

ဆက်လက်၍   အမျိုးသားလွှတ်တော်ကိုယ်စားလှယ် ဦးကျော်တုတ်က   စာပေ၏အရေးပါပုံနှင့်   စာပေဖတ်ရှုလေ့လာခြင်းဖြင့် မိမိတို့ဘဝတွင် အသိပညာဗဟုသုတများပြည့်စုံကြွယ်ဝပြီး လူမှုစီးပွားဘဝများဖွံ့ဖြိုးတိုးတက်စေရန် အထောက် အကူကောင်းများရရှိမည်ဖြစ်ကြောင်း ဆွေးနွေးပြောကြားသည်။

ယင်းနောက် စာကြည့်တိုက်အလှူရှင် ဦးကျော်သူ(ယဉ်ကျေးမြန်မာ)က စာကြည့်တိုက်ဆောက် လုပ်လှူဒါန်းရခြင်းနှင့်ပတ်သက် ၍ ရှင်းလင်းပြောကြားပြီး  စာကြည့်တိုက်အတွက်  ဆက်လက် ထောက်ပံ့ပေးသွားမည့် အစီအစဉ်များနှင့် ကျေးရွာနေပြည်သူများအနေဖြင့် စာပေဖတ်ရှုလေ့လာခြင်းဖြင့်ရရှိလာသည့် အသိပညာဗဟုသုတများဖြင့် မိမိရပ်ရွာဒေသ ကောင်းကျိုးများကို တိုးတက်ထမ်းဆောင်နိုင်ကြသည့်သူများ ဖြစ်ပါစေကြောင်း ဆုတောင်းစကား ပြောကြားပြီး အခမ်းအနားကို ရုပ်သိမ်းလိုက်သည်။

အဆိုပါ ယဉ်ကျေးမြန်မာစာကြည့်တိုက်အဆောက်အအုံမှာ အလျားပေ၂ဝ၊ အနံ ၁၂ပေရှိ သွပ်မိုး၊ အုတ်ကာတစ်ထပ်အဆောက်အအုံဖြစ်ပြီး  စာကြည့်တိုက်တွင် သုတ/ရသစာအုပ်ပေါင်း ၁၅ဝဝ နှင့် ကလေးစာပေနှင့်ရုပ်ပြအုပ်ရေ ၅ဝဝ ကျော်ရှိပြီး   အင်ချောင်းကျေးရွာဒေသခံတစ်ဦးဖြစ်သည့်  ရန်ကုန်မြို့နေ ဦးကျော်သူ(ယဉ်ကျေးမြန်မာ)

မိသားစုက လှူဒါန်းခြင်းဖြစ်ကြောင်း  သိရသည်။

ကိုနေ(ကျောက်ပန်းတောင်း)

Page 1199 of 1397