နေပြည်တော်၊ ဇွန် ၁၈
တိုင်းဒေသကြီး၊ ပြည်နယ်များရှိ မြို့နယ်အချို့တွင် အုပ်ချုပ်ရေးပိုင်းဆိုင်ရာ တာဝန်ရှိသူများ၊ နိုင်ငံ့ဝန်ထမ်းများနှင့် အေးချမ်းစွာ နေထိုင်နေကြသော ပြည်သူလူထုအချို့အား အုပ်ချုပ်မှုယန္တရား ပျက်ပြားစေရန်၊ လူထုအတွင်း အကြောက်တရားများလွှမ်းမိုးလာစေရန်နှင့် ငါနှင့်မတူ ငါ့ရန်သူဟူသည့် တစ်ဖက်သက် အစွန်းရောက်ဂိုဏ်းဂဏစွဲအပေါ် အခြေခံကာ လက်နက်ကိုင်အကြမ်းဖက်သူများက သေနတ်များ၊ တုတ်/ ဓားများ၊ လက်လုပ်ဗုံး၊ လက်ပစ်ဗုံးများအသုံးပြုကာ အကြောင်းမဲ့ ရက်စက်စွာ လုပ်ကြံသတ်ဖြတ်ခဲ့ကြောင်း သိရသည်။
ထိုသို့ဆောင်ရွက်ခဲ့ရာတွင် ဇွန်လ ၁၇ ရက်နေ့ ၆ နာရီခွဲအချိန်တွင် စစ်ကိုင်းတိုင်း ဒေသကြီး၊ ကန့်ဘလူမြို့နယ်၊ အမှတ်(၃)ရပ်ကွက်နေ ဦးခင်မောင်ဦး(၄၅)နှစ် (ဘ)ဦးသောင်းငွေသည် အဆိုပါရပ်ကွက်ရှိ ကံလျှိုတံတားအနီးနေ ဖခင်ဖြစ်သူ၏ နေအိမ်ရှေ့၌ တစ်ဦးတည်းထိုင်နေစဉ် ဆိုင်ကယ်စီးနင်းလာသည့် အကြမ်းဖက်သူ အမျိုးသား ၂ ဦးက လက်လုပ်သေနတ်ဖြင့် ပစ်ခတ်ထွက်ပြေးသွားခဲ့သဖြင့် ဦးခင်မောင်ဦးတွင် ဝဲပါး၊ ပုခုံး ထိမှန်ဒဏ်ရာများရရှိခဲ့ကြောင်း သတင်းအရ လုံခြုံရေးတပ်ဖွဲ့ဝင်များပါဝင်သော ပူးပေါင်းအဖွဲ့က သွားရောက်ခဲ့ရာ ၎င်းအား သေနတ်ဖြင့် ပစ်ခတ်သွားသူများမှာ တစ်ရပ်ကွက်တည်းနေ ဇေယျာထွန်း(၃၇)နှစ် (ဘ)ဦးလှရွှင်နှင့် အမျိုးသား ၁ ဦး(စိစစ်ဆဲ)ဖြစ်ကြောင်း အခင်းဖြစ်နေရာအနီးရှိနေသည့် ဦးခင်မောင်ဦး၏ညီဖြစ်သူ ဦးခင်မောင်ဝင်း၏ ပြောပြချက်အရ သိရှိရပြီး ဒဏ်ရာရရှိသူအား ဆေးဝါးကုသနိုင်ရေး ကန့်ဘလူမြို့နယ်၊ ပြည်သူ့ဆေးရုံသို့ ပို့ဆောင်ထားကြောင်း သိရသည်၊
အလားတူ ဇွန်လ ၁၈ ရက်နေ့ နံနက် ၈ နာရီ ၅၅ မိနစ်အချိန်တွင် မန္တလေးတိုင်းဒေသကြီး၊ ချမ်းမြသာစည်မြို့နယ်၊ ချမ်း/တောင်ရပ်ကွက်၊ စစ်ကိုင်းလမ်း၊ ဖူဂျီစတိုးဆိုင်အနီး၌ ချမ်း/တောင်ရပ်ကွက် ရပ်ကွက်အုပ်ချုပ်ရေးမှူး ဦးကျော်စိန် သေနတ်ဖြင့် ပစ်ခတ်ခံရကြောင်း သတင်းအရ လုံခြုံရေးတပ်ဖွဲ့ဝင် များပါဝင်သော ပူးပေါင်းအဖွဲ့က သွားရောက်စစ်ဆေးရာ ၎င်းသည် တစ်ရပ်ကွက်တည်းနေ ကိုဟိန်းဇော်ဦး (၃၀)နှစ် (ဘ)ဦးမောင်တိုး မောင်းနှင်သည့် ဆိုင်ကယ်ဖြင့် နေအိမ်မှ ရပ်ကွက်အုပ်ချုပ်ရေးမှူးရုံးသို့ ထွက်ခွာလာစဉ် အခင်းဖြစ်နေရာအရောက်၌ နောက်မှ ဆိုင်ကယ်မောင်းနှင်လာသည့် အကြမ်းဖက်သူ အမျိုးသား ၂ ဦးက ပစ္စတိုသေနတ်ဖြင့် ပစ်ခတ်ထွက်ပြေးသွားသဖြင့် ဦးကျော်စိန်တွင် ဝဲလက်ပြင်အောက် ကျည်ဖောက်ဝင်/ထွက် ဒဏ်ရာရရှိခဲ့၍ ဆေးဝါးကုသနိုင်ရေး တပ်မတော်ဆေးရုံသို့ ပို့ဆောင်ထားပြီး အဆိုပါနေရာမှ ၉ မမကျည်ခွံ ၁ ခု၊ ကျည်ထိပ်ဖူး ၁၊ ၉ မမကျည် ၂ တောင့်တို့အား သိမ်းဆည်းရမိခဲ့ကြောင်း သိရသည်။
အလားတူ နံနက် ၁၁ နာရီ ၃၅ မိနစ်အချိန်တွင် မန္တလေးတိုင်းဒေသကြီး၊ မြင်းခြံမြို့နယ်၊ အမှတ်(၉၅)ယာဉ်ထိန်းရဲတပ်ဖွဲ့စုမှ ရဲတပ်ကြပ်ကြီး မြတ်ကိုကိုအောင်သည် ယာဉ်လမ်းကြောင်းရှင်းလင်း ရေးတာဝန်ဆောင်ရွက်ရန် တာဝန်ကျရာနေရာသို့ ဗိုလ်ချုပ်လမ်းမအတိုင်း ဆိုင်ကယ်ဖြင့် ထွက်ခွာ လာစဉ် အမှတ်(၁၉)ရပ်ကွက်၊ ရတနာမိုးလမ်း၊ ဒဏ္ဍာရီလက်ဖက်ရည်ဆိုင်အနီးအရောက်၌ အနောက်မှ ဆိုင်ကယ်မောင်းနှင်လာသည့် အကြမ်းဖက်သူ အမျိုးသား ၂ ဦးမှ သေနတ်ဖြင့် ပစ်ခတ်ခဲ့သဖြင့် ၎င်းတွင် လည်ပင်းကျည်ဖောက်ဝင်ဒဏ်ရာ ၁ ချက်ရရှိကာ အခင်းဖြစ်နေရာ၌ သေဆုံးသွားခဲ့ကြောင်း သိရသည်။
အထက်ပါဖြစ်စဉ်များတွင် အုပ်ချုပ်ရေးပိုင်းဆိုင်ရာ တာဝန်ရှိသူများ၊ နိုင်ငံ့ဝန်ထမ်းများနှင့် အေးချမ်းစွာ နေထိုင်နေကြသော ပြည်သူများအား ငါနှင့်မတူ ငါ့ရန်သူဟူသည့် တစ်ဖက်သက် အစွန်း ရောက်ဂိုဏ်းဂဏစွဲအပေါ်အခြေခံကာ အကြောင်းမဲ့ရက်စက်ယုတ်မာစွာ လုပ်ကြံသတ်ဖြတ်မှု ကျူးလွန် ခဲ့သည့် အကြမ်းဖက်သူများအား ဖော်ထုတ်ဖမ်းဆီး၍ ဥပဒေနှင့်အညီ ထိရောက်စွာ အပြစ်ပေးအရေးယူ နိုင်ရေး လုံခြုံရေးတပ်ဖွဲ့ဝင်များက စုံစမ်းဖော်ထုတ်လျက်ရှိကြောင်း သတင်းရရှိသည်။