နေပြည်တော်၊ ဇွန် ၂၁
တိုင်းဒေသကြီး၊ ပြည်နယ်များရှိ မြို့နယ်အချို့၌ လူမှုကူညီရေးယာဉ်နှင့် ယာဉ်မောင်းများ၊ အေးချမ်းစွာ နေထိုင်သော ပြည်သူများအား အကြမ်းဖက်သူများက တူမီးသေနတ်၊ ဓားများဖြင့် ချောင်းမြောင်း ပစ်ခတ်၊ ထိုးခုတ်တိုက်ခိုက်ခြင်းများ ပြုလုပ်ခဲ့ကြောင်း သိရသည်။
ထိုသို့ဆောင်ရွက်ခဲ့ရာတွင် ဇွန်လ ၁၉ ရက်နေ့ ညနေ ၅ နာရီ ၄၅ မိနစ်အချိန်တွင် စစ်ကိုင်းတိုင်းဒေသကြီး၊ မြောင်မြို့နယ်၊ သနပ်ကုန်း-ငါးပယ်ကျေးရွာချင်းဆက်လမ်း၌ “ရေစကြိုမြို့နယ်၊ သာဂေါင်းကျေးရွာ၊ စံပြလူမှုကူညီရေးအသင်း” စာတမ်းပါ ယာဉ် ၁ စီးနှင့် အဆိုပါ ယာဉ်အနီးတွင် အမျိုးသားအချို့ ဒဏ်ရာများဖြင့် သေဆုံးနေသည်ကို တွေ့ရှိရကြောင်း သတင်းအရ လုံခြုံရေးတပ်ဖွဲ့ဝင် များက သွားရောက်စစ်ဆေးခဲ့သည်။
ထိုသို့ သွားရောက်စစ်ဆေးခဲ့ရာ သနပ်ကုန်း-ငါးပယ်ကျေးရွာ ချင်းဆက်လမ်းပေါ် သနပ်ကုန်းကျေးရွာနှင့် ၁ ဖာလုံခန့်အကွာရှိ သနပ်ကုန်းတံတားအနီး၌ စံပြလူမှုကူညီရေးအသင်းယာဉ်နှင့် ယာဉ်မောင်းထိုင်ခုံတွင် ရေစကြိုမြို့နယ်၊ သာဂေါင်းကျေးရွာနေ လှိုင်လင်းထက် (၃၈)နှစ်၊ (ဘ)ဦးမိုးဆန်းသည် မျက်လုံးထွက်၊ ဝမ်းဗိုက်ကျည်ထိမှန်ဒဏ်ရာ၊ နောက်ကျော ထိုးသွင်း ဒဏ်ရာတို့ဖြင့်လည်းကောင်း၊ ယာဉ်၏အနီး မြေသားလမ်းပေါ်တွင် တစ်ရွာတည်းနေ မျိုးသန့်ထွန်း(၂၃)နှစ် (ဘ)ဦးမြင့်ဝင်းနှင့် ငြိမ်းချမ်းအောင်(၁၈)နှစ် (ဘ)ဦးသန်းဇော်မင်းတို့ ၂ ဦးမှာ ဦးခေါင်းပေါက်ပြဲ၊ ယာနားထင်၊ ဝမ်းဗိုက်နှင့် ယာလက်မောင်းတို့တွင် သေနတ်ထိမှန်ဒဏ်ရာများ အသီးသီးရရှိ၍ သေဆုံးနေသည်ကို တွေ့ရှိရပြီး အခင်းဖြစ်နေရာအနီးမှ ကျည်ခွံ ၁ ခု၊ အခင်းဖြစ်နေရာ အနီးရှိ လမ်းပေါ်တွင် ကားဘီးပေါက်စေရန် ပြုလုပ်ထားသည့် ကြက်ခြေခတ်ပုံသဏ္ဍာန် ၂ လက်မသံဆူးချောင်း ၉ ချောင်းတို့အား တွေ့ရှိသိမ်းဆည်းရမိခဲ့ပြီး ရုပ်အလောင်းများအား ကျောက်ရစ် တိုက်နယ်ဆေးရုံသို့ ပို့ဆောင် ထားရှိခဲ့ကြောင်း သိရသည်။
အထက်ပါဖြစ်စဉ်တွင် အေးချမ်းစွာနေထိုင်သော ပြည်သူများအား အကြမ်းဖက်သူများက ငါနှင့်မတူ ငါ့ရန်သူဟူသည့် တစ်ဖက်သက် အစွန်းရောက်ဂိုဏ်းဂဏစွဲအပေါ်အခြေခံကာ အကြောင်းမဲ့ ရက်စက်ယုတ်မာစွာ လုပ်ကြံခဲ့မှုများ ကျူးလွန်သူများကို ဖော်ထုတ်ဖမ်းဆီး၍ ဥပဒေနှင့်အညီ ထိရောက်စွာ အပြစ်ပေးအရေးယူနိုင်ရေး လုံခြုံရေးတပ်ဖွဲ့ဝင်များက စုံစမ်းဖော်ထုတ်လျက်ရှိကြောင်း သတင်း ရရှိသည်။