ဘရာဇီးနိုင်ငံ၌ လှေများပေါ်သို့ ကျောက်သားထုများ ပြိုကျခြင်းကြောင့် လူခြောက်ဦးထက်မနည်း သေဆုံး
ဘရာဇီးနိုင်ငံ အရှေ့တောင်ပိုင်း မီနက်ဂါရစ်ပြည်နယ်ရှိ ရေကန်တစ်ခု၌ အပျော်စီး ခရီးသွား လှေလေးစင်းပေါ်သို့ ချောက်နက်ကြီးမှ ကြီးမားသည့် ကျောက်သားထု အများအပြား ပြိုကျမှုဖြစ်ပွားခြင်းကြောင့် လူခြောက်ဦးထက်မနည်း သေဆုံးပြီး လူ ၃၂ ဦးထက်မနည်း ဒဏ်ရာရရှိကြောင်း တာဝန်ရှိသူများက ဇန်နဝါရီ ၈ ရက်တွင် ပြောသည်။
တာဝန်ရှိသူများသည် အဆိုပါ မတော်တဆမှုအတွင်း လူ ၂ဝ ဦးထက် မနည်း ပျောက်ဆုံးလျက်ရှိသည်ဟု ယူဆထားပြီး ၎င်းတို့ကို ရှာဖွေမှုများ လုပ်ဆောင်လျက်ရှိကြောင်း သိရသည်။
အဆိုပါမတော်တဆမှုသည် ဇန်နဝါရီ ၈ ရက် မွန်းလွဲပိုင်းတွင် မီနက်ဂါရစ်ပြည်နယ် ကယ်ပီတိုလီယိုစီးတီးအနီး ဖာနက်ရေကန်၌ ဖြစ်ပွားခြင်းဖြစ်ပြီး အနီးပတ်ဝန်းကျင်ရှိ ချောက်နက်ကြီးမှ ကြီးမားသည့်ကျောက်သားများ ပြိုကျလာခြင်းဖြစ်သည်။ အဆိုပါကျောက်သားထုများသည် ခရီးသွားများကို လှည့်လည်ပြသနေသည့် လှေလေးစင်းပေါ်သို့ ပြုတ်ကျလာခြင်း ဖြစ်ကြောင်း သိရသည်။
ယင်းဒေသတွင် ဇန်နဝါရီ ၈ ရက်နံနက်ပိုင်းက စံချိန်တင် မိုးသည်းထန်စွာ ရွာသွန်းမှု ဖြစ်ပွားခြင်းကြောင့် ကျောက်သားများ ပြိုကျခဲ့ဖွယ်ရှိကြောင်း တာဝန်ရှိသူများက ယူဆထားကြောင်း သိရသည်။